Ostroh Bible❧Дії святих апостолів, розділ 4

1

зач̑҇, і҃·

2

Гл҃ющем же и҆мъ къ лю́демъ, наидо꙼ша на ни́хъ сщ҃е́нницы и҆ воево́да цр҃ко́вныи, и҆ сад̑дꙋке́е, стꙋжа́юще с̂и за е҆же ѹ҆чи́ти и҆мъ лю́ди, и҆ въз꙽вѣща́ти ѻ҆ і҆с҃ѣ въскр҃се́нїе мр҃твых꙽. и҆ възложи́ша на ни́хъ рꙋцѣ, и҆ положи́ша и҆хъ въ соблюде́нїе до ѹ҆трѣѧ, бѣ б̂о ве́черъ ѹ҆же. мно́зи же ѿ слы́шавшихъ сло́во, вѣ́роваша, и҆ бы́сть число̀ мꙋжїи ꙗ҆́ко ты́сѧщь пѧ́ть·

3

Бы́сть же наѹ҆трѣѝ събра́тисѧ кнѧзе́мъ их̑, и҆ ста́рцемъ и҆ кни́жником꙽ въ і҆ерс̑҇лим̑ і҆ а́нна а҆рхїере́й, и҆ каі꙼а́фа. і҆ и҆ѻ҆а́ннъ, і҆ а҆леѯа́н꙽дрь. и҆ е҆ли́цы бѣша ѿ р́ода а҆рхїереи́ска. и҆ поста́вльше их̑ посредѣ, въпраша́хꙋ. коею̀ си́лою, и҆л̂и кои́мъ и҆́менемъ сътвори́сте с̂е в̂ы; тогда̀ пе́тръ и҆спо́лнив꙽сѧ дх҃а ст҃а, речѐ к ни́мъ. кнѧ́ѕи людьстїи, и҆ ста́рцы і҆и҆л҃евы. а҆ще м̂ы дне́сь и҆стѧза́еми е҆смы, ѻ҆ бл҃годѣѧнїи чл҃ка не́мощна, ѻ҆ чесо́мъ се́й сп҃сесѧ, разꙋ́мно бꙋ́ди всѣмъ вам꙽, и҆ всм̑ѣ лю́демъ і҆и҆л҃евомъ, ꙗ҆́ко въ и҆мѧ і҆с҃а х҃а назаре́а, е҆го́же в̂ы распѧ́сте, е҆гож̑ бг҃ъ въскр҃си ѿ мр҃твыхъ, ѻ҆ се́мъ се́й стоит̑ пред̑ ва́ми здра́въ·

4

Се́й е҆́сть ка́мень ѹ҆коре́нныи ѿ вас̑҇ зи́ждꙋщих̑, бы́выи въ главꙋ̀ ѹ҆глꙋ̀, и҆ нѣсть ѻ҆ и҆но́мъ н̂и ѻ҆ е҆ді́номже сп҃се́нїа. нѣ́сть б̂о и҆ного и҆́мени под̑ нб҃семъ, да́наго въ чл҃цѣхъ, ѻ҆ не́мже подоба́етъ спс̑҇тисѧ на́мъ·

5

зач̑҇, а҃і·

6

Видѧще же петро́во дерзнове́нїе і҆ и҆ѻа́нново. и҆ разꙋмѣвше ꙗ҆́ко чл҃ка некни́жна е҆ста и҆ про́ста, дивлѧ́хꙋсѧ, знаа́хꙋ же их̑, ꙗ҆́ко съ і҆с҃омъ бѣста. чл҃ка же видѧ́ще с ни́ми стоѧ҆ща и҆сцѣлѣ́вшаго, ничтоже и҆мѧ́хꙋ проти́вꙋ рещѝ·

7

Повелѣ́вше же и҆́ма во́нъ и҆з꙽ сонмища и҆зыти, стѧза́хꙋсѧ к себѣ̀ гл҃юще. чт̂о сътворимъ чл҃кома си́ма; ꙗ҆́ко ѹ҆бо разꙋмно зна́менїе бы́сть и҆́ма, всѣмъ живꙋ́щимъ въ і҆ерс̑҇ли́мѣ ꙗ҆́вѣ, и҆ не мо́жемъ ѿврещи́сѧ. н̂о да не бо́лѣ про́стретсѧ въ лю́дехъ, преще́нїемъ да запрѣти́мъ и҆ма, ктомꙋ̀ не гл҃ати ѻ҆ и҆́мени се́мъ ни е҆ді́номꙋ ѿ чл҃къ. и҆ призва́вше и҆хъ, заповѣ́даша и҆ма ѿнꙋдъ не провѣщева́ти, ни ѹ҆чи́ти ѻ҆ и҆́мени і҆с҃овѣ·

8

Пе́тръ же і҆ и҆ѻ҆а́ннъ, ѿвѣща́вше к нима рѣ́ста, а҆ще праведно е҆сть пред̑ бг҃омъ, ва́съ послꙋшати па́че, неже л̂и б҃а; сꙋ́дите. не мо́жемъ б̂о м̂ы ꙗ҆́же ви́дѣхомъ и҆ слы́шахомъ, не гл҃ати. ѻ҆ни́ же призапрѣщьше и҆́ма, пꙋсти́ша и҆хъ. ничто́же ѻ҆брѣт꙽ше како мꙋ́чити и҆́х꙽ людїи ради. ꙗ҆́ко вс̂и прославлѧ́хꙋ бг҃а ѻ҆ бы́вшем̑. лѣты б̂о бѧше мно́жае четы́редесѧ́те чл҃къ, ѻ҆ не́мже бы́сть чю́до сїе и҆сцѣле́нїѧ·

9

зач̑҇, в҃і·

10

Ѿпꙋще́на же бы́вша, прїидо́ста къ свои҆мъ, и҆ възвѣсти́ста е҆ли́ка к ним̑ а҆рхїере́ѝ и҆ ста́рцы рѣша·

11

ѻ҆ни же слы́шавше, е҆ді́нодꙋ́шно въз꙽двиго́ша глас̑҇ къ б҃ꙋ, и҆ рекоша·

12

влд̑ко т̂ы б҃е сътвори́выи нб҃о и҆ зе́млю и҆ мо́ре, и҆ вс̂ѧ ꙗ҆́же в ни́х꙽. и҆же дх҃омъ ст҃ым̑ ѹ҆сты̀ ѿц҃а на́шего дв҃да ѻ҆трока твое҆го рекїи·

13

Вскꙋ́ю шата́шасѧ ꙗ҆́зы́цы, и҆ лю́дїе поѹ҆чи́шасѧ тще́тным̑ приста́ша царїе зем꙽стїи. и҆ кнѧ́ѕи събра́шасѧ вкꙋ́пѣ, на́ г҃а и҆ на х҃а е҆го·

14

Събра́ша б̂о сѧ въи҆́стинꙋ въ градѣ се́мъ, на ст҃ого ѻ҆́трока твое҆го і҆с҃а, е҆го́же пома́за,.

15

И҆́род̑ же и҆ по́нтеискїи пилатъ, съ ꙗ҆зыкы и҆ людмѝ і҆ил҃евыми, сътвори́ти е҆ли́ка рꙋка твоѧ̀ и҆ съвѣтъ твои прежд̑е наречѐ быти·

16

И҆ нн҃ѣ г҃и, призрѝ на преще́нїѧ и҆хъ, и҆ да́ждь рабо́мъ твои҆мъ съ всѣмъ дер꙽знове́нїемъ гл҃ати сло́во твоѐ, внегда̀ рꙋ́кꙋ твою прострѣти, въ и҆сцѣленїѧ, и҆ зна́менїа и҆ чюдеса̀ бывати и҆менем̑ ст҃ым̑ ѻ́трока твое҆го і҆с҃а. и҆ помоли́вшемсѧ и҆́мъ, подви́жесѧ мѣ́сто и҆дѣ́же бѧхꙋ съ́брани, і҆ и҆спо́лнишасѧ вс̂и дх҃а ст҃а. и҆ гл҃ахꙋ сло́во бж҃їе съ дръзнове́нїемъ·

17

Наро́дꙋ же вѣ́ровавшимъ, б̂ѣ срд̑це и҆ дш҃а е҆ді́на,.

18

И҆ ни е҆ді́нъ же что̀ ѿ имѣ́нїѧ свое҆го гл҃аше своѐ бы́ти, н̂о бѧ́хꙋ и҆мъ вс̂ѧ ѻ҆бща, и҆ ве́лїею силою въздаа́хꙋ свѣдѣтел̑҇ство а҆плс̑҇и въскрс̑҇нїю г҃а і҆с҃а·

19

Бл҃годать же б̂ѣ ве́лїѧ на всѣхъ и҆хъ. не бѧ́ше б̂о лишенъ ни е҆ді́нъ в нихъ. е҆ли́цы бо господїе се́ломъ и҆л̂и домовомъ бѧ́хꙋ, прода́юще приноша́хꙋ цѣ́ны прода́емыхъ и҆ полага́хꙋ при ногах̑ а҆пс̑҇лъ·

20

даа́ше же сѧ комꙋ́ждо е҆же а҆ще кт̂о требова́ше·

21

І҆ѻ҆сїѳьж̑ нарече́нныи варна́ва, ѿ а҆пс̑҇лъ, е҆же ес̑҇ сказа́емо сн҃ъ ѹ҆тѣше́нїѧ, леввит̑, ки́прѧнинъ ро́домъ, и҆мѣѧ́ село̀, прода́въ принесѐ цѣ́нꙋ, и҆ положѝ пред̑ нога́ма а҆пс̑҇лъ·