Ostroh Bible❧П'ята книга Мойсеєва: Повторення Закону, розділ 16

1

Снабдѝ мс̑҇цъ но́выхъ, и҆ да твори́ши. па́схꙋ гв҃и б҃ꙋ твое҆мꙋ. ꙗ҆ко въ мс̑҇цъ но́выи и҆зведы́и т̂ѧ и҆зъ е҆гѷп꙽та но́щїю·

2

И҆ да жрътвꙋе҆ши па́схꙋ гв҃и б҃ꙋ твое҆мꙋ. ѻ҆́вца и҆ говѧ́да, въ мѣ́сте е҆же и҆збере́тъ г҃ь б҃ъ тво́и себѣ̀ призыва́ти и҆́мѧ е҆го т̂ꙋ·

3

да не ꙗ҆́сѝ в н̂ю ква́са. з҃, дн҃їи. да ꙗ҆́си в н̂ѧ ѻ҆прѣ́сноки хлѣб꙽ ѕло́бныи ꙗ҆́ко съ т꙽ща́нїемъ и҆зыидо́сте и҆зъ е҆гѷпта да помина́ете дн҃ь и҆схо́да ва́шего. ѿ землѧ̀ е҆гѷпетъски, вс̂ѧ дн҃и жи́тїѧ ва́шего·

4

да не ꙗ҆́ви́тсѧ тебѣ̀ ква́сно въ всѣхъ предѣ́лѣхъ твои҆хъ. з҃. дн҃їи. и҆ да не ѻ҆бъвечерѣ́етъ ѿ мѧ́съ ꙗ҆́же пожрете къ ве́черꙋ. въ а҃. дн҃ь. до ѹ҆́трїѧ·

5

Не возмо́жеши требова́ти па́схи н̂и въ е҆ді́номъ же гра́дъ твоих̑ ꙗ҆же г҃ь б҃ъ тво́и дае҆тъ тебѣ̀·

6

Но̂ въ мѣ́сте е҆же и҆збере́т꙽ г҃ь б҃ъ твои, призыва́ти и҆́мѧ е҆го т̂ꙋ. т̂ꙋ требꙋ́еши па́схꙋ въ ве́черъ до за́хода сл҃нца, въ времѧ в не́же и҆зыидо́сте и҆з꙽ земѧ̀ е҆гѷпет꙽ски, и҆ съвари́ши і҆ и҆спече́ши и҆ ꙗ҆́си на мѣ́сте и҆дѣже и҆збере́тъ г҃ь б҃ъ твои себѣ̀, и҆ въз꙽врати́шисѧ заѹ҆́тра і҆ и́деши въ дом̑ сво́и·

7

ѕ҃ дн҃їи да ꙗ҆́си ѻ҆прѣ́сноки, въ седмы́и же дн҃ь и҆схо́дныи пра́здник̑҇ гв҃и б҃ꙋ твое҆мꙋ, да не сътвори́ши в н̂ѧ всѧ́каго дѣ́ла·

8

И҆ з҃, недѣ́ль и҆спо́лненых꙽ да сочте́ши себѣ̀, а҆ въ нача́ло же твое҆го се́рпа на жи́та. начни че́сти з҃. недѣ́ль, и҆ да сътвори́ши пра́з꙽дникъ недѣ́лныи гв҃и б҃ꙋ твое҆мꙋ. ꙗ҆́коже т̂и доспѣ́ет꙽ рꙋка̀, и҆ е҆ли́ко же да́сть т̂и. ꙗ҆́коже т̂ѧ блс̑҇вѝ г҃ь б҃ъ тво́и·

9

И҆ възвесели́шисѧ пред̑ гм҃ъ бм҃ъ твои҆мъ, т̂ы и҆ сн҃ъ тво́и и҆ д꙽щѝ твоѧ, и҆ ра́бъ тво́и и҆ раба̀ твоѧ̀, и҆ левѷтинъ и҆же въ гра́дѣхъ твои҆хъ, и҆ прише́лецъ и҆ сирота̀, и҆ вдова̀ ꙗ҆́же въ ва́съ, въ мѣсте и҆дѣже и҆збере́тъ г҃ь б҃ъ тво́и себѣ̀, призыва́ти и҆́мѧ е҆го т̂ꙋ·

10

И҆ помѧне́ши ꙗ҆́ко раб̑҇ б̂ѣ и҆ т̂ы въ земли е҆гѷпет̑стеи, и҆ снабди́ши и҆ сътвори́ши за́повѣди е҆го·

11

И҆ пра́зд꙽ник̑҇ кꙋщ꙽ныи да сътвори́ши себѣ̀, з҃ дн҃їи, е҆гда̀ събере́ши ѿ ни́вы твое҆ѧ и҆ ѿ точи́ла твое҆го. и҆ да́ сѧ възвесели́ши ѻ҆ пра́зднице твоем̑, т̂ы и҆ сн҃ъ твои. и҆ д꙽щѝ твоѧ̀, и҆ ра́бъ и҆ раба̀ твоѧ̀ и҆ левѷт꙽ и҆ прише́лец꙽ и҆ сирота̀ и҆ вдова̀, и҆же въ гра́дѣхъ твои҆хъ·

12

з҃ дн҃їи да пра́зднꙋ́еши гв҃и б҃ꙋ твое҆мꙋ, въ мѣсте и҆дѣж́е и҆збе́ретъ г҃ь б҃ъ себѣ призыва́ти и҆́мѧ е҆го т̂ꙋ·

13

А҆ще же блс̑҇вит꙽ т̂ѧ г҃ь б҃ъ твой въ всх̑ѣ жи́тех̑ твои҆хъ, и҆ въ всем̑ дѣ́ле рꙋкъ твоих̑, и҆ бꙋ́деши веселѧ́сѧ·

14

И҆ три́жды въ лѣто да ꙗ҆влѧ́етсѧ всѧ́къ мꙋжескъ по́лъ пред̑ гм҃ъ бм҃ъ твои҆мъ·

15

На мѣ́стѣ е҆же и҆збра̀ г҃ь б҃ъ тво́и, въ пра́зд꙽никъ ѻ҆прѣ́сночныи, и҆ въ пра́здникъ недѣ́лныи, и҆ въ пра́зд̑ник̑҇ кꙋщныи.

16

И҆ да не ꙗ҆́ви́шисѧ пред̑ гм҃ъ бм҃ъ твои҆мъ то́щъ. ко́ждо по постиже́нїю рꙋкы̀ свое҆ѧ, по блс̑҇венїю г҃а б҃а свое҆го и҆же да́лъ е҆сть тебѣ̀·

17

Сꙋдїѧ̀ и҆ кни́гочїѧ поста́виши себѣ̀ въ всѣ́хъ гра́дѣхъ твои҆хъ ꙗ҆́же г҃ь б҃ъ да́стъ тебѣ̀ по племенемъ, да сꙋ́дѧтъ лю́демъ сꙋ́дъ пра́ведныи. да не ѹ҆кло́нѧтъ сꙋда̀. ниже да зрѧ́тъ на лица̀ ниже да во́змꙋтъ м꙽зды̀. м꙽зда̀ б̂о ѻ҆слеплѧ́етъ ѻ҆́чи мꙋ́дрыхъ, и҆ ѿме́щетъ словеса пра́ведныхъ·

18

Пра́вед̑не пра́веднаго възыщытѐ, да поживетѐ. и҆ шед̑ше прїимѣте зе́млю, ю҆́же г҃ь б҃ъ твои дае́тъ ва́мъ·

19

да не насади́ши себѣ̀ садо́въ ниже дре́ва подлѣ̀ ѻ҆лта́рѧ г҃а б҃а твое҆го е҆же сътвори́ши себѣ̀ и҆ да не поста́виши себѣ̀ ка́пища е҆гож̑ възненави́дѣ г҃ь б҃ъ тво́и·