Ostroh BibleПерша книга Самуїлова (Перша книга царів), розділ 23
Шрифт:
Запис:
1
И възвѣсти́ша дв҃дꙋ гл҃юще се и҆ноплеме́нницы ѻ҆блего́ша кеи́ль, и҆ расхита́ютъ плѣ́нь. и҆ попераю҆тъ пло́ды·
2
И҆ въпросѝ дв҃дъ г҃а гл҃ѧ, а҆ще шед̑ и҆збїю̀ и҆ноплеме́нникы сїѧ, рече г҃ь и҆дѝ и҆ побѣди́ши и҆ноплеме́нники сїѧ, и҆ сп҃сеши кеи́ль·
3
И҆ рѣша мꙋжи дв҃дви к немꙋ̀, с̂е м̂ы зд̂ѣ въ і҆ѹ҆де́и бои́мсѧ, ка́ко бꙋдет̑ а҆ще и҆́демъ въ кеи́ль въ чревеса̀ и҆ноплеме́нникомъ вни́демъ·
4
И҆ приложѝ е҆щѐ дв҃дъ въпроси́ти г҃а. и҆ ѿвѣща̀ е҆мꙋ г҃ь и҆ речѐ. въста́ни и҆ сни́ди в кеи́ль, ꙗ҆́ко а҆зъ нн҃ѣ предаю̀ и҆ноплеме́нники в рꙋцѣ твоѝ·
5
І҆ и́де дв҃дъ и҆ мꙋжи е҆го с ни́мъ в кеи́ль. и҆ бра́шасѧ съ и҆ноплеме́нники. и҆ бѣжа́ша и҆ноплеме́нницы ѿ лица̀ двд̑ва и҆ поꙗ҆́тъ ско́ты и҆хъ, и҆ поразѝ их̑ ꙗ҆звою вели́кою, и҆ сп҃се дв҃дъ живꙋщаѧ въ кеи́лѣ·
6
И҆ бы́сть е҆гда бѣжа̀ а҆виа҆ѳа́ръ сн҃ъ а҆вимеле́ховъ къ дв҃дꙋ. и҆ сни́де и҆ се́и с ни́мъ в꙽ кеи́лꙋ и҆мы́и е҆фꙋ́дъ в рꙋцѣ̀ свое́й·
7
И҆ възвѣсти́сѧ саѹ́лꙋ, ꙗ҆́ко прїиде двд̑ъ в кеи́лꙋ. и҆ рече саѹ́лъ, ꙗ҆́ко предас̑҇ и҆̀ б҃ъ в рꙋцѣ моѝ, ꙗ҆́ко затвори́сѧ вшед̑ въ градъ вра́ты и҆ верїа҆ми·
8
И҆ заповѣда саѹ́лъ всѣмъ лю́демъ на́ брань сни́ти в кеи́лꙋ ꙗ҆́ти дв҃да и҆ мꙋжи е҆го·
9
И҆ ѹ҆вѣсть с̂е дв҃дъ ꙗ҆́ко ѕл̂ѣ ѹ҆мы́сли ѻ҆ немъ саѹ́лъ, и҆ рече дв҃дъ къ а҆вїа҆ѳа́рꙋ жръцꙋ̀, принесѝ е҆фꙋ́дъ гн҃ь·
10
И҆ рече дв҃дъ г҃и б҃е і҆и҆л҃евъ, слы́ша ѹ҆слы́шалъ е҆сть ра́бъ твой. ꙗ҆́ко и҆́щетъ саѹл̑҇ прїитѝ на кеи́лꙋ, растли́ти гра́да менѐ ради·
11
Предадꙋтъ л̂и менѐ живꙋщ́їи в ке́и҆лѣ в рꙋцѣ саѹ́лови. и҆ нн҃ѣ а҆ще сни́детъ саѹ́лъ ꙗ҆́коже слы́шалъ е҆сть ра́бъ твой, г҃и бж҃е і҆и҆л҃евъ възвѣстѝ рабꙋ̀ с̂и. и҆ рече г҃ь предадѧ́тъ т̂ѧ·
12
И҆ въста́въ дв҃дъ и҆ мꙋжи е҆го с нимъ ꙗ҆́ко, х҃, и҆зыдо́ша и҆с кеи́лы. і҆ и҆дѧ́хꙋ а҆́може хотѧ́хꙋ, и҆ възвѣсти́ша саѹ́лꙋ ꙗ҆́ко сп҃сесѧ дв҃дъ и҆с кеи́лы. и҆ ѹ҆ста́висѧ е҆ще и҆ не и҆зы́иде·
13
И҆ сѣде двд̑ъ въ пꙋсты́ни в масе́рмѣ въ ѹ́зинѣ и҆ сѣде въ пꙋсты́ни въ горѣ̀ зифо́рѣ в горѣ̀ те́мнѣ въ землѝ м꙽гле́нѣ. і҆ и҆ска́ше е҆го саѹ́лъ въ вс̂ѧ дн҃и, и҆ не преда́сть е҆го б҃ъ в рꙋцѣ саѹ́ли·
14
И҆ ви́дѣ дв҃дъ ꙗ҆́ко и҆схо́дитъ саѹ́лъ и҆ска́ти е҆го, и҆ бѧ́ше дв҃дъ въ зем̑ли м꙽гле́нѣ. и҆ ѻ҆бновле́нїе зи́ѳовѣ·
15
И҆ въста̀ и҆ѻ҆а҆наѳа́нъ сн҃ъ саѹ́ловъ і҆ и́де къ дв҃дꙋ въ ѻ҆бновле́нїе. и҆ въз꙽дви́же рꙋцѣ своѝ къ б҃ꙋ·
16
И҆ рече к немꙋ не бо́исѧ ꙗ҆́ко не и҆́мать ѻ҆брѣстѝ тебѐ рꙋка̀ ѿц҃а мое҆го саѹ́ла. и҆ т̂ы и҆́маши црс̑҇твова́ти въ і҆и҆л҃и. и҆ а́зъ бꙋдꙋ по тебѣ дрꙋгїи. и҆ саѹ́лъ ѿц҃ъ мой вѣде та́ко·
17
И҆ положи́ста ѻ҆́ба завѣтъ пред̑ гм҃ъ, и҆ сидѧ́ше дв҃дъ въ ѻ҆бновле́нїи, и҆ѻ҆а҆наѳа́нъ вни́де в до́мъ сво́й.
18
І҆ и҆зыидо́ша зиѳѣ́и ѿ м꙽гле́ныѧ землѧ̀ к саѹ́лꙋ гл҃юще на хо́лмѣ·
19
Вѣ́си л̂и ꙗ҆́ко дв҃дъ кры́е҆тсѧ в на́съ в махе́рѣ въ ѹ́зинахъ в но́вѣи, на хо́лмѣ хела́тъстѣ, ѻ҆деснꙋю і҆е҆семо́на·
20
И҆ нн҃ѣ е҆ли́ко по дш҃и цр҃евѣ е҆сть, да сни́детъ к на́мъ затворе́нъ б̂о е҆сть, и҆ та́ко мнѝ ꙗ҆ко в рꙋцѣ т̂и е҆сть·
21
И҆ рече саѹ́лъ блс̑҇вени вы̀ гв҃и ꙗ҆́ко поболѣсте со мно́ю, и҆дѣте нн҃ѣ ѹ҆гото́вите и҆̀, и҆ ктомꙋ̀ разꙋмѣ́ите мѣсто е҆го, и҆дѣже е҆сть ста́нъ е҆го, та́мо ѹ҆бо и҆дѣте, е҆да ка́ко слꙋкꙋ́етъ·
22
Но вы̀ вѣдѣте и҆ разѹмѣ́ите ѻ҆ всѣхъ мѣстъ, и҆дѣже сѧ кры́е҆тъ и҆ възврати́тесѧ къ мн̂ѣ, да на гото́во и҆дꙋ̀ с ва́ми а҆ще е҆сть и҆ под̑ земле́ю и҆зыска́ти и҆́мамъ его, и҆ въ всѣ́хъ ты́сꙋщахъ і҆ѹ́динахъ.
23
И҆ въста́вше зи́ѳѣ ѿ м꙽гле́ныѧ и҆дѧ́хꙋ пред̑ саѹ́ломъ, дв҃дъ же и҆ мꙋжи е҆го бѧ́хꙋ въ пꙋсты́ни внꙋтренеи, при ве́черѣ ѻ҆деснꙋ́ю и҆е҆семо́на·
24
І҆ и́де саѹ́лъ и҆ мꙋжи е҆го и҆ска́ти дв҃да и҆ възвѣсти́ша с̂е дв҃дꙋ, и҆ сни́де в ка́мы и҆же бѣ въ пꙋсты́ни, и҆ слы́шав̑҇ саѹ́лъ, и҆ гна̀ въ слд̑ѣ дв҃да въ пꙋстыню внꙋт́ренюю·
25
І҆ и҆дѧ́ше саѹл̑҇ и҆ мꙋжи е҆го в ча́сть горы̀ тоѧ̀, и҆ б̂ѣ дв҃дъ и҆ мꙋжи е҆го кры́ѧсѧ ѿ лица̀ саѹ́ла, саѹ́л же и҆ мꙋжи е҆го нападо́ша на дв҃да, и҆ хотѣша ꙗ҆́ти и҆̀·
26
И҆ прїиде а҆́гг҃лъ къ саѹ́лꙋ гл҃ѧ, потщи́сѧ и҆ прїидѝ, ꙗ҆́ко прїидо́ша в землю твою и҆ноплеме́нницы·
27
И҆ възврати́сѧ саѹ҆лъ, ꙗ҆ко ктомꙋ̀ не гонѝ дв҃да, і҆ и҆де на срѣте́нїе и҆ноплеме́нникомъ, сего ради наречесѧ мѣсто т̂о ка́мы раздѣлныѝ, и҆ въста̀ дв҃дъ ѿтꙋдꙋ и҆ сѣде въ ѹ҆зинах̑ в га́ди·
Джерела
