Ostroh BibleДруга книга Самуїлова (Друга книга царів), розділ 8
Шрифт:
Запис:
1
И бы́сть по си́хъ и҆ побѣдѝ дв҃дъ и҆ноплеме́нники. и҆ смирѝ и҆хъ. и҆ прїꙗ҆́тъ двд̑ъ ѿлꙋче́нїе ѿ рꙋкѝ и҆ноплеме́нникъ·
2
И҆ ѹ҆бѝ дв҃дъ моава, и҆ раздѣлѝ ѧ҆̀ на ча́сти и҆ положѝ ѧ҆̀ на землѝ. и҆ бы́ста дв̂ѣ ча́сти на ѹ҆мръщве́нїе и҆ на наполне́нїе тре́теѝ ча́сти. и҆ бы́ша моа́влѧне двд̑ви рабѝ да́ю҆ще е҆мꙋ да́нь·
3
И҆ ѹбѝ двд̑ъ а҆драза́ра, сн҃а раа́влѧ цр҃ѧ сꙋ́вска. и҆дꙋщꙋ е҆мꙋ наста́вити предѣлъ на рецѣ е҆фра́тъстѣи·
4
И҆ пред̑взѧ̀ дв҃дъ е҆же ѿ е҆го, ҂а҃, колесни́цъ. и҆ ҂з҃ ко́нниковъ, и҆ ҂к҃ мꙋжъ пѣшъцовъ. и҆ раздрꙋшѝ дв҃дъ вс̂ѧ ѻ҆рꙋжїа и҆ ѻ҆ста̀ е҆мꙋ ѿ нихъ. р҃ колесни́цъ·
5
І҆ и́де в сѷрїю дама́сковꙋ, на по́мощъ а҆драза́рꙋ цр҃ю сꙋ́вскꙋ. и҆ ѹ҆бѝ дв҃дъ ѿ сѷрїѧ, ҂к҃в, мꙋжъ·
6
И҆ поста́ви т̂ꙋ дв҃дъ блюсти́телѧ в сѷрїи, ꙗ҆́же под̑ дама́скомъ. и҆ бы́сть сѷрїѧ двд̑ви в рабїю да́юще да́нь, и҆ сп҃са́ше г҃ь дв҃да а҆може и҆дѧ́ше·
7
И҆ прїѧ́тъ дв҃дъ по́ꙗ҆сы зла́тыѧ и҆же бѣша на ѻ҆́троцх̑ѣ а҆драза́рихъ цр҃ѧ сꙋ́вска. и҆ принесѐ ѧ҆̀ въ і҆ерс̑҇лі́мъ·
8
И҆ взѧт̑ ѧ҆̀ сꙋсаки́мъ цр҃ь е҆гѷпетъскъ, е҆гда приходѝ въ і҆ерс̑҇лі́мъ въ дн҃и ровоа́ма сн҃а соло́монѧ. и҆ ѿ метева́ка. и҆ ѿ и҆збо́рныхъ гра́дъ а҆драза́ровъ. и҆ взѧ̀ дв҃дъ мѣ́дь мно́гꙋ ѕѣло·
9
Тою̀ б̂о мѣ́дїю сътворѝ мо́ре мѣ́дѧно соло́монъ. и҆ столпы̀ и҆ ба́нѧ и҆ вс̂ѧ сосꙋ́ды, и҆ слы́ша сево́и цр҃ь и҆́мах̑, ꙗ҆́ко и҆збѝ дв҃дъ вс̂ю си́лꙋ а҆драза́рю·
10
И҆ посла̀ ѳо́ѹ҆ и҆е҆дꙋра́ма сн҃а свое҆го къ цр҃ю дв҃дꙋ. въпроси́ти и҆̀ ꙗ҆́же ѻ҆ ми́рѣ. и҆ ѻ҆ блс̑҇вити и҆̀ поне́же побѣдѝ а҆драза́ра. и҆ ѹ҆бѝ и҆̀ занѐ съпротивлѧ́ѧсѧ б̂ѣ а҆драза́рꙋ. и҆ в рꙋкꙋ е҆го бѧ́ше сосꙋ́ды сре́брены и҆ зла́ты, и҆ сосꙋ́ды мѣдѧны·
11
И҆ сїѧ блс̑҇ви цр҃ь дв҃дъ г҃ꙋ со сребро́мъ и҆ зла́томъ и҆же ѻ҆ст҃и ѿ всеѧ бра́ни·
12
И҆же наси́лова ѿ и҆дꙋме́а и҆ ѿ моа́ва, и҆ ѿ сн҃в꙽ а҆м꙽мо́нь. и҆ ѿ и҆ноплеме́нникъ. и҆ ѿ ам̑мали́ка. и҆ ѿ коры́сти а҆драза́рихъ сн҃а роа́влѧ цр҃ѧ сꙋ́вска·
13
И҆ сътворѝ дв҃дъ себѣ̀ сла́вꙋ е҆гда̀ възъврати́сѧ побѣ́ждъ и҆дꙋме́ю. в꙽ геле́мѣ, съ ҂и҃і·
14
И҆ поста́ви въ и҆дꙋмѣи дв҃дъ блюстителѧ, и҆ бы́ша вс̂и и҆дꙋмѣ́и рабѝ дв҃дꙋ. и҆ сп҃се г҃ь дв҃да вездѣ̀ а҆́може а҆ще и҆дѧ́ше·
15
И҆ црс̑҇твова̀ дв҃дъ над̑ і҆и҆л҃емъ. и҆ бѣ дв҃дъ творѧ́и сꙋдъ и҆ пра́вдꙋ, надо всѣми людмѝ е҆го·
16
І҆ѻ҆а́въ сн҃ъ сарꙋ́инъ над̑ во́и҆нъствїи е҆го. і҆ и҆а҆сафаѳ̑҇ сн҃ъ а҆хилꙋдовъ въ паметописа́нїи·
17
И҆ садокъ сн҃ъ а҆хи́товъ, и҆ а҆вимелех̑ сн҃ъ а҆вїа҆ѳа́ръ жерцы̀. и҆ саса́и кни́жникъ·
18
И҆ ванѣ́асъ сн҃ъ и҆ѻ҆да́нь б̂ѣ совѣтник꙽, и҆ ѻ҆ хеле́ѳъ, и҆ ѻ҆ ѳет̑, и҆ сн҃ове дв҃дви пола́тамъ строи́теле бѣша·
Джерела
