Ostroh Bible❧Третя книга Ездри, розділ 4

1

Тогда̀ ѿвѣща̀ къ мнѣ̀ а҆гг҃лъ е҆мꙋже и҆мѧ ѹ҆рїи҆лъ, и҆же по́слан̑҇ б̂ѣ къ мнѣ, и҆ рече м̂и въ ѹ҆́жасѣ и҆стꙋпѝ срд̑це твоѐ въ вѣ́цѣ семъ, поне́же хо́щеши и҆спыта́ти пꙋти вы́шнего, а҆з же ѿвѣщах̑·

2

Та́ко е҆сть г҃и мо́и, ѻ҆́н же къ мнѣ̀ рече си́це. тр̂и пꙋтѝ по́сланъ е҆смь показа́ти тебѣ и҆ тр̂и подо́бїѧ пред̑ста́вити пред̑ тобо́ю. ѿ ни́х꙽же е҆гда̀ м̂и е҆ді́нꙋ и҆з꙽ꙗ҆ви́ши. а҆́зъ ти покажꙋ̀ пꙋть е҆го́же жела́еши ви́дѣти. и҆ наѹ҆чю т̂ѧ ѿкꙋ́дꙋ въ срд̑це лꙋка́во прихо́дитъ, и҆ реко́хъ възвѣстѝ г҃и мои, и҆ рече, и҆дѝ і҆ и҆зва́жи м̂и ѻ҆гнѧ̀ тѧ́гость, и҆ли и҆з꙽мѣ́ри дыха́нїе вѣтра, и҆ли въз꙽врати въспѧ́ть дн҃ь и҆же ми́мои҆дѐ·

3

А҆́з꙽ же ѿвѣща́хъ, е҆гда̀ ли сїа чл҃къ сътво́ритъ, е҆же т̂ы хо́щеши ѿ мене ѹ҆вѣ́дити; ѻ҆́нже реч̑҇, въпрошꙋ̀ ли т̂ѧ ка́ко е҆сть мно́го жили́ща посред̑и̑ мо́рѧ, и҆ли ка́ко мно́го и҆сто́чникъ ѿ нача́ла бе́здны, и҆ли и҆сто́чниковъ на ѻ҆крꙋзѣ нбс̑҇нѣмъ, и҆ли чт̂о сꙋть предѣлы ра́иски, и҆ бꙋ́деши ѿвещати и҆ въ бе́зднꙋ не снидох̑ ни во а҆́дъ па́ки, ни на нб҃са нико́лиже възыидо́хъ·

4

Нн҃ѣ же ѻ҆ се́мъ не въпроси́хъ т̂ѧ, толи́ко ѻ҆ ѻ҆гнѝ и҆ вѣтрѣ, и дн҃и во́ньже е҆си пребыва́лъ, и҆ без꙽ си́хъ ве́щеи бы́ти не мо́жеши, ты же ѻ сихъ ничт̂о ми ѿвѣща̀·

5

И҆ па́ки м̂и рече, чт̂о е҆сть твое҆го, и҆ чт̂о с тобо́ю и҆зрастѐ, зна́ти не мо́жеши·

6

И҆ ка́коже сїи сꙋ́дъ твой възмо́жетъ ѻ҆бъꙗ҆́ти пꙋтѝ вы́шнѧго, и҆ли свѣтъ и҆з꙽внꙋ̀ растлѣ́нъ, ка́ко и҆́мать разꙋмѣти растлѣ́нїе е҆же а҆зъ зрю̀. и҆ реко́хъ къ немꙋ, лꙋчши дабы е҆смы̀ не бы́ли, нежели бы́ти живꙋще въ ѕлѣ̀ и҆ претрьпѣвати невѣ́дꙋще чесо̀ ра́ди·

7

ѻ҆́нъ же ѿвѣща̀ м̂и, прїидох̑ къ нѣ́кои пꙋсты́ни, и҆деже древа совѣтъ сътвори́ша гл҃ющи, прїидѣте і҆ и́демъ и҆ двигнемъ бра́нь на́ море да пред̑ на́ми побѣ́гнетъ·

8

И҆ да сътво́римъ себѣ и҆́ныѧ дꙋбра́вы·

9

Та́коже и҆ волны̀ мо́рскїи совѣтъ сътвори́ша гл҃юще. поидимъ и҆ двигнѣмъ бра́нь на лѣсы по́льныѧ, да побѣди́вши и҆хъ въспрїимемъ себѣ и҆́ное мѣсто·

10

Мышле́нїѧ же лѣсовъ б̂ѣ пра́зна. поне́же прїиде ѻ҆́гнь и҆ пож꙽же их̑, та́коже и҆ во́лнъ мо́рьскихъ, поне́же въздержа̀ и҆̀ пѣсо́къ и҆ не дадѐ им̑м̑·

11

И҆ е҆гда̀ бы е҆си бы́лъ сꙋдїѧ и҆хъ, кое҆го бы е҆си ѿ сихъ ѻ҆правда́лъ, и҆ли ви́нна сътвори́лъ·

12

ѿвѣща́хъ а҆зъ, въи҆́стиннꙋ въ совѣтъ сꙋетенъ въда́шасѧ, понеже землѧ̀ да́на лѣсом̑, и҆ мо́рю мѣ́сто, е҆же ноша́ше во́лны е҆го, ѻ҆́н же рече къ мнѣ, пра́во рассꙋди́лъ е҆си, чесоже ради себе не сꙋ́диши, поне́же ка́ко землѧ̀ дꙋбра́вамъ и҆ мо́ре же волнамъ свои҆мъ да́но е҆сть, та́коже и҆же ѻ҆бита́ютъ на землѝ·

13

Толи́ко вещи зе́мныѧ разꙋмѣва́ют̑, а҆ е҆же на́ нб҃си і҆ и́же на высотѣ̀ и҆хъ,.

14

И҆ ѿвѣща́хъ си́це, молю́ ти сѧ г҃и, мн̂ѣ да́стьсѧ ѹ҆́мъ разꙋмѣнїѧ, не бо̀ хотѣхъ въпроси́ти ѻ҆ вы́шних̑ твои҆хъ. но ѻ҆ сихъ и҆же всегда̀ в нас̑҇ быва́ютъ, чесо ра́ди і҆и҆л҃ь да́нъ въ порꙋга́нїе ꙗ҆́зы́комъ·

15

И҆ чесо̀ ра́ди лю́дїе твоѝ възлю́бленїи да́ны ꙗ҆зы́комъ нечести́вымъ·

16

И҆ чесо̀ ра́ди зако́нъ ѿц҃ъ на́шихъ в па́гꙋбꙋ, из̑веде́нъ бы́сть и҆ расмотре́нїе писа́нїи не сꙋть·

17

Чесо ра́ди вездѣ ѻ҆бита́ем꙽ ꙗ҆́ко гꙋсе́ница, живꙋщи въ вели́цем̑ стра́сѣ и҆ ѹ́жасѣ. и҆ недосто́ины е҆смы̀ млс̑҇ти твое҆ѧ наслѣди́ти·

18

И҆ чт̂о сътворимъ съ и҆менемъ своим̑, е҆гоже м̂ы нарица́емъ, сїа сꙋть е҆го́же а҆зъ въпраша́ю, ѻ҆́н же рече, коли́ко бо́леи въпраша́ти и҆́маши, толи́ко бо́ле и҆ ѹ҆диви́шисѧ·

19

Поне́же нꙋж́но прилежитъ вѣ́къ проитѝ, и҆ не възмо́жеши разꙋмѣти чт̂о пра́вед̑ным̑ ѻ҆бѣща́нна сꙋть·

20

Поне́же непра́вды і҆спо́лнь вѣкъ се́и и҆ немощеи. а҆ ѻ҆ нем̑м̑же въпраша́еши възвѣщꙋ тебѣ, насѣѧшасѧ лꙋка́в꙽ствїа, и҆ не ѹ҆̀ прїиде поги́бель е҆го, и҆ е҆гда̀ ли не възвратит̑сѧ е҆же сѧ насѣѧ̀, и҆ не погꙋби́тсѧ мѣ́сто и҆де́же насѣ́ѧно лꙋка́в꙽ство, не прїидетъ гдѣ насѣѧ́но е҆сть бл҃го, поне́же зе́рно сѣ́мени зла́го, е҆же въсѣѧ́но въ срд̑це а҆да́мово, и҆з нача́ла ка́ко мно́го ѕл̂а родѝ и҆ до нн҃ѣ. и҆ родит̑ да́же до жа́твы, воньмѝ самъ себѣ̀, ка́ко мно́го ѹ҆мно́жи пло́да ѕла́го зе́рно сѣмени лꙋка́ва, и҆ гдѣ бꙋ́дꙋтъ не съчте́ныѧ лꙋка́в꙽ства посѣ́ены, ка́ко бꙋ́детъ ве́лїе пожа́тїе ѹ҆гото́вано. не ѿвѣщахъ гл҃ѧ, когда, и҆ въ кое вре́мѧ сїа бꙋ́дꙋтъ, и҆ чесо ра́ди кра́т꙽ки и҆ не бл҃ги лѣта на́ша, ѻ҆́нже рече не бꙋ́ди ско́ръ паче вы́шнѧго, поне́же въсꙋе прилежи́ши е҆го превы́шити и҆же ѹ҆́жасъ твои мно́гъ, е҆да̀ не въпраша́ша дш҃а пра́вед̑ныхъ ѻ҆ тацх̑ѣ ве́щах̑ въ затворе́нїю свое҆мъ гл҃ѧ·

21

доко́лѣ та́ко надѣ́ющисѧ бꙋ́демъ, и҆ е҆гда̀ прїидꙋтъ намъ пло́ды жа́твы на́шеѧ въспрїѧ́тїе м꙽зды̀·

22

а҆рхаа҆гг҃лъ же ѹ҆рїи҆лъ ѿвѣща̀ м̂и. е҆гда̀ и҆спо́лнитсѧ число̀ сѣмени въ васъ, ꙗ҆́ко въ скала́хъ вѣ́къ, мѣ́рꙋ мѣри́л꙽ времена и҆ число́мъ съчте часы̀, и҆ не въсколѣба̀ ни възбꙋдѝ, да́же и҆спол̑҇нитсѧ пред̑рече́ннаѧ мѣ́ра·

23

И҆ ѿвѣща́хъ гл҃ѧ, ѽ влд̑ко г҃и. н̂о и҆ м̂ы сих̑ исполнены нече́стїа, и҆ нас̑҇ ради е҆гда ли не прїидетъ жа́тва пра́ведных̑, ра́ди грѣхо́въ ѻ҆бита́ющих̑ на землѝ, ѻ҆́нже рече, и҆ди и҆ въпроси и҆мꙋщаѧ въ чре́вѣ, е҆гда ли носи́вши ѳ҃ мс̑҇цеи възмо́жетъ живо́тъ е҆ѧ̀ в себѣ съдрьжа́ти пло́дъ, и҆ а́зъ ѿвѣщах̑, въи҆́стиннꙋ не възмо́жетъ·

24

ѻ҆́нже ѿвѣща̀, въ преи҆спод̑нихъ ѻ҆би́тели дш҃ъ сꙋть подо́бныѧ животꙋ. поне́же ка́ко родѧ́щаѧ хо́щетъ въско́рѣ роди́ти, та́кожде сїи хо́щꙋтъ да ѿдадꙋтъ и҆мъ вданое, из нача́ла же възвѣщꙋ, і҆ и҆з꙽ꙗ҆влю тебѣ̀ е҆го́же хо́щеши сматрѧ́ти, и҆ ѿвѣщах̑ е҆гда ли ѻ҆брѣто́хъ блгд̑ть пред̑ тобо́ю·

25

И҆ е҆гда ли възмо́жно сїѧ и҆ а́з꙽ъ же досто́и҆нъ ли покажи м̂и, е҆гда̀ ли бо́леи е҆сть вре́мени прїидꙋщаго нежели преидꙋщаго, и҆ли преидꙋщаго, нежели прїидꙋщаго·

26

Вѣ́мъ бо е҆же преиде, того же не вѣ́мъ чт̂о прїити и҆́мат̑·

27

ѻ҆́н же реч̑҇ ста́ни ѻ҆деснꙋ́ю менѐ, аз̑ же тебѣ̀ и҆з꙽ꙗ҆влю при́т꙽чею, и҆ ста́хъ и҆ ви́дѣхъ и҆ с̂е пе́щь горѧ́щаѧ про́идет̑ предо мно́ю. е҆гда же пла́мень преста̀, и҆ ды́мъ е҆щѐ ѻ҆ста̀ посемъ проиде же предо мно́ю ѻ҆́блакъ и҆сполнь воды̀. и҆з него́же сѧ и҆спꙋсти до́ждь ве́лїи. и҆ е҆гд̑а про́иде стремленїе дожда, ѹ҆мно́жишасѧ на нем̑ ка́плѧ. и҆ реч̑҇ къ мнѣ̀. внима́и себѣ̀, ꙗ҆́ко растет̑ дожд̑ь на́ипач̑҇ неже ка́пли, и҆ ѻ́гнь неже ды́мъ·

28

Та́ко бо́льшаѧ е҆сть мѣ́ра неже пре́иде, преѹ҆мно́жиша же ка́плѧ и҆ дым̑. и҆ си́це молих̑сѧ, е҆да лѝ а́зъ та́ко дол̑҇го жи́ти и́мам̑, и҆ли чт̂о и́мать прїити в та̀ времена̀ и҆ ѿвѣща́ ми гл҃ѧ·

29

Ѡ҆ зна́менїѧхъ си́хъ и҆же м̂ѧ въпраша́еши, ѿ ча́сти могꙋ т̂и гл҃ати, толи́ко нѣсмь по́сланъ да повѣмъ тебѣ̀ ѻ҆ животѣ̀ твоем̑ н̂о не свѣмъ·