Ostroh Bible❧Третя книга Ездри, розділ 10

1

И бы́сть е҆гда вни́де сн҃ъ мои въ чръто́гъ свои. па́дъ и҆ ѹ́мре, и҆ преврати́хомъ всѧ свѣтлаѧ·

2

И҆ въста́ша̑ вс̂и гража́не моѝ въ ѹ҆тѣше́нїи мое́мъ, и҆ почи́хъ да́же до дрꙋга́го дн҃е до но́щи·

3

И҆ бысть е҆гда̑ вс̂и почива́хꙋ да мѧ ѹ҆тѣшатъ да поко́юсѧ·

4

И҆ въстахъ но́щїю и҆ бѣжа́хъ и҆ прїидо́хъ ꙗ҆́ко ви́диши на то́мъ по́ли, и҆ помышлѧ́ю ѹ҆жѐ не възврати́тисѧ въ́ градъ. н̂о тꙋ̀ стоѧ́ти, и҆ не ѧ́сти и҆ не пи́ти, н̂о без꙽преста́ни рыда́ти и҆ пости́тисѧ до́ндеже ѹ҆мрꙋ̀·

5

И҆ ѻ҆ста́вилъ словеса̀ в ни́х же бѣ́хъ, и҆ ѿвѣща̀ съ ꙗ҆́ростїю к не́и, и҆ реко́хъ бꙋ́ѧ паче всх̑ѣ же́нъ. не ви́диши пла́чь на́шъ і҆ и҆же на́мъ слꙋчи́сѧ, ꙗ҆́ко сїѻ́нъ мт҃и на́ша вс̂ѧ ско́рбїю скорби́тсѧ. и҆ смире́нїю смирена е҆сть и҆ пла́четъ ѕл̑҇ѣнѣ́иши·

6

И҆ нн҃ѣ ꙗ҆ко вс̂и рыда́емъ и҆ ско́рбни е҆смы̀, ꙗ҆́ко всѣ ско́рбни е҆смы̀, ты́ же скорби́ши ѻ҆ е҆ді́нѣмъ сн҃ѣ·

7

Въпросѝ б̂о землѝ и҆ речетъ тебѣ, ꙗ҆ко сїѧ е҆сть и҆же и҆́мать рыда́ти паде́нїѧ, толи́кимъ на не́и ражда́ютсѧ. и҆ ѿ неѧ̀ ѿ нача́ла вс̂и рожде́нїи, и҆́ныи прїидꙋтъ. и҆ сѐ близ꙽ко в꙽сѣхъ в꙽ поги́бель хо́дѧтъ і҆ и҆стребле́нїѧ бꙋдетъ мно́жества их̑ и҆ кто̀ б̂о и҆́мать рыда́ти н̂о и҆ паче токмо сїѧ и҆же толи́ко мно́жество поги́бе, неже ты̀ и҆же за е҆ді́наго болѣзнꙋ́еши·

8

А҆ще же рече́ши мн̂ѣ ꙗ҆́ко нѣсть пла́чь мои подо́бен̑҇ землѝ ꙗ҆́ко плодъ чре́ва мое҆го поги́бе. е҆гож̑ в꙽ печа́ли породи́хъ и҆ со бо́лѣзнїю родѝ землѧ́ же по пꙋтѝ землѝ, и҆дет꙽ же в꙽ неѧ̀ мно́жество настоѧ́щее. како слꙋчи́сѧ и҆ а́зъ тебѣ рекꙋ, ꙗ҆́ко ты̀ съ трꙋдомъ роди́ла е҆си, та́ко и҆ зем̑лѧ̀ да́сть плод̑ свои чл҃кꙋ ѿ нача́ла е҆мꙋ и҆же сътвори́лъ еѧ̀. нн҃ѣ б̂о въздержѝ сама̀ себѣ бо́лѣзнь твою̀. и҆ крѣпко носѝ и҆же тебѣ слꙋчи́шасѧ паде́нїѧ. а҆ще б̂о ѻ҆правди́ши предѣлы бж҃їи и҆ совѣты е҆го·

9

Прїемлеши вре́мѧ и҆ въ таковы́хъ похва́лишисѧ вни́ди б̂о въ́ градъ къ мꙋжꙋ свое҆мꙋ, и҆ рече къ мнѣ̀, не сътворю̀ ни вни́дꙋ въ́ градъ н̂о здѐ ѹ҆мрꙋ̀. и҆ пред̑ста́вих̑ гл҃ати к не́и, и҆ реко́хъ. не мозѝ сотвори́ти сѐ сло́во, н̂о и҆зво́ли по совѣтꙋ мое҆мꙋ, коли́ко паде́нїе сїѻ́на ѹ҆тѣшиши ради болѣзни і҆ерс̑҇лі́ма·

10

Ви́диши б̂о ꙗ҆ко ѻ҆сщ҃енїе на́ше ѻ҆пꙋстѣ̀. и҆ ѻ҆лта́рь нашъ сътре́нъ ес̑҇. и҆ цр҃ковь наша разоре́на е҆сть·

11

и҆ ѱал̑҇ты́рь нашъ смире́нъ е҆сть, и҆ пѣснь ѹ҆млъча̀, и҆ ра́дость свѧ́зана е҆сть, и҆ свѣща свѣтилника на́шего погаше́на е҆сть. и҆ кїѻ́тъ завѣта на́шего ѻ҆браще́нъ е҆сть, и҆ ст҃аѧ на́ша̑ и҆змѣне́на сꙋть і҆ и́мѧ чт̂о възва́но е҆сть на нас̑҇ близко ѻ҆скверненїѧ е҆сть, и҆ свободы наши ѹ҆коре́нїе тръпѣли сꙋть. и҆ сщ҃ен꙽ницы пож꙽же́ни сꙋть. и҆ левѷти наши въ плене́нїе и҆до́ша. и҆ дв҃цы наши ѻ҆скверне́ни сꙋть. и҆ же́ны наша наси́лїе тръпѣша. и҆ пра́веднїи на́ши въсхище́ни сꙋть и҆ ѻ́троцы наша и҆зги́бнꙋша і҆ ю́ноши наши слꙋжи́ша. и҆ крѣпци наши и҆знемого́ша·

12

И҆ чт̂о всѣмъ на́ипа́че знамена́нїе сїѻ́на. ꙗ҆́ко и҆зы́иде ѿ сла́вы своеѧ. ꙗ҆́же и҆ преда́нъ е҆сть в рꙋка́хъ и҆же насъ ненави́дѣша·

13

Ты́ бо ѿрѣ́еши твоѝ ско́рби мно́ги. и҆ ѿложѝ ѿ себѐ мно́жество бо́лѣзнїи да тѧ̀ възлю́битъ крѣпкїи и҆ поко́и сътвори́тъ тебѣ вы́шнїи покое́нїе трꙋда·

14

И҆ бы́сть е҆гда̀ гл҃ахъ е́и лице́ сѧ сїѧ́ше ско́ро, и҆ ѻ́бразъ блиста́нїе сътворѧше видѣнїе е҆ѧ̀·

15

да бы́хъ ѹ҆жа́сенъ ѕѣло к не́и. и҆ помышлѧ́хъ чт̂о бысть сїе. и҆ сѐ ско́ро ѿпꙋстѝ шꙋ́мъ гла́сомъ вели́кимъ стра́хомъ по́лнымъ да въздвига́шесѧ землѧ̀ ѿ жены̀ съ шꙋ́момъ·

16

И҆ ви́дѣхъ с̂е на́ипаче жена̀ не ꙗ҆влѧ́шесѧ мн̂ѣ н̂о гра́дъ созида́шесѧ и҆ мѣсто показа́шесѧ ѿ ѻ҆снова́нїѧ вели́кихъ, и҆ ѹ҆страши́хсѧ и҆ возопих̑ гла́сомъ вели́кимъ, и҆ реко́хъ гдѣ̀ е҆сѝ ѹ҆рїель а҆гг҃лъ и҆же ѿ начала прїиде къ мн̂ѣ. ꙗ҆́ко то́и м̂ѧ сътворѝ прїитѝ въ мно́жествѣ ѹ҆жаса ѹ҆ма̀ сего·

17

И҆ бысть коне́цъ мои в растлѣнїе, и мл҃тва моѧ в꙽ поноше́нїе, и҆ е҆гда бы́хъ гл҃ющи сїѧ. с̂е прїиде къ мн̂ѣ и҆ ви́дѣ м̂ѧ, и҆ сѐ бы́сть поставле́нъ ꙗ҆ко мр҃твъ и҆ ра́зꙋмъ мои ѻ҆чюжде́нъ бы́сть, и҆ дръжа̀ десни́цꙋ мою, и҆ въскрѣпѝ м̂ѧ и҆ постави м̂ѧ на́ нозѣ моѝ. и҆ рече м̂и чт̂о тебѣ е҆сть и҆ въскꙋю ѻ҆скорбе́нъ е҆сть ра́зꙋмъ твой, и҆ чю́вство срд̑ца твое҆го. и҆ въскꙋ́ю въскорби́шисѧ и҆ реко́хъ ꙗ҆́ко ѻ҆ста́вилъ м̂ѧ е҆си и҆ а́з꙽ сътвори́хъ по словесе́мъ твои҆мъ, и҆ взыидо́хъ на́ поле и҆ сѐ ви́дх̑ѣ и҆ ви́жꙋ чт̂о не могꙋ провѣща́ти. и҆ рече къ мн̂ѣ, ста́ни ꙗ҆ко мꙋжъ и҆ въздви́гнꙋ т̂ѧ. и҆ рекохъ, гл҃и г҃и мои и҆ не ѻ҆ста́ви м̂ѧ ꙗ҆ко да не в сꙋетѣ̀ ѹ҆мрꙋ̀. ꙗ҆́ко ви́дѣхъ и҆же не свѣдѧхъ, и҆ слы́шꙋ и҆же не свѣмъ и҆л̂и чю́вство мое лже́тъ, и҆ дш҃а моѧ мечта́нїе видѧ. нн҃ѣ б̂о помолю́ ти сѧ да ска́жеши рабꙋ̀ твое҆мꙋ въ ѹ́жасѣ семъ. и҆ ѿвѣща̀ къ мн̂ѣ и҆ рече слы́ши м̂ѧ, и҆ наѹ҆чꙋ̀ тѧ̀ и҆ рекꙋ̀ тебѣ ѻ҆ кои́хъ бои́шисѧ ꙗ҆́ко вы́шнїи ѿкры́етъ тебѣ та́ины вели́ки. видѣ правъ пꙋть твои, ꙗ҆́ко безъпреста́ни скорби́шисѧ за лю́ди твоѧ̀, и҆ ѕѣло рыда́еши сїѻ́на ради. тꙋ б̂о ра́зꙋмъ видѣнїѧ и҆же тебѣ ꙗ҆ви́сѧ прежде ма́ло. е҆ѧ́же ви́дѣл꙽ е҆си рыда́ющи нача́лъ е҆си ѹ҆тѣша́ти е҆ѧ̀. нн҃ѣ же ѹ҆жѐ лица̀ же́ньска не ви́диши. н̂о ꙗ҆ви́сѧ тебѣ гра́дъ созида́ти и҆ ꙗ҆́ко провѣща́ше тебѣ ѿпаде́нїе сн҃а еѧ̀. с̂е е҆сть ѿрѣше́нїе·

18

се жена̀ ю҆́же ви́дѣлъ е҆си сїѧ е҆сть сїѻ́нъ, и҆ ꙗ҆ко речетъ тебѣ и҆же и҆ нн҃ѣ позри́ши, ꙗ҆́ко град̑ създа́нъ. и҆ ꙗ҆́ко речетъ тебѣ и҆же безъпло́дна быс̑҇, лѣтъ, л҃, и҆ чт̂о бѧ́хꙋ лѣта л҃, къгда не бы́сть в немъ е҆ще жрътва прино́шена·

19

И҆ бысть по лѣтех̑ л, созда̀ соло́монъ град̑. и҆ принесѐ приноше́нїе, тогда е҆гда родѝ непло́ды сн҃а, и҆ чт̂о т̂и рече ꙗ҆ко въспи́та е҆го съ трꙋдомъ, т̂о бы́сть. ѻ҆битанїе въ і҆ерс̑҇лимѣ, и҆ ꙗ҆́ко рече тебѣ да сн҃ъ мои грѧдꙋщи въ свои чрътогъ мрътвъ бы́сть, и҆ слꙋчи́сѧ е҆мꙋ паде́́нїе. т̂о бы́сть и҆же сътворе́но е҆сть паде́нїе і҆ерс̑҇лім̑ско и҆ с̂е ви́дѣлъ е҆си подо́бїе е҆ѧ̀. и҆ ꙗ҆́ко сн҃а рыда́ше, нача́лъ е҆си ѹ҆тѣша́ти е҆ѧ̀. и҆ ѿ сихъ и҆же слꙋчи́шасѧ сїѧ бѧ́хꙋ тебѣ ѻ҆тво́рена. и҆ нн҃ѣ ви́дѣ вы́шнїи ꙗ҆́ко дш҃ею ско́рбенъ е҆си. и҆ ꙗ҆́ко всѣмъ срд̑цемъ терпи́ши за́нь ꙗ҆ви́сѧ тебѣ свѣтлость сла́вы е҆го и҆ красота̀ лѣпоты̀ е҆го·

20

Сего б̂о ради рекох̑ тебѣ да живе́ши в по́ли гд̂ѣ нѣсть до́мъ създа́нъ. вѣм꙽ б̂о а҆зъ ꙗ҆́ко вы́шнїи начина́ше тебѣ показа́ти сїѧ. сего ра́ди реко́хъ тебѣ да прїидеши на ни́вꙋ гдѣ̀ нѣсть ѻ҆снова́нїѧ съзида́нїю. ни б̂о можа́ше дѣло бл҃го творе́нїе чл҃ческо въздержа́ти въ мѣстѣ гдѣ начина́шесѧ вы́шнїи гра́дъ показа́ти. ты́ бо не бо́исѧ ни ѹ҆стра́шитсѧ срд̑це твое, н̂о вни́ди и҆ ви́ждь свѣтлость и҆ вели́чества създа́нїѧ. коли́ко възмо́жно е҆сть тебѣ видѣнїе ѻ҆чесе́мъ ви́дѣти. и҆ посе́мъ слы́шиши коли́ко прїемлетъ слыша́нїе ѹ҆шесе́мъ твои҆мъ слы́шати. ты̀ блж҃нъ е҆си на мно́ѕѣхъ и҆ зва́нъ е҆си пред̑ вы́шнѧго ꙗ҆́ко и҆ ма́ло. но́щъ и҆же заѹ́тра бꙋдꙋщи пребыва́е҆ши т̂ꙋ, и҆ пока́жетъ тебѣ вы́шнїи та̀ видѣнїѧ бо́льши и҆же сътвори́тъ ѻ҆бита́ющим̑ на землѝ ѿ послѣднихъ днїи. и спахъ т̂ꙋ но́щь и҆ дрꙋгꙋю ꙗ҆́ко рече мн̂ѣ·