Ostroh Bible❧Книга пророка Даниїла, розділ 4

1

Азъ навходоносо́ръ ѻ҆билꙋѧ бѣхъ в домꙋ̀ свое҆мъ, и҆ бл҃го цвѣтыи на прс̑҇тлѣ своем̑.

2

Сонъ ви́дѣхъ и҆ ѹ҆стра́ши м̂ѧ. и҆ смѧто́хсѧ на ло́жи моемъ, и҆ видѣ́нїѧ главы̀ мое҆ѧ смѧта́хꙋ м̂ѧ. и҆ мно́ю заповѣдасѧ за́повѣдь, привестѝ пред̑ мѧ всѧ̀ мꙋжа мꙋдрыѧ вавѷлон꙽скы, да сказа́нїе сна̀ възвѣтѧ́тъ мн̂ѣ. и҆ въхожда́хꙋ ба́лїѧ, и҆ вол꙽сви газарин꙽стїи, и҆ халдѣ́и, и҆ со́нъ а҆зъ рѣхъ пред̑ ними. и҆ сказа́нїѧ е҆го не възвѣсти́ша м̂и. до́ндеже дрꙋгїи вни́де пред̑ мѧ данїилъ, е҆мꙋже и҆мѧ валтасаръ, по и́мени б҃а мое҆го, и҆же дх҃ъ бж҃їи ст҃ъ и҆́мать в꙽ себѣ, и҆ со́нъ пред̑ нимъ рѣхъ. валтаса́ре кнѧ́же ба́лїискь, е҆гоже а҆зъ разꙋмѣхъ ꙗ҆́ко дх҃ъ бж҃їи ст҃ыи и҆́маши и҆ всѧ̀ та́ина не ѿнемо́жетсѧ тебѣ. слы́ши видѣ́нїе сна̀ мое҆го и҆же ви́дѣхъ и҆ сказа́нїе е҆го повѣждъ мн̂ѣ. и҆ вѣдѣнїе главы̀ моеѧ на ло́жи мое҆мъ. зрѣхъ, и҆ с̂е дꙋбъ средѣ землѧ̀, и҆ высота̀ е҆го възвеличисѧ ѕѣло, и҆ досѧза́ше до нб҃се. и҆ ко́ренїе е҆го в꙽ кон꙽цых̑ землѧ̀ всеѧ̀. ли́ствїе е҆го кра́сно, и҆ плод̑ е҆го мног꙽, и҆ пи́ща всѣхъ в нем̑. и҆ под ни́мъ вселѧ́хꙋсѧ вс̂и ѕвѣрїе ди́вїи, и҆ въ вѣтвехъ е҆го живѧ́хꙋ вс̂ѧ пти́ца нбс̑҇ныѧ, и҆ ѿ него пита́шесѧ вс̂ѧ землѧ̀. ви́дѣхъ въ снѣ̀ но́щїю на ло́жи мое҆мъ. и҆ с̂е бъж꙽дрїи ст҃ыи ѿт̑ нб҃се сни́де, и҆ въз꙽гласѝ крѣп꙽цѣ, и҆ рече, посѣцѣте дꙋбъ, и҆ ѻ҆бїате вѣ́ѧ е҆го. и҆ ѻ҆брꙋшите ли́ствїе е҆го, и҆ расы́плете плод̑ е҆го. да сѧ възы́блютъ звѣрїе и҆же под ни́мъ, и҆ пти́ца съ вѣтвеи е҆го. то́чїю прониче́нїе ко́ренїѧ е҆го въ землѝ ѻ҆ста́вите. и҆ въ ѹ́зе желѣзне и҆ мѣ́дьне и въ травѣ вн̂ѣ, и҆ ро́сѣ нбс̑҇нѣи вселит̑сѧ, и҆ съ звѣрем̑ ди́вїим̑ ча́сть е҆го. ѿ чл҃къ и҆змѣнит̑сѧ срд̑це е҆го, и҆ срд̑це звѣрино дас̑҇ѧ е҆мꙋ. и҆ седмь вре́менъ и҆змѣнит̑сѧ ѻ҆ нем̑. сказа́нїемъ бъж꙽дре сло́во и҆ гл҃ъ ст҃ъ въпро́съ. да ѹ҆вѣ́дѧтъ живꙋщеи ꙗ҆́ко владе́тъ вы́шнїи цр҃ьствомъ чл҃чемъ, и҆ е҆мꙋже въсхо́щет̑ дастъ е҆̀. и҆ похꙋле́нїе чл҃че въста́вит̑ в нѐ. сїи со́нъ и҆же ви́дѣхъ а҆́зъ навходоносо́ръ цр҃ь. ты́ же валтаса́ре сказа́нїе е҆го повѣждь пре́ди. ꙗ҆́ко вс̂и мꙋдрїи црс̑҇тва мое҆го не могꙋтъ сказа́нїѧ е҆мꙋ и҆сповѣдати мн̂ѣ. ты́ же данїи́ле мо́жеши, ꙗ҆́ко дх҃ъ бж҃їи ст҃ъ в тебѣ·

3

Тогда̀ данїилъ е҆мꙋже и҆мѧ валтаса́ръ, ѹ҆жасе́сѧ а҆ки е҆ді́нъ ча́съ, и҆ размышле́нїѧ ег̑҇ смꙋщахꙋ е҆го. и҆ ѿвѣща̀ цр҃ь, и҆ ре́че валтасаре, со́нъ мои и҆ сказа́нїе е҆го да тебе не т꙽щитъ. и҆ ѿвѣща̀ валтаса́ръ, и҆ рече, гдс̑҇не, да бꙋдетъ со́н꙽ сїи ненави́дѧщимъ т̂ѧ, и҆ сказа́нїе е҆го враго́мъ твои҆мъ. дꙋбъ и҆же ви́дѣ възвели́чивыисѧ и҆ ѹ҆крепѣвыи, е҆гоже высота̀ досѧза́ше нб҃се, и҆ ко́ренїе е҆го въ все́и землѝ, и҆ ли́ствїе е҆го бл҃го цвѣтно, и҆ пло́дъ е҆го мног̑҇, и҆ пи́ща всѣмъ в꙽ немъ, под ни́мъ живѧ́хꙋ звѣрїе ди́вїи, и҆ въ вѣтвех̑ е҆го ѹ҆гнѣздѧ́хꙋсѧ пти́ца нбс̑҇ныѧ. ты̀ е҆си цр҃ю, ꙗ҆́ко възвели́чисѧ и҆ ѹ҆крепѣ. и҆ вели́чество твое възвели́чисѧ и҆ досѧже нб҃се, и҆ вла́сть твоѧ до конець зе́мльных̑. и҆ ꙗ҆́ко ви́дѣ цр҃ь а҆гг҃ла, и ст҃аго сходѧ́ща съ нб҃се, и҆ рече, посѣцѣте дб̑҇ꙋ, и҆ расы́плете и҆̀ то́чїю прониче́нїе ко́ренїѧ е҆го в зем̑лѝ ѻ҆ста́вите, и҆ въ ѹ́зѣ желѣзнѣ и҆ мѣдѧнѣ, и҆ въ зла́це внѣ̀ и҆ въ росѣ нбс̑҇неи въдво́ритсѧ, съ звѣремъ ди́вїимъ ча́сть е҆го. до́ндеже седмь вре́менъ премѣни́тсѧ ѻ҆ немъ·

4

Се́ же сказа́нїе е҆го цр҃ю. и҆ сказа́нїе вы́шнѧго с̂е е҆сть, е҆же приспѣ̀ на господи́на мое҆го цр҃ѧ. и҆ж꙽денꙋтъ т̂ѧ ѿ чл҃кь, и҆ съ дивїимъ звѣремъ бꙋдетъ житїе твоѐ. и҆ траво́ю а҆ки вола̀ напита́ютъ т̂ѧ, и҆ ѿ росы̀ небнс̑҇ыѧ тѣло твое ѻ҆брастетъ. и҆ се́д꙽мь временъ и҆змѣни́тсѧ ѻ҆ тебѣ, до́ндеже ѹ҆вѣси ꙗ҆ко съвладе́тъ вы́шнїи црс̑҇твомъ чл҃чемъ, и҆ е҆мꙋже въсхо́щетъ дасть е҆̀·

5

и҆ е́же рече, ѻ҆ста́вите проникнове́нїе ко́ренїѧ дꙋба въ землѝ. црс̑҇тво твое тебѣ̀ бꙋдетъ, ѿнележе ѹ҆вѣси вла́сть нбс̑҇нꙋю. сего ради цр҃ю совѣтъ мо́и да ти бꙋдетъ ѹ҆го́денъ, и҆ грѣхѝ своѧ млс̑҇тьми расы́пли, и҆ непра́вды твоѧ щедрота́ми ѹ҆богихъ, негли бꙋдетъ въздержа̀ ꙗ҆́рость грѣхомъ твои҆мъ б҃ъ·

6

се̂ всѐ пости́же навходоносо́ра цр҃ѧ. по дво́ю же надесѧте мс̑҇цꙋ црс̑҇тва е҆го, въ вавѷло́нѣ б̂ѣ ходѧ̀, и҆ на забра́лѣхъ гра́да съ всею сла́вою е҆го, и на сѣнехъ е҆го хожда́ше.

7

И҆ ѿвѣща̀ цр҃ь, и҆ рече, нѣсть ли с̂е вавѷлонъ вели́каѧ ю҆́же а҆зъ съгради домꙋ црс̑҇твꙋ въ дръжа́ве крѣпости моеѧ, въ че́сть сла́вы моеѧ. е҆ще б̂о сло́вꙋ сꙋщꙋ въ ѹ҆стѣхъ цр҃ихъ. глс̑҇а съ нб҃се бысть, црс̑҇тво твое преи҆де ѿ тебѐ, и҆ ѿ чл҃къ ѿженꙋтъ т̂ѧ, и҆ съ звѣремъ ди́вїимъ жи́тїе твое. и҆ траво́ю а҆ки вола напитают̑ т̂ѧ. и҆ седмь вре́менъ и҆змѣнит̑сѧ ѻ҆ тебѣ, дондеже ѹ҆вѣси ꙗ҆́ко съвладѣетъ вы́шнїи црс̑҇твомъ чл҃чемъ, и҆ е҆мꙋже въсхо́щетъ дасть е҆̀·

8

В то́и ча́съ сло́во сконча́сѧ на цр҃и навходоносо́рѣ. и҆ ѡ чл҃кь ѿгна́сѧ, и҆ травꙋ а҆ки волъ ꙗ҆дѧ́ше, и҆ ѿ росы нбс̑҇ныѧ тѣло е҆го ѻ҆брастѐ, дон꙽деже вла́си е҆мꙋ ꙗ҆́ко львꙋ̀ възвелича́ша, и҆ но́гте е҆мꙋ а҆ки пти́цамъ·

9

И҆ по сконча́нїи тх̑ѣ дн҃їи. а҆зъ нав꙽ходоносо́ръ ѻ҆́чи своѝ на́ нб҃о въздви́гъ, и҆ ѹ́мъ мои къ мнѣ сѧ възвратѝ. вышнѧго блс̑҇вих̑ и҆ живꙋщаго въ вѣки похвали́хъ. ꙗ҆́ко власть е҆го, вла́сть вѣ́чна, и црс̑҇тво е҆го в ро́ды и҆ ро́ды. и҆ вс̂и живꙋщеи на землѝ нивочто́же намѣни́шасѧ. по во́ли свое́и тво́ритъ в꙽ си́лѣ нбс̑҇нѣи, и҆ в селе́нїи земльнм̑ѣ. и҆ нѣсть и҆же сѧ проти́витъ рꙋцѣ е҆го, и҆ речетъ е҆мꙋ, чт̂о сътворѝ. в꙽ то времѧ ѹ́мъ мой възврати́сѧ къ мн̂ѣ, и҆ в че́сть црс̑҇тва свое҆го прїидохъ. и҆ ѻ́зречь моѧ възвратисѧ къ мн̂ѣ. и҆ мꙋчи́теле моѝ, и҆ вельмо́жа моѧ и҆ска́хꙋ мене. и҆ въ црс̑҇твѣ свое҆мъ ѹ҆тверди́хсѧ, и҆ вели́чество и҆зъѻ҆би́лнѣе приложи́ ми сѧ·

10

Нн҃ѣ ѹ҆бо а҆зъ навходоносо́ръ, хвалю̀ и҆ превозноша́ю, и҆ сла́влю цр҃ѧ нбс̑҇наго. ꙗ҆́ко всѧ̀ дѣла е҆го и́стин꙽на, и҆ пꙋтїе е҆го сꙋ́ди. и҆ вс̂ѧ ходѧ́щаѧ съ презрѣнїемъ мо́жетъ смири́ти·