Ostroh BibleДруга книга Самуїлова (Друга книга царів), розділ 13
Шрифт:
Запис:
1
И бы́сть по си́хъ и҆ ѹ҆ а҆весало́ма сн҃а дв҃два. б̂ѣ сестра̀ взо́рꙋ добра̀ ѕѣло. и҆́мѧ же б̂ѣ е́и ѳама́рь. и҆ възлюбѝ ю҆̀ а҆м꙽мо́нъ сн҃ъ дв҃двъ·
2
И҆ та́ко скорбѧ́ше а҆м꙽мо́нъ. ꙗ҆́ко и҆ разболѣ́сѧ ѕѣ́ло сестры̀ е҆го ра́ди ѳамары ꙗ҆́ко дв҃ою бѧ́ше сїѧ. и҆ бѧ́ше при́сно пред̑ ѻ҆чи́ма а҆м꙽мо́нема хоти́ма ꙗ҆́коже и҆мѣти ю҆̀·
3
И҆ б̂ѣ а҆м꙽мо́нꙋ бра́тꙋ ча́дь. и҆́мѧ е҆мꙋ, і҆ѻ҆а҆нада́въ сн҃ъ самаи́нъ, бра́та двд҃ва. і҆ѻ҆а҆нада́въ б̂ѣ мꙋжъ мꙋ́дръ ѕѣ́ло.
4
И҆ ре́че е҆мꙋ і҆ѻ҆а҆нада́въ что̀ т̂и ꙗ҆ко та́ко боли́ши сн҃ꙋ цр҃евъ, не възвѣща́еши м̂и ѹ́тро ѹ́тро·
5
И҆ рече е҆мꙋ а҆м꙽мо́нъ ѳама́рꙋ сестрꙋ̀ а҆весало́млю бра́та свое҆го а҆зъ люблю̀·
6
И҆ ре́че е҆мꙋ і҆ѻ҆а҆нада́въ. лѧ́зи на посте́ли свое́и и҆ разболи́сѧ. и҆ вни́дет꙽ ѿц҃ъ ви́дѣти тебѐ. и҆ рече́ши к не́мꙋ да прїидетъ ѹ҆бо ѳама́рь сестра̀ моѧ̀. и҆ да м̂и да́сть ꙗ҆́сти. и҆ да сътвори́тъ пред̑ ѻ҆чи́ма мои́ма ꙗ҆́дь. и҆ да ви́дѣвъ неглѝ мощѝ начнꙋ̀ вкꙋси́ти ѿ рꙋкѝ е҆ѧ̀·
7
И҆ ѻ҆бъле́же а҆м꙽мон̑҇ и҆ разболѣ́сѧ. и҆ вни́де цр҃ь ви́дѣти е҆го. и҆ рече а҆м꙽мо́нъ къ цр҃ю. да прїидетъ ѹ҆́бо ѳама́рь сестра̀ моѧ къ мн̂ѣ, и҆ да и҆спече́тъ м̂и дв̂ѣ ча́сти мѧ́снѣ пред̑ ѻ҆чи́ма мои́ма. да бы́хъ ꙗ҆́лъ ѿ рꙋкꙋ е҆ѧ̀·
8
И҆ посла̀ дв҃дъ къ ѳама́рѣ в до́мъ гл҃ѧ. и҆дѝ нн҃ѣ в дом̑ а҆м꙽мона бра́та свое҆го, и҆ сътворѝ е҆мꙋ ꙗ҆́дь·
9
І҆ и́де ѳама́рь в до́мъ а҆м꙽мо́нь бра́та свое҆го. и҆ то́и лежа́ше и҆ взѧ́тъ тꙋ́къ. и҆ потща́вши ѹ҆стро́и пред̑ ѻ҆чи́ма е҆го. и҆спечѐ ѻ҆́бѣ ча́сти мѧ́снѣ въ сковрадѣ̀·
10
І҆ и҆зложѝ ѧ҆̀ на блю́до пред̑ не́го, и҆ не въсхотѣ ꙗ҆́сти. и҆ рече а҆м꙽мо́нъ и҆жденѣте вс̂ѧ мꙋжа. и҆же сꙋть над̑ м̂ѧ пришлѝ. і҆ и҆згна́ша вс̂ѧ мꙋжа, и҆же бѣша пришлѝ над о́нь·
11
И҆ рече ам̑мон̑҇ къ ѳама́рѣ. внесѝ м̂и ꙗ҆́дь внꙋтренюю клѣть, и҆ ꙗ҆́мъ ѿ рꙋкꙋ твое́ю. и҆ взѧ́тъ ѳама́рь ча́сть в рꙋ́кꙋ, юж̑ б̂ѣ и҆спекла̀. и҆ внесѐ а҆м꙽мо́нꙋ братꙋ с̂и въ внꙋтренюю клѣть·
12
И҆ предъста́ви е҆мꙋ да ꙗ҆́сть. і҆ и́мъ ю҆̀ рече е́й лѧ́зи со мною се́стро моѧ̀·
13
И҆ реч̑҇ е҆мꙋ ѳама́рь. н̂и брате мо́и и҆ не погꙋбѝ менѐ. поне́же не сътвори́тсѧ си́це въ і҆и҆л҃и. не сътворѝ безꙋмїѧ сего·
14
И҆ а́зъ ка́мо де́жꙋ безче́стїе моѐ, и҆ т̂ы бꙋ́деши съ безꙋмными въ і҆и҆л҃и. и҆ нн҃ѣ ѹ҆же гл҃и къ цр҃ю, да не ѿлꙋчи́тъ менѐ ѿ тебѐ. и҆ не въсхотѣ̀ а҆м꙽мо́нъ послꙋш́ати гла́са е҆ѧ̀. і҆ и́мъ ю҆̀ лѧ́же с не́ю. и҆ възненавѣ́дѣ ю҆̀ ѿто́лѣ а҆м꙽мо́нъ. нена́вистїю вели́кою ѕѣ́ло. ꙗ҆́ко ве́лїемъ възненавѣдѣ́нїемъ възненавидѣ̀ ю҆̀ паче любвѐ е҆ю́же люблѧ́ше ю҆̀. и҆ реч̑҇ е́й а҆м꙽мо́нъ, въста́ни и҆ ѿи҆дѝ·
15
И҆ рече е҆мꙋ ѳама́рь. н̂и бра́те ꙗ҆ко зло́ба бо́лши е҆сть послѣ́днѧѧ па́че прь́выѧ. ю҆́же сътворѝ со мно́ю, е҆же ѿпꙋсти́ти менѐ, и҆ не хотѧ́ше а҆м꙽мо́нъ слы́шати гла́са е҆ѧ̀·
16
Призва̀ ѻ҆́трока свое҆го, дръжа́щаго дом̑ е҆го, и҆ рече е҆мꙋ и҆спꙋстѝ ѹ҆бо во́нъ сїю ѿ ме́не, и҆ заключѝ две́ри, да не вни́дет꙽·
17
И҆ б̂ѣ ри́за на не́и дꙋгна́та, ꙗ҆́ко такꙋ ри́зꙋ ноша́хꙋ дще́ри цр҃ѧ, сꙋщаѧ дв҃ица, и҆ такїи ѻ҆скри́лы ноша́хꙋ, і҆ и҆згна̀ ю҆̀ во́нъ слꙋга̀ е҆го, и҆ затворѝ две́ри за не́ю.
18
И҆ взе́мши ѳама́рь по́пелъ насы́па на главꙋ̀ с̂и, и҆ ѻ҆де́ждꙋ дꙋгна́тꙋ, и҆ ю́же ноша́ше све́рже с꙽ себѐ, и҆ възложѝ рꙋцѣ своѝ на главꙋ̀ свою, и҆ рѣ́ющисѧ и҆дѧ́ше, и҆ въпїѧ́ше·
19
И҆ рече к не́и а҆весоло́мъ бра́тъ еѧ̀, еда а҆м꙽мо́нъ бра́тъ тво́и бы́сть с тобо́ю, т̂о и҆ нн҃ѣ се́стро ѹ҆молча́и ꙗ҆́ко бра́тъ е҆сть, и҆ не полага́и с̂и на срд̑цы ꙗ҆́ко гл҃ати словеса̀ с̂и, и҆ сѣде ѳама́рь вдовꙋ́ющи и҆ молча́щи в домꙋ̀ а҆весоло́ма бра́та свое҆го·
20
И҆ слы́ша дв҃дъ цр҃ь словеса̀ с̂и и҆ разгнѣ́васѧ ѕѣло·
21
И҆ не поскорбѣ̀ дш҃ею ѻ҆ а҆м꙽мо́нѣ сн҃ѣ свое҆мъ, поне́же люблѧ́ше е҆го ꙗ҆́ко прьве́нецъ б̂ѣ е҆мꙋ, и҆ не гл҃а а҆весоло́мъ ѿто́лѣ съ а҆м꙽мо́ном꙽ ни ѻ҆ до́брѣ ни ѻ҆ ѕлѣ̀, поне́же възненави́дѣ а҆весоло́мъ а҆м꙽мо́на, того ра́ди поне́же бѧ́ше ѳама́рь сестрꙋ̀ е҆го нарꙋга́лъ·
22
И҆ бы́сть ми́мошед̑шимъ дн҃емъ мно́гимъ, и҆ бѣша стригꙋще ѻ҆́вца а҆весоло́мови рабѝ, в꙽ веласо́рѣ въ ѻ҆́бласти е҆фре́мли, и҆ призва̀ а҆весоло́мъ вс̂ѧ сн҃ы цр҃ѧ·
23
И҆ прїиде а҆весоло́мъ къ цр҃ю, и҆ рече с̂е нн҃ѣ стригꙋтъ рабѝ твоѝ, т̂о дабы̀ ше́лъ цр҃ь и҆ ѻ҆́троцы е҆го с ни́мъ къ мн̂ѣ рабꙋ свое҆мꙋ·
24
И҆ рече цр҃ь къ а҆весоло́мꙋ сн҃ꙋ свое҆мꙋ, н̂и сн҃ꙋ мо́и не и҆́демъ вс̂и, да т̂и не сътвори́мъ тѧ́жка, и҆ нꙋжда́ше и҆̀, и҆ не хотѧ́ше цр҃ь и҆тѝ, и҆ блс̑҇ви и҆̀·
25
И҆ рече а҆весоло́мъ, т̂о да и́детъ понѐ а҆м꙽мо́нъ бра́тъ мои, и҆ рече е҆мꙋ цр҃ь т̂о да почто̀ и́детъ с тобо́ю а҆м꙽мо́нъ·
26
И҆ нꙋжа́ше и҆̀ а҆весоло́мъ, и҆ пꙋстѝ с нимъ а҆м꙽мо́на, и҆ вс̂ѧ сн҃ы цр҃ѧ·
27
И҆ сътворѝ а҆весоло́мъ пи́ръ ꙗ҆́коже тво́ритъ пи́ръ цр҃ь, и҆ заповѣда а҆весоло́мъ ѻ҆́трокомъ свои҆мъ гл҃ѧ, ви́дите е҆гда̀ възблажа́етъ срд̑це а҆м꙽мо́не и҆ рекꙋ ва́мъ ѹ҆бїите а҆ммо́на до сме́рти, и҆ не ѹ҆бо́итесѧ а҆́з꙽ б̂о повелѣва́ю вам̑, мꙋжа́итесѧ и҆ бꙋдете въ сн҃ы си́лны·
28
И҆ сътвори́ша ѻ҆́троцы а҆весоло́мли а҆ммо́нꙋ, ꙗ҆́коже заповѣ́да и́мъ а҆весоло́мъ и҆ ѹ҆би́ша и҆̀, и҆ въста́ша сн҃ове цр҃ви и҆ всѣде ко́жд̑о на мща̀ своѐ и҆ бѣжаша·
29
И҆ бы́сть сꙋщемъ и́мъ на пꙋтѝ, слꙋхъ до́иде дв҃да гл҃ѧ, и҆збѝ а҆весоло́мъ вс̂ѧ сн҃ы цр҃евы, и҆ не и҆збы̀ ѿ ни́хъ ни е҆ді́н же·
30
И҆ въста́въ двд̑ъ цр҃ь све́рже ри́зы своѧ̀ и҆ лѧ́же ни́цъ на землѝ, и҆ вс̂и ѻ҆́троцы пред̑стоꙗ҆́щїѝ е҆мꙋ сверго́ша ри́зы своѧ·
31
И҆ рече и҆ѻ҆а҆нада́въ сн҃ъ самаи́нъ, бра́та дв҃два, и҆ рече да не речетъ господи́нъ мо́и цр҃ь, ꙗ҆́ко вс̂ѧ ѻ҆́троки и҆ сн҃ы цр҃ѧ ѹ҆би́ша, н̂о а҆м꙽мо́нъ е҆сть е҆ді́нъ ѹ҆бїе́нъ, ꙗ҆́ко то́и и҆зъ ѹ́стъ а҆весоло́мꙋ не и҆схожда́ше, ѿнелѣже ѻ҆брꙋга̀ сестрꙋ̀ е҆го ѳама́рꙋ·
32
И҆ нн҃ѣ да не полага́етъ с̂и на срд̑цы господи́н꙽ мо́и цр҃ь словесѐ сего гл҃ѧ, ꙗ҆́ко вс̂и цр҃їе сн҃ове не и҆збїе́ни бы́ша, н̂о то́кмо а҆м꙽мо́нъ е҆сть е҆ді́нъ ѹ҆бїе́нъ·
33
И҆ бѣжа̀ а҆весоло́мъ и҆ ви́дѣ ѻ҆́трокъ слꙋжа́и пред̑ ѻ҆чи́ма е҆го, и҆ с̂е люді́и мно́жество и҆дꙋще пꙋте́мъ и҆ѻ҆а́мъскимъ съза́ди е҆го съ страны̀ го́ръски въ и҆схо́дѣ·
34
І҆ и́де слꙋга̀ и҆ възвѣстѝ цр҃ю, и҆ рече е҆мꙋ мꙋ́жа ви́жꙋ на пꙋтѝ іѻ҆рда́ньстемъ, съ стра́ны горъ сходѧ̀, и҆ рече и҆ѻ҆а҆нада́в꙽ къ цр҃ю сн҃ове цр҃еви прихо́дѧтъ, по словесѝ раба̀ твое҆го та́ко бы́сть·
35
И҆ бы́сть е҆гда̀ сконча̀ гл҃ѧ, и҆ сн҃ови цр҃еви прїидо́ша, и҆ въздвиго́ша гласъ свои и҆ пла́кашасѧ и҆ са́мъ цр҃ь и҆ вс̂и ѻ҆́троцы е҆го и҆ пла́кашасѧ пла́чемъ велики́мъ ѕѣ́ло·
36
И҆ а҆весоломъ въстав̑҇ бѣжа̀, і҆ и́де къ ѳол꙽ми сн҃ꙋ е҆мно́ню цр҃ю геѳьсе́рь, въ землю гад̑скꙋ, и҆ пла́касѧ двд҃ъ цр҃ь по сн҃ꙋ свое҆мъ вс̂ѧ дн҃и·
37
И҆ а҆весоло́мъ бѣжа̀ і҆ и́де в геѳ̑҇се́рь, и҆ бѣ т̂ꙋ, г҃ лѣта·
38
И҆ помы́сли цр҃ь и҆зыи́ти въ слд̑ѣ а҆весоло́ма, ꙗ҆́ко не бѧ́шесѧ ѹ҆тѣшилъ ѻ҆ а҆м꙽мо́нѣ, ꙗ҆́ко ѹ҆бїенъ бѧ́ше·
Джерела
