Ostroh Bible❧П'ята книга Мойсеєва: Повторення Закону, розділ 13

1

Аще въста́нет̑ въ тебѣ̀ про̑҇ркъ и҆л̂и видѧ̀ со́нъ, и҆ да́стъ тебѣ̀ зна́менїѧ и҆ чюдеса̀·

2

и҆ прїиде зна́менїе и҆л̂и чю́до е҆же бꙋ́детъ гл҃ати рекі́и, и҆́демъ да послꙋж́имъ бо́гом̑ и҆нѣмъ, и҆хже не вѣ́сте·

3

да не послꙋшаете гл҃ъ прро̑҇ка того̀, и҆л̂и ви́дѧщаго со́нъ то́и. ꙗ҆ко и҆скꙋша́етъ г҃ь б҃ъ васъ ѹ҆вѣдѣти а҆́ще лю́бите г҃а б҃а ва́шег̑҇ всѣмъ срд̑цемъ ва́шимъ и҆ все́ю дш҃ею ва́шею·

4

По г҃ѣ бѕ҃ѣ ва́шемъ, да хо́дите и҆ того бои́тесѧ, и҆ за́повѣди е҆го снабдите. и҆ гла́са е҆го да послꙋшае҆те и҆ томꙋ послꙋж́ите, и҆ к немꙋ̀ прилепи́тесѧ·

5

И҆ про̑҇ркъ то́й и҆л̂и ви́дѧи со́нъ да ѹ҆́мрет̑·

6

Гл҃алъ б̂о е҆сть прельсти́ти т̂ѧ ѿ г҃а б҃а твое҆го и҆звед̑шаго тѧ и҆з꙽ землѧ е҆гѷпет̑скїа и҆зба́вльшаго тѧ и҆з рабо́ты·

7

Хотѧ́ще съврати́ти т̂ѧ с пꙋтѝ, и҆же заповѣ́да тебѣ г҃ь б҃ъ тво́и ходи́ти во́нь. сего̀ ра́ди погꙋби́те сами зло́е ѿ васъ·

8

А҆́ще же молит̑ т̂ѧ брат̑ твои сн҃ъ мт҃ри твоеѧ̀ и҆л̂и сн҃ъ твои и҆л̂и дщѝ твоа̀, и҆л̂и жена̀ ло́на твое҆го, и҆л̂и дрꙋгъ твой то́ченъ дш҃и твое́й, ѻ҆та́и гл҃ѧ. и҆́демъ и҆ послꙋ́жимъ бо́гомъ и҆нѣм꙽, и҆хже не ви́дѣ т̂ы н̂и ѿц҃ы твоѝ·

9

ѿ бого́въ странъ ꙗ҆же ѻ҆́крс̑҇тъ насъ, приближа́ющих̑сѧ тебѣ̀, и҆л̂и да́лних̑ ѿ тебѐ, ѿ конца землѝ до конца̀ землѝ·

10

Не восхощѝ и҆тѝ с ним̑, ни́же послꙋш́аи е҆го. и҆ да не пощади́тъ ѻ҆́ко твое на него, и҆ не възлюбѝ е҆го и҆ да не прикры́еши е҆го·

11

Возвѣща́ѧ возвѣстиши ѻ҆ немъ. и҆ рꙋка твоа̀ да бꙋдет̑ на не́мъ въ пр́ьвыхъ побитї ѝ, и҆ рꙋкѝ всѣхъ людїи послѣждь·

12

И҆ побїе́те е҆го ка́менїемъ и҆ ѹ҆́мретъ, ꙗ҆́ко възыска́лъ е҆сть ѻ҆брати́ти тебѐ ѿ г҃а б҃а твое҆го, и҆звед̑шаго т̂ѧ и҆зъ землѧ̀ е҆гѷпет̑ски ѿ до́мꙋ рабо́ты·

13

И҆ ве́сь і҆и҆л҃ь ѹ҆слы́шавъ ѹ҆бои́тсѧ и҆ не приложи́тсѧ посемъ сътвори́ти по словеси семꙋ̀ ѕло́мꙋ и҆же въ вас̑҇·

14

А҆́ще л̂и ѹ҆слы́шиши въ е҆ді́номъ ѿ град̑ ꙗ҆́же г҃ь б҃ъ да́етъ тебѣ всели́тисѧ т̂ꙋ гл҃ющихъ·

15

И҆зыидо́ша мꙋжѝ без꙽законїи ѿ нас̑҇, и҆ ѿврати́ша живꙋщ́аѧ въ гра́дѣхъ и҆хъ гл҃юще. и҆́демъ да послꙋж́им꙽ бого́мъ и҆́нѣмъ, и҆́хже не вѣ́сте·

16

И҆ да възы́щеши и҆ вопраша́еши и҆ ѻ҆бы́щеши ѕѣло. и҆ сеж̑ л̂и и҆́стинно сло́во бы́сть ꙗ҆́вѣ, и҆ похꙋ́ленїе е҆сть въ вас̑҇·

17

Се̂ ѹ҆бива́ѧ ѹ҆бїе́ши вс̂ѧ живꙋщ́аа въ гра́дѣ ѻ҆́ном̑ ѹ҆бо́емъ ме́чнымъ. и҆ възложе́нїем꙽ да възложи́ши и҆хъ и҆ вс̂ѧ ꙗ҆же в ним̑·

18

И҆ ве́сь пл́ѣнь е҆го събере́ши и҆ в распꙋтїихъ е҆го. и҆ да запали́ши гра̑ ѻ҆́гнем̑ и҆ всю̀ коры́сть е҆го всѧ́ческы пред̑ гм҃ъ бм҃ъ твои҆мъ, и҆ бꙋ́детъ пꙋстъ въ вѣ́ки, не въз꙽гра́дитсѧ посе́мъ·

19

да приложит̑сѧ ничто́же ѿ положенїѧ в рꙋцѣ твоѝ. да ѿвратит̑ б҃ъ ѿ ꙗ҆́рости гнѣвъ сво́и, и҆ да́сть т̂и млс̑҇ть и҆ помилꙋет꙽ т̂ѧ и҆ ѹ҆мно́жит̑ т̂ѧ ꙗ҆́кож̑ е҆сть гл҃а тебѣ, и҆ ꙗ҆́коже сѧ е҆сть клѧ̀ г҃ь ѿц҃емъ ва́шимъ·

20

А҆́ще послꙋша́е҆ши гласа г҃а б҃а твое҆го, и҆ снабди́ши вс̂ѧ за́повѣди е҆го, ꙗ҆́же а҆зъ заповѣ́даю тебѣ дне́сь. твори́ти добро̀ и҆ ѹ҆год̑но пред̑ гм҃ъ бм҃ъ твоим̑·