Ostroh BibleПерша книга Самуїлова (Перша книга царів), розділ 15
Шрифт:
Запис:
1
И рече само́илъ къ саѹ҆́лꙋ. посла̀ м̂ѧ г҃ь пома́зати т̂ѧ на црс̑҇тво, в лю́дехъ е҆го въ і҆и҆л҃ю. и҆ нн҃ѣ послꙋш́аи гла́са слове́съ гн҃ихъ·
2
Си́це рече г҃ь саваѻ́ѳъ. нн҃ѣ ѿмщꙋ̀, ꙗ҆́же сътворѝ ам̑мали́къ і҆и҆л҃ю, и҆же срѣте и҆̀ на пꙋтѝ, въсходѧ́щимъ и҆мъ ѿ е҆гѷпта·
3
И҆ нн҃ѣ т̂ы и҆дѝ, и҆ побѣдѝ ам̑мали́ка, и҆ а҆ри́ма. и҆ вс̂ѧ ꙗ҆́же сꙋть е҆го. и҆ не живи ѿ ни́хъ ничтоже, і҆ и҆скорени́ши и҆хъ. и проклене́ши и҆̀. всѣ́хъ сꙋщ́ихъ е҆го, не ѿпꙋсти́ши и҆х꙽. и҆ да и҆̀ ѹ҆бїеши ѿ мꙋж́еска по́лꙋ, и҆ до же́ньска. ѿ ю́ношъ, и҆ до с꙽сꙋщих̑ мле́ко. и҆ ѿ говѧ́дъ до ѻ҆ве́цъ. и҆ ѿ вельблю́дъ, до ѻ҆слѧ́тъ·
4
И҆ събра̀ лю́ди саѹ҆́лъ и҆ съчте ѧ҆̀. в галга́лх̑ѣ число́мъ же б̂ѣ и҆хъ, ҂с҃, пѣш́ихъ. и҆ ҂і҃. ѿ сн҃овъ і҆ѹ҆́диныхъ·
5
И҆ прїиде саѹ́лъ до гра́да ам̑маликова, и҆ ѹ҆таи҆сѧ въ пото́цѣхъ·
6
И҆ рече саѹ҆́лъ къ кинѣѻ҆ви, и҆дѝ и҆ пробѣ́гни среди ам̑мали́ковъ, и҆ к ни́мъ не приближа́исѧ да не погꙋблю т̂ѧ съ ни́ми, ты б̂о б̂ѣ сътвори́лъ млс̑҇ть съ сн҃ы і҆и҆л҃евыми, е҆гда̀ и҆схожа́хꙋ и҆зъ е҆гѷпта·
7
И҆ ѹ҆клони́сѧ кинѣи ѿ срѣды ам̑мали́ковъ, и҆ побѝ саѹ҆́лъ ам̑мали́ка, ѿ е҆фъи҆ла́ѳа, да́же и҆ до сꙋ́ра пред̑ лицемъ е҆гѷптѧ́нъ·
8
И҆ ѧ́тъ а҆га́га цр҃ѧ ам̑мали́кова жи́ва, и҆ вс̂ѧ лю́ди а҆ми́нѧ, и҆збѝ ѻ҆рꙋ́жїемъ и҆ е҆ри́ма ѹ҆бѝ мече́мъ, и҆ взѧ̀ саѹ҆́лъ и҆ вс̂и лю́дїе, а҆га́га цр҃ѧ жи́ва, и҆ бл҃гаѧ ста́да и҆ па́ствины, и҆ бꙋ́иволица, и҆ ѻ҆де́жа и҆ виногра́ды, и҆ вс̂е бл҃гое, и҆ не хотѧ́хꙋ всего̀ того̀ и҆скорени́ти, толи́ко хꙋж́дьшее, и҆ ѹ҆ничиже́ное разъвръго́ша·
9
И҆ бы́сть гл҃ъ гн҃ь къ само́илꙋ гл҃ѧ раскаѧ҆хсѧ, ꙗ҆́ко пома́захъ саѹ҆́ла на црс̑҇тво, поне́же ѿврати́сѧ ѿ менѐ, и҆ слове́съ мои҆хъ не съблюдѐ, и҆ съжали́сѧ само́илъ и҆ възопѝ къ г҃ꙋ вс̂ю но́щъ·
10
И҆ ѹ҆ра́ни само́илъ, и҆дѧ́ше на срѣтенїе і҆и҆л҃ьтомъ заѹ҆́тра, и҆ възвѣсти́ша само́илꙋ, гл҃юще, приближа́етсѧ саѹ҆́лъ въ карми́л꙽, и҆ с̂е ѹ҆же ѻ҆слабѣ е҆мꙋ рꙋка̀, и҆ възврати́сѧ съ ѻ҆рꙋж́їемъ въ галга́лы·
11
И҆ прїиде само́илъ къ саѹ҆́лꙋ, и҆ с̂е то́и самъ възносѧ́и вс̂есъж꙽же́нїе г҃ꙋ, пр́ьвые коры́сти и҆же взѧ̀ на ам̑мали́цѣхъ·
12
И҆ прїиде само́илъ къ саѹ҆́лꙋ и҆ рече е҆мꙋ саѹ҆́лъ, блс̑҇ве́нъ т̂ы г҃ꙋ, сътвори́хъ б̂о вс̂е е҆ли́ко м̂и гл҃а г҃ь·
13
И҆ рече само́илъ чт̂о е҆сть гла́съ ста́дъ сихъ въ ѹ҆́шїю мое҆ю, и҆ гла́съ говѧд̑ е҆же а҆зъ слы́шꙋ·
14
И҆ рече саѹ҆л̑҇ ѿ а҆м꙽мали́ка ѧ҆̀ пригна́хомъ, ꙗ҆́же събра́ша лю́дїе силнѣ́ишаѧ па́ствины, и҆ воло́въ, ꙗ҆́ко пожре́ти ѧ҆̀ г҃ꙋ б҃ꙋ свое҆мꙋ, а҆ про́чаѧ и҆зби́хъ·
15
И҆ рече само́илъ къ саѹ҆́лꙋ, пождѝ възвѣщꙋ т̂и ꙗ҆́же гл҃а г҃ь къ мнѣ̀ в сі́ю но́щь·
16
И҆ рече е҆мꙋ саѹ҆́лъ гл҃и, и҆ реч̑҇ само́илъ къ саѹ҆́лꙋ, е҆да̀ не ма́лъ быс̑҇ ты пред̑ нимъ, и҆ не властели́на ли тѧ поста́ви хорꙋгвѝ, колѣ́на і҆и҆л҃ева, и҆ пома́за т̂ѧ г҃ь на црс̑҇тво і҆и҆л҃ево·
17
И҆ посла̀ т̂ѧ г҃ь пꙋте́мъ, и҆ рече т̂и и҆дѝ и҆скоренѝ а҆м꙽мали́ка, и҆ не поми́лꙋ́и съгрѣш꙽шихъ предо мно́ю, и҆ побѣди́сѧ с ни́ми до сконча́нїѧ и҆хъ·
18
И҆ почто̀ не послꙋ́ша гла́са гн҃ѧ, по всемꙋ̀ е҆ли́ко гл҃ат̂и, н̂о ѹ҆стреми́сѧ на коры́сть пожре́ти ю҆̀, и҆ сътворѝ лꙋка́вое пред̑ гм҃ъ·
19
И҆ рече саѹ҆́лъ къ само́и҆лꙋ, послꙋш́ахъ гла́са гн҃ѧ, і҆ и҆до́хъ пꙋте́мъ и҆м꙽же посла̀ м̂ѧ г҃ь, и҆ приведо́хъ а҆га́га цр҃ѧ а҆м꙽мали́кова, и҆ а҆м꙽мали́ки и҆скоренихъ·
20
И҆ взѧ́ша лю́ды коры́сти стад̑ныѧ, и҆ бꙋ́иволы, и҆ пред̑нѧа коры́сти на пожрѣ́нїе г҃а б҃а на́шего в галга́лѣхъ·
21
И҆ реч̑҇ само́илъ къ саѹ҆́лꙋ е҆да̀ л̂и бы́ша и҆ ѹ҆го́дны г҃ꙋ вс̂есъж꙽же́нїѧ и҆ жр́ьтвы, н̂о лꙋ́чши е҆сть послꙋшати гла́са гн҃ѧ, и҆ ѹ́не е҆сть жр́ьтвы бл҃ги послꙋша́нїе, и҆ паче тꙋ́ка ѻ҆́внѧ·
22
Ꙗ҆́ко ѹ҆бо грѣ́хъ е҆сть чарова́нїе, та́ко грѣ́хъ е҆сть противле́нїе, ꙗ҆́ко грѣ́хъ есть и҆́долопоклоне́нїе, та́ко грѣ́хъ е҆сть престꙋпа́ти за́повѣди гн҃ѧ, ꙗ҆́ко ѹ҆ничижи́лъ е҆си гл҃ы гн҃ѧ, и҆ ѹ҆ничижи́т꙽ т̂ѧ г҃ь, не бы́ти тебѣ̀ цр҃ю въ і҆и҆л҃и·
23
И҆ рече саѹ́лъ къ само́и҆лꙋ съгрѣшихъ ꙗ҆́ко престꙋпи́хъ слово гн҃е, и҆ гл҃ъ твои, ѹ҆боѧ҆́хъ бо сѧ людїи, и҆ послꙋшахъ гласа и҆хъ·
24
И҆ нн҃ѣ вѣдѣ ѻ҆ грѣсѣ мое҆мъ, и҆ въз꙽вратисѧ съ мно́ю да поклоню́сѧ г҃ꙋ б҃ꙋ·
25
И҆ рече само́илъ къ саѹ҆́лꙋ, не възвращꙋ́сѧ с тобо́ю. ꙗ҆ко ѹ҆ничижи́лъ е҆си гл҃ъ гн҃ь. и҆ ѹ҆ничижи́тъ т̂ѧ г҃ь не бы́ти тебѣ̀ цр҃ю въ і҆и҆л҃и·
26
И҆ ѿвратѝ лицѐ своѐ само́илъ, ѿи҆тѝ хотѧ̀ ѿ него̀. и҆ ѧ́тъ саѹ҆́лъ за въскры́лїе риз̑ е҆го, и҆ раздра̀ и҆хъ, и҆ рече е҆мꙋ само́илъ, ѿѧ г҃ь црс̑҇тво і҆и҆л҃ево ѿ рꙋ́кꙋ твое҆ю дне́сь, и҆ да́сть е҆̀ бли́жнемꙋ твое҆мꙋ. и҆ бл҃жа́ишꙋ тебѐ·
27
И҆ победи́тель въ люде́хъ і҆и҆л҃евыхъ не ѿстꙋп́итъ, и҆ не ѻ҆брати́тсѧ ниже покает̑сѧ ст҃ыи і҆и҆л҃евъ, ꙗ҆́ко не чл҃къ ес̑҇ пока́ѧтисѧ. то́и б̂о запрети́тъ и҆ не пребꙋ́дет꙽·
28
И҆ рече саѹ҆́лъ съгрѣши́хъ г҃и. н̂о просла́ви м̂ѧ пред̑ ста́рцы і҆и҆л҃евы, и҆ пред̑ людмѝ мои́ми, и҆ възврати́сѧ съ мно́ю, и҆ поклоню́сѧ г҃ꙋ б҃ꙋ твое҆мꙋ·
29
И҆ възврати́сѧ само́илъ въ слѣ́дъ саѹ҆́ла, и҆ поклони́сѧ г҃ꙋ·
30
И҆ реч̑҇ само́ил̑҇ приведѣте м̂и сѣ́мо а҆га́га цр҃ѧ а҆м꙽мали́кова. и҆ прїиде к немꙋ̀ а҆га́гъ трепе́ща. и҆ рече а҆га́гъ ѽ го́рко смр҃ть·
31
И҆ реч̑҇ само́илъ къ а҆га́гꙋ, ꙗ҆́коже бещад̑ствова жены̀ ѻ҆рꙋ́жїе твоѐ. та́ко бещади́тсѧ в жена́хъ ма́ти твоѧ̀·
32
И҆ закла̀ само́илъ а҆га́га пред̑ гм҃ъ въ галга́лѣхъ·
33
И҆ ѿи́де само́илъ въ сармаѳе́мꙋ. и҆ саѹ҆́лъ ѿи́де в до́мъ сво́и въ гава́вꙋ·
34
И҆ не приложѝ само́илъ ктомꙋ̀ ви́дѣти саѹ҆́ла, и҆ до дн҃е смр҃ти е҆го. н̂о пла́каше само́илъ по саѹ҆́лѣ, за е҆же ка́ѧшесѧ г҃ь ꙗ҆́ко црс̑҇твова саѹ҆́лъ въ і҆и҆л҃и·
Джерела
