Ostroh BibleДії святих апостолів, розділ 6
Шрифт:
Запис:
1
зач̑҇, ѕ҃і·
2
Въ дн҃ех̑ же си́хъ, ѹ҆мно́жившемсѧ ѹ҆чн҃комъ, бысть ропта́нїе е҆́ллиномъ къ е҆вр́еѻм̑, ꙗ҆́ко презри́ми быва́хꙋ въ слꙋже́нїи повседн҃е́внѣмъ вдови́ца ихъ·
3
Призва́вше же дв̂анадесѧтїи мно́жество ѹ҆чени́къ, рѣша. не ѹ҆го́дно е҆сть на́мъ ѻ҆ста́вльшемъ сло́во бж҃їе, слꙋжи́ти трапе́замъ·
4
ѹ҆смотри́те ѹ҆бо бра́тїе мꙋ́жа ѿ ва́с꙽ свидѣтельствованы сед̑мь, и҆спо́лнены дх҃а ст҃а и҆ премꙋ́дрости, и҆́хже поста́вимъ над̑ слꙋжбою сею̀. м̂ы же въ мл҃твѣ и҆ слꙋже́нїи сло́ва пребꙋ́демъ. и҆ ѹ҆го́дно бы́сть сло́во с̂е предъ всѣмъ наро́домъ·
5
И҆ и҆збра́ша стефа́на, мꙋжа и҆спо́лнена вѣ́ры и҆ дх҃а ст҃а, и҆ фїли́ппа и҆ про́хора, и҆ никоно́ра, и҆ ти́мона, и҆ парме́на, и҆ никола́ѧ̀ прише́лца а҆нтиѻ҆хїискаго, и҆хже поста́виша предъ а҆пс̑҇лы, и҆ помоли́вшесѧ, възложиша на́ нѧ рꙋцѣ̀. и҆ сло́во бж҃їе растѧ́ше, и҆ мно́жашесѧ число̀ ѹ҆чн҃къ въ і҆ерс̑҇ли́мѣ ѕѣло̀. и҆ мно́г꙽ народ̑ сщ҃е́нникъ, послꙋшахꙋ вѣ́рою·
6
зач̑҇, з҃і·
7
Стефа́нъ же и҆спо́лнь вѣ́ры и҆ си́лы, творѧ́ше зна́менїѧ и҆ чюдеса̀, ве́лїа въ людехъ. въста́ша же нѣ́цыи ѿ со́н꙽ма гл҃емаго ливерти́н꙽ска, и҆ кирине́иска, и҆ а҆леѯа́ндрьска, і҆ иже ѿ киликїѧ и҆ а҆сїѧ, състѧза́ющесѧ съ стефа́номъ, и҆ не можа́хꙋ противꙋ ста́ти премꙋдрости, и҆ дх҃ꙋ и҆мже гл҃аше·
8
Тогда̀ ѝзведо́ша мꙋ́жа, гл҃юща ꙗ҆ко слы́шахомъ е҆го гл҃юща гл҃ы хꙋ́лны на моѷсе́ѧ и на б҃а·
9
сподвиго́ша же лю́ди и҆ ста́рца и҆ книжники, и҆ въста́вше въсхи́тиша е҆го, и҆ приведо́ша на со́нмиище. поста́виша же свѣдѣтелѧ ло́жны, гл҃юща·
10
Ꙗ҆́ко чл҃къ се́й не преста́етъ глаго́лы хꙋлныѧ гл҃ѧ, на мѣ́сто ст҃ое сїе и҆ зако́нъ·
11
Слы́шахом̑ бо е҆го гл҃юща, ꙗ҆́ко і҆с҃ назаре́и се́й разори́т꙽ мѣ́сто сїе, і҆ и҆змѣни́т꙽ ѻ҆бы́чаѧ, ꙗ҆́же предаде намъ моѷсе́и·
12
И҆ възрѣ́вше на́нь вс̂и сѣдѧ́щеѝ въ со́нмищи, видѣша лицѐ е҆го ꙗ҆́ко лицѐ а҆гг҃лꙋ·
Джерела
