Ostroh Bible❧Друга книга Самуїлова (Друга книга царів), розділ 9

1

И рече дв҃дъ а҆ще е҆сть гдѣ̀ е҆ще ѻ҆ста́нокъ домꙋ саѹ́лѧ. и҆ сътворю̀ с ни́ми ми́лость і҆ѻ҆а҆наѳа́на ради·

2

И҆ ѿ до́мꙋ саѹ́лѧ б̂ѣ ѿрокъ и҆мѧ е҆мꙋ си́ва. и҆ призва́ша и҆̀ къ дв҃дꙋ. и҆ рече к немꙋ̀ дв҃дъ цр҃ь. ты̀ л̂и е҆си си́ва ѻ҆́трокъ. и҆ рече си́ва аз̑ ра́бъ твои·

3

И҆ рече цр҃ь ѻ҆ста̀ ли сѧ е҆ще ѿ до́мꙋ саѹ́лѧ гдѣ̀ мꙋжъ. и҆ сътворю̀ с ни́мъ млс̑҇ть бж҃їю. и҆ рече си́ва къ цр҃ю. е҆ще е҆сть сн҃ъ и҆ѻ҆а҆наѳа́нь, хро́мъ нога́ми·

4

И҆ рече цр҃ь гдѣ е҆сть. и҆ рече си́ва къ цр҃ю. с̂е в домꙋ̀ махе́ровѣ сн҃а а҆мїи́лѧ ѿ лодава́ры·

5

И҆ посла̀ цр҃ь дв҃дъ и҆ поѧ́тъ и҆̀ ѿ до́мꙋ махе́рова, сн҃а а҆мїи́лѧ ѿ лодава́ры·

6

И҆ прїиде мем꙽ѳивосте́и сн҃ъ и҆ѻ҆а҆наѳа́нь сн҃а саѹ́лова къ цр҃ю дв҃дꙋ. и҆ па́дъ на лицы̀ свое҆мъ, и҆ поклони́сѧ е҆мꙋ. и҆ рече е҆мꙋ дв҃дъ мем̑ѳивосте́ю и҆ рече с̂е ра́бъ твои·

7

И҆ рече е҆мꙋ дв҃дъ. не бои́сѧ ꙗ҆́ко творѧ̀ сътворю̀ с тобо́ю млс̑҇ть, и҆ѻ҆а҆наѳа́на ради ѿц҃а т̂и. и҆ дамъ т̂и вс̂ѧ се́ла саѹ́лѧ дѣ́да твое҆го. а҆ ты̀ ѧж̑ хлѣ́бъ на трапе́зѣ мое́и всегда̀·

8

И҆ поклони́сѧ е҆мꙋ мем꙽ѳивосте́и. и҆ рече кто е҆смь а҆зъ рабъ твои и҆же призрѣ̀ на ѱа̀ ѹ҆ме́рша на менѐ·

9

И҆ призва̀ цр҃ь си́вꙋ ѻ҆тро́чища саѹ́лѧ. и҆ рече е҆мꙋ вс̂е е҆ли́ко е҆сть саѹ́ле. весь до́мъ е҆го да́хъ сн҃ꙋ господи́на т̂и·

10

да дѣлае҆ши зе́млю. ты̀ и҆ сн҃ове твоѝ, и҆ рабѝ твоѝ. и҆ да приноси́ши сн҃ꙋ господи́на твое҆го хлѣбы да ꙗ҆́сть. и҆ мем꙽ѳивосте́и сн҃ъ господи́на т̂и да ꙗ҆́сть хлѣбы всегда̀ на трапе́зѣ мое́и. и҆ ѹ҆ си́вы бѧ́ше е҃і сн҃овъ, и҆ к҃ ра́бъ·

11

И҆ рече си́ва къ цр҃ю ѻ҆ всѣхъ и҆хже заповѣ́да. дасть м̂и господи́нъ и҆ цр҃ь. та́ко да сътворю̀ ра́бъ твои. и҆ мем꙽ѳивосте́и ꙗ҆дѧ́ше на трапе́зѣ дв҃двѣ. ꙗ҆ко е҆ді́нъ ѿ сн҃овъ цр҃ьскихъ·

12

И҆ мемѳивоа́лꙋ сн҃ъ б̂ѣ ма́лъ. и҆́мѧ е҆мꙋ ми́ха. и҆ всѧко и҆мѣнїе до́мꙋ сиво́нѧ рабѝ бѧ́хꙋ мемѳивосте́ѻ҆вы·

13

И҆ мемѳивосте́и живѧ́ше въ і҆ерс̑҇лі́мѣ. и҆ на трапезѣ цр҃евѣ ꙗ҆дѧ́ше всегда̀ и҆ то́и бѧ́ше хро́мъ ѻ҆бѣма нога́ма свои́ма·