Ostroh BibleДруга книга Самуїлова (Друга книга царів), розділ 10
Шрифт:
Запис:
1
И бы́сть по си́хъ ѹ҆́мре цр҃ь сн҃овъ а҆намо́них̑. и҆ црс̑҇твова сн҃ъ е҆го а҆но́нъ в него мѣсто·
2
И҆ рече дв҃дъ да сътворю̀ млс̑҇ть съ а҆на́номъ сн҃омъ а҆́совымъ а҆мо́шимъ. и҆мже ѻ҆́бразомъ сътворѝ ѿц҃ъ е҆го млс̑҇ть со мно́ю. и҆ посла̀ дв҃дъ послы̀ на ѹ҆тѣше́нїе рабы̀ своѧ ѻ҆ ѿц҃ы е҆го. и҆ прїидо́ша ѻ҆́троцы дв҃двы в зе́млю сн҃овъ а҆м꙽монихъ·
3
И҆ рѣша старѣ́ишины а҆м꙽мо́ни къ а҆но́нꙋ господи́нꙋ свое҆мꙋ. не прославле́нїѧ ра́ди ѿц҃а твое҆го, пꙋсти́лъ е҆сть дв҃дъ к тебѣ ѹ҆тѣши́телѧ. н̂о да и҆спыта́ют̑ гра́дъ и҆ съглѧдают̑ е҆го. того ра́ди пꙋстѝ дв҃дъ рабы̀ своѧ к тебѣ·
4
И҆ поꙗ҆́тъ а҆но́нъ ѻ҆́троки дв҃двы и҆ ѻ҆стрижѐ бра́ды и҆мъ. и҆ ѿрѣза ѻ҆дѣꙗ҆́нїѧ и҆хъ въ срѣди до по́ѧса, и҆ ѿпꙋстѝ ѧ҆̀·
5
И҆ възвѣсти́ша дв҃дꙋ гл҃юще ѻ҆ мꙋже́хъ. и҆ посла̀ проти́вꙋ им̑. ꙗ҆́ко бѣша мꙋжи т̂ы что́мы ѕѣ́ло. и҆ рече цр҃ь сѣди́те въ е҆рихо́нѣ, до́нде̑ възрастꙋтъ бра́ды ва́ша. и҆ тогда сѧ възврати́те·
6
И҆ ви́дѣша сн҃ове а҆м꙽мо́ни ꙗ҆́ко посрамле́ни бы́ша мꙋжы дв҃двы. и҆ посла́ша сн҃ове ам̑мо́ни. и҆ наꙗ҆́ша сѷрїю виѳроа́мовꙋ. и҆ сѷрїю со́вовꙋ. и҆ ро́воѻ҆вꙋ, ҂к҃, пѣшца. и҆ цр҃ѧ а҆м꙽мали́кова маа́хи, ҂а҃, мꙋжъ. і҆ и҆стовъскихъ мꙋжъ ҂в҃і·
7
И҆ слы́ша дв҃дъ. и҆ посла̀ і҆ѻ҆а́ва и всю̀ си́лꙋ си́лныхъ·
8
І҆ и҆зыидо́ша сн҃ове а҆м꙽мони. и҆ ѹ҆строи́ша бра́нь пред̑ вра́ты гра́да. и҆ сѷрѧ́не сꙋвїинї и́ ровъ, і҆ и҆стовъ. и҆ а҆м꙽мали́киты е҆ді́ни ста́ша на селѣ̀·
9
И҆ ви́дѣ и҆ѻ҆а́въ ꙗ҆́ко бы́ти и҆мъ с ни́ми в лицѐ бра́ни. ѿ лица̀ проти́вныхъ и҆зъза́дꙋ и҆збра̀ ѿ всѣхъ ю҆́ношъ і҆и҆л҃въ и҆ ѹ҆стро́и ѧ҆̀ проти́вꙋ сѷрѧ́нъ·
10
І҆ и҆збы́токъ людїи да́сть в рꙋцѣ бра́тꙋ свое҆мꙋ а҆ве́сѣ. и҆ ѹ҆строи ѧ҆̀ противꙋ сн҃омъ а҆м꙽мо́немъ·
11
И҆ рече и҆ѻ҆а́въ къ а҆весѣ. а҆ще ѹ҆держит̑сѧ сѷрїѧ паче мене, то бꙋди м̂и на сп҃сенїе. сн҃ове же а҆м꙽мо́ни. а҆ще ѻ҆держа́тъ па́че тебѐ, т̂о бꙋдевѣ сп҃са́юще тебе·
12
І҆ ѹ҆крѣпи́мсѧ, и҆ мꙋжа́имсѧ ѻ҆ лю́дехъ на́ю, и҆ ѻ҆ гра́дѣ б҃а на́шего. и҆ г҃ь сътворит̑ бл҃го пред̑ ѻ҆чи́ма свои҆ма·
13
И҆ прїиде и҆ѻ҆а́въ и҆ лю́ди е҆го с ни́мъ на́ брань на сѷрїю. и҆ бѣжа̀ ѿ лица̀ и҆хъ·
14
И҆ ви́дѣвше сн҃ове а҆м꙽мони. ꙗ҆́ко бѣжаша сѷрѧ́не. и҆ тїи бѣжа́ша ѿ лица а҆ве́сы, і҆ и҆до́ша въ́ град̑, и҆ възврати́сѧ и҆ѻ҆ав̑҇ ѿ сн҃овъ а҆м꙽монь. и҆ прїиде въ і҆ерс̑҇лім̑·
15
И҆ ви́дѣвше сѷрѧ́не. ꙗ҆́ко не мого́ша проти́витисѧ і҆и҆л҃ьтомъ. и҆ събра́шасѧ въкꙋ́пѣ, и҆ посла̀ а҆драза́ръ. и҆ приведѐ сѷрїꙗ҆не и҆же ѻ҆бонъ полъ реки халама́ка. и҆ прїидоша въ е҆ѻ҆ла́мъ и҆ съва́къ. старѣишина б̂ѣ си́ли а҆драза́ровы пред̑ ними·
16
И҆ възвѣсти́ша дв҃дꙋ. и҆ събра̀ весь і҆и҆л҃ь и҆ пре́иде і҆ѻ҆рда́нъ. и҆ прїиде въ е҆лам̑·
17
И҆ ѹ҆строи́шасѧ сѷрѧ́не на дв҃да, и҆ бра́шасѧ с ни́мъ·
18
И҆ бѣжа́ша сѷрѧ́не ѿ лица̀ і҆и҆л҃ьтѧнъ. и҆ взѧ̀ дв҃дъ ѿ сѷрїѧ, з҃, со́тъ колесни́цъ, и҆ ҂м҃, ко́нникъ. и҆ съва́ка старѣ́ишинꙋ е҆го ѹ҆бѝ, и҆ ѹ҆́мре т̂ꙋ·
19
И҆ ви́дѣша вс̂и цр҃и. и҆ рабѝ а҆драза́ри, ꙗ҆́ко падо́ша пред̑ і҆и҆л҃емъ. и҆ повинꙋшасѧ і҆и҆л҃ю. и҆ порабо́таша и҆мъ. и҆ ѹ҆боѧ́шасѧ сѷрѧ́не. ꙗ҆́ко не ѹ҆цѣлѣти ктомꙋ̀ сн҃омъ а҆м꙽мо́немъ·
Джерела
