Ostroh Bible❧П'ята книга Мойсеєва: Повторення Закону, розділ 15

1

Въ сед̑мо́е лѣто да сотвори́ши ѿпꙋще́нїе. си́ же за́повѣдь ѿпꙋще́нїа, да ѻ҆ста́виши ве́сь до́лгъ свои им̑же дл́ъжен̑҇ ближнїи тебѣ̀. и҆ бра́та своег̑҇ не стѧжѝ ꙗ҆́ко нарече́сѧ ѿпꙋще́нїе г҃ꙋ б҃ꙋ твое҆мꙋ·

2

ѿ стра́н꙽ника да стѧ́жеши, е҆ли́ко ти е҆сть ѹ҆ него̀. а҆ бра́тꙋ свое҆мꙋ ѿпꙋще́нїе да сътвори́ши до́лга твое҆го ꙗ҆́ко нѣсть доста́точенъ·

3

Сего̀ ради словесѝ блс̑҇ве́нїем̑, блс̑҇ви́тъ т̂ѧ г҃ь б҃ъ твои. въ землѝ ю҆же т̂и г҃ь б҃ъ дае́тъ въ прича́стїе прїѧ́ти ю҆̀·

4

А҆́ще же слꙋ́хомъ послꙋша́ете гла́са г҃а б҃а ва́шего, снабдѣти и҆ твори́ти вс̂ѧ за́повѣди сїѧ, ꙗ҆́же а҆́зъ заповѣ́даю тебѣ днесь·

5

Ꙗ҆́ко г҃ь б҃ъ твои блс̑҇ви́лъ т̂ѧ е҆сть ꙗ҆́ко̑ ти е҆сть гл҃алъ. и҆ въ заи́мъ да́си страна́мъ мно́гимъ, ты́ же не за́имеши. и҆ ѻ҆блада́еши т̂ы страна́ми мно́гами, тобо́ю же не ѻ҆блада́ютъ ни̂кто̀·

6

А҆́ще л̂и бра́тъ ѿ бра́тїа твоеѧ̀ бꙋ́детъ тебѣ̀ недоста́точен̑҇, въ е҆ді́номъ град̑ твоих̑ въ землѝ ю҆же г҃ь б҃ъ тво́и да́етъ тебѣ̀. да не ѿврати́ши срд̑ца твое҆го, ни съж꙽мѝ рꙋкѝ твое҆ѧ пред̑ бра́томъ твои҆мъ просѧ́щимъ·

7

Прострѣнїемъ прострѝ рꙋ́кꙋ твою̀ е҆мꙋ. и҆ вза́имъ да да́си е҆мꙋ е҆ли́ко про́сит̑. и҆ е҆ли́ко е҆мꙋ недоста́нетъ·

8

Блюдѝ себѐ сам̑ да не бꙋ́детъ слово та́ино въ срд̑цы твое҆м꙽ безако́нїа гл҃ѧ. приспѣе́тъ сед̑мое лѣто, ѿпꙋще́нїа·

9

И҆ съзло́бит꙽ ѻ҆́ко твоѐ бра́тꙋ твое҆мꙋ просѧ́щемꙋ, и҆ не да́си е҆мꙋ, и҆ възопїетъ на́ тѧ къ гв҃и, и҆ бꙋ́детъ т̂и грѣхъ велик̑҇·

10

данїе҆мъ да́си е҆мꙋ, и҆ занѧ́тїемъ за́имеши е҆мꙋ, е҆ли́коже а҆ще про́сит̑ ѹ҆ тебѐ, не съжа́ли с̂и въ срд̑цы своем̑, даю́щꙋ т̂и е҆мꙋ·

11

Ꙗ҆́ко сего̀ ради сло́ва блс̑҇ви́тъ т̂ѧ г҃ь б҃ъ тво́и въ всѣх꙽ дѣ́лехъ твои҆хъ, и҆ на вс̂е на не́же възложи́ши рꙋ́кꙋ твою̀·

12

И҆б̂о не ѻ҆скꙋдѣет̑ ндоста́точен̑҇ въ землѝ твое́и, сего̀ ради аз̑ заповѣ́даю слово с̂е гл҃ѧ. ѿвръза́ѧ ѿве́рзи рꙋцѣ своѝ бра́тꙋ твое҆мꙋ ни́щемꙋ, и҆ просѧ́щемꙋ на землѝ твое́и·

13

А҆́ще л̂и прода́стъсѧ к тебѣ̀ брат̑ тво́и е҆врѣа́нинъ и҆л̂и е҆вреа́нынѧ да т̂и рабо́тае҆тъ ѕ҃ лѣтъ. въ сед̑мо́е же да ѿпꙋс́тиши е҆го свобод̑на ѿ себѐ·

14

А҆́ще же пꙋ́стиши е҆го свобод̑на ѿ себѐ, да не ѿпꙋстиши е҆го тща̀. па́мѧтное е҆мꙋ да ѹ҆гото́виши ѿ ѻ҆ве́цъ свои҆хъ и҆ ѿ пшени́ца свое҆ѧ и҆ ѿ вина̀ твое҆го, ꙗ҆́коже т̂ѧ блс̑҇вит̑ г҃ь б҃ъ тво́и и҆ да да́си е҆мꙋ·

15

И҆ помѧнѝ ꙗ҆́ко ра́бъ и҆ ты̀ б̂ѣ, въ землѝ е҆гѷпет̑стеи и҆ свободи т̂ѧ г҃ь б҃ъ тво́и ѿтꙋдꙋ·

16

Сего ра́ди и҆ а҆зъ заповѣ́даю тебѣ̀ твори́ти сло́во с̂е·

17

А҆́ще же гл҃етъ к тебѣ̀ не ѿидꙋ ѿ тебѐ ꙗ҆ко възлю́бих̑ т̂ѧ и҆ дом̑ твои. и҆ ꙗ҆́ко лю́бо е҆мꙋ е҆сть ѹ҆ тебе·

18

да прїимеш̑҇ ши́ло, и҆ провръти́ши е҆мꙋ ѹ҆́хо пред̑ две́рми ѹ҆ степе́ни. и҆ бꙋдет̑ ти раб꙽ въ вѣ́ки, и҆ рабѣ свое́и да сотвори́ши та́кожд̑е·

19

И҆ да не бꙋдет̑ же́стока пред̑ тобо́ю ѿпꙋща́емым̑ ѿ тебѐ свобод̑но. ꙗ҆́ко и҆стѧ́женꙋю м꙽здꙋ рабо́тал̑҇ т̂и е҆сть, ѕ҃, лѣтъ. и҆ блс̑҇ви́т꙽ т̂ѧ г҃ь б҃ъ тво́и въ всем̑ е҆же твори́ши·

20

И҆ всѧ́къ первене́цъ роже́н꙽ныи ѿ волов̑҇ твои҆хъ и҆ ѻ҆ве́цъ твоих̑. мꙋжескъ пол̑҇ да ѻ҆ст҃иши гв҃и б҃ꙋ твое҆мꙋ, и҆ да не дѣ́лаеши первенце́мъ ѿ ю҆нцевъ, и҆ да не стриже́ши прьвенца̀ въ ѻ҆́вцахъ твои҆хъ·

21

Пред̑ гм҃ъ бм҃ъ твои҆мъ да ꙗ҆́си ѧ҆̀ ѿ лѣта до лѣта, въ мѣсте и҆дѣже и҆збере́тъ г҃ь б҃ъ тво́и, т̂ы и҆ до́мъ тво́и·

22

А҆́ще л̂и на не́мъ бꙋдет̑ порече́нїе, храмота̀, и҆л̂и слѣпота̀ и҆ вс̂е порече́нїе ѕло́е да не положи́ши и҆̀ тре́бы г҃ꙋ б҃ꙋ твое҆мꙋ·

23

Въ гра́дѣх꙽ твоих̑ да ꙗ҆́си ѧ҆̀, нечи́стыи и҆ чи́стыи ѹ҆ тебѐ. та́кожде да ꙗ҆́сте ꙗ҆ко и҆ сернꙋ и҆ е҆ле́нѧ, ра́звѣ кро́ви да не ꙗ҆́си, на́ землю пролива́и и҆̀ а҆ки во́дꙋ·