Ostroh BibleДруга книга Самуїлова (Друга книга царів), розділ 22
Шрифт:
Запис:
1
И гл҃а дв҃дъ къ г҃ꙋ словеса̀ пѣсни сеѧ̀. во дн҃ь во́нже и҆зба́ви и҆̀ г҃ь и҆з рꙋ́ки всѣ́хъ враг̑҇ е҆го, і҆ и҆з рꙋ́ки саѹ҆́ловы·
2
И рече г҃ь ка́мень мо́и, ѹ҆твръженїе моѐ, и҆ сп҃ситель мо́и б҃ъ мо́и, храни́тель бы́сть мо́и. ѹ҆пова́ѧ бꙋ́дꙋ на́ тѧ. защит̑никъ мо́и и҆ ро́гъ сп҃се́нїа мое҆го. застꙋ́пникъ мо́и прибѣ́жище сп҃се́нїю мое҆мꙋ и҆ ѿ непра́вды сп҃се́ши м̂ѧ·
3
Хвалѧ́и призовꙋ̀ г҃а, и҆ ѿ вра́гъ мои҆хъ сп҃сꙋсѧ·
4
Ꙗ҆́ко ѻ҆дръжа́ша м̂ѧ бо́лѣзни смр҃тныѧ, и҆ пото́цы безако́нїа смꙋти́ша м̂ѧ·
5
И҆ болѣ́зни а҆́довы ѻ҆быдо́ша м̂ѧ. вари́ша мѧ сѣти смерътныѧ·
6
И҆ въ скорбъ мою̀ призва́хъ г҃а. и҆ къ б҃ꙋ мое҆мꙋ во́звахъ. и҆ ѹ҆слы́ша м̂ѧ ѿ ст҃ыа цр҃кви свое́ѧ глас̑҇ мо́и. и҆ во́пль мо́и пред̑ ни́мъ вни́дет꙽ во ѹ҆́ши е҆го·
7
И҆ подвижа́сѧ и҆ трепет̑на бы́сть землѧ̀. и҆ ѻ҆снова́нїа го́ръ смѧто́шасѧ, и҆ подви́зашасѧ и҆ трепе́тна бы́сть и҆ прогнѣ́васѧ на́ нѧ г҃ь и҆хъ·
8
Възы́де ды́мъ гнѣ́вомъ е҆го. и҆ ѻ́гнь ѿ лица̀ е҆го воспланет̑сѧ. и҆ ѹ́глїе возгорѣшасѧ ѿ не́го·
9
Преклонь нб҃са и҆ сни́де, и҆ примра́къ под̑ нога́ма е҆го·
10
И҆ въсѣ́де на херꙋви́мъ, и҆ ле́тѣ и҆ ꙗ҆ви́сѧ на кры́лꙋ вѣтренюю·
11
И҆ положѝ тм̂ꙋ за кро́въ свой. и҆ ѻ́крестъ е҆го кро́въ е҆го. те́мна вода̀ во ѻ́блацѣхъ а҆е́рныхъ. ѿ сїѧнїа пред̑ ним̑ разгорѣшасѧ ѹ҆́глїе ѻ҆гне́нїи·
12
И҆ возгремѣ съ нб҃се г҃ь, и҆ вы́шнїи дас̑҇ гла́съ сво́и.
13
И҆ пꙋ́сти стрѣ́лы и҆ расточи ѧ҆̀. и҆ бле́снꙋ мо́лнїѧ ѹ҆стра́ши ѧ҆̀·
14
И҆ ꙗ҆ви́шасѧ и҆сто́чницы мор̑҇стїи. и҆ ѿкры́шасѧ ѻ҆снова́нїѧ в꙽селе́ныѧ, ѿ запрѣще́нїѧ гн҃ѧ. и҆ ѿ дох̑нове́нїа дх҃а гнѣва твое҆го·
15
Посла̀ свы́ше и прїѧ́тъ м̂ѧ и҆ под̑ѧ́тъ мѧ ѿ во́дъ мно́гъ·
16
І҆ и҆зба́ви м̂ѧ ѿ вра́гъ мои҆хъ си́лныхъ, и҆ ѿ ненави́дѧщих̑ м̂ѧ. ꙗ҆́ко ѹ҆твръди́шасѧ па́че менѐ·
17
Вари́ша м̂ѧ во дн҃ь печа́ли мое́а и҆ бысть г҃ь под̑ѧ́тель мо́и·
18
И҆ възведе м̂ѧ на широтꙋ̀ и҆зба́ви м̂ѧ, ꙗ҆ко вохсотѣ̀ м̂ѧ·
19
И҆ возда́сть м̂и г҃ь по правдѣ мое́й и҆ по чистотѣ̀ рꙋ́кꙋ мое́ю възда́сть м̂и·
20
Ꙗ҆́ко съхрани́хъ пꙋтѝ гн҃ѧ. и҆ не нечествова́хъ ѿ б҃а мое҆го·
21
Ꙗ҆́ко вс̂и сꙋди е҆го предо мно́ю сꙋть и҆ ѻ҆правда́нїѧ е҆го не ѿстꙋпи́ша̑ ѿ ме́не·
22
И҆ бꙋ́дꙋ непоро́ченъ с ним̑, и҆ съхраню́сѧ ѿ безако́нїа мое҆го·
23
И҆ возда́сть м̂и г҃ь по пра́вдѣ мое́й, и҆ по чистотѣ̀ рꙋ́кꙋ мое́ю пред̑ ѻ҆чи́ма е҆го·
24
Съ прпд̑бными прпд̑бнъ бꙋ́деши и҆ съ мꙋже́мъ непови́ннымъ непови́нен̑҇ бꙋ́деши·
25
И҆ съ и҆збра́ннымъ и҆збран̑҇ бꙋ́деши. и҆ со стропти́вымъ раз꙽врати́шисѧ·
26
Лю́ди же смире́нныа спасе́ши. и҆ ѻ́чи го́рдыхъ смири́ши·
27
Ꙗ҆́ко т̂ы просвѣща́еши свѣти́лникъ мо́и г҃и, б҃е мо́и просвѣща́еши тм̂ꙋ мою̀·
28
Ꙗ҆́ко тобо́ю и҆зба́влюсѧ ѿ напа́сти. и҆ ѻ́ бѕ҃ѣ моем̑ прелѣзꙋ стѣнꙋ·
29
Крѣ́пкїѝ и҆ непоро́чны пꙋтѝ е҆го. гл҃ъ гн҃ь раж꙽жен̑҇, защи́тник̑҇ е҆сть всм̑ѣ ѹ҆пова́ющим̑ на́нь·
30
Ꙗ҆́ко кт̂о б҃ъ ра́звѣ б҃а на́шего. л̂и кт̂о тво́рец̑҇ ра́звѣ г҃а на́шего·
31
Крѣ́покъ б҃ъ ѻ҆бдержа́и м̂ѧ си́лою, и҆ положѝ непоро́чен̑҇ пꙋть мо́и·
32
Полага́ѧ но́ѕѣ моѝ ꙗ҆́ко е҆́лени. и҆ на высо́ких̑ поставлѧ́а м̂ѧ·
33
Наѹ҆ча́ѧ рꙋ́цѣ моѝ на́ брань. полага́ѧ лꙋкъ мѣдѧнъ мы́шци мое́й·
34
И҆ дал̑҇ м̂и е҆си защище́нїе спс̑҇нїю. и҆ наказа́нїе твоѐ и҆спра́вит̑ м̂ѧ. наѹ҆чит̑ м̂ѧ до конца̀·
35
Раз̑ширил̑҇ е҆си стопы̀ моа̀ подо мно́ю. и҆ не позыбле́тасѧ го́лени мо́и·
36
И҆ поженꙋ̀ врагы̀ моѧ̀ и҆ пости́гнꙋ ѧ҆̀. и҆ не воз꙽вращꙋсѧ до́ндеже сконча́ют̑сѧ·
37
Сокрꙋшꙋ ѧ҆̀ и҆ не и҆́мꙋть постоѧ́ти, и҆ падт̑ꙋ под̑ нога́ма мои́ма·
38
Препоꙗ҆сал̑҇ мѧ е҆си си́лою на́ бран̑҇ и҆ въспѧл̑҇ е҆си вс̂ѧ воста́ющаѧ на́ мѧ под̑ м̂ѧ·
39
И҆ враг̑҇ моих̑ дал̑҇ м̂и е҆си хребет̑. и҆ ненави́дѧщаѧ м̂ѧ ѹ҆мрътви́лъ е҆си·
40
Возва́ша и҆ не бѣ̀ сп҃са́ющаго, возва́ша ко г҃ꙋ, и҆ не ѹ҆слы́ша их̑·
41
И҆ ѿѧ́т꙽ ѧ҆̀ ꙗ҆ко прах̑ зе́мныи. и҆ ꙗ҆́ко бе́рнїе по пꙋтѝ и҆стон̑҇чи ѧ҆̀·
42
И҆зба́ви м̂ѧ ѿ прерѣка́нїа людїи моих̑. и҆ поста́виши м̂ѧ в꙽ главꙋ ꙗ҆́зы́ком̑ и҆ лю́дїе их̑же не знах̑ рабо́таша м̂и. и҆ во слх̑ꙋ ѹ҆́ха ѹ҆слы́шаша м̂ѧ·
43
Сн҃ве тꙋждїи сол꙽гаша м̂и, сн҃ове тꙋж́дїи ѻ҆бет̑шаша и҆ ѻ҆хромо́ша ѿ стезь своих̑·
44
Жив̑҇ г҃ь и҆ блс̑҇вен̑҇ б҃ъ. и҆ вознесет̑сѧ б҃ъ мо́и сп҃съ мо́и крѣпкїи г҃ь да́ѧ и҆ месть мн̂ѣ. и҆ приводѧ̀ лю́ди под̑ м̂ѧ. и҆ взѧт̑ м̂ѧ ѿ враг̑҇ моих̑. и҆ на воста́ющаа на́ мѧ вознесе́ши м̂ѧ и҆ ѿ мꙋж́а непра́вед̑на и҆зба́ви м̂ѧ·
45
Сего̀ рад̑и̑ и҆сповм̑ѣ т̂ѧ въ ꙗ҆зы́цх̑ѣ г҃и. і҆ и́мени твое҆мꙋ воспо́ю·
46
възвелича́ю спс̑҇енїе цр҃ево, и҆ творѧ́и млс̑҇ть х҃ꙋ свое҆мꙋ дввд̑и, и҆ сѣмени е҆го до́ вѣка·
Джерела
