Ostroh Bible❧П'ята книга Мойсеєва: Повторення Закону, розділ 10

1

Въ ѻно вре́мѧ рече г҃ь къ мн̂ѣ. и҆стешѝ себѣ дв̂ѣ дъсцѣ ка́меннѣ ꙗ҆́цѣже и҆ пе́рвїи, и҆ възы́ди къ мн̂ѣ на горꙋ̀ и҆ да сътвори́ши себѣ̀ ковче́гъ дре́вѧнъ, и҆ въпишꙋ на дъсцѣ словеса̀. е҆ликоже их̑ бѣ на первых̑ дъсках꙽, и҆хже съкрꙋшѝ, и҆ да вложи́ши ѧ҆̀ въ ковче́гъ·

2

И҆ сътвори́хъ ковче́гъ ѿ дре́въ негнию́щъ. і҆ и҆стеса́хъ дв̂ѣ дъсцѣ ка́мен꙽нѣ ꙗ҆́цѣ же и҆ пе́рвїи. и҆ възыидо́хъ на горꙋ̀, ѻ҆́бѣ же дъсцѣ въ ѻ҆бою̀ рꙋ́кꙋ мою̀·

3

И҆ въписа̀ на дъскꙋ по писа́нїю пе́рвомꙋ, і҃, словес̑҇, ꙗ҆́же гл҃а г҃ь к ва́мъ, на горѣ̀ ѿ среды̀ ѻ҆гнѧ̀, и҆ вда́сть ѧ҆̀ г҃ь мн̂ѣ·

4

И҆ ѻ҆брати́в꙽сѧ снидо́хъ съ горы̀, и҆ вложи́хъ дъсцѣ въ ковче́гъ и҆же сѣтвори́хъ. и҆ бѣ́ста т̂ꙋ ꙗ҆́коже повелѣ̀ м̂и г҃ь·

5

Сн҃ове же і҆и҆л҃еви въздвиго́шасѧ ѿ виро́ѳа, сн҃овъ и҆а҆ки́мль, мисадаин̑҇·

6

т̂ꙋ ѹ҆мре а҆а҆ро́нъ, и҆ погребе́нъ быс̑҇ т̂ꙋ, и҆ бы́сть жрецъ е҆лїа҆за́ръ сн҃ъ а҆а҆ро́нь въ ѿц҃а мѣсто·

7

ѿтꙋдꙋ же въздвигошасѧ въ гад̑гадъ, и҆ ѿ гад̑гада до и҆е҆таваѳа землѝ водотечь водъ·

8

Въ ѻ҆́но времѧ, ѿлꙋчѝ г҃ь племѧ̀ левѷино, носи́ти ковче́гъ завѣта гн҃ѧ. и҆ пред̑стоѧ́ти пред̑ гм҃ъ слꙋжи́ти, и҆ моли́ти и҆ блс̑҇ви́ти и҆́мѧ е҆го, до дн҃ешнѧго дн҃е·

9

Сего̀ ради нѣ́сть левѷтомъ ча́сти н̂и жребїа въ братїи и҆хъ, г҃ь б̂о са́мъ прича́стїе и҆хъ, ꙗ҆́коже е҆сть ре́клъ им̑·

10

А҆́зъ же стоѧх̑ на горах꙽, м҃, дн҃їи. и҆ м҃, но́щїи, и҆ послꙋша г҃ь менѐ вс̂е вре́мѧ, и҆ не въсхотѣ̀ г҃ь погꙋби́ти васъ·

11

И҆ рече г҃ь къ мнѣ грѧдѝ въздви́гнисѧ пред̑ люд̑мѝ си́ми, и҆ да вни́дꙋтъ и҆ причастѧт̑ зе́млю е҆ю́же клѧ́хсѧ ѿц҃емъ их̑ да́ти ю҆̀ си́мъ·

12

И҆ нн҃ѣ і҆и҆л҃ю чт̂о про́ситъ г҃ь б҃ъ тво́и ѹ҆ тебѐ, то́чїю да с̂ѧ боꙗ҆́ти г҃а б҃а твое҆го, и҆ ходити въ всѧ̀ пꙋтѝ е҆го и҆ люби́ти е҆го, и҆ слꙋжи́ти г҃ꙋ б҃ꙋ твое҆мꙋ, ѿ всего̀ срд̑ца твое҆го, и҆ ѿ всеѧ̀ дш҃а твое҆ѧ·

13

Снабдѣти за́повѣди г҃а б҃а твое҆го, и҆ ѻ҆правле́нїа е҆го, е҆лико а҆зъ заповѣ́даю днс̑҇е да т̂и бл҃го бꙋдет̑.

14

Се̂ г҃а б҃а твое҆го нб҃о, и҆ нб҃о нб҃си, землѧ̀ и҆ вс̂ѧ е҆лико е҆сть на не́и·

15

ѻ҆баче ѿц҃а ва́ша поѧ̀ прежд̑е г҃ь люби́ти ѧ҆̀. і҆ и҆збра̀ племѧ̀ и҆хъ по ни́хъ ва́съ, па́че всѣ́хъ стра́нъ до дн҃ешнѧго дн҃е·

16

И҆ да пресѣче́те жесто́чь срд̑цъ ва́шихъ, и҆ вы́ю вашꙋ не жесточи́те по сем̑·

17

Гь҃ б̂о б҃ъ ва́шъ сїи б҃ъ бм҃ъ, и҆ г҃ь гм҃ъ·

18

Бг҃ъ вели́кїи и҆ крѣпкїи и҆ стра́шныи и҆же не зрит̑ лица̀, н̂и во́зметъ да́ра·

19

Творѧи сꙋдъ, прише́лцꙋ, и҆ сиротѣ̀ и҆ вдови́це·

20

и҆ люби́ти прише́лца да́ти е҆мꙋ хлѣ́бъ, и҆ ри́зꙋ·

21

И҆ люби́те прише́лца, прише́лцы б̂о бѣ́сте въ землѝ е҆гѷпет̑стѣи·

22

Га҃ б҃а твое҆го бо́исѧ, и҆ томꙋ̀ да слꙋж́иши, и҆ к томꙋ̀ прилѣпи́сѧ, и҆́менемъ е҆го клени́сѧ·

23

И҆ то́и хвала̀ твоѧ̀, и҆ то́и б҃ъ тво́и, и҆же сътворѝ тебѣ ве́лїа и҆ сла́внаѧ сїѧ, ꙗ҆́же ви́дѣста ѻ҆́чи твоѝ о҃, и҆ е҃ ю, дш҃ъ внидо́ша ѿц҃ы твоѝ въ е҆гѷпетъ, и҆ нн҃ѣ же сътворѝ т̂ѧ е҆сть г҃ь б҃ъ тво́и, ꙗ҆ко ѕвѣ́зды нбс̑҇ныѧ мно́жествомъ·