Ostroh Bible❧Друга книга Самуїлова (Друга книга царів), розділ 7

1

И быс̑҇ е҆гда сѣде цр҃ь в домꙋ̀ своем̑ и҆ г҃ь ѹ҆наслѣдѝ и҆̀ надо всѣмѝ врагѝ е҆го·

2

И҆ рече цр҃ь къ наѳа́нꙋ про̑҇рокꙋ. с̂е а҆зъ живꙋ̀ в пола́тахъ ке́дрънах̑ и҆ кїѻ́тъ бж҃їи по́средѣ да стои́тъ·

3

И҆ рече наѳа́нъ къ цр҃ю. вс̂е е҆ли́ко а҆ще е҆сть на срд̑цы твое҆мъ, ходѝ и҆ творѝ ꙗ҆́ко г҃ь е҆сть с тобо́ю·

4

И҆ бы́сть в но́щи то́и глс̑҇а гн҃ь къ наѳа́нꙋ гл҃ѧ·

5

Идѝ и҆ рцы̀ рабꙋ̀ мое҆мꙋ дв҃дꙋ, си́це гл҃етъ г҃ь. не и҆́маши т̂ы сътвори́ти до́мꙋ на пребыва́нїе мн̂ѣ·

6

Ꙗ҆́ко не ѻ҆бита́хъ въ домꙋ̀ ѿ ни́хже дн҃їи и҆зведо́хъ сн҃ы і҆и҆л҃евы. и҆зъ землѧ̀ е҆гѷпетъски до дн҃е сего̀. н̂о токмо бѣхъ пребыва́ѧ въ ѻ҆би́телищихъ и҆ в сѣни·

7

И҆ въ все́мъ и҆дѣже а҆ще вхожа́хъ въ всемъ і҆и҆л҃и. а҆ще гл҃ѧ гл҃ахъ къ е҆ді́номꙋ колѣ́нꙋ, е҆мꙋже заповѣ́дахъ па́сти люди моѧ і҆и҆л҃ѧ гл҃ѧ почто не създа́сте м̂и до́мꙋ ке́дрена·

8

То нн҃ѣ сѝ да рече́ши рабꙋ̀ мое҆мꙋ дв҃дꙋ. си́це гл҃етъ г҃ь вседержи́тель. поꙗ҆́хъ т̂ѧ ѿ па́жити ѻ҆́вчаѧ на вла́стельство лю́демъ мои҆мъ і҆и҆л҃ю·

9

И҆ нн҃ѣ е҆смъ с тобо́ю вездѣ̀ а҆́може и҆́деши, і҆ и҆скоренихъ врагѝ твоѧ ѿ лица̀ твое҆го. и҆ сътвори́хъ т̂ѧ и҆мени́та по и҆́мени вели́ких̑ и҆же сꙋть на землѝ·

10

И҆ положꙋ̀ мѣсто лю́дем̑ мои҆мъ і҆и҆л҃ю. и҆ насажꙋ̀ и҆хъ, и҆ вселѧ́тсѧ в себѐ са́ми, и҆ не въскорби́тъ никогда̀, и҆ не приложит̑ сн҃ъ непра́вды ѻ҆би́дѣти е҆го, ꙗ҆́кож̑ и҆спрь́ва·

11

И҆ с̂е ѿ дн҃їи в нѧ́же поста́вихъ сꙋдїѧ въ і҆и҆л҃и въ лю́дехъ моих̑ и҆ поко́ю т̂ѧ ѿ всѣхъ вра́гъ твоих̑, и҆ възвѣсти́тъ т̂и г҃ь ꙗ҆ко съзи́ждеши до́мъ е҆мꙋ·

12

И҆ бꙋдетъ е҆гда сконча́ютсѧ дн҃їе твоѝ, и҆ ѹ҆сне́ши съ ѿц҃ы твои҆ми. и҆ въста́влю сѣмѧ твое по тебѣ̀, и҆же е҆сть ѿ чре́ва твое҆го, и҆ ѹ҆гото́влю црс̑҇тво е҆го·

13

И҆ то́и съзи́ждетъ дом̑ и҆́мени мое҆мꙋ, и҆ ѹ҆пра́влю прс̑҇тлъ е҆го до́ вѣка·

14

А҆з꙽ бꙋдꙋ е҆мꙋ въ ѿц҃ъ, и҆ то́и бꙋдет̑ м̂и въ сн҃ъ. а҆ще прїидетъ непра́вда е҆го, и҆ а́зъ ѻ҆бличꙋ̀ и҆̀ па́лицею мꙋжа наставле́нїе сн҃омъ чл҃ческимъ·

15

И҆ млс̑҇ти же мое́ѧ не ѻ҆ста́влю ѿ него, ꙗ҆́коже ѿстꙋпи́хъ е҆гда̀ ѿстꙋпи́ша ѿ лица̀ мое҆го·

16

И҆ вѣ́ровати и҆́мать до́мъ е҆го, и҆ црс̑҇тво е҆го до́ вѣка предо мно́ю, и҆ прс̑҇тлъ е҆го бꙋдетъ и҆справле́нъ до́ вѣка·

17

И҆ по всѣхъ словесех̑ си́хъ, и҆ по всемꙋ̀ видѣнїю се́мъ, та́ко гл҃а наѳа́нъ къ дв҃дꙋ·

18

И҆ вни́де цр҃ь дв҃дъ, и҆ сѣде пред̑ гм҃ъ, и҆ рече кт̂о е҆смъ а҆зъ г҃и мо́и г҃и, и҆л̂и чт̂о до́м꙽ мой, ꙗ҆́ко възлюбѝ м̂ѧ до сего·

19

И҆ съгрѣшихъ пред̑ тобо́ю мно́го г҃и мо́и г҃и, и҆ гл҃а до́мꙋ ра́ди раба̀ свое҆го и҆здале́ча, си́це же за́конъ чл҃кꙋ г҃и мой г҃и·

20

И҆ чт̂о приложи́тъ дв҃дъ е҆ще гл҃ати к тебѣ, и҆ нн҃ѣ ты̀ вѣси г҃и мой г҃и раба̀ свое҆го·

21

И҆ раба̀ своег̑҇ ради сътворѝ, и҆ по срд̑цꙋ свое҆мꙋ, сътворѝ вс̂е вели́чество с̂е, позна́ти раба̀ свое҆го·

22

Вели́чїѧ ради твое҆го г҃и мой г҃и, нѣ́сть б̂о и҆́нъ ꙗ҆́коже ты̀, и҆ нѣ́сть б҃а ра́звѣи тебѐ въ всх̑ѣ ꙗ҆́же слы́шахом꙽ ѹ҆ши́ма на́шима.

23

И҆ кт̂о ꙗ҆́коже лю́дїе твоѝ і҆и҆л҃ь. ꙗ҆́зык̑҇ и҆́нъ на землѝ. ꙗ҆́коже наста́ви и҆хъ б҃ъ е҆же и҆зба́вити себѣ̀ людїи. и҆ е́же положи́ти себѣ̀ и҆́мѧ. и҆ е҆же сътвори́ти вели́чїе. и҆ просвѣте́нїе е҆же приꙗ҆́ти и҆хъ ѿ лица̀ людїи си́хъ. и҆́хже и҆зба́вихъ себѣ̀ ѿ е҆гѷпта. ꙗ҆́зы́ки и҆ селища·

24

И҆ ѹ҆гото́ва себѣ̀. лю́ди своѧ і҆и҆л҃евъ лю́ди на́ вѣкъ. и҆ т̂ы г҃и бꙋди и҆мъ въ б҃ъ·

25

И҆ нн҃ѣ г҃и мой г҃и. гл҃ъ и҆же гл҃а ѻ҆ рабѣ̀ свое҆м꙽ и҆ ѻ҆ домꙋ̀ е҆го ѹ҆вѣрѝ до́ вѣка. ꙗ҆́коже гл҃а сътворѝ·

26

И҆ нн҃ѣ да възвели́читсѧ и҆́мѧ твое до́ вѣка. гл҃ѧ·

27

Гь҃ вседержи́тель б҃ъ над̑ і҆и҆л҃емъ. и҆ до́м꙽ раба̀ твое҆го дв҃да. да бꙋдетъ и҆справле́нъ пред̑ тобо́ю·

28

Ꙗ҆́ко т̂ы г҃ь вседержитель б҃ъ і҆и҆л҃евъ. ѿверзе ѹ҆́хо рабꙋ̀ твое҆мꙋ гл҃ѧ до́м꙽ съзида́ю т̂и сего ради ѻ҆брѣте рабъ твои срд̑це своѐ е҆же помоли́тисѧ тебѣ̀ мл҃твою сею̀·

29

И҆ нн҃ѣ г҃и мои г҃и ты̀ е҆си б҃ъ. и҆ словеса̀ твоѧ̀ бꙋдꙋтъ и҆́сти́нна. и҆ гл҃а раба̀ ради твое҆го бл҃гаѧ сїѧ·

30

И҆ нн҃ѣ начнѝ и҆ блс̑҇ви до́мъ раба̀ с̂и. ꙗ҆́ко бы́ти е҆мꙋ въ вѣки пред̑ тобо́ю. ꙗ҆́ко ты̀ г҃и мой г҃и. гл҃а ѿ блс̑҇венїѧ твое҆го. да блс̑҇витсѧ до́мъ раба̀ твое҆го пред̑ тобо́ю·