Ostroh BibleДії святих апостолів, розділ 5
Шрифт:
Запис:
1
зач̑҇, г҃і·
2
Мꙋ́жъ же нѣ́кїи, а҆на́нїѧ и҆́менемъ, съ сапфи́рою жено́ю свое҆ю̀ прода́ста село̀, и҆ ѹ́таѝ ѿ цѣны̀ свѣ́дꙋщи и҆ женѣ̀ е҆го, и҆ принесѣ ча́сть нѣкꙋю пред̑ нога́ма а҆пс̑҇лъ положѝ·
3
Рече́ же петръ, а҆на́нїе, почто̀ и҆спо́лъни сатана̀ срд̑це твоѐ, сълга́ти дх҃ꙋ ст҃о́мꙋ,
4
И҆ ѹ҆таи́ти ѿ цѣны̀ села̀; не сꙋ́щее ли твоѐ б̂ѣ, и҆ продано̀ въ твое҆и ѻ҆́бласти бѧ́ше; чт̂о ꙗ҆ко положѝ ве́щь сїю̀ въ срд̑цы свое҆мъ; не солга̀ чл҃комъ, н̂о б҃ꙋ·
5
Слы́шав же а҆на́нїа словеса̀ сїѧ̀, па́дъ и҆́зд̑ше. и҆ бы́сть стра́хъ вели́къ на всѣ́хъ слы́шащих꙽ сїѧ. въста́вше же ю҆́ноша, стреби́ша е҆го·
6
І҆ и҆знес꙽ше погребо́ша·
7
Быс̑҇ же ꙗ҆́ко тре́мъ часо́мъ минꙋ́вшемъ, и҆ жена̀ е҆го не вѣдꙋщи бы́вшаго, вни́де ѿвѣща́в же е҆и петръ·
8
Рцы̀ м̂и а҆ще на толи́цѣ село̀ ѿда́ста; ѻ҆на́ же реч̑҇, е́и҆, на толи́цѣ. пе́тръ же речѐ к не́и,
9
Чт̂о ꙗ҆́ко съгласи́стасѧ и҆скꙋси́ти дх҃ь гн҃ь; с̂е но́ги погр́ебшихъ мꙋжа твое҆го при дверехъ, і҆ и҆зне́сꙋтъ т̂ѧ. паде́ же а҆́бїе пред̑ нога́ма е҆го, і҆ и́здъше. вшед̑ше же ю҆́ноша, ѻ҆брѣто́ша ю҆́ ме́ртвꙋ·
10
І҆ изне́сше погребо́ша ю҆̀ ѹ҆ мꙋ́жа е҆ѧ̀. и҆ бы́сть стра́хъ вели́къ на все́й цр҃кви и҆ на всх̑ѣ слы́шащих̑ сїа·
11
зач̑҇, д҃і·
12
Рꙋка́ма же а҆пс̑҇лъскама бы́ша зна́менїѧ и҆ чюдеса̀ въ людехъ мно́га. и҆ бѧхꙋ е҆дїнодꙋшно вс̂и въ притворѣ соломони·
13
ѿ про́чих̑ же никтоже смѣѧ́ше прилѣплѧ́тисѧ и҆́мъ, н̂о велича́хꙋ и҆хъ лю́дїе. па́че же прилага́хꙋсѧ вѣрꙋ́ющїи гв҃и мно́жество мꙋже́и и҆ же́нъ, Ꙗ҆́ко и҆ на распꙋтїѧхъ и҆зноси́ти недꙋ́жныѧ, и҆ полага́ти на посте́лѧхъ и҆ на ѻ҆дрѣ́хъ, да грѧдꙋ́щꙋ петрꙋ̀, поне сѣ́нь ѻ҆сѣ́нитъ нѣ́кое҆го ѿ нихъ. схожа́ше же сѧ мно́жество, ѿ ѻ҆кре́стныхъ градо́въ въ і҆е҆рс̑҇ли́мъ, приносѧ́ще недꙋ́жныѧ, и҆ стражꙋщаа ѿ дꙋ́хъ нечи́стыхъ, и҆же и҆сцѣлева́хꙋсѧ вс̂и·
14
Въста́в же а҆рхїере́и, и҆ вс̂и и҆же с нимъ, сꙋ́щаѧ е҆ресь сад꙽дꙋкеискаѧ̀, и҆спо́лнишасѧ за́висти. и҆ възложи́ша рꙋ́ки своѧ̀ на а҆пс̑҇лы, и҆ послаша их̑ въ съблюде́нїе ѻ҆́бщее·
15
А҆гг҃лъ же гн҃ь, но́щїю ѿвр́ьзе две́ри темни́ци. и҆звд̑е же и҆хъ, речѐ. и҆дѣте, и҆ ста́вше гл҃ите въ цр҃кви лю́дем̑ вс̂ѧ гл҃ы жи́зни сеѧ̀·
16
зач̑҇, е҃і·
17
Слы́шавше же внидо́ша по ѹ҆́треници въ цр҃ковь, и҆ ѹ҆ча́хꙋ·
18
Пришед̑ же архїере́и, і҆ и҆же с нимъ, съзваша съборъ, и҆ всѧ̀ ста́рца сн҃овъ і҆ил҃евъ, и҆ посла́ша въ ѹ҆зи́лище привестѝ их̑. слꙋги́ же шед̑ше, не ѻ҆брѣто́ша и҆хъ въ темни́цы. въз꙽врати́в꙽ше же сѧ възвѣстиша гл҃юще, Ꙗ҆́ко ѹ҆бо темни́цꙋ ѻ҆брѣтохомъ заключе́нꙋ съ всѧ́цѣмъ ѹ҆тверже́нїем꙽, и҆ блю́стителѧ стоѧ́ща пред̑ две́рми, ѿве́рзъше же внꙋтрь ни е҆ді́ного ѻ҆брѣто́хом̑·
19
Ꙗ҆́коже слы́шѧша словеса̀ сїа̀, сщ҃е́нникъ же и҆ вое҆во́да цр҃ко́вныи, и а҆рхїере́и, недоѹ҆мѣ́вахꙋсѧ ѻ҆ ни́хъ, чт̂о ѹ҆бо бꙋдетъ с̂е·
20
Пришед̑ же нѣ́кто възвѣсти и҆мъ, ꙗ҆́ко сѐ мꙋжїе их̑же всадисте в темни́цꙋ, сꙋть въ цр҃кви стоѧ҆ще, и҆ ѹ҆чаще лю́ди·
21
Тогда̀ шед̑ вое҆во́да съ слꙋгами, и҆ приведѐ и҆хъ, н̂о не с нꙋжею. боѧ́хꙋ б̂о сѧ людїи, да не побїю́тъ и҆хъ ка́менїемъ. привед̑ше же и҆хъ поста́виша на со́нмищи·
22
И҆ въпросѝ их̑ а҆рхїе҆ре́и, гл҃ѧ. не запрѣще́нїемъ ли запрѣти́хомъ вамъ, не ѹ҆чи́ти ѻ҆ и҆́мени семъ; и҆ с̂е и҆спо́лнисте і҆е҆рс̑҇ли́мъ ѹ҆че́нїемъ ва́шимъ, и҆ хо́щете навестѝ на́ н̂ы кро́вь чл҃ка сего; ѿвѣща́в же пе́тръ и҆ а҆пс̑҇ли рѣша. вѣ́ровати подоба́етъ бв҃и, пач̑҇, неже л̂и чл҃комъ. б҃ъ ѿц҃ъ на́ших̑ въздви́же і҆с҃а, е҆гоже в̂ы ѹ҆би́сте повѣшьше на́ древѣ. сего б҃ъ нача́лника и҆ сп҃са възне́съ десни́цею свое҆ю̀, да́ти покаа́нїе і҆ил҃еви и҆ ѻ҆ставле́нїе грѣхом̑. и҆ м̂ы е҆смы того свѣдѣтеле гл҃омъ симъ, и҆ дх҃ъ же ст҃ы́и, е҆гоже дастъ б҃ъ вѣ́ровавшимъ е҆мꙋ·
23
ѻ҆ни же слы́шавше надыма́хꙋсѧ. и҆ съвѣща́ша ѹ҆би́ти и҆́х꙽·
24
Въста́в же нѣ́кїи на со́нмищи фарисе́и и҆́менемъ гамалїи҆лъ, зако́ноѹ҆чи́тел꙽, что́мъ всѣми люд̑мѝ, повелѣ, вн̂ѣ ма́ло чт̂о а҆пс̑҇лом̑ ѹ҆стꙋпи́ти. рече́ же к ни́мъ, мꙋжїе і҆и҆л҃ьтѧне, внима́ите себѣ ѻ҆ чл҃цх̑ѣ си́хъ, чт̂о хо́щете сътвори́ти. предъ си́ми б̂о дн҃ьми въста̀ ѳе́вда, гл҃ѧ бы́ти нѣ́что себѐ, е҆мꙋ́же прилѣпи́шасѧ число́мъ мꙋ́жїи ꙗ҆́ко четы́рист̂а, и҆́же ѹ҆бїе́нъ бы́сть, и҆ вс̂и е҆ли́цы вѣ́роваша е҆мꙋ, разы́до́шасѧ, и҆ бы́ша нивочто́же·
25
Посе́мъ въста̀ і҆юда галїле́ѧнинъ въ дн҃и написа́нїѧ, и҆ ѿвлечѐ люди дово́льны въ слд̑ѣ себѐ. и҆ то́й поги́бе и҆ вс̂и е҆ли́цы послꙋшаша е҆го, разсы́пашасѧ, и҆ нн҃ѣ гл҃ю вам̑, ѿстꙋпи́те ѿ чл҃къ сих̑, і҆ ѻ҆ста́вите и҆́хъ. ꙗ҆́ко а҆́ще бꙋ́детъ ѿ чл҃къ съвт̑ѣ, и҆ли дѣло с̂е, разори́тсѧ. а҆́ще ли же ѿ б҃а е҆́сть, не мо́жете разори́ти т̂о, е҆д̂а ка́ко и҆ бг҃обо́рцы ѻ҆брѧ́щетесѧ·
26
послꙋшашаж̑ е҆го, и҆ призва́вше а҆пс̑҇лы, би́вше запрѣти́ша и҆́мъ, не гл҃ати ѻ҆ и҆́мени і҆с҃овѣ, и҆ ѿпꙋсти́ша и҆хъ. ѻ҆ни́ же ѹ҆́бо и҆дѧ́хꙋ ра́дꙋю҆щесѧ ѿ лица̀ събо́рꙋ, ꙗ҆́ко за́ имѧ е҆го сподо́бишасѧ бесче́стїе прїѧ҆́ти. въ всѧ́ же дн҃и въ цр҃кви, и҆ в домѣх꙽ не престаа́хꙋ ѹ҆ча́ще, и҆ бл҃говѣствꙋюще і҆с҃а х҃а·
Джерела
