Ostroh Bible❧П'ята книга Мойсеєва: Повторення Закону, розділ 12

1

Сїи́ же за́повѣди и҆ сꙋды̀ ꙗ҆́же снабди́те твори́ти на зем̑лѝ ю҆же г҃ь б҃ъ ѿц҃ъ ва́шихъ дает̑ вамъ въ прича́стїе всѧ дн҃и ꙗ҆́же в̂ы живе́те на землѝ·

2

Па́гꙋбою погꙋби́те вс̂ѧ мѣ́ста, въ ни́х же слꙋжи́ша т̂ꙋ стра́ны бого́мъ своимъ, ꙗ҆́же в̂ы прїимете на гора́хъ высо́кихъ и҆ хо́лмехъ, и҆ под̑ дре́вомъ сѣ́нным̑·

3

И҆ да раскопа́ете тре́бища и҆хъ, и҆ съкрꙋши́те столпы̀ и҆хъ, и҆ сады̀ и҆хъ съсѣче́те, и҆ ваѧ́нїа богов̑҇ и҆хъ и҆зож꙽же́те на ѻ҆гнѝ, и҆ поги́бнет̑ и҆́мѧ и҆хъ ѿ мѣ́ста того̀·

4

да не сътвори́те та́ко г҃ꙋ б҃ꙋ вашемꙋ. н̂о на мѣ́стѣ и҆дѣже и҆збере́тъ г҃ь б҃ъ нашъ. всѣмъ племене́мъ вашемъ призва́ти и҆́мѧ е҆го т̂ꙋ. и҆ взы́щете и҆ въни́дете та́мо·

5

И҆ принесе́те т̂ꙋ вс̂есъжже́нїа ваша и҆ тре́бы ваша и҆ приноше́нїа ваша. и҆ мл҃твы ваша и҆ во́лнаа ваша. и҆сповѣ́данїа ваша, и҆ первенца̀ воло́въ вашихъ, и҆ ѻ҆ве́цъ вашихъ·

6

И҆ да ꙗ҆́сте та́мо пред̑ гм҃ъ бм҃ъ вашимъ. и҆ възвесели́тесѧ ѻ҆ все́мъ, на не́же възложи́те рꙋкѝ ваша в̂ы и҆ до́мове ваши, ꙗ҆́ко т̂ѧ блс̑҇ви́лъ е҆сть г҃ь б҃ъ тво́и·

7

да не сътворите т̂ꙋ по всемꙋ̀ е҆ликоже творите зд̂ѣ днс̑҇ь, кожд̑о ѹ҆год̑но пред̑ собою·

8

Нѣ́сте б̂о пришлѝ до нн҃ѣ въ поко́и. въ прича́стїе е҆же г҃ь б҃ъ вашъ дае́тъ ва́мъ·

9

Но̂ е҆гда̀ пре́идете і҆ѻ҆рда́нъ и҆ всели́тесѧ на землѝ ю҆́же г҃ь б҃ъ ваш꙽ причасти́тъ вамъ, и҆ поко́итъ вас̑҇ ѿ всѣ́хъ вра́гъ ва́ших̑ и҆же ѻ҆́крс̑҇тъ вас̑҇, и҆ всели́тесѧ без꙽ събла́зна·

10

И҆ бꙋ́дет̑ мѣ́сто и҆дѣже и҆збере́тъ г҃ь б҃ъ вашъ призва́ти и҆мѧ е҆го т̂ꙋ·

11

Тꙋ принесе́те вс̂е е҆ли́ко а҆зъ заповѣ́даю вамъ днс̑҇е. вс̂есъжже́нїѧ ваша, и҆ тре́бы ваша. и҆ десѧти́ны ваша, и҆ начат̑ки рꙋ́къ ваших̑, и҆ всѧ́къ и҆збра́нъ даръ вашъ. е҆ли́ко ѻ҆бѣща́ете гв҃и б҃ꙋ ва́шемꙋ·

12

И҆ възвесели́тесѧ пред̑ гм҃ъ бм҃ъ ва́шимъ, в̂ы и҆ сн҃ове ва́ши, и҆ дще́ри ваши, и҆ рабы̀, и҆ рабы́нѧ ваша, и҆ левѷти и҆же ѹ҆ вратъ ва́ших̑, ꙗ҆́ко нѣ́сть им̑ ча́сти н̂и жре́бїа с ва́ми·

13

Блюдѝ себѐ са́мъ не приносѝ вс̂есъжже́нїа свое҆го въ всѧ́комъ мѣ́стѣ е҆го́же а҆ще възлю́биши·

14

Но̂ в мѣ́сте е҆же и҆збере́тъ г҃ь б҃ъ твои въ е҆ді́номъ грд̑а твоих꙽. т̂ꙋ да принесе́ши вс̂есъжже́нїе твоѐ, и҆ т̂ꙋ сътвори́ши вс̂е е҆ли́ко а҆зъ заповѣда́ю тебѣ̀ днс̑҇ь·

15

Но̂ всм̑ѣ хотѣ́нїемъ дш҃а твое҆а. да же́ртвꙋеши и҆ ꙗ҆́жь мѧ́са, по блс̑҇венїю г҃а б҃а твое҆го и҆же дадѐ тебѣ̀ въ всх̑ѣ гра́дѣх꙽ твои҆хъ, нечи́сты и҆ тебѣ̀, и҆ чи́стыи въкꙋ́пѣ да ꙗ҆́стъ ѧ҆̀, ꙗ҆́ко се́рнꙋ и҆ е҆ле́нь·

16

Ра́звѣ кро́ви да не ꙗ҆́сте, на́ землю пролива́ите ю҆̀ а҆ки во́дꙋ.

17

Не възмо́жеши ꙗ҆́сти въ гра́дх̑ѣ свои҆х꙽ десѧти́ны, пшени́ца твое҆ѧ и҆ вина̀ твое҆го, и҆ е҆ле́ѧ твое҆го. первенца̀ воло́въ свои҆хъ, и҆ ѻ҆ве́цъ свои҆хъ, и҆ вс̂ѧ ѻ҆бѣти е҆же ѻ҆бѣща́еши, і҆ и҆сповѣ́данїа ваша, и҆ прино́съ рꙋкъ ва́ших꙽·

18

Но̂ пред̑ гм҃ъ бм҃ъ свои҆мъ да ꙗ҆́си ѧ҆̀ въ мѣ́сте и҆дѣже и҆зберет̑ г҃ь б҃ъ твои себѣ̀·

19

Ты̂ и҆ сн҃ъ твои и҆ дще́ри твоа̀ и҆ ра́бъ твои и҆ раба̀ твоѧ̀, и҆ левѷтин̑҇, и҆ прише́лецъ, и҆же въ гра́дх̑ѣ твоих̑, и҆ възвесели́шасѧ пред̑ гм҃ъ бм҃ъ твоим̑ ѻ҆ всем̑ на не́же возложи́ши рꙋкꙋ твою̀·

20

Блюдѝ себѐ са́мъ да не ѻ҆ставлѧ́еши левѷтинина въ вс̂е вре́мѧ до́ндеже е҆си жи́въ на землѝ·

21

А҆́ще же раз꙽шири́тъ г҃ь б҃ъ предѣ́лы твоѧ̀, ꙗ҆коже т̂и е҆сть гл҃а и҆ рече́ши да ꙗ҆́мъ мѧ́са. а҆ще въсхо́щетъ дш҃а твоѧ̀ ꙗ҆ко ꙗ҆́сти мѧ́са. въ все́мъ похотѣ́нїю дш҃а твое҆ѧ да ꙗ҆́си мѧ́са·

22

А҆́ще же пода́ле мѣ́сто ѿ тебѐ е҆же и҆збере́тъ г҃ь б҃ъ тво́и, призыва́ти и҆́мѧ е҆го т̂ꙋ·

23

и҆ тре́бꙋ положи́ши ѿ воло́въ свои҆хъ, и҆ ѿ ѻ҆ве́цъ свои҆хъ ꙗ҆́же да́стъ тебѣ̀ б҃ъ твои. ꙗ҆́коже заповѣ́дах̑ тебѣ̀, да ꙗ҆́си въ гра́дѣхъ твоих̑ по похотѣнїю дш҃а твое҆ѧ·

24

Ꙗ҆́коже сѧ ꙗ҆́стъ серна̀ и҆ е҆ле́нь. такоже да ꙗ҆си ѧ̀, нечи́стыи тебѣ̀ и҆ чи́стыи та́кожде да ꙗ҆дѧ́тъ·

25

Во́ньми крѣ́пце да не ꙗ҆́си кро́ви, кро́вь б̂о е҆сть дш҃а е҆го. да не ꙗ҆́ст꙽сѧ дш҃а с мѧ́сы·

26

да не ꙗ҆́сте еа̀, н̂о на́ землю пролива́ите ѧ҆̀ а҆ки во́дꙋ, да не ꙗ҆́си ю҆̀. да бл҃го тебѣ̀ бꙋ́детъ и҆ сн҃омъ твои҆мъ по тебѣ̀ въ вѣ́ки·

27

А҆́ще сътвори́ши с̂е, е҆же добро̀ и҆ ѹ҆гд̑оно е҆сть пред̑ гм҃ъ бм҃ъ твои҆мъ·

28

Ра́звѣ ст҃аѧ твоѧ̀ и҆же бꙋ́дет̑ тебѣ̀, и҆ ѻ҆бѣты твоѧ̀ възе́мъ да прїи́деши на мѣ́сто, и҆дѣже и҆збере́тъ г҃ь б҃ъ твои ѻ́но себѣ̀, призва́ти и҆мѧ е҆го т̂ꙋ·

29

И҆ да сътвори́ши вс̂ѧсъжже́нїѧ твоѧ̀, мѧ́са же и҆ кровь възнесе́ши на ѻ҆лтарь г҃а б҃а твое҆го. кровь же тре́бъ твои҆х꙽. да пролїе́ши пред̑ степе́ни ѻ҆лта́рѧ б҃а твое҆го, а҆ мѧ́са да ꙗ҆́си·

30

Снабдѝ и҆ послꙋш́аи и҆ да сътвори́ши вс̂ѧ словеса̀ ꙗ҆́же а҆зъ заповѣ́даю тебѣ̀ днс̑҇ь. да бл҃го т̂и бꙋдет̑ и҆ сн҃омъ твоим̑ по тебѣ̀ въ вѣ́ки·

31

А҆́ще сътвори́ши добро̀ и҆ ѹ҆го́дно прд̑е гм҃ъ твои҆мъ·

32

А҆́ще же потребит̑ б҃ъ страны̀, в нѧже вхо́диши т̂ы та́мо прїѧ́ти зе́млю и҆хъ ѿ лица твое҆го, и҆ прїимеши ю҆̀ и҆ всели́шисѧ въ зе́млю и҆хъ·

33

Блюдѝ себѣ̀ са́мъ не възы́щи въ слѣ́дъ и҆т̂и и҆хъ, по потребле́нїю и҆хъ ѿ лица̀ твое҆го. не възыщѝ богов̑҇ и҆хъ гл҃ѧ. ка́ко творѧ́тъ страны̀ сїа бого́мъ свои҆мъ, сътворю̀ и҆ аз̑·

34

да не сътвори́ши г҃ꙋ б҃ꙋ свое҆мꙋ та́ко, похꙋ́лено бо е҆сть е҆го́же г҃ь ненави́дит̑. сътвори́ша бого́мъ свои҆мъ. ꙗ҆ко сн҃ы своѧ и҆ д꙽щери своѧ ж꙽гꙋтъ ѻ҆гнем̑ бого́мъ и҆мъ·

35

Вс̂е сло́во е҆же а́зъ заповѣ́даю тебѣ днс̑҇ь, с̂е снабдѝ твори́ти. да не приложи́ши к семꙋ̀ н̂и ѹ҆́и҆меши ѿ него̀·