Ostroh Bible❧П'ята книга Мойсеєва: Повторення Закону, розділ 9

1

Послꙋш́аи і҆и҆л҃ю т̂ы минꙋе҆ши і҆ѻ҆рда́нъ дне́сь. внити прїѧ́ти страны̀ вели́кїѧ, и҆ крѣпча́иша паче ва́съ. грады вели́ки и҆ ѹ҆гражде́ны до нб҃се·

2

Лю́ди вели́ки и҆ мно́ги и҆ предо́лжены, сн҃ы е҆на́ковы ꙗ҆́же т̂ы вѣси. и҆ слы́шалъ е҆си. кт̂о проти́вꙋ ста́нетъ сн҃омъ е҆на́ковымъ·

3

И҆ ѹ҆вѣ́си дне́сь ꙗ҆́ко г҃ь б҃ъ твои се́и преди по́идетъ пред̑ тобо́ю. ѻ҆́гнь б̂о попалѧ́ай е҆сть се́и потреби́т꙽ ѧ҆̀, и҆ сїи ѹ҆клони́тъ и҆хъ ѿ лица̀ ва́шего и҆ потреби́тъ ѧ҆̀ въско́ре, ꙗ҆́коже ре́клъ е҆сть тебѣ г҃ь·

4

Не рцы̀ въ срд̑цы своем̑ е҆гда потребит̑ г҃ь б҃ъ твой страны̀ сїѧ ѿ лица̀ твое҆го гл҃ѧ пра́вдъ ра́ди мои҆хъ въведе м̂ѧ г҃ь причасти́ти зе́млю бл҃гꙋю сїю, н̂о безче́стїѧ рад̑и̑ стра́нъ сихъ г҃ь потребѝ ѧ҆̀ ѿ лица̀ твое҆го·

5

А҆ не пра́вды ради твое҆ѧ, ниже преподо́бїѧ ради срд̑ца твое҆го, т̂ы вхо́диши прїѧ́ти землю их̑, н̂о нече́стїѧ ра́ди и҆ безако́нїѧ ради стра́нъ сихъ, г҃ь ѿ лица̀ твое҆го потребї ѧ҆̀. и҆ да ѹ҆ста́витъ завѣтъ и҆мже клѧ́тсѧ г҃ь ѿц҃емъ вашим꙽·

6

а҆враа́мꙋ и҆саа́кꙋ і҆а́ковꙋ·

7

И҆ да вѣси дне́сь ꙗ҆́ко не пра́вды ради твоеѧ, г҃ь б҃ъ дае́тъ тебѣ̀ зе́млю бл҃гꙋю сїю прїѧ́ти. ꙗ҆́ко лю́дїе жесто́цы е҆сте·

8

помѧнѝ не забꙋди коли́ко раз̑гнѣ́васте г҃а б҃а свое҆го в꙽ пꙋсты́ни ѿ него́же дн҃е и҆зыдо́сте и҆з꙽ землѧ̀ е҆гѷпет꙽ски, даже вънидо́сте в мѣсто сїе·

9

Непокорѧ́щесѧ съгрѣши́сте пред̑ гм҃ъ. и҆ въ хори́вѣ разгнѣвасте г҃а, и҆ разгнѣвасѧ г҃ь на́ вы, потреби́ти вас̑҇·

10

Въсходѧ́щꙋ мн̂ѣ на горꙋ̀, взѧ́ти двою дъскꙋ ка́мен̑҇нꙋ и҆ дъсцѣ ка́мен̑҇нѣ завѣта, и҆же завѣща г҃ь къ ва́мъ·

11

И҆ пребых̑ в горѣ м҃, дн҃їи, и҆ м҃, но́щїи хлѣ́ба не ꙗ҆до́хъ ниже воды̀ пи́хъ·

12

И҆ да́сть м̂и г҃ь дв̂ѣ дъсцѣ ка́менны напи́сано пр́ьстомъ бж҃їимъ. в ни́хже бѧ́хꙋ напи́сана вс̂ѧ словеса̀ ꙗ҆́же гл҃а г҃ь къ ва́мъ въ горѣ̀. ѿ среды ѻ҆гнѧ̀ въ дн҃ь събра́нїѧ·

13

И҆ бысть по м҃ дн҃їи, и҆ по м҃ но́щїи. и҆ дастъ м̂и г҃ь дв̂ѣ дъсцѣ ка́меннѣ, дъсцѣ завѣта·

14

И҆ рече г҃ь къ мн̂ѣ въста́ни і҆ и҆зы́ди ско́ро ѿсю́дꙋ. ꙗ҆́ко безако́нова́ша лю́ди твоѝ, ꙗ҆́же и҆зведѐ и҆з꙽ землѧ̀ е҆гѷпет꙽ски, състꙋпи́ша ско́ро с пꙋтѝ. и҆же заповѣ́дахъ и҆мъ. сътвори́ша себѣ солїѧ́нїѧ·

15

И҆ рече г҃ь къ мн̂ѣ, гл҃ахъ тебѣ̀ е҆ді́ною и҆ дв̂ажды, гл҃ѧ. ви́дѣхъ лю́ди сїѧ, с̂е лю́дїе жестоковыи сꙋть. ѻ҆ста́ви м̂ѧ да ѧ҆̀ потреблю̀ и҆ погꙋблю̀, і҆ и҆мѧ и҆хъ под̑ нб҃семъ, и҆ сотворю̀ т̂ѧ въ ꙗ҆зы́къ вели́къ и҆ крѣпок꙽, и҆ мног̑҇ па́че сихъ·

16

И҆ ѻ҆брати́всѧ снидо́хъ съ горы̀ и҆ гора̀ кꙋрѧ́шесѧ ѻ҆гнем̑ и҆ дв̂ѣ дъсцѣ свѣдѣ́нїа въ ѻ҆бою̀ рꙋ́кꙋ мое́ю.

17

И҆ ви́дѣхъ ꙗ҆́ко съгрѣши́сте пред̑ гм҃ъ бм҃ъ нашимъ, и҆ сътвори́сте себѣ̀ теле́цъ сълїꙗ҆нъ, и҆ състꙋпи́сте с пꙋтѝ ско́ро, и҆же заповѣ́да г҃ь вам̑ твори́ти. и҆ ем̑ ѻ҆́бѣ дъсцѣ повергох̑ и̑ рꙋкꙋ моею̀ и҆ съкрꙋших̑ и҆х꙽ прд̑е вами·

18

И҆ моли́хсѧ пред̑ гм҃ъ второ́е, ꙗ҆коже и҆ пе́рвое, м҃, дн҃їи. и҆ м҃, но́щїи, хлѣ́ба не ꙗ҆до́хъ и҆ воды̀ не пи́хъ. всх̑ѣ ради грѣхъ ва́шихъ, ꙗ҆́же съгрѣши́сте творѧ́ще ѕло́е пред̑ гм҃ъ бг҃омъ ва́шимъ. разгнѣ́вающи е҆го·

19

И҆ съ боꙗ҆́знїю бѣхъ гнѣ́ва ради и҆ ꙗ҆́рости, ꙗ҆́ко разгнѣвасѧ г҃ь на́ вы, да потреби́тъ васъ. и҆ послꙋша менѐ г҃ь, и҆ въ то вре́мѧ·

20

И҆ на а҆ро́на разгнѣвасѧ г҃ь ѕѣ́ло е҆же погꙋби́ти е҆го. и҆ моли́хсѧ за а҆а҆ро́на въ вре́мѧ ѻ҆́но·

21

И҆ грѣх́ъ вашъ и҆же сътвори́сте теле́цъ взѧх̑ е҆го и҆ съжжего́хъ на ѻ҆гнѝ, і҆ и҆зби́хъ и҆̀ и҆ сътро́хъ и҆̀ ѕѣ́ло, дажд̑ь бы́сть дро́бенъ, и҆ бы́сть ꙗ҆́ко пра́хъ и҆ просы́пахъ пра́хъ въ водоте́чь сходѧ́щꙋю съ горы̀·

22

И҆ въ запале́нїи, и҆скꙋше́нїи, и҆ въ гро́бѣхъ похотѣнїа раз̑гнѣ́вали бѣсте г҃а б҃а ва́шего·

23

И҆ е҆гда̀ в̂ы, пꙋстѝ г҃ь ѿ кади́сварнїѝ гл҃ѧ, възыди́те, и҆ прїимѣте зе́млю ю҆́же а҆зъ даю̀ вамъ и҆ съпроти́вистесѧ гл҃омъ г҃а б҃а ва́шего, и҆ не вѣровасте е҆мꙋ, и҆ не послꙋшасте словес̑҇ е҆го·

24

И҆ не покорѧ́щесѧ бѣ́сте г҃ꙋ ѿ дн҃е в о́ньже ꙗ҆́ви́сѧ вамъ·

25

И҆ молих̑сѧ пред̑ гм҃ъ, м҃, дн҃їи. и҆ м҃, но́щїи, ꙗ҆́же моли́хсѧ, рече б̂о г҃ь погꙋби́ти васъ·

26

И҆ моли́хсѧ гв҃и и҆ реко́хъ, г҃и г҃и, цр҃ю стра́намъ не погꙋбѝ людїи свои҆хъ и҆ прича́стїа свое҆го е҆же и҆зба́ви крѣ́постїю твое́ю вели́кою ꙗ҆́же и҆зведѐ и҆з꙽ землѧ̀ е҆гѷпетъски крѣ́постїю твое́ю вели́кою и҆ рꙋко́ю си́лною и҆ мы́шцею свое҆ю высо́кою·

27

Помѧнѝ рабы̀ своѧ̀ а҆враа́ма, і҆саа́ка, і҆а́кова, и҆м꙽же сѧ клѧ̀ собо́ю. не призира́и на жесто́чество людїи сихъ, и҆ на бесче́стїе и҆хъ, и҆ на грѣхѝ их̑, да не когда̀ рект̑ꙋ живꙋщ́їи на землѝ, ѿню́дꙋже и҆зведѐ насъ гл҃ющи. не могїи г҃ь въвестѝ и҆хъ въ зе́млю ю҆́же и҆мъ ѻ҆бѣща̀, и҆ ненави́дѧ и҆хъ г҃ь и҆зве́дъ и҆ погꙋбѝ и҆хъ въ пꙋстыни·

28

Сїи же лю́дїе твоѝ и҆ прича́стїе твоѐ. и҆хже и҆зведѐ и҆з꙽ землѧ̀ е҆гѷпетъски крѣ́постїю свое҆ю вели́кою, и҆ мыш̑҇цею высо́кою·