Ostroh Bible❧Друга книга хронік, розділ 8

1

Испо́лньшимъ же сѧ, к҃ ти лѣтомъ. по созда́нїю соло́монꙋ до́мꙋ гн҃ѧ, и҆ до́мꙋ свое҆го. гра́ды кото́рыѧ дал̑҇ хирамъ соло́монꙋ созида́ѧ соло́монъ и҆ вселѝ т̂ꙋ сн҃овъ і҆и҆л҃евъ. прїиде же въ е҆маѳъсꙋва, и҆ въздръжа̀ е҆го. и҆ създа̀ ѳед꙽мо́ръ въ пꙋсты́ни, и҆ вс̂ѧ гра́ды защитител꙽нѣ́ишїѧ, създав̑҇ въ е҆маѳѣ, състро́и же веѳеро́н꙽ вы́шнїи, и҆ веѳеро́нъ ни́жнїи. гра́ды стѣна́ты, и҆мѣ́ющи вра́та, и҆ запо́ры, и҆ зам꙽кѝ, валаа́ѳъ па́ки и҆ всѣхъ поса́довъ крѣп꙽ча́ишихъ, и҆же бы́ша соло́мони. всѣх же поса́дов̑҇ колесни́чныхъ, и҆ поса́довъ ко́нникъ всѧ̀ е҆ли́каже въсхотѣ̀ сътворѝ цр҃ь соло́монъ. и҆ расмотрѝ, създа̀ въ і҆ерс̑҇ли́мѣ, и҆ в лива́нѣ, и҆ въ все́и вла́сти землѝ свое́ѧ, весь по́лкъ и҆же ѻ҆ста́вленъ бы́сть, ѿ е҆ѳ꙽ѳе́ѧ, и҆ а҆м꙽море́ѧ и҆ ферезе́ѧ, и҆ е҆ве́ѧ, и҆ е҆вꙋсе́ѧ, и҆же не бѧхꙋ ѿ племе́ни і҆и҆л҃ева н̂о бѣша ѿ сн҃овъ и҆хъ послѣ́днихъ кото́рыхъ не ѹ҆би́ша сн҃ове і҆и҆л҃евы. под꙽ни́зи соло́монъ въ дан꙽никѝ даже до дн҃е сего. па́ки ѿ сн҃овъ і҆и҆л҃евъ не поста́ви да слꙋжатъ дѣлом̑ цр҃евым̑ тїи б̂о бѧхꙋ мꙋжи бра́нницы, и҆ въе҆во́ды прь́выи и҆ нача́лницы колесни́цамъ, и҆ ко́н꙽никомъ е҆го. сїи же и҆ нача́лницы воем̑ цр҃ѧ соло́мона бы́ша, и҆ с҃ н҃, приставник̑҇ дѣла над̑ людмѝ·

2

дще́рь же фараѻ́ню преведѐ соло́монъ ѿ гра́да двд҃ва в до́мъ е҆гоже създа̀ е́й. рече б̂о цр҃ь да не ѻ҆битает̑ жена̀ моѧ в домꙋ̀ дв҃да цр҃ѧ і҆и҆л҃ева. того ради и҆же ѻ҆сщ҃енъ е҆сть, вшел̑҇ б̂о е҆сть кїѻ́тъ гн҃ь во́нь, тогда̀ принесѐ соло́монъ вс̂есъж꙽же́нїѧ гв҃и на ѻ҆лтар̑҇ ꙗ҆́же состро́и гв҃и пред̑ хра́момъ по словесѝ ѿ дн҃ѧ до дн҃ѧ носи́ти в꙽ нем по повелѣнїю моѷсїѻ́вꙋ в꙽ сꙋбо́ты и҆ въ новомѣсѧчїа, и҆ въ пра́здники дн҃їи три́щи лѣтомъ, и҆же е҆сть въ великїи пра́з꙽дъникъ ѻ҆прѣснокъ, и҆ въ праз̑дникъ неде́ль, и҆ въ пра́з꙽дник̑҇ кꙋщеи и҆ поста́ви по раз̑сꙋже́нїю дв҃да ѿц҃а свое҆го, и҆ правила сщ҃ен꙽ником̑·

3

И҆ слꙋже́нїѧ их̑, и҆ левѷты въ страж̑бы̀ и҆хъ. да хва́лѧтъ и҆ слꙋжатъ пред̑ сщ҃ен꙽ники. по чинꙋ̀ е҆ді́ного ко́ждо дн҃їи. и҆ две́рницы в꙽ раздѣле́нїихъ свои҆хъ·

4

По вратомъ и҆ вра́томъ. та́ко б̂о повелѣлъ дв҃дъ чл҃къ бж҃їи не престꙋпа́ли сꙋть ѿ за́повѣдїи цр҃евыхъ·

5

ѻ҆ сщ҃ен꙽ницехъ и҆ левѷтех̑ въ всемъ и҆же повелѣ̀. и҆ въ сторо́жех̑ сокро́вищемъ всѝ расхо́ды. ѹ҆гото́вани и҆мѣ̀ соло́монъ. ѿ того̀ дн҃е и҆же ѻ҆снова̀. до́мъ гн҃ь даже до дн҃е и҆же съвръшѝ до́мъ гн҃ь·

6

Тогда̀ и҆де соло́монъ, въ а҆сїѻ́нъ гаве́ръ, и҆ въ е҆ла́ѳъ къ странѣ̀ морѧ чрьмнаго. и҆же е҆сть въ землѝ дꙋме́искои·

7

И҆ посла̀ е҆мꙋ хира́мъ рꙋка́ма слꙋ́гъ свои҆хъ кораблѝ, и҆ корабленицы зна́ющїѧ мо́рьскїѧ проходы, и҆ хожда́хꙋ съ рабы̀ соло́моньми въ сафир̑҇. и҆ взѧ́ша. ѿтꙋдꙋ, у҃, и҆ н҃, талан꙽тъ зла́та, и҆ принесо́ша къ цр҃ю соло́монꙋ·