Ostroh BibleДруга книга Самуїлова (Друга книга царів), розділ 21
Шрифт:
Запис:
1
И бы́сть гла́дъ на землѝ въ дн҃и дв҃двѣ, г҃, лѣта, лѣто подле лѣ́та. и҆ възыска̀ дв҃дъ лица̀ гн҃ѧ·
2
І҆ рече г҃ь саѹ́ла ради и҆ проли́тїѧ кро́ве до́мꙋ е҆го ѻ҆бидѝ ѻ҆би́да сїа е҆сть поне́же ѹ҆мрътвѝ гаваѻ҆ни́ты·
3
И҆ призва̀ цр҃ь гаваѻ҆ни́ты, и҆ рече к ни́мъ. и҆ гаваѻ҆ни́тѧне. не сꙋть сн҃ове і҆и҆л҃еви. н̂о ѿ сѣмене а҆м꙽море́и҆на, н̂о сн҃ове і҆и҆л҃еви клѧ́шасѧ к ним̑ ꙗ҆́ко не вое҆ва́ти на́ нѧ.
4
Саѹ́л же възыска̀ попра́тї ѧ зави́дѧще и҆мъ сн҃ове і҆и҆л҃еви і҆ и҆ѹ́дины·
5
И рече двд̑ъ къ гаваѻ҆ни́тѧномъ. чт̂о сътворю̀ ва́мъ. и҆ ка́ко в̂ы ѹ҆молю̀. да блс̑҇ви́те достоꙗ҆́нїе гн҃е·
6
И҆ рѣша е҆мꙋ гаваѻ҆ни́ти нѣ́сть на́мъ ѻ҆бще́нїѧ ѻ҆ сребрѣ̀ и҆ зла́тѣ, съ саѹ́ломъ и҆ съ до́мом̑ е҆го. и҆ нѣ́сть намъ мꙋжа ѹ҆мори́ти ѿ всего і҆и҆л҃ѧ. и҆ рече и҆мъ чт̂о вы̀ гл҃ете и҆ сътворю̀ вамъ·
7
И҆ рѣша къ цр҃ю. мж̑ꙋ сконча́выи н̂ы и҆ погна́выи н̂ы. и҆ помышлѧ́ше потреби́ти ны̀. въспроти́вимсѧ е҆мꙋ да не бꙋдетъ въ всѣ́хъ предѣлех꙽ і҆и҆л҃елвых꙽. дади́те нам̑, з҃, мꙋжъ ѿ сн҃овъ е҆го, и҆ м꙽сти́мъ и҆хъ ѽ г҃и. на хо́лмѣ саѹ́ли и҆збра́нномꙋ г҃ꙋ. и҆ рече цр҃ь а҆зъ да́мъ ва́мъ·
8
И҆ пощадѣ̀ цр҃ь мем꙽ѳивосте́ѧ. сн҃а і҆ѻ҆а҆наѳа́нѧ. сн҃а саѹ́лѧ, клѧ́твы ра́ди гн҃ѧ·
9
І҆ и҆же посредѣ и҆хъ посредѣ дв҃домъ и҆ посредѣ і҆ѻ҆а҆наѳа́ном̑ сн҃омъ саѹ́лимъ·
10
И҆ поѧ́тъ цр҃ь дв̂а сн҃а и҆ре́сѳы дще́ри а҆и́ѧ, подло́жници саѹ́лѧ. ꙗ҆же родѝ саѹ́лꙋ, и҆р꙽моні́ѧ, и҆ мем꙽ѳивосте́ѧ, и҆ е҃, сн҃овъ мела́ховы, дще́ре саѹ́лѧ, ꙗ҆́же родѝ е҆здрїи҆лі́ю, сн҃ꙋ верзеи́лю маѹ҆ла́ѳи·
11
И҆ да́сть ѧ҆̀ в рꙋки гаваѻ҆нитомъ. и възведо́ша ѧ҆̀ на́ горꙋ пред̑ гм҃ъ. и҆ падо́ша т̂ꙋ, з҃, въкꙋпѣ. тїи же ѹ҆мро́ша во́ дн҃и жа́твеныѧ. въ пр́ьвое нача́ло жа́твы ꙗ҆чме́нѧ·
12
И҆ възе́м꙽ши ре́сѳа д꙽щи а҆ке́ва взѧ̀ вре́тище и҆ постла̀ е҆го себѣ сама̀ на ка́мени въ нача́ло жа́твеное ꙗ҆чме́нѧ. до́ндеже снидо́ша на́ нѧ во́ды бж҃їѧ съ нб҃се. и҆ не дадѧ́ше пти́цамъ нбс̑҇нымъ дн҃їю. н̂и ѕвѣ́ремъ зе́мнымъ но́щїю почи́ти на ни́хъ·
13
И҆ повѣда́ша дв҃дꙋ вс̂ѧ е҆ли́ко сътворѝ ре́сѳа дщѝ а҆и́ѧ под̑ло́жница саѹ́лѧ·
14
И҆ шед̑ дв҃дъ и҆ взѧ̀ ко́сти саѹ́лѧ. и҆ ко́сти і҆ѻ҆а҆наѳа́нѧ сн҃а саѹ́лѧ, ѿ мꙋжъ а҆ви́съ галад̑скихъ. и҆же бѣша ѹ҆кра́ли со стѣны̀ веѳъса́нѧ. повѣсившемъ ѧ҆̀ т̂ꙋ и҆ноплеме́нникомъ. въ дн҃ь во́нже поби́ша и҆ноплеме́нницы саѹ́ла въ гел꙽вꙋ́и·
15
И҆ възнесѐ дв҃дъ ко́сти саѹ́лѧ ѿтꙋ́дꙋ. и҆ ко́сти і҆ѻ҆а҆наѳа́нѧ сн҃а саѹ́лѧ. и҆ събра́въ ко́сти и҆зби́вшихъ·
16
И҆ погребо́ша ко́сти саѹ́лѧ. и҆ ко́сти и҆ѻ҆а҆наѳа́нѧ сн҃а е҆го, и҆ ко́сти всѣ́хъ и҆зби́вшихъ. въ землѝ венїа҆ми́новѣ. въскра́и гроба̀ ки́сова ѿц҃а е҆го. и҆ сътвори́ша вс̂ѧ е҆ли́ко заповѣ́да цр҃ь, и҆ послꙋш́а б҃ъ землѧ̀ по сих̑·
17
И бы́сть па́ки бра́нь въ и҆ноплеме́нницѣхъ съ і҆и҆л҃ьты. и҆ сни́де дв҃дъ и҆ ѻ҆́троцы е҆го с ни́мъ. и҆ би́шасѧ съ и҆ноплеме́нники ѹ҆трж̑ꙋсѧ дв҃дъ·
18
І҆ е҆сві́и же и҆же бѣ̀ ѿ внꙋк꙽ рафа́иновыхъ ѹ҆ него́же б̂ѣ вага̀ копїѧ е҆го́, т҃, си́кль мѣры мѣ́дѧны и҆ то́и бѣ̀ препоꙗ҆́санъ ѻ҆рꙋжїем꙽ своим̑ хотѧ̀ поби́ти дв҃да·
19
И҆ възва̀ и҆̀ а҆ве́са сн҃ъ сарꙋ́инъ. і҆ и҆зба́ви дв҃да а҆ве́са. и҆ поразѝ и҆ноплеме́нника и҆ ѹ҆морѝ и҆̀·
20
И҆ тогда̀ клѧ́шасѧ мꙋжи дв҃дви гл҃юще. не вни́деши ктомꙋ̀ на́ брань с нами, да не ѹ҆гаси́ши свѣти́лника і҆и҆л҃ева·
21
И҆ бы́сть по си́хъ бра́нь въ не́ѳе, съ и҆ноплеме́нники. тогда̀ поразѝ савохѣ́и, и҆же ѿ а҆со́ѳ꙽ собра́нныѧ внꙋки гига́нтовы·
22
И҆ быс̑҇ паки бра́нь въ ровѣ̀ съ и҆ноплемен̑҇ники и҆ поразѝ е҆леа҆на́нъ сн҃ъ а҆лворїѧ виѳлеѻ҆́м꙽скаго. голїа́ѳа и҆же ѿ геѳ꙽ѳе́ѧ. и҆ дре́во ко́пїѧ е҆го бы́сть вели́ко ѕѣло·
23
И҆ бы́сть паки бра́нь въ ге́ѳѣ. и҆ бѣ мꙋжъ ѿ мадо́на. и҆ прь́сты рꙋкꙋ е҆го и҆ но́гꙋ е҆го по, ѕ҃, пр́ьстъ, кои́ждо рꙋцѣ и҆ но́ѕѣ. число́мъ, к҃, и҆ д҃. и҆ то́и роди́сѧ ѿ ра́ѳы·
24
И҆ е҆гда ѹ҆ничижѝ і҆и҆л҃ѧ, тогда ѹ҆би и҆̀ и҆ѻ҆а҆наѳа́нъ сн҃ъ сафа́евъ бра́та дв҃два·
25
Четы́ри сїи роди́шасѧ ѿ внꙋ́къ гига́нтовыхъ раѳѣши·
26
Въ ге́ѳѣ, и҆ падо́ша ѿ рꙋ́кꙋ двд҃вꙋ, и҆ ѿ рꙋ́кꙋ ра́бъ е҆го·
Джерела
