Ostroh Bible❧Друга книга хронік, розділ 9

1

Цр҃ца же сава̀ е҆гда̀ слы́ша слх̑ꙋ соло́моновъ, и҆ прїиде да и҆скꙋша́етъ е҆го, въ гаданїихъ, въ і҆ерс̑҇ли́мѣ, съ си́лою тѧ́жкою ѕѣ́ло. и҆ вельблю́ды и҆же ноша́хꙋ, во́ни бл҃говон̑҇ны и҆ зла́та, и҆ ка́менїѧ драга́го, и҆ прїиде къ соло́монꙋ и҆ гл҃ала е҆сть е҆мꙋ всѧ̀ е҆ли́ка бѣша въ срд̑цы е҆ѧ̀, и҆ възвѣстѝ соло́монъ всѧ̀ словеса̀ е҆ѧ̀, и҆ ничт̂о не бы́сть. е҆же бы не ѻ҆бъꙗ҆вле́но е́й сътвори́лъ. и҆ ви́дѣ цр҃ца сава̀ премꙋдрость соло́моню, и҆ до́мъ е҆же създа́лъ, и҆ ꙗ҆де́нїе стола̀ е҆го. и҆ сѣда́лища рабо́мъ и҆ прави́ла слꙋже́бникомъ е҆го, и҆ ри́зы и҆хъ, и҆ ѻ҆дѣѧ́нїѧ и҆хъ. и҆ под̑ча́шїи е҆го, и҆ вс̂есъж꙽же́нїѧ ꙗ҆́же жрѧ́ше в домꙋ̀ гн҃и·

2

Не бы́сть ѿ ѹ́жасти да́ле в не́и дх҃ъ, рече же къ цр҃ю, и҆́стинно е҆сть сло́во, е҆же слы́шахъ в꙽ землѝ мое́и, ѻ҆ премꙋдрости твое́и, и҆ словесе́хъ твои҆хъ, и҆ не вѣ́ровахъ повѣда́ющимъ, до́н꙽деже сама̀ прїидо́хъ и҆ ви́дѣша ѻ҆́чи моѝ. і҆ и҆скꙋси́хъ, и҆ е́два полови́на премꙋ́дрости твое́ѧ мн̂ѣ бысть повѣдана. приложи́лъ е҆си къ слы́шанїю, ꙗ҆́же слы́шала. бл҃жени мꙋжи твоѝ. и҆ бл҃жени рабѝ твоѝ сїи, и҆же пред̑стоѧ́тъ пред̑ тобою на всѧко вре́мѧ. и҆ слы́шатъ премꙋдрость твою̀, да бꙋдетъ г҃ь б҃ъ твои блс̑҇венъ, и҆же въсхотѣ тебе ѹ҆чини́ти на прс̑҇тлѣ е҆го. цр҃емъ лю́демъ г҃а б҃а твое҆го. занѐ възлюбѝ б҃ъ і҆и҆л҃ѧ, и҆ хо́щетъ съхрани́ти е҆го въ вѣки. того ради поста́ви тѧ над̑ ни́ми цр҃ѧ. да сътвори́ши сꙋдбы̀ и҆ пра́вдꙋ. даде́ же цр҃ю. р҃к, тала́нта зла́та. и҆ а҆рома́ты мно́ги ѕѣло. и҆ камени предража́иши·

3

И҆ не бы́ша а҆рома́ты таковы́ѧ, ꙗ҆́ко сїѧ, и҆же да́сть цр҃ца сава̀ цр҃ю соло́монꙋ. н̂о и҆ рабы̀ хира́мовы, съ рабы̀ соло́моними. приноша́хꙋ зла́то ѿ сꙋфи́ра, и҆ дре́ва пе́в꙽гова, и҆ ка́менїе предража́ише·

4

И҆ сътворѝ соло́монъ цр҃ь, ѿ дре́въ певговыхъ стꙋп꙽нѣ в домъ гн҃ь. и҆ в до́мъ цр҃евъ, и҆ гꙋсли, и҆ ѱалты́ри пѣснїи. никогда́ же ви́дѣна сꙋть в꙽ землѝ і҆ѹ́динѣ такова́ѧ. цр҃ь же соло́монъ дасть цр҃ци савѣ̀ вс̂ѧ, і҆ и҆же въсхотѣла ꙗ҆́же просѝ. и҆ мно́жае бол꙽ши неже принесѐ к немꙋ̀, ꙗ҆же възврати́сѧ в зе́млю свою съ рабы̀ свои́ми·

5

Бѣ же тѧ́гость зла́та чт̂о приноша́шесѧ къ соло́монꙋ по е҆ді́на лѣта, хѯ҃ѕ, тала́н꙽тъ зла́та. ра́звѣ мꙋжїи да́н꙽никъ и҆ кꙋп꙽цо́въ, е҆же приноша́хꙋ·

6

И҆ всѣхъ ц҃рїи а҆ра́в꙽скихъ, и҆ вла́стелїи земли, и҆же ноша́хꙋ зла́то и҆ сребро̀ соло́монꙋ. сътвори ѹ҆бо цр҃ь соло́мон꙽, с҃, ко́пїи зла́тых̑ тѧ́гненых̑. х҃, зла́тыхъ вагѝ, въ е҆ді́ном̑ копїѝ. и҆ т҃, щи́товъ зла́тыхъ тѧ́гненыхъ тре́ю со́тъ зла́тыхъ тѧ́жесть е҆ді́номꙋ щи́тꙋ. положи ѧ҆̀ црь въ ѻ҆рꙋжницꙋ ꙗ҆́же бѣ̀ ѻ҆са́жена древомъ лива́новымъ·

7

Сотвориж̑ цр҃ь прс̑҇тлъ слоно́выхъ зꙋб́овъ вели́къ, и҆ позлатѝ е҆го зла́томъ чистѣ́ишимъ. и҆ ше́сть же стꙋп꙽неи и҆́миже въсхожа́ше къ прс̑҇тлꙋ позлаще́ни зла́томъ, и҆ мы́шцицы дв̂ѣ тꙋдꙋ и҆ сю́дꙋ. над̑ прс̑҇тломъ сѣда́лища, и҆ дв̂а льва̀ стоѧ́ща близь мы́шцеи, н̂о и҆́ныхъ. в҃і, львичищъ стоѧ́ще, на ѕ҃ стꙋпнехъ, ѿ ѻ҆бѣ́ю же странꙋ̀·

8

И҆ не бы́сть тако́въ прс̑҇тлъ въ всѣхъ црс̑҇твѣхъ. всѧ́ же сосꙋды цр҃евы бѣхꙋ зла́та, и҆ сосꙋды до́мꙋ ѿ зла́та чистѣ́ишаго. сребро̀ б̂о въ дн҃ехъ тѣхъ низачтоже мнѧ́шесѧ, занѐ кора́бль цр҃евъ хожда́ше въ ѳарси́съ съ рабы̀ хира́мовыми е҆дини́цею в лѣта трѝ, и҆ прихожда́ше кора́бль ѿ ѳарси́са, по́лонъ зла́та, и҆ сребра̀, и҆ зꙋбовъ слоно́выхъ, и҆ ѻ҆безьѧ́нъ·

9

Възвели́чисѧ соло́монъ над̑ всѣмѝ цр҃и зе́мными. бога́тъствомъ и҆ мꙋдростїю·

10

Вси же цр҃и зем꙽стїи жела́хꙋ ви́дѣти лицѐ соло́моне, и҆ слы́шати премꙋдрость е҆го. ю҆́же въздасть б҃ъ на́ срд̑це е҆го·

11

И҆ прино́шахꙋ е҆мꙋ ко́ждо да́ры. сосꙋды сре́брѧны, и҆ зла́ты, и҆ ѻ҆дѣѧ́нїѧ, и҆ ста́ктꙋ, и҆ кон꙽фекъты, и҆ ѻ҆рꙋжїѧ, и҆ а҆рама́ты, ко́ни и҆ мъскѝ по е҆ді́на лѣта·

12

И҆ бѣхꙋ же цр҃ю соло́монꙋ, ҂м҃, кобы́лъ въ ста́дехъ. и҆ ҂і҃, конн꙽икъ. и҆ поста́ви же и҆хъ въ градх̑ѣ колесни́чныхъ, и҆ съ цр҃емъ въ і҆ерс̑҇ли́мѣ·

13

И҆ бы́сть воже́мъ на всѣхъ цр҃ѣхъ. ѿ рѣки е҆фра́та, даже до землѧ̀ и҆ноплеме́нник̑҇. и҆ даже до предѣлъ е҆гѷпетъскихъ. толко же мно́жество возда́лъ зла́та̑ сребра̀ і҆ерс̑҇ли́мꙋ ꙗ҆́ко ка́менїѧ, и҆ ке́дри толи́ко мно́жества ꙗ҆́ко черъничїѧ и҆же ража́ютъсѧ въ полех̑. и҆ приводѧ́хꙋ же е҆мꙋ ко́ни ѿ е҆гѷпта и҆ съ всѣх же стра́нъ. и҆ про́чаѧ же дѣ́ла соломонѧ прьваѧ и҆ послд̑ѣнѧа пи́сана сꙋть въ словесехъ наѳа́на про̑҇рка, и҆ въ словесехъ а҆хїѧ силони́та. и҆ въ ви́денїи і҆ѻ҆и́лѧ ви́дѧщаго проти́вꙋ, і҆е҆ровоа́ма сн҃а нава́това·

14

И҆ цр҃ьствова́ же соло́монъ въ і҆ерс̑҇лимѣ над̑ всѣмъ і҆и҆л҃емъ, м҃, лѣтъ. ѹ҆спеж̑ соло́монъ съ ѿц҃ы свои҆ми. и҆ погребо́ша е҆го въ́ градѣ двд҃вѣ·

15

И҆ црс̑҇твова же ровоам̑ сн҃ъ е҆го в него̀ мѣсто·