Ostroh Bible❧Третя книга Ездри, розділ 5

1

Ѡ зна́менихъ же прїидетъ вре́мѧ, и҆же живꙋщїи на землѝ ѻ҆бремене́ни да́ньми ве́лїими, и҆ съкры́етсѧ пꙋть пра́вды, и҆ бꙋдетъ црс̑҇тво непло́дно ѿ вѣры·

2

И҆ ѹ҆множитсѧ непра́вда бо́леи нежели нн҃ѣ ви́диши, и҆ нежели е҆си слы́шалъ, землѧ̀ в ню́же вни́деши, і҆ ю́же ви́диши и҆же нн҃ѣ црс̑҇твꙋ́етъ, ѹ҆зрѧт̑ е҆ѧ̀ ѻ҆пꙋстѣнꙋ, и҆ да́сть л̂и тебѣ вы́шнїи жи́вꙋ бы́ти. ѹ҆́зриши по тре́теи трꙋбѣ и҆же въско́рѣ сл҃нце възсїѧ́етъ в нощи, и҆ лꙋна три́щи на днь. и҆ ка́паетъ кро́вь ѿ дре́ва, и҆ ка́мень дасть гла́съ свои. и҆ възъшата́ютсѧ лю́дїе, и҆ то́и бꙋдетъ црс̑҇твова́ти е҆гоже сѧ ненадѣ́ютъ живꙋщїи на землѝ. и҆ пти́цы пре́идт̑ꙋ ѿ мѣста свое҆го. и҆ мо́ре содом̑ское ры́бы ѿме́щетъ, и҆ да́сть гла́съ нощъ и҆же мно́зїи не зна́ша, и҆ вс̂и ѹ҆слы́шат̑ гласъ е҆го, и҆ трꙋси бꙋдт̑ꙋ по мѣстехъ мно́ѕѣхъ. и҆ ѻ́гнь без̑престани ѻ҆пꙋститсѧ. и҆ ѕвѣрїе польстїи преселѧ́тсѧ, и҆ же́ны болѣзнивыѧ родѧтъ ди́внаѧ. и҆ въ сла́дкихъ вода́хъ сла́ны ѻ҆брѧ́щꙋтсѧ, и҆ прїатели всѣхъ сами собою ѻ҆полчают̑сѧ. и҆ съкрысѧ тогда ѹ҆́м꙽ и҆ ра́зꙋмъ разлꙋчитсѧ в꙽ храни́лищи свое҆мъ, і҆ и҆зы́щетсѧ ѿ многихъ и҆ не ѻ҆брѧ́щетсѧ·

3

Непра́вда же и҆ невъздержанїе ѹ҆мно́житсѧ на зем̑лѝ. и҆ вопроситъ странꙋ ближнїю свою, и҆ речетъ, ни ли по тебѣ преидетъ правда правость творѧщи. и҆ т̂о ѿмещꙋтсѧ, и҆ бꙋдетъ в то̀ времѧ ѹ҆поваю҆тъ чл҃ци и҆ не воспрїимꙋтъ трꙋдѧт̑сѧ и҆ не ѹ҆правлѧ́ютъ пꙋти и҆хъ. сїѧ зна́менїѧ повелѣно гл҃ати тебѣ, ѿпꙋщено е҆сть мнѣ, и҆ а́ще помоли́шисѧ па́ки и҆ въспла́чешисѧ ꙗ҆́ко и҆ нн҃ѣ. и҆ пости́шисѧ седмь дн҃їи е҆ще бо́леи ѹ҆слы́шиши и҆ возбнв̑҇ꙋ и҆ тѣло моѐ ѹ҆страшис̑҇ ѕѣло, и҆ дш҃а моѧ ѹ҆трꙋди́сѧ ꙗ҆́ко и҆щезѐ. держа̀ м̂ѧ и҆же прїиде а҆гг҃лъ и҆же гл҃аше в꙽ м̂ѧ и҆ ѹ҆крѣпѝ м̂ѧ, и҆ поста́ви м̂ѧ на нога́хъ. и҆ бы́сть в но́щь в꙽торꙋ́ю и҆ прїиде къ мн̂ѣ салаѳїель во́жъ лю́демъ, и҆ рече мн̂ѣ гдѣ̀ бѧ́ше. и҆ въскꙋю лице твое ско́рбно. и҆л̂и не вѣси ꙗ҆́ко тебѣ въвѣре́нъ е҆сть і҆и҆л҃ь въ странѣ̀ преселе́нїѧ их̑. въста́ни б̂о и҆ вкꙋсѝ хлѣба. и҆ не ѻ҆пꙋстѝ насъ ꙗ҆́ко па́стыръ ста́до свое в рꙋки влъкомъ лꙋка́вымъ. и҆ реко́хъ е҆мꙋ, и҆ди ѿ менѐ. и҆ не приближишис̑҇ ко мнѣ и҆ ѹ҆слы́шалъ ꙗ҆ко реко́хъ. и҆ ѿи́де ѿ менѐ, а҆ а́зъ пости́хсѧ дн҃їи сед̑мь стенѧ́щи и҆ пла́чющи. ꙗ҆́ко мн̂ѣ заповѣда ѹ҆рїель а҆гг҃лъ. и҆ бы́сть по дн҃и седмихъ. и҆ па́ки помышле́нїе срд̑ца мое҆го трꙋдно бѧ́ше мн̂ѣ ѕѣло и҆ въспрїѧ̀ дш҃а моѧ дх҃ъ ра́зꙋменъ и҆ па́ки нача̀ гл҃ати пред̑ вы́шнимъ словеса̀, и҆ рѣхъ. ѽ влд̑ко г҃и ѿ всх̑ѣ дꙋбра́въ зем꙽скихъ и҆ ѿ всѣхъ дре́въ е҆го и҆збра́лъ е҆си виногра́дъ е҆ді́ныи. ѿ всѣхъ зе́мль вселе́нныѧ и҆збра́лъ е҆си себѣ ѹ҆до́лїе е҆ді́но. и҆ ѿ всѣхъ цвѣтъ селныхъ и҆збра́лъ е҆си себѣ кри́нъ е҆ді́нъ. и҆ ѿ всѣхъ бе́зд꙽нъ мо́рьских̑ и҆сполнилъ е҆си себѣ и҆сто́чник̑҇ е҆дїнъ. и҆ ѿ всѣхъ созида́нїи гра́дов̑҇ ѻ҆ст҃илъ е҆си себѣ сїѻ́нъ, и҆ ѿ всѣхъ сътворе́нїи летѧ́щихъ и҆меновалъ е҆си себѣ голꙋби́цꙋ е҆ді́нꙋ, и҆ ѿ всѣх꙽ сътворе́нїи скота̀ прови́дѣлъ е҆си себѣ ѻ҆вцꙋ̀ е҆ді́нꙋ, и҆ ѿ всѣхъ ѹ҆мно́женыхъ лю́дїи и҆зыска́лъ е҆си себѣ лю́ди е҆ді́ны. и҆ ѿ всѣхъ и҆скꙋше́нъ зако́нъ, да́лъ е҆си семꙋ е҆гоже желл̑҇ѣ е҆си людїи·

4

И҆ нн҃ѣ г҃и въскꙋю преда́лъ е҆си е҆ді́нъ мно́гимъ. и҆ ѹ҆гото́валъ е҆си на е҆ді́нъ ко́рень мно́ги и҆́ныѝ, и҆ расточи́лъ е҆си е҆ді́нъ твои въ мно́зѣхъ и҆ потопта́ша е҆го, и҆же проти́вꙋ гл҃ющаго во́ли твое́и. е҆ще твои҆хъ завѣтъ не вѣровахꙋ. и҆ а́ще ненавидѧ́ще ненави́дѣлъ е҆си лю́ди твоѧ̀. твои҆ми рꙋка́ми и҆́маши наказа́ти·

5

И҆ бы́сть е҆гда̀ гл҃алъ е҆смь словеса̀, и посла́нъ е҆сть а҆гг҃лъ и҆же пре́жде прїиде къ мн̂ѣ въ проходѧ́щꙋю но́щь. и҆ рече м̂и ѹ҆слы́ши м̂ѧ и҆ наѹ҆чю т̂ѧ. и҆ вон̑҇ми мѝ и҆ пред̑ложꙋ̀ пред̑ тобо́ю, и҆ реко́хъ. гл҃и г҃и мои. и҆ рече къ мн̂ѣ, ѕѣло въ ѹ҆жасѣ ѹ҆ма̀ сътворе́нъ е҆си ради і҆и҆л҃ѧ. и҆л̂и наи́паче възлюби́лъ е҆си е҆го, неже сътвори и҆̀. и҆ рѣхъ к не́мꙋ нѝ г҃и, н̂о болѧ́щи гл҃алъ е҆смь. мꙋ́чатъ б̂о сѧ лѧ́двїѧ моѧ по всѧ̀ ча́сы и҆́щꙋщи взѧ́ти стезю̀ вы́шнѧго. и҆ взыска́ти ча́сть сꙋ́да е҆го. и҆ рече къ мн̂ѣ, не мо́жеши. и҆ реко́х꙽, почто̀ г҃и, и҆ почто̀ родих̑сѧ и҆л̂и въскꙋ́ю не сътвори́сѧ ѹ҆тро́ба мт҃ри моеѧ мн̂ѣ гро́бъ, да не ви́дх̑ѣ трꙋда і҆а́ковлѧ и҆ безъси́лїѧ ра́ди і҆и҆л҃ева. и҆ рече къ мн̂ѣ. сочтѝ м̂и сїе и҆же е҆гда̀ не прїидо́ша. и҆ соберѝ м̂и раскро́пленыѧ ка́пли, и҆ ѻ҆зеленѝ м̂и сꙋхїѧ цвѣты, и҆ ѿврьзѝ м̂и запертыѧ храни́лища, і҆ и҆зведѝ м̂и затворе́ны в ни́хъ вѣтры, покажѝ м̂и гла́сꙋ ѻ҆́бразъ, и҆ тогда покажꙋ̀ т̂и трꙋдъ и҆же жеда́еши ви́дѣти и҆ рѣхъ, ѽ влд̑ко г҃и, кто́ бо е҆сть и҆же можетъ сїѧ ви́дѣти. то́кмо и҆же съ чл҃ки ѻ҆бита́нїѧ не и҆́мать·

6

А҆́з же безꙋменъ и҆ ка́ко могꙋ гл҃ати ѻ҆ си́хъ и҆же менѐ въспро́сиши. и҆ рече къ мнѣ̀ ка́ко не мо́жеши сътвори́ти е҆ді́нъ ѿ си́хъ и҆же гл҃ана сꙋть та́ко не мо́жеши ѻ҆брѣсти сꙋдъ мо́и. и҆лѝ въ ко́нецъ любо́въ ю҆́же лю́демъ ѻ҆бѣщахъ·

7

И҆ рѣхъ чт̂о сътворѧт̑ и҆же предо мно́ю бы́ша. і҆ и́же с на́ми і҆ и҆же по на́съ. и҆ гл҃а къ мнѣ̀, вѣнцꙋ подобенъ сꙋдъ мо́и. ꙗ҆́ко не послд̑ѣни́мъ по́зднаѧ, та́ко не пр́ьвым̑ ско́раѧ·

8

И҆ ѿвѣщахъ и҆ реко́хъ. не могаше сътвори́ти и҆же сътворени сꙋть і҆ и҆же сꙋть і҆ и҆же приходѧ́ще сꙋть въ е҆ді́но да бы́стрѣе сꙋдъ тво́и пока́жеши·

9

И҆ ѿвѣща къ мнѣ̀ и҆ рече. не мо́жетъ тща́ти творе́нїе на тво́рца, и҆ н̂и снестѝ вѣка и҆хъ и҆же в немъ сътво́рени сꙋть въ е҆ді́но и҆ рѣхъ·

10

Ка́ко гл҃еши рабꙋ̀ твое҆мꙋ. ꙗ҆́ко ѻ҆живлѧю҆щи ѻ҆живи́лъ е҆си, ѿ тебѐ сътво́рена творе́нїѧ въ е҆ді́но. и҆же б̂о снесло сътворе́нїе. мо́жетъ и҆ нн҃ѣ носи́ти настоѧ́щее въ е҆ді́но·

11

И҆ реч̑҇ къ мнѣ̀ въпросѝ живота женьска. и҆ гл҃еши к не́и. и҆ а́ще ро́диши, въскꙋю по времени, моли б̂о еѧ̀ да ро́дитъ десѧт̑ въ е҆ді́но. и҆ реко́хъ не бо мо́жетъ, н̂о по времени·

12

И҆ рече къ мнѣ̀. и҆ аз̑ дахъ матриси земъстѣи и҆ си́мъ и҆же просѣѧ́ни сꙋть на не́и по времени и҆́мже б̂о ѻ҆́бразомъ мла́денецъ не ро́дитъ т̂а и҆же ста́ра сꙋть·

13

Та́ко а҆́зъ раз꙽смотрих̑ ѿ себѐ сътвореныи вѣкъ. и҆ па́ки въспроси́хъ. и҆ рекохъ е҆гда̀ ѹ҆жѐ да́еши м̂и пꙋть гл҃ю пред̑ тобо́ю. и҆́мже мт҃и на́ша ѻ҆ не́иже гл҃алъ е҆си мн̂ѣ, е҆щѐ млада е҆сть ѹ҆жѐ ста́рости приближа́етсѧ. и҆ ѿвѣща къ мнѣ̀ и҆ реч̑҇. въспросѝ еѧ̀ и҆же ро́дит̑·

14

И҆ речетъ тебѣ̀. гл҃еши б̂о е́и. въскꙋю коих̑ роди́ла е҆си нн҃ѣ. нѣ сꙋть подо́бни тѣмъ и҆же пред̑ тобо́ю. н̂о мен꙽ши во́зрастом꙽. и҆ речетъ тебѣ т̂а и҆нїи сꙋть и҆же въ ю́ности силы рожд̑ени сꙋть. і҆ и҆нїи же по времени ста́рости ѻ҆скꙋдѣ́ющи матриси роди́шасѧ разꙋмѣи б̂о и҆ т̂ы ꙗ҆́ко ме́нши во́зрастомъ е҆стѐ ѿ тѣхъ и҆же преже вас̑҇ і҆ и҆же по ва́съ мен꙽ши неже в̂ы, ꙗ҆́ко ѹ҆жѐ състарѣю́щее сътворенїе и҆ крѣпостѝ ю҆́ноши преминꙋющи·

15

И҆ рекох̑ молю г҃и а҆́ще ѻ҆брѧ́щꙋ блгд̑ть пред̑ ѻ҆чима твои́ма. покажи рабꙋ̀ твое҆мꙋ и҆́мже посѣтиши сътворе́нїе своѐ·