Ostroh Bible❧П'ята книга Мойсеєва: Повторення Закону, розділ 11

1

И да лю́биши г҃а б҃а твое҆го, и҆ снабди́ши снабдѣ́нїа е҆го, и҆ ѻ҆правле́нїѧ е҆го, и҆ за́повѣди е҆го, и҆ сꙋды̀ е҆го вс̂ѧ дн҃и·

2

И҆ да ѹ҆вѣ́сте дне́сь ꙗ҆ко не дѣтемъ ва́шимъ гл҃ю ꙗ҆же не свѣ́дѧтъ ни ви́дѣша наказа́нїа г҃а б҃а твое҆го, и҆ вели́чества е҆го, и҆ рꙋ́кꙋ си́лнꙋю, и҆ мы́шцꙋ высо́кꙋю·

3

Ни̂ зна́менїа е҆го, н̂и чюдеса̀ е҆го, е҆ли́ка сътворѝ посредѣ е҆гѷпта фараѻ́нꙋ цр҃ю е҆гѷпетьскꙋ и҆ все́и землѝ е҆го·

4

И е҆ли́ко сътворѝ си́ле е҆гѷпетьстѣи и҆ ѻ҆рꙋж́їѧ и҆хъ, и҆ ко́ни и҆хъ. ка́ко потопѝ вода чермна́го морѧ пред̑ лицем̑ и҆хъ женꙋщ́имъ и҆мъ по ва́съ, и҆ погꙋбѝ и҆хъ г҃ь б҃ъ до дн҃ешнѧго дн҃е·

5

И҆ е҆ли́ко сътворѝ ва́мъ въ пꙋсты́ни до́ндеже прїидо́сте на мѣ́сто сїе·

6

И҆ е҆лико сътвори, дафа́нꙋ и҆ а҆виро́нꙋ сн҃ома е҆лїа́влема сн҃а рꙋвинѧ. ꙗ҆́же ѿврьз꙽ши землѧ̀ ѹ҆ста̀ своѧ̀ пожрѐ их̑ и҆ домы и҆хъ, и҆ кꙋща и҆хъ, и҆ вс̂е и҆хъ и҆мѣ́нїе с ни́ми средѝ всего̀ і҆и҆л҃ѧ. Ꙗ҆́ко ѻ҆́чи ваши ви́дѣста вс̂ѧ дѣ́ла гн҃ѧ, вели́каѧ, е҆ли́ко сътворѝ вам̑ днесь·

7

И҆ да снабди́те вс̂ѧ за́повѣди е҆го е҆ли́ко а҆́зъ заповѣ́даю вамъ днс̑҇е. да живе́те и҆ ѹ҆мно́житесѧ, и҆ въни́дѣте и҆ прїимѣте зе́млю, на ню́же в̂ы минꙋ́ете чрез꙽ і҆ѻ҆рда́нъ та́мо причасти́ти ю҆̀·

8

да мно́ги дн҃и бꙋ́дете на землѝ, е҆ю́же клѧ́тсѧ г҃ь ѿц҃емъ вашимъ. да́ти и҆мъ и҆ сѣ́мени их̑ по них̑. зе́млю кипѧ́щꙋ мле́комъ и҆ ме́дом̑·

9

Землѧ̀ б̂о е҆сть на ню́же в̂ы и҆́дете та́мо причасти́ти е҆ѧ̀·

10

Не ꙗ҆́ко землѧ̀ е҆гѷпетъска е҆сть, ѿню́дꙋже ѿхо́дите та́мо, е҆гда̀ сѣ́ютъ сѣ́мѧ, и҆ напаѧ́ютъ и҆̀ пое́нїемъ, ꙗ҆́ко ѻ҆гра́дꙋ ѕе́льнꙋю·

11

Землѧ̀ же в ню́же т̂ы вхо́диши та́мо причасти́ти ю҆̀, землѧ̀ го́рна и҆ ра́вна, ѿ дожда̀ нбс̑҇наго напаѧ́етсѧ·

12

Землѧ̀ ю҆́же г҃ь б҃ъ тво́и снабди́тъ всегда̀. ѻ҆́чи г҃а б҃а твое҆го на не́и въ нача́ло лѣтꙋ, и҆ до конца̀ лѣтꙋ·

13

А҆́ще же слꙋхомъ послꙋш́аете всѣ́хъ заповѣдеи его, е҆ли́ко аз̑ заповѣ́даю тебѣ днс̑҇е·

14

люби́ти г҃а б҃а твое҆го, и҆ слꙋжи́ти е҆мꙋ ѿ всего̀ срд̑ца твое҆го, и҆ ѿ всеѧ̀ дш҃а твое҆ѧ·

15

И҆ да́стъ до́ждь землѝ твое́и по вре́мени ра́нныи и҆ по́зд̑ныи. и҆ събере́ши жи́та твоѧ̀. и҆ вино̀ твоѐ и҆ е҆ле́и твои·

16

И҆ да́си пищꙋ на се́лѣх꙽ ско́томъ твои҆мъ, ꙗ҆́дъ же и҆ насыти́шисѧ·

17

Блюдѝ себѐ, да не развелича́етсѧ срд̑це твоѐ. и҆ пристꙋпи́вше послꙋ́жите бого́мъ и҆нѣмъ, и҆ покло́нитесѧ и҆мъ·

18

И҆ ꙗ҆́ростїю раз̑гнѣ́ваетсѧ г҃ь на́ вы, и҆ затвори́тъ нб҃о. и҆ не бꙋ́детъ дождѧ̀ и҆ землѧ̀ не да́стъ плода̀ свое҆го, и҆ поги́бнете въско́рѣ съ землѧ̀ бл҃гїа ю҆́же г҃ь да́стъ ва́мъ·

19

И҆ да вложи́те словеса̀ с̂и въ срд̑ца ва́ша и҆ въ дш҃ꙋ ва́шꙋ. и҆ да възложи́те ѧ҆̀ въ зна́менїе на́ рꙋкꙋ вашꙋ да бꙋ́дꙋтъ на челѣ́хъ междꙋ̀ ѻ҆чи́ма ва́шима·

20

И҆ да наѹ҆чи́те ча́да своѧ̀ гл҃ати сих̑ сѣдѧще въ домꙋ̀, і҆ и҆дꙋще въ пꙋть, и҆ лежа́ще и҆ въста́юще·

21

И҆ въпиши́те ѧ҆̀ на пра́зѣхъ хра́ма свое҆го, и҆ на вра́тѣхъ своихъ·

22

да ѹ҆мно́жатсѧ дн҃и ва́ши, и дн҃и сн҃овъ ва́шихъ. на землѝ е҆ю́же клѧ́тсѧ г҃ь ѿц҃емъ ва́шимъ да́ти ю҆̀ ꙗ҆́ко дн҃їе нб҃ꙋ на землѝ·

23

И҆ бꙋ́детъ а҆ще слꙋхомъ послꙋш́аете всѣ́хъ за́повѣдеи сихъ, ꙗ҆́же ѧ҆̀ заповѣдаю ва́мъ днс̑҇е твори́ти. люби́ти г҃а б҃а ва́шего, ходи́ти въ вс̂ѧ за́повѣди е҆го и҆ прилеплѧ́тисѧ къ немꙋ̀·

24

Тогда̀ ѿженет̑ г҃ь стра́ны сїа ѿ лица ва́шего, и҆ ѻ҆дръжи́те стра́ны великїа и҆ крѣ́пкїа ѕѣло па́че ва́съ·

25

Вс̂ѧ мѣ́ста на ни́хже ста́нетъ стопа̀ но́гъ ва́шихъ, вам̑ бꙋ́детъ, ѿ пꙋсты́нѧ, и҆ ѿ дꙋбрав̑҇, и҆ ѿ рѣкѝ вели́кїа е҆фра́т꙽, и҆ до мо́рѧ, е҆же на за́пади бꙋдт̑ꙋ предѣ́ли ва́ши·

26

Не ста́нетъ н̂икто́же пред̑ лицемъ ва́шимъ, и҆ тре́петъ ва́шъ и҆ стра́хъ ва́шъ възложи́тъ г҃ь б҃ъ вашъ на лицѐ всеѧ̀ землѧ̀ на ню́же а҆ще в꙽зы́идете ꙗ҆́коже гл҃а г҃ь къ ва́мъ·

27

Се̂ а́зъ даю̀ пред̑ ва́ми днс̑҇е, блс̑҇ве́нїе и҆ клѧ́твꙋ. блс̑҇ве́нїе а҆ще послꙋш́аете за́повѣдїи г҃а б҃а ва́шего, е҆ли́коже а҆зъ заповѣдаю вамъ днс̑҇е·

28

Клѧ́твы же а҆ще не послꙋш́аете за́повѣди г҃а б҃а ва́шего, и҆же заповѣ́дахъ вамъ днс̑҇е·

29

И҆ съвратите́сѧ с пꙋтѝ и҆же заповѣ́дахъ вамъ, и҆дꙋщ́е послꙋжи́ти бого́мъ и҆нѣмъ и҆́хже не вѣ́сте·

30

И҆ бꙋ́детъ е҆гда̀ въведетъ тебѐ г҃ь б҃ъ твои, въ зе́млю въ ню́же минꙋ́ете та́мо причасти́ти е҆ѧ̀·

31

И҆ да да́си блс̑҇ве́нїе на горꙋ̀ гаризи́ню, а҆ клѧ́твꙋ на горꙋ̀ гева́лю. е҆же е҆сть ѻ҆бо́нꙋ странꙋ̀ і҆ѻ҆рдана за пꙋтем̑ и҆же на за́пади слн҃ца въ землѝ ханаа҆н꙽стеи, ѻ҆бита́ющим̑ на за́пади слн҃ца бли́зъ голго́ла высо́каго·

32

Вы̂ бо̀ минꙋе́те і҆ѻ҆рда́нъ въшед̑ше прїѧ́ти землѧ̀, ю҆же г҃ь б҃ъ ва́шъ дае́тъ ва́мъ въ прича́стїе вс̂ѧ дн҃и, и҆ прїимете ю҆̀ и҆ всели́тесѧ в н̂ю·

33

И҆ да съхрани́те твори́ти вс̂ѧ за́повѣди е҆го, и҆ сꙋды̀ е҆го ꙗ҆же а́зъ даю̀ ва́мъ днс̑҇ь·