Ostroh Bible❧Дії святих апостолів, розділ 3

1

зач̑҇, з҃·

2

Въкꙋ́пѣ же, пе́тръ і҆ и҆ѻн̑҇а́ въсхожа́ста въ ст҃и́лище на мл҃твꙋ въ часъ девѧ́тыи·

3

и҆ нѣ́кїи мꙋ́жь хро́мъ ѿ чрева ма́тере свое҆ѧ̀ сыи носи́мъ бываше. е҆го́же пола́гахꙋ по всѧ̀ дн҃и пред̑ дверми цр҃ковными реко́мыми кра́сными, просити милостынѧ ѿ входѧ́щихъ въ цр҃ковь·

4

И҆́же видѣ́въ петра̀ і҆ и҆ѻа́нна хотѧщихъ внити въ цр҃ковь, проша́ше ми́лостынѧ. възрѣ́в же петръ на́нь съ і҆ѻа́нном꙽, речѐ. възрѝ на́ ны. ѻ҆́н же прилежа́ше и҆ма, мнѧ нѣ́что ѿ них̑ прїѧ҆ти. рече́ же пе́тр꙽. сребра̀ и҆ зла́та нѣ́сть ѹ менѐ, н̂о е҆же и҆́мамъ, с̂е т̂и дам̑. въ и҆мѧ і҆с҃а х҃а назаре́ѧ въста́ни и҆ ходѝ. и҆ е҆мъ е҆го за деснꙋ́ю рꙋкꙋ въз꙽дви́же·

5

А҆́бїе же ѹ҆тверди́стѣсѧ е҆мꙋ плеснѣ и҆ глезнѣ. и҆ въскочи́въ, ст̂а и҆ хожа́ше. и҆ вни́де с ни́ма въ цр҃ковь, ходѧ и҆ скача, и҆ хвалѧ̀ б҃а·

6

И҆ видѣша е҆го вс̂и лю́дїе ходѧ́ща и҆ хвалѧ́ща б҃а. знаа́хꙋ же е҆го, ꙗ҆́ко сеи бѧ́ше ми́лостынѧ ради сѣдѧѝ при кра́сныхъ две́рех̑ цр҃ко́вныхъ. і҆ и҆спо́лнишасѧ чю́да и҆ ѹ҆́жаса ѻ҆ приключи́вшем̑сѧ е҆мꙋ̀·

7

зач̑҇, и҃·

8

Держа́щꙋ же сѧ и҆сцѣлѣ́вшемꙋ хр́омомꙋ петра̀ і҆ и҆ѻа́нна. притеко́ша к нимъ вс̂и людїе въ притвор̑҇ нарица́емыи соло́моновъ, ѹ҆жа́сни·

9

Видѣ́в же пе́тръ. ѿвѣщева́ше къ людемъ·

10

Мꙋ́жїе і҆и҆л҃ьтѧне, чт̂о чю́дитесѧ ѻ҆ се́мъ; и҆л̂и на́ ны чт̂о взира́ете, ꙗ҆́ко своею л̂и си́лою и҆л̂и бл҃гоче́стїем̑ сътвори́хомъ е҆го ходи́ти;

11

Бг҃ъ а҆враа́мовъ, і҆ и҆саа́ковъ, і҆ и҆а́ковль, бг҃ъ ѿц҃ъ на́шихъ, просла́ви ѻ҆́трока свое҆го і҆с҃а, е҆гоже ѹ҆́бо в̂ы преда́сте, и҆ ѿверго́стесѧ е҆го пред̑ лицемъ пила́товѣмъ,.

12

Сꙋди́вшꙋ ѻ҆́номꙋ пꙋсти́ти, вы́ же ст҃а́го и҆ пра́веднаго ѿверго́стесѧ, І҆ и҆спроси́сте мꙋ́жа ѹ҆бїицꙋ да́ти ва́мъ, нача́лника же жи́зни ѹ҆би́сте, е҆гоже бг҃ъ въскр҃сѝ ѿ ме́рътвых̑, е҆мꙋ́же м̂ы свидѣтеле е҆смы, і҆ ѻ҆ вѣ́рѣ и҆́мени е҆го, сего е҆гоже видите и҆ вѣ́сте, ѹ҆твердѝ и҆́мѧ е҆го, и҆ вѣра ꙗ҆же е҆го ра́ди, да́сть е҆мꙋ вс̂ю цѣлость сїю, пред̑ всѣми ва́ми·

13

И҆ нн҃ѣ мꙋ́жїе бра́тїа вѣмъ. ꙗ҆́ко по невѣдѣнїю с̂е сътвори́сте, ꙗ҆коже и҆ кнѧѕи ва́ши. бг҃ъ же, ꙗ҆́коже провозвѣсти ѹ҆сты всѣхъ про̑҇рокъ свои҆хъ пострада́ти х҃ꙋ сконча̀ та́ко·

14

зач̑҇, ѳ҃·

15

Пока́итесѧ ѹ҆́бо и҆ ѻ҆брати́тесѧ да ѻ҆цы́ститесѧ ѿ ва́шихъ грѣх꙽, ꙗ҆́ко да прїидꙋтъ времена̀ прохла́дна ѿ лица гн҃ѧ, и҆ послетъ преже нарече́ннаго вам̑, іс҃а х҃а, е҆гоже подоба́етъ нб҃си ѹ҆бо прїа́ти, да́же до лт̑ѣ ѹ҆строе҆нїа. и҆хъже гл҃а бг҃ъ ѹ҆сты̀ всѣхъ ст҃ыхъ свои҆хъ прро̑҇окъ, ѿ в́ѣка·

16

Мои҆се́и ѹ҆бо къ ѿц҃емъ речѐ, ꙗ҆́ко проро́ка вамъ въздви́гнетъ г҃ь бг҃ъ ва́шъ ѿ братїѧ ва́шеѧ, ꙗ҆коже менѐ, того послꙋ́шаите ѻ҆ всемъ, е҆ли́ка а҆ще речетъ къ вамъ·

17

Бꙋ́детъ же всѧ́ка дш҃а, ꙗ҆́же а҆ще не послꙋ́шае҆тъ про̑҇ро́ка того, потреби́тсѧ ѿ людїи. и҆ вс̂и же про̑҇ро́цы ѿ самꙋи҆ла и҆ про́чих꙽, е҆ли́цы гл҃аша и҆ възвѣсти́ша дн҃и сїа̀·

18

в̂ы е҆сте сн҃ове про̑҇ро́къ, и҆ завѣта, и҆ми же завѣща бг҃ъ къ ѿц҃емъ ва́шим̑, гл҃ѧ къ а҆враа́мꙋ. и҆ ѻ҆ сѣмени твоем̑ блс̑҇вѧ́тсѧ вс̂ѧ ѿчествїѧ земна́ѧ. ва́мъ пе́рвѣе бг҃ъ възвд̑и́гъ ѻ҆́трока свое҆го і҆с҃а, посла̀ е҆го блс̑҇вѧ́ща васъ, ѿвраща́тисѧ къмꙋ́ждо ѿ ѕло́бъ ва́шихъ·