Ostroh BibleДруга книга Самуїлова (Друга книга царів), розділ 20
Шрифт:
Запис:
1
И т̂ꙋ нарица́емъ сн҃ъ безакон̑҇ныи, и҆́мѧ е҆мꙋ саве́и. сн҃ъ въхо́ровъ. мꙋжъ и҆е҆мене́ѻ҆въ. и҆ въстрꙋбѝ трꙋбо́ю и҆ рече нѣ́сть намъ ча́сти съ дв҃домъ, ни́же достоѧ́нїѧ на́мъ ѹ҆ сн҃а і҆ѻ҆сѣ́ева. възврати́тесѧ мꙋжи в се́ла ва́ша і҆и҆л҃ьтеска·
2
И҆ ѿстꙋпи́ша вс̂и мꙋжи і҆и҆л҃еви ѿ дв҃да до саве́и. сн҃а въхо́рова. мꙋжи же і҆ѹ́дины прилепишасѧ къ цр҃ю свое҆мꙋ ѿ і҆ѻ҆рда́на даже и҆ до і҆ерс̑҇ли́ма·
3
И҆ вни́де дв҃дъ въ до́мъ сво́и въ і҆ерс̑҇лим̑ и҆ поꙗ҆́тъ цр҃ь, і҃. подло́жницъ своих̑ ꙗ҆́же б̂ѣ ѻ҆ста́вилъ стрещѝ до́мъ свои ѿ до́мꙋ стражбы̀ и҆ прекормѝ ѧ҆̀ и҆ ѿто́лѣ не вни́де к ни́мъ. и҆ бѣша хранѧ́щесѧ до дн҃е см҃рти е҆го. вдо́в꙽скїи живꙋщи·
4
И҆ рече цр҃ь къ а҆меса́и созовѝ мꙋжа і҆ѹдины тремѝ дн҃ьми т̂ы бꙋди с ни́ми·
5
І҆ и́де а҆меса́и събра́ти мꙋжъ і҆ѹ́диных̑. и҆ ѹ҆медлѝ ѡ вре́мене. ꙗ҆́коже повелѣ̀ е҆мꙋ дв҃дъ и҆ рече дв҃дъ къ а҆ве́сѣ. нн҃ѣ ѕл̂о сътвори́т꙽ нам̑ саве́и сн҃ъ вехо́рь па́че а҆весоло́ма·
6
И҆ нн҃ѣ т̂ы пои҆мѝ съ собо́ю ѻ҆́троки господи́на свое҆го. и҆ женѝ въ слѣ́дъ е҆го. е҆да ка́ко ѻ҆брѧ́щет̑ себѣ̀ гра́ды тве́рды, и҆ застѣнит̑сѧ ѿ ѻ́чїю на́шею·
7
І҆ и҆зыидо́ша въ слд̑ѣ е҆го а҆меса́и и҆ мꙋжи и҆ѻ҆а́вли. и҆ ѻ҆ хереѳ̑҇ и҆ ѻ҆ фелеѳъѳі́и. и҆ вс̂и си́лнїи і҆ и҆зыидо́ша и҆зъ і҆ерс̑҇лі́ма. гна́ти въ слѣд꙽ саве́ѧ, сн҃а вохо́рїева·
8
І҆ е҆гда̀ бѧ́хꙋ ѹ҆ ка́мени вели́каго и҆же въ гаваѻ́нѣ и҆ а҆меса́и и҆зы́иде пред̑ ни́ми. и҆ѻ҆а́въ препоꙗ҆́санъ ри́зами ѻ҆дѣꙗ҆́нїѧ свое҆го и҆ верхꙋ̀ того̀ препоѧ́санъ мече́мъ. припрѧ́женымъ при чре́слѣхъ е҆го. въ но́жнахъ е҆го и҆ е҆гда ѿи́де. и҆ ме́чь и҆зъсꙋ́нꙋсѧ и҆ не падѐ·
9
И҆ рече и҆ѻ҆а́въ а҆меса́ю. здра́въ л̂и е҆си бра́те. и҆ прїꙗ҆́тъ і҆ѻ҆а́въ рꙋко́ю де́сною за бра́дꙋ а҆меса́е҆вꙋ лобза́ти и҆̀ хотѧ̀·
10
А҆меса́и же не бреже́сѧ меча̀ и҆же при бе́дрꙋ и҆ѻ҆а́влю. и҆ впадѐ на́нь ѡ и҆ѻа́ва ме́чь въ чре́сла е҆го і҆ и҆злїѧ́сѧ чрево е҆го на землю. и҆ не повто́ри е҆го и҆ ѹ҆́мре т̂ꙋ а҆меса́и. и҆ѻ҆а́в же и҆ а҆ве́са бра́тъ е҆го гна́ста въ слѣдъ саве́ѧ сн҃а вохо́рѧ·
11
И҆ мꙋжъ ста̀ над ни́ми нѣ́кто ѿ ѻ҆́трокъ и҆ѻ҆а́вль и҆ рече кт̂о хотѧ́и бы́ти дв҃двъ въ слѣдъ и҆ѻ҆а́ва и҆ а҆ве́са да и҆́детъ·
12
А҆меса́и ме́ртвъ валѧ́шесѧ въ кро́ви посредѣ пꙋтѝ. и҆ ви́дѣвъ мꙋжъ ꙗ҆́ко стоѧт̑ вс̂и лю́дїе. и҆ съвратѝ а҆меса́ѧ с пꙋтѝ на село̀. и възложа́ше на́нь ри́зы ви́дѧще вс̂ѧ приходѧ́щаѧ над̑ не́го и҆ ста́юща·
13
И҆ бысть е҆гда̀ принесо́ша ѿ пꙋтѝ. и҆ прїидо́ша вс̂и мꙋжи і҆и҆л҃еви въ слѣдъ и҆ѻ҆а́ва е҆же гна́ти въ слѣдъ саве́ѧ сн҃а вохо́рѧ·
14
Но се́и ѻ҆бышед̑ вс̂ѧ колѣ́на і҆и҆л҃ева. и҆ прїиде въ е҆ве́ль и҆ въ е҆ѳъмахꙋ́рꙋ, и҆ вс̂и въ харꙋ́и. и҆ вс̂и гра́ды събра́шасѧ, і҆ и҆до́ша въ слѣ́дъ е҆го·
15
И҆ пришед̑ше и҆ въполчи́шасѧ на́нь ѻ коло, и҆ во е҆ве́лѣ. и҆ въ ѳарма́хꙋ. и҆ възе́мше число̀ рас꙽сы́пашасѧ ꙗ҆́ко и҆ пе́рсть на град̑ и҆ стоѧ́ше ѹ҆ прь́выѧ стѣны̀ гра́да. и҆ вс̂и лю́дїе и҆же съ и҆ѻ҆а́вомъ дꙋ́мающе ка́ко б̂ы шлѝ и҆ низложи́ли стѣны град̑ныѧ·
16
И҆ рече жена̀ мꙋ́дра съ гра́да. и҆ рече слы́шите м̂ѧ слы́шите. і҆ и҆ рцѣ́те и҆ѻ҆а́вꙋ да приближит̑сѧ до здѣ̀ и҆ гл҃ю к не́мꙋ·
17
И҆ приближи́сѧ к не́и и҆ѻ҆а́въ и҆ реч̑҇ жена̀ т̂ы ли е҆си и҆ѻ҆ав̑҇ ѻ҆н же реч̑҇ а҆зъ·
18
И҆ реч̑҇ е҆мꙋ жена̀ послꙋш́аи словес̑҇ рабы̀ свое́ѧ. и҆ реч̑҇ е́и и҆ѻ҆ав̑҇ послꙋш́аю·
19
И҆ реч̑҇ с̂е слово гл҃ах꙽ гл҃ющи къ старѣ́ишинам̑ вопроша́ема вопросѝ во е҆ве́ли, и҆ въ е҆н꙽да́нѣ. а҆ще ѻ҆скꙋдѣша е҆же положи́ша вѣ́рнїи і҆и҆л҃еви. вопраша́ю҆ще въспро́сѧт̑ во е҆ве́ли, и҆ та́ко рече а҆ще ѻ҆скꙋдѣша.
20
А҆зъ е҆смъ въ ми́ръ, и҆ ѹ҆тверже́нїе і҆и҆л҃ево. ты́ же и҆́щеши ѹ҆мори́ти гра́дъ. и҆ ма́тере гра́дъ і҆и҆л҃евъ. и҆ почт̂о ты̀ потоплѧ́еши достоѧ́нїе гн҃е·
21
И҆ ѿвѣща̀ и҆ѻ҆а́въ рече млс̑҇тивыи млс̑҇тивы́и а҆ще потоплю̀. и҆ а́ще разрꙋшꙋ̀·
22
Не та́ко сло́во. ꙗ҆́ко мꙋжъ со горы̀ е҆фрѣ́млѧ. саве́и сн҃ъ вохо́рь и҆́мѧ е҆мꙋ. то́и взѧ́т꙽ рꙋ́кꙋ свою на цр҃ѧ дв҃да. дади́те м̂и то́кмо того̀ е҆ді́наго. и҆ ѿи́демъ кро́мѣ ѿ гра́да. и҆ рече жена̀ къ и҆ѻ҆а́вꙋ. с̂е глава̀ е҆го све́ржет̑сѧ к тебѣ съ стѣны̀ град̑ныѧ·
23
И҆ вни́де жена̀ къ всѣмъ лю́демъ. и҆ гл҃а къ всемꙋ̀ гра́дꙋ мꙋ́дростїю свое́ю. и҆ ѿсѣко́ша главꙋ̀ саве́инꙋ сн҃а вохо́рѧ. и҆ съверго́ша ю҆̀ къ и҆ѻ҆а́вꙋ. і҆ и҆ѻ҆а́въ въстрꙋбѝ в꙽ трꙋбꙋ̀. и҆ разыидо́шасѧ мꙋжи ѿ гра́да вс̂и на се́ла своѧ̀. а҆ и҆ѻ҆а́въ възврати́сѧ въ і҆ерс̑҇лим̑ къ цр҃ю·
24
Бѣ б̂о и҆ѻ҆а́въ надо всѣмѝ си́лными і҆и҆л҃евыми. и҆ ванѣѧ сн҃ъ и҆ѻ҆да́евъ. над̑ хе́рїю. и҆ над̑ велеѳі́ею·
25
А҆донира́мъ же над̑ да́ньми. и҆ а҆сафат̑ сн҃ъ а҆хилꙋ́ѳъ. воспомина́ѧ, и҆ сꙋса́ра кни́гочїи, и҆ садо́хъ. и҆ а҆вїа҆ѳа́ръ і҆е҆ре́ѧ·
26
Геи́ра. и҆ ѻ҆а҆и́ръ бы́сть жрец̑҇ дв҃двъ·
Джерела
