Ostroh Bible❧П'ята книга Мойсеєва: Повторення Закону, розділ 17

1

И да не приведе́ши гв҃и б҃ꙋ твое҆мꙋ телца̀ н̂и ѻ҆вча́те на не́мже е҆сть порече́нїе, и҆ вс̂е сло́во ѕл̂о, ꙗ҆́ко хꙋ́лно гв҃и б҃ꙋ твое҆мꙋ е҆сть с̂е·

2

А҆́ще же сѧ ѻ҆брѧ́щетъ ѹ҆ тебѐ въ е҆ді́номъ ѿ град̑ твои҆хъ, ꙗ҆́же г҃ь б҃ъ дае́тъ тебѣ̀. мꙋжъ и҆л̂и жена̀ иж̑ сътвори́т꙽ ѕл̂о пред̑ гм҃ъ бм҃ъ твоим̑ и҆ престꙋпит̑ завѣтъ е҆го. и҆ шед̑ше послꙋж́итъ богом̑ и҆́нѣмъ, и҆ покло́нитсѧ и҆мъ. сл҃нцꙋ и҆л̂и всемꙋ̀ ѿ нбс̑҇ных̑ е҆гоже нѣ́сть. повелѣлъ т̂и г҃ь·

3

И҆ повѣдѧ́тъ т̂и с̂е е҆же ѹ҆слы́шиши, и҆ да възы́щеши ѕѣ́ло, и҆ а҆ще с̂е и҆́стин꙽но бꙋ́дет꙽ сло́во ꙗ҆ко хꙋле́нїе с̂е бꙋдет̑ въ і҆и҆л҃и. да и҆зведе́ши чл҃ка, того̀ и҆л̂и женꙋ̀ т̂ꙋ ꙗ҆́же сътвори́ста дѣ́ло ѕло́е с̂е, при две́рех꙽ и҆ побїете и҆̀ ка́менїемъ, и҆ да ѹ҆́мретъ. пред̑ двема̀ по́слꙋхома. и҆л̂и пред̑ трима̀ да ѹ҆́мретъ ѹ҆мира́ѧи да не ѹ҆мира́етъ е҆ді́нѣмъ по́слꙋхом̑·

4

Рꙋка́ же по́слꙋхъ бꙋ́детъ на немъ пр́ьвое ѹ҆би́ти и҆̀. и҆ рꙋка́ же всѣ́хъ людїи послѣж́дь. и҆ да и҆зве́ржете ѕло́е ѿ вас̑҇ самѣхъ·

5

А҆́ще л̂и и҆знемо́жетъ сло́во ѹ҆ тебѐ въ сꙋдѣ̀, междꙋ кро́вїю и҆ кро́вїю. и҆ ме́ждꙋ сꙋдом̑ и҆ сꙋ́дом꙽, и҆ ме́ждꙋ внѧ́тїе҆мъ внѧ́тїе, и҆ ме́жди прѣ́нїемъ прѣ́нїѧ·

6

Є҆гда словеса̀ сꙋ́днаѧ въ гра́дѣхъ твои҆хъ бꙋ́детъ, т̂о въставъ възы́идеши на мѣ́сто, е҆же и҆зберет̑ г҃ь б҃ъ тво́и призва́ти и҆́мѧ е҆го т̂ꙋ.

7

И҆ да вшед̑ши къ жерце́мъ и҆ левѷтомъ и҆ къ сꙋдїѝ и҆же бꙋдетъ въ ты́и дн҃и и҆ възыска́вше възвѣстѧ́тъ тебѣ̀ сꙋ́дъ·

8

И҆ сътвори́ши по словесѝ е҆же т̂и възвѣстѧт̑. и҆ ѿ мѣста и҆же т̂и и҆збере́тъ г҃ь б҃ъ тво́и призыва́ти и҆мѧ е҆го т̂ꙋ·

9

И҆ да снабдиши ѕѣло твори́ти въ все́мъ е҆ли́ко зако́нъ положи́тсѧ тебѣ̀·

10

По зако́нꙋ и҆ по сꙋдꙋ̀ и҆же рекꙋтъ тебѣ̀ сътвори́ти да сѧ не ѹ҆кло́ниши ѿ словесѝ е҆же и҆звѣстѧт̑ тебѣ, н̂и на́ десно н̂и на́ лѣво·

11

И҆ чл҃къ и҆же сътвори́тъ презрѣнїе не послꙋшати жерца̀, пред̑стоа́щаго слꙋжи́ти во и҆́мѧ г҃а б҃а твое҆го и҆л̂и сꙋдїѧ и҆же въ ты́и дн҃и бꙋ́детъ. да ѹ҆́мрет̑ чл҃къ то́и. и҆ да и҆звержеши ѕло́е ѿ і҆ил҃ѧ·

12

И҆ вс̂и лю́дїе ѹ҆слы́шавше ѹ҆боѧ́тсѧ и҆ не беществꙋ́ютъ посем꙽·

13

А҆ще же вни́деши въ зе́млю ю҆́же г҃ь б҃ъ дае́тъ тебѣ̀ въ прича́стїе и҆ прїимеши ю҆̀, и҆ всели́шисѧ на не́и, и҆ рече́ши поста́влю кн҃ѕѧ себѣ̀ ꙗ҆ко и҆́ныѝ страны̀, ꙗ҆́же ѻ҆́крс̑҇тъ на́съ·

14

Поста́вѧ да поста́виши себѣ̀ кн҃ѕѧ е҆гоже и҆зберетъ г҃ь б҃ъ твои ѿ бра́тїа твое҆ѧ да поста́виши себѣ̀ кн҃ѕѧ, да не възмо́жеши себѣ̀ поста́вити кн҃ѕѧ чл҃ка чю́ждаго, е҆же нѣ́сть бра́тъ твои·

15

И҆ да не ѹ҆мно́житъ себѣ ко́нь и҆ да не възврати́тъ людїи въ е҆гѷпетъ, ꙗ҆́ко да не ѹ҆мно́жиши себѣ̀ ко́нь. г҃ь б̂о рече ва́мъ не приложи́те възврати́тисѧ въспѧ́ть посе́мъ·

16

И҆ да не ѹ҆мно́жит꙽ себѣ̀ жен̑҇ да не съврати́тсѧ срд̑це е҆го, и҆ сребра̀ и҆ зла́та не ѹ҆мно́житъ себѣ̀ ѕѣ́ло·

17

И҆ бꙋдетъ е҆гда̀ сѧ́детъ на столѣ̀ вла́сти свое҆ѧ. да въпи́шетъ себѣ̀ зако́нъ сїи въ кни́ги ѿ жре́цъ и҆ ѿ левѷтъ·

18

И҆ да бꙋдет̑ е҆мꙋ и҆ да чте́т꙽ по всѧ дн҃и жи́тїѧ свое҆го да сѧ наѹ҆́читъ боꙗ҆́тисѧ г҃а б҃а свое҆го, и҆ да снабди́тъ вс̂ѧ за́повыди сїѧ и҆ ѻ҆правле́нїѧ сїѧ твори́ти ѧ҆̀·

19

И҆ да сѧ не възвы́ситъ срд̑це е҆го ѿ бра́тїѧ е҆го да не престꙋ́питъ ѿ за́повѣдеи н̂и на́ десно н̂и на́ лѣво ꙗ҆ко да бꙋдетъ мно́ги лѣта въ вла́сти свое́и той и҆ сн҃ы е҆го с ни́мъ въ сн҃ѣхъ і҆и҆л҃евых̑·