Ostroh Bible❧П'ята книга Мойсеєва: Повторення Закону, розділ 14

1

Сн҃ове б̂о вы̀ г҃а б҃а ва́шего да не рѣж́етесѧ, и҆ не возложи́те плѣши межѝ ѻ҆чи́ма ва́шима на ме́ртвемъ·

2

Ꙗ҆́ко лю́дїе ст҃и е҆сте гв҃и б҃ꙋ ва́шемꙋ. тебѐ б̂о и҆збра́лъ е҆сть г҃ь б҃ъ твои бы́ти е҆мꙋ себѣ̀ лю́демъ преподобным̑ ѿ всѣхъ стра́нъ ꙗ҆же на лицы̀ землѝ. да не ꙗ҆́сте всего̀ скверна́ва·

3

Се въ ско́тѣхъ да ꙗ҆́сте, теле́цъ ѿ говѧд̑ а҆гнецъ ѿ ѻ҆вец̑҇, и҆ козе́лъ ѿ коз̑. е҆ле́нѧ и҆ се́рнꙋ и҆ бꙋ́иволицꙋ, и҆ ла́нѧ, зꙋ́бръ, и҆ ѻ҆нагръ, саи҆га́къ, и҆ всѧк̑҇ ско́тъ на́ двое дѣ́лѧ па́зногти, и҆ копы́то на́ двое копы́тѧ. и҆ възносѧ̀ жва́нїе во ско́тѣ сїѧ̀ да ꙗ҆́сте·

4

И҆ сих̑ да не ꙗ҆́сте ѿ възносѧ́щихъ жва́нїе, и҆ ѿ дѣлѧ́щихъ па́зногти на́ двое, н̂о копы́та не копы́тѧщих̑, велблю́да и҆ за́ѧца ꙗ҆́ко възносѧт̑ жва́нїа сїи н̂о копы́та не копы́тѧтъ нечи́сто с̂и вамъ·

5

И҆ свинїа̀ ꙗ҆́ко на́ двое дѣ́лѧт̑ па́зногти, и҆ копы́та копы́тит̑ сїѧ же жва́нїа не жꙋе́тъ нечи́ста с̂и ва́мъ е҆сть ѿ мѧ́са и҆хъ да не ꙗ҆́сте и҆ мр҃твечи́не и҆хъ да не прикаса́етесѧ·

6

И҆ сїѧж̑ да ꙗ҆́сте ѿ всѣх꙽ и҆же въ водѣ̀, е҆мꙋже е҆сть пе́рїе и҆ чешꙋѧ̀ ты́и да ꙗ҆́сте. и҆ всемꙋ̀ е҆мꙋже нѣсть пе́рїа ни чешꙋѧ̀ да не ꙗ҆сте нечи́ста т̂а вам̑·

7

И҆ вс̂ю пти́цꙋ чи́стꙋ да ꙗ҆́сте·

8

И҆ сих̑же да не ꙗ҆́сте ѿ них̑ ѻ҆рла̀, и҆ но́га, и҆ ѻ҆рла̀ мо́рскаго, и҆ неꙗ҆́сыти, и҆кти́на и҆ подо́бныа сим̑·

9

И҆ вра́на, и҆ врабїѧ̀. и҆ вы́пелица. и҆ сꙋхола́плѧ и҆ ꙗ҆́стреба и҆ подо́бныа сим̑, и҆ вра́на но́щнаго, и҆ лилика, и҆ подо́бнаѧ симъ·

10

И҆ е҆родїѻ́на, и҆ ле́бедѧ і҆ и́винъ, и҆ катара́кта, и҆ вдо́да·

11

И҆ но́щнаго нетопырѧ, и҆ сыча̀, и҆ теслоно́са, и харадрїѻ́на и҆ подо́бныа сим̑, и҆ порфирїѻ́на·

12

И҆ вс̂ѧ га́ды пти́ческїа нечи́ста сїѧ ва́мъ, да не ꙗ҆́сте ѿ нихъ·

13

Всѧ́кꙋ пти́цꙋ чи́стꙋ да ꙗ҆́сте. все ꙗ҆́же мр҃твечины да не ꙗ҆сте ѻ҆битал꙽никꙋ и҆же въ гра́дѣ да да́сте и҆ да ꙗ҆́стъ, и҆л̂и да ѿда́сте стра́н꙽никꙋ, ꙗ҆́ко лю́дїе ст҃и е҆сте гв҃и б҃ꙋ ва́шемꙋ, да не свари́ши ꙗ҆́гнѧте въ мле́цѣ ма́тери е҆го·

14

десѧти́ны да ꙗ҆́си ѿ всего̀ пло́да сѣмени свое҆го, плд̑о нив̑҇ твои҆хъ ѿ го́да до го́да·

15

да ꙗ҆́си ѧ҆̀ пред̑ гм҃ъ бм҃ъ свои҆мъ на мѣ́стѣ и҆дѣже и҆збере́тъ г҃ь б҃ъ твои, призыва́ти и҆́мѧ е҆го т̂ꙋ. та́мо да принесе́ши десѧти́нꙋ пшени́ца твое҆ѧ и҆ вина̀ твое҆го, і҆ е҆ле́а твое҆го, и҆ прьвене́цъ воло́въ твоих̑ и҆ ѻ҆ве́цъ твоих̑, да сѧ наѹ҆чи́ши боѧ́тисѧ г҃а б҃а твое҆го вс̂ѧ дн҃и·

16

А҆́ще л̂и дале́че бꙋ́дет̑ пꙋтем̑ ѿ тебѐ и҆ не возмо́жеши донестѝ и҆хъ, ꙗ҆ко дале́че мѣ́сто ѿ тебѐ, е҆же и҆збере́тъ г҃ь б҃ъ твои, призывати и҆мѧ е҆го т̂ꙋ, ꙗ҆ко блс̑҇ви т̂ѧ г҃ь б҃ъ твои·

17

Тогда̀ ѿдасѝ сїе на ценѣ̀ и҆ во́змеши цѣнꙋ̀ в рꙋ́кꙋ свою̀, и҆ да и́деши въ мѣсто е҆же и҆збере́тъ г҃ь б҃ъ твои себѣ̀·

18

И҆ да́си цѣнꙋ на всем̑ на не́же т̂и помы́слит̑ дш҃а твоѧ̀ на волы̀ и҆ ѻ́вцы и҆л̂и на вино̀, и҆л̂и на ѻ҆ло́винꙋ и҆л̂и на вс̂е на не́же помышлѧет̑ дш҃а твоѧ, и҆ да ꙗ҆́си т̂ꙋ пред̑ гм҃ъ бм҃ъ твои҆мъ. да възвесели́шисѧ т̂ы и҆ до́мъ твои·

19

Левѷтинъ же и҆же въ гра́дѣхъ твои҆хъ, не ѻ҆ста́виши е҆го ꙗ҆́ко нѣ́сть е҆мꙋ ча́сти, ни жре́бїа с тобо́ю·

20

По тре́хъ лѣтехъ да и҆знесе́ши вс̂ю десѧти́нꙋ жи́тъ свои҆хъ в т̂о лѣто ѻ҆́но да положи́шї ю҆̀ въ гра́дѣхъ свои҆хъ·

21

И҆ прїидетъ левѷтинъ ꙗ҆́ко нѣсть е҆мꙋ ча́сти, н̂и жре́бїа с тобо́ю и҆ прише́лецъ и҆ сирота̀ и҆ вдова̀, ꙗ҆же въ гра́дѣхъ твоих̑. да ꙗ҆дѧ́тъ и҆ насы́тѧтсѧ и҆ блс̑҇вит̑ т̂ѧ г҃ь б҃ъ тво́и въ всѣхъ дѣлехъ твоих̑ ꙗ҆́же а҆ще сътвориши·