Ostroh BibleДруга книга Самуїлова (Друга книга царів), розділ 11
Шрифт:
Запис:
1
И бы́сть по възвраще́нїи лѣта того̀. въ времѧ и҆схожде́нїѧ цр҃емъ на́ брань. и҆ посла̀ дв҃дъ і҆ѻ҆а́ва, и҆ ѻ́троки е҆го с ним̑. и҆ всего і҆и҆л҃ѧ. и҆ расточѝ сн҃ы а҆м꙽монѧ. и҆ ѻ҆бъсѣдо́ша ѻ҆́крс̑҇тъ рава́ѳа. и҆ дв҃дъ сѣде въ і҆ерс̑҇лі́мѣ·
2
И҆ бы́сть при ве́черѣ, и҆ въста́въ дв҃дъ с ло́жа свое҆го. и҆ хожда́ше по пола́тѣ въ домꙋ̀ свое҆мъ, и҆ ви́дѣ женꙋ̀ с пола́ты мы́ющꙋсѧ·
3
и҆ бѣ жена̀ взо́рꙋ добра велмѝ·
4
И҆ посла̀ дв҃дъ и҆ в꙽зы́ска жены̀ и҆ рече. нѣсть ли с̂е версавіи дщи е҆лїа́влѧ, жена̀ ѹ́рїѧ хетѳе́ѧ·
5
И҆ посла̀ дв҃дъ слꙋги своѧ и҆ приведо́ша ю҆̀. і҆ и҆ вни́де к не́и, и҆ лѧ́же с не́ю. и҆ та б̂ѣ ѻ҆чи́стиласѧ ѿ нечистоты̀ свое́ѧ. и҆ въста́вши възврати́сѧ в до́мъ свои·
6
И҆ зача́тъ жена̀ въ чревѣ и҆ посла́вши възвѣстѝ дв҃дꙋ и҆ рече. с̂е а҆зъ въ чревѣ зачахъ·
7
И҆ посла̀ дв҃дъ къ и҆ѻ҆а́вꙋ, гл҃ѧ. послѝ къ мнѣ ѹ́рїю хетѳе́ѧ. и҆ посла̀ и҆ѻ҆а́въ ѹ҆́рїю къ дв҃дꙋ·
8
И҆ прїиде ѹ́рїѧ къ дв҃дꙋ. и҆ въпросѝ е҆го дв҃дъ ѻ҆ здра́вїи и҆ѻ҆а́ва. и҆ ѻ҆ здра́вїи людїи, и҆ ѻ҆́ ми́рꙋ и҆ ѻ҆ бра́ни, и҆ рече дв҃дъ къ ѹ́рїи дои҆дѝ в дом̑ свои ѹ҆мы́и ноѕѣ своѝ. и҆́де ѹ́рїѧ и҆з до́мꙋ цр҃ева. і҆ и҆де въ слѣдъ е҆го слꙋга цр҃евъ·
9
И҆ спа̀ ѹ́рїѧ пред̑ вра́ты до́мꙋ цр҃ева, со рабы̀ господи́на свое҆го, а҆ не ходѝ в до́мъ свои. и҆ възвѣсти́ша дв҃дꙋ гл҃юще ꙗ҆́ко не ходѝ ѹ́рїѧ в до́мъ свои, и҆ рече дв҃дъ къ ѹ́рїи. нѣси л̂и ты̀ с пꙋтѝ прише́лъ т̂о что̀ с̂е нѣси в дом̑ свои пришел̑҇·
10
И҆ рече ѹ́рїѧ. киѻ́тъ бж҃їи і҆и҆л҃ь, и҆ѹ҆де́е пребыва́ютъ въ кровѣхъ, а҆ господи́нъ мои і҆ѻ҆а́въ, и҆ рабѝ господи́на мое҆го, на лицы̀ всѣхъ селъ пребыва́ютъ, т̂о ка́ко а҆зъ вни́дꙋ в домъ свои ꙗ҆́сти и҆ пи́ти и҆л̂и спа́ти съ жено́ю свое́ю, жива̀ бꙋдетъ дш҃а моа̀, а҆ще сътворю̀ аз̑ гл҃ы сїѧ·
11
И҆ рече дв҃дъ къ ѹ́рїи, посѣди зд̂ѣ днесь и҆ ѹ́тро, и҆л̂и тре́тїꙗ҆го дн҃е и҆ пꙋщꙋ т̂ѧ. и҆ пребысть ѹ҆́рїѧ въ і҆ерс̑҇ли́мѣ въ то́й дн҃ь и҆ въ дрꙋгы́и·
12
И҆ призва̀ дв҃дъ ѹ҆́рїю. и҆ ѻ҆бѣ́давъ с нимъ и҆ питъ, и҆ ѹ҆пи́сѧ, і҆ и́де вечеръ спа́ти на ло́же свое, съ рабы̀ господи́на свое҆го, а҆ в дом̑ свои не и҆дѐ·
13
И҆ бы́сть ѹ҆́тро и҆ напи́са дв҃дъ кни́ги къ і҆ѻ҆а́вꙋ, и҆ пꙋстѝ рꙋко́ю ѹ҆́рїиною·
14
И҆ напи́са въ кни́гахъ гл҃ѧ. пꙋстѝ ѹ́рїю проти́вꙋ бра́ни лꙋ́чшеи. и҆ възвратитесѧ въспѧ́ть ѿ него̀ да ꙗ҆́з꙽венъ ѹ҆́мретъ·
15
И҆ бы́сть е҆гда̀ хранѧ и҆ѻ҆а́въ ѹ҆ гра́да. и҆ поста́ви и҆ ѹ́рїю на мѣ́стѣ. ѿнꙋдꙋже вѣдѧ́ше мꙋ́жа сꙋща си́лны т̂ꙋ·
16
І҆ и҆зыдо́ша мꙋ́жи и҆з гра́да, и҆ бїѧ́хꙋсѧ съ і҆ѻ҆а́вом̑ и҆ падо́ша мно́ѕи ѿ люді́и. и҆ ѿ ра́бъ двд҃въ. ѹ҆́мре же и҆ ѹ́рїѧ хетѳе́инъ и҆ посла̀ и҆ѻ҆а́въ и҆ възвѣсти т̂а двд̑ви вс̂ѧ рѣ́чи ꙗ҆́же ѻ҆ бра́ни гл҃ѧ·
17
И҆ заповѣ́да и҆ѻ҆а́въ послꙋ̀ гл҃ѧ, е҆гда скон꙽ча́еши вс̂ѧ рѣчи, ꙗ҆́же ѻ҆ бра́ни къ цр҃ю гл҃ѧ. а҆́ще па́че разгнѣ́ваетсѧ цр҃ь и҆ речет꙽ ти. т̂о почто̀ приближи́стесѧ къ гра́дꙋ на́ брань. не вѣсте ли ꙗ҆́ко стрѣлѧ́ютъ съ стѣны̀·
18
Кто е҆сть ѹ҆би́лъ а҆вимеле́ха сн҃а и҆е҆ровоа́млѧ, сн҃а ни́рова. не жена̀ ли ес̑҇ връ́гла на́нь ѹ҆лом꙽комъ жер꙽нова съ стѣны̀, и҆ ѹ҆рази е҆го и҆ ѹ́мре въ ѳаме́сѣ. т̂о почто̀ пристꙋпа́сте ко стѣнѣ. и҆ речеши и҆б̂о и҆ ра́бъ тво́и ѹ҆́рїѧ хет꙽ѳе́инъ, ѹ҆бїенъ бы́сть и҆ ѹ́мре·
19
І҆ и́де посо́лъ и҆ѻ҆а́вль къ цр҃ю въ і҆ерли́мъ. и҆ прїиде и҆ възвѣсти́ дв҃дꙋ вс̂е е҆ли́ко гл҃а е҆мꙋ и҆ѻ҆а́въ вс̂ѧ гл҃ы бра́ни·
20
И҆ разгнѣ́васѧ дв҃дъ на и҆ѻ҆а́ва. и҆ рече дв҃дъ къ послꙋ̀. почто е҆сте приближи́лисѧ къ гра́дꙋ би́тисѧ·
21
Не вѣ́дасте ли ꙗ҆́ко ꙗ҆́звенїю е҆сть мно́гꙋ бы́ти съ стѣны̀. кт̂о ѹ҆би а҆вимеле́ха сн҃а и҆е҆ровоа́млѧ не жена л̂и е҆сть връгла ка́мень жернова съ стѣны̀. и҆ ѹ́мре въ ѳаме́сѣ, и҆ почто б̂о приближи́стесѧ къ стѣнѣ̀·
22
И҆ рече посо́лъ къ дв҃дꙋ, ꙗ҆́ко ѹ҆крышасѧ на́ ны мꙋжи і҆ и҆зыдо́ша на́ ны на село̀. и҆ гони́хомъ ѧ҆̀ до вра́тъ гра́да·
23
И҆ стрѣлѧша стрѣ́лцы съ стѣны̀ в ны̀, и҆ ѹ҆стрѣли́ша ѿ ѻ҆́трок̑҇ цр҃ьскихъ. и҆ ѹ́рїю хет꙽ѳе́ина ѹ҆би́ша·
24
И҆ рече дв҃дъ къ послꙋ̀ си́це. да речеши къ и҆ѻ҆а́вꙋ, да не бꙋ́дет ти печа́ль пред̑ ѻ҆чи́ма словесѐ. ꙗ҆́ко ѻ҆́вогда си́це ѻ҆́вогда ѻ҆на́ко бывает̑ сѣчъ, и҆ ѹ҆крѣпи бра́нь твою на град̑, и҆ раскопа и҆̀·
25
И҆ слыша жена̀ ѹ҆́рїина ꙗ҆́ко ѹ҆бїенъ бы́сть мꙋ́жъ е҆ѧ̀. и҆ рыдаше по мꙋжи свое҆мъ, и҆ пла́касѧ. і҆ и҆схожаше гла́съ пла́ча е҆ѧ̀. и҆ посла́въ дв҃дъ приведе́ ю в домъ сво́и и҆ бы́сть е҆мꙋ жена̀. и҆ роди е҆мꙋ сн҃ъ, и҆ лꙋка́вен̑҇ ꙗ҆ви́сѧ гл҃ъ. и҆же сътвори дв҃дъ пред̑ ѻ҆чи́ма гн҃има·
Джерела
