Ostroh Bible❧Перша книга Самуїлова (Перша книга царів), розділ 22

1

И прїиде в пеще́рꙋ и҆а҆дала́мъскꙋ, и҆ слы́шавше бра́тїѧ е҆го и҆ до́мъ ѿц҃а е҆го, прїидо́ша к немꙋ̀ та́мо·

2

И҆ събра́шасѧ к немꙋ̀ вс̂и сꙋщи въ бѣда́х꙽. и҆ вс̂и и҆же въ ѕлѣ̀, и҆ вс̂и и҆же в печа́лех̑, и҆ бѣ̀ и҆́ми ѻ҆блада́ѧи и҆ бѧ́ше с ни́мъ ꙗ҆ко, у҃, мꙋжъ·

3

И҆ ѿи́де дв҃дъ ѿтꙋдꙋ в масиѳа́ѳъ моа҆ви́тскїи. и҆ рече дв҃дъ къ цр҃ю моа҆ви́тскꙋ. да бꙋдетъ мои ѿц҃ъ, и҆ ма́ти моѧ ѹ҆ тебе здѣ̀, до́ндеже ви́жꙋ чт̂о сътвори́тъ мн̂ѣ б҃ъ·

4

И҆ ѹ҆моли́сѧ цр҃ю моа҆вит̑скꙋ, и҆ пребыва́хꙋ ѹ҆ него̀ по вс̂ѧ дн҃и сꙋщи дв҃дꙋ въ ѻ҆́бласти то́и·

5

И҆ рече га́дъ прро̑҇къ къ дв҃дꙋ. не сѣдѝ въ ѻ҆́бласти се́и, повста́въ и҆дѝ въ ѻ́бласть і҆ѹ́динꙋ і҆ и́де дв҃дъ. и҆ пришед̑ и҆ сѣде въ́ градѣ сири́хъ·

6

И҆ слы́ша саѹ́лъ. ꙗ҆́ко ꙗ҆ви́сѧ дв҃дъ и мꙋжи и҆же с нимъ, и҆ саѹ́лъ сѣдѧ́ше на хо́лмѣ на столѣ̀ в ра́мѣ, и҆ копїѐ в рꙋкꙋ е҆го, и҆ вс̂и ѻ҆́троцы е҆го пред̑стоꙗ҆́хꙋ е҆мꙋ·

7

И҆ реч̑҇ саѹ́лъ къ ѻ҆́трокомъ свои҆мъ пред̑стоꙗ҆́щимъ е҆мꙋ слы́шите нн҃ѣ сн҃ве венїа҆ми́новы а҆ще въи҆́стиннꙋ всм̑ѣ вамъ. да́сть сн҃ъ і҆е҆с꙽се́ѻ҆въ. се́ла и҆ виногра́ды, и҆ поста́витъ в̂ы всѝ со́т꙽ники, и҆ ты́сꙋщники·

8

Ꙗ҆́ко вс̂и съгласи́стесѧ на́ мѧ и҆ никто́же васъ не повѣ́дае҆тъ м̂и ѻ҆ немъ ничто́же положѝ завѣтъ сн҃ъ мои съ сн҃омъ і҆е҆с꙽се́ѻвымъ, и҆ нѣсть ѿ ва́съ ни е҆ді́нъ болѧ̀ со мно́ю и҆ възвѣстѝ въ ѹ́ши моѝ. ꙗ҆́ко въздви́же сн҃ъ мои раба̀ мое҆го на́ мѧ врага до дне́шнѧго дн҃е·

9

И҆ ѿвѣща̀ дои́къ сѷринъ пасы́и м꙽скѝ саѹ́лѧ и҆ стоꙗ҆́ше в т̂о вре́мѧ со рабы̀ саѹ́ловы, и҆ рече ви́дѣхъ сн҃а і҆е҆с꙽се́ѻва пришед̑ша въ цр҃ковь къ а҆вимеле́хꙋ сн҃ꙋ а҆хи́товꙋ і҆е҆ре́ю·

10

И҆ въпроша̀ и҆̀ б҃а ради, и҆ бра́шно вдасть е҆мꙋ, и҆ копїѐ голїꙗ҆́дово и҆ноплеме́нника вда́сть е҆мꙋ, и҆ посла̀ цр҃ь призва́ти а҆вимеле́ха сн҃а а҆хи́това, и҆ вс̂ѧ сн҃ы ѿц҃а е҆го, і҆е҆ре́ѧ ѿ но́мвы. и҆ прїидо́ша вс̂и къ цр҃ю.

11

И҆ рече саѹ́лъ. послꙋшаи ѹ҆бо сн҃ꙋ а҆хи́товъ. и҆ рече с̂е аз̑ гл҃и гн҃е·

12

И҆ рече е҆мꙋ па́ки саѹ́лъ чт̂о помы́сли на́ мѧ т̂ы и҆ сн҃ъ і҆е҆с꙽се́ѻ҆въ, ꙗ҆ко вда̀ е҆мꙋ хлѣбъ и҆ копїѐ. и҆ въпроси́лъ е҆си б҃а ра́ди е҆го. положи́ти е҆го на́ мѧ врага̀ до дне́шнѧго дн҃е. и҆ рече а҆вимеле́хъ цр҃ю, т̂о кто е҆сть въ всѣ́хъ рабехъ твои҆хъ вѣрен̑҇ ꙗ҆́коже дв҃дъ и҆ зѧ́ть цр҃евъ. и҆ кн҃зь всѣмъ за́поведемъ твои҆мъ, и҆ сла́венъ в домꙋ̀ твое҆мъ·

13

И҆л̂и мни́ши дне́сь наче́нша м̂ѧ моли́тисѧ ѻ҆ нем꙽ къ б҃ꙋ, н̂и ѹ҆бо да не възложи́ши цр҃ю на раба̀ свое҆го слове́съ сихъ. и҆ на ве́сь до́мъ ѿц҃а мое҆го ꙗ҆ко не вѣде ра́бъ твой сего словесѐ ни ма́ла ни вели́ка, и҆ рече цр҃ь саѹ́лъ смр҃тїю да ѹ҆́мреши а҆вимеле́хъ т̂ы, и҆ весь до́мъ ѿц҃а твое҆го·

14

И҆ реч̑҇ цр҃ь ры́щꙋщим̑ пред̑ ним꙽. и҆ пред̑стоащим̑ пред̑ ним̑ приведите і҆ и҆збїите і҆е҆ре́ѧ гн҃ѧ. ꙗ҆́ко рꙋка̀ их̑ съ дв҃дом и҆ ксемꙋ разꙋмѣ́вше ꙗ҆́ко бѣжи́тъ дв҃дъ. и҆ не възвѣсти́ша въ ѹ́шїю мою, и҆ не хотѧ́хꙋ ѻ҆́троцы цр҃евы възложи́ти рꙋкъ свои҆хъ насопротив̑҇ і҆е҆ре́ѻ҆мъ бж҃їимъ·

15

И҆ рече цр҃ь дои҆́кови възврати́сѧ т̂ы и҆ срѧ́щи і҆е҆ре́ѧ. и҆ ѻ҆брати́сѧ дои́къ сѷринъ, и҆ ѹ҆бѝ і҆е҆ре́ѧ гн҃ѧ в то́и дн҃ь, п҃, и҆ е҃ мж̑ꙋ. и҆ вс̂ѧ носѧ́щаѧ е҆фꙋдъ. и҆ ном̑ва́тъ гра́дъ і҆е҆ре́искїи, погꙋбѝ ѹ҆сты̀ ѻ҆рꙋжїѧ. ѿ мꙋжеска по́лꙋ и҆ до же́ньска, ѿ ѻ́трокъ и҆ до с꙽сꙋщ́их꙽ и҆ телѧ́тъ, и҆ ѻ҆се́лъ и҆ ѻ҆вча́тъ·

16

И҆ гонзѐ е҆ді́нъ сн҃ъ а҆вимеле́ховъ, сн҃а а҆хи́това, и҆́мѧ е҆мꙋ а҆віа҆ѳа́ръ и҆ бѣжа въ слд̑ѣ дв҃да.

17

И҆ възвѣстѝ а҆вїа҆ѳа́ръ дв҃дꙋ, ꙗ҆́ко ѹ҆бѝ саѹ́лъ вс̂ѧ і҆е҆реѧ гн҃ѧ·

18

И҆ рече дв҃дъ къ а҆виа҆ѳа́рꙋ. ви́дѣхъ въ дн҃ь то́и, ꙗ҆́ко та́мо б̂ѣ дои́къ сѵ́ринъ. ꙗ҆́ко възвѣща́ѧ възвѣстѝ саѹ́лови. а҆зъ е҆смь ви́ненъ ѻ҆ дш҃ахъ до́мꙋ ѿц҃а твое҆го·

19

Сѣдѝ зд̂ѣ со мно́ю не бо́исѧ. ꙗ҆́ко и҆дѣж́е а҆ще и҆щꙋ̀ дш҃и своеи мѣ́ста. възыщꙋ̀ и҆ дш҃и твое́и. ꙗ҆́ко съхранен̑҇ бꙋдеши днес̑҇ со мно́ю·