Ostroh Bible❧П'ята книга Мойсеєва: Повторення Закону, розділ 6

1

Сїа́ же за́повѣди і҆ и҆справле́нїа и҆ сꙋды̀, е҆ли́ко заповѣ́да г҃ь б҃ъ ва́шъ. наѹ҆чи́ти ва́съ твори́ти та́ко. на землѝ в ню́же в̂ы вхо́дите та́мо причасти́ти е҆ѧ̀·

2

да сѧ бо́ите г҃а б҃а свое҆го, и҆ снабди́те вс̂ѧ ѻ҆правле́нїа ег̑҇ и҆ за́повѣди е҆го, ꙗ҆́же а́зъ заповѣдаю тебѣ̀ днс̑҇ь. т̂ы и҆ сн҃ове твоѝ и҆ внꙋ́цы твоѝ, вс̂ѧ дн҃и живота твое҆го, да мно́ги дн҃и пребꙋ́дете·

3

И҆ послꙋшаи і҆и҆л҃ю, и҆ снабдѝ твори́ти да бл҃го ти бꙋ́детъ. и҆ да ѹ҆мно́житесѧ ѕѣ́ло ꙗ҆́коже гл҃а г҃ь б҃ъ ѿц҃ъ ва́ших̑, да́ти тебѣ̀ зе́млю кипѧ́щꙋ мле́комъ и҆ ме́домъ·

4

Сїѧ́ же ѻ҆правле́нїѧ и҆ сꙋды̀, е҆ли́ко заповѣ́да г҃ь б҃ъ сн҃омъ і҆и҆л҃евымъ въ пꙋсты́ни. из̑шед̑шимъ и҆мъ из̑ землѧ̀ е҆гѷпетски·

5

Слы́ши і҆и҆л҃ю г҃ь б҃ъ твои г҃ь е҆ді́нъ е҆сть·

6

И҆ да лю́биши г҃а б҃а твое҆го, ѿ всего̀ срд̑ца твое҆го, и҆ ѿ всеѧ̀ дш҃а свое҆ѧ, и҆ ѿ всеѧ̀ си́лы твое҆ѧ·

7

И҆ да бꙋ́дꙋтъ ти словеса̀ с̂и, ꙗ҆же а́зъ заповѣ́даю т̂и днс̑҇ь. въ срд̑цы твое҆мъ, въ дш҃и твое́й·

8

И҆ да нака́жеши и́ми сн҃ы твоѧ̀, и҆ да гл҃еши в ни́хъ сѣдѧ́и въ домꙋ̀, і҆ и҆ды́и пꙋте́мъ, и҆ лежа̀, и҆ въста́ѧ·

9

И҆ възложѝ ѧ҆̀ въ зна́менїе на́ рꙋкꙋ твою̀. и҆ да бꙋ́детъ невъсколѣ́блема пред̑ ѻ҆чи́ма твои́ма·

10

И҆ д̂а въпи́шеши ѧ҆̀ на пра́зѣхъ хра́мины свое҆ѧ, и҆ на вра́тѣхъ своих̑·

11

И҆ да бꙋ́детъ е҆гда̀ въведе́тъ т̂ѧ г҃ь б҃ъ твои в зе́млю е҆ю́же клѧ́тсѧ ѿц҃ем̑ твои҆мъ, а҆враа́мꙋ, и҆саа́кꙋ, і҆а́ковꙋ да́ти тебѣ̀ гра́ды вели́ки, и҆ добры̀, и҆х꙽же нѣ́си съгради́лъ т̂ы·

12

И҆ до́мы по́лны всего̀ бл҃га, их̑же нѣ́си напо́лнилъ. и҆ пото́ки и҆ско́паны, и҆х꙽же нѣ́си копа́лъ, и҆ виногра́ды, и҆ ма́слины и҆х꙽же нѣ́си насади́лъ, и҆ ꙗ҆ды́и и҆ насыти́в꙽сѧ·

13

Вонмѝ себѣ̀ да не раз꙽шири́тсѧ срд̑це твоѐ, и҆ забꙋ́детъ г҃а б҃а твое҆го, и҆зве́дшаго тебѐ и҆з꙽ землѧ̀ е҆гѷпет꙽ски, ѿ до́мꙋ рабо́тнаго·

14

Га҃ б҃а твое҆го бо́исѧ, и҆ томꙋ̀ е҆ді́номꙋ да слꙋж́иши. и҆ е҆мꙋ̀ прилепи́шисѧ, і҆ и́менемъ е҆го клене́шисѧ·

15

да не хо́диши въ слѣ́дъ богов̑҇ и҆́ныхъ, къ богом̑ стра́нъ ꙗ҆́же ѻ҆́крс̑҇тъ васъ·

16

Ꙗ҆́ко б҃ъ ревни́въ г҃ь б҃ъ твои посредѣ тебѐ. да не разгнѣ́вавъсѧ ꙗ҆ростїю г҃ь б҃ъ твои на́ тѧ, и҆ потреби́тъ т̂ѧ съ лица̀ всего̀ зем̑на́го·

17

да не и҆скꙋша́еши г҃а б҃а свое҆го ꙗ҆́коже и҆скꙋша́сте въ и҆скꙋше́нїи·

18

Снабдѧ̀ да снабди́ши за́повѣди г҃а б҃а свое҆го, и҆ свѣдѣ́нїѧ е҆го, и҆ ѻ҆правле́нїѧ е҆го, е҆ли́ко заповѣ́да тебѣ̀·

19

И҆ да сътвори́ши ѹ҆го́дное и҆ бл҃го́е пред̑ гм҃ъ бг҃омъ твои҆мъ, да бл҃го бꙋ́детъ тебѣ̀·

20

И҆ вни́деши и҆ прїимеши зем̑лю бл҃гꙋю, е҆ю́же клѧ́тсѧ ѿц҃емъ на́шимъ·

21

ѿгна́ти вс̂ѧ сꙋпоста́ты твоѧ̀ съ лица̀ твое҆го, ꙗ҆́коже е҆сть гл҃а г҃ь·

22

И҆ бꙋ́детъ е҆гда̀ въпраша́ет꙽ т̂ѧ сн҃ъ твои ѹ҆́трѣ гл҃ѧ. коѧ̀ сꙋть свѣдѣнїѧ и҆ ѻ҆правле́нїѧ и҆ сꙋды̀ е҆ли́ко заповѣ́далъ е҆сть г҃ь б҃ъ нашъ на́мъ·

23

И҆ рече́ши сн҃ꙋ свое҆мꙋ, рабы̀ бѣ́хомъ фараѻ́нꙋ въ е҆гѷптѣ и҆зведѐ насъ г҃ь б҃ъ ѿтꙋ́дѣ. рꙋко́ю крѣ́пкою, и҆ мы́шцею высо́кою·

24

И҆ да́стъ г҃ь б҃ъ зна́менїа и҆ чюдеса̀ вели́ка и҆ ѕла́ѧ въ е҆гѷптѣ ѹ҆ фараѻ́на, и҆ въ домꙋ е҆го и҆ въ си́лѣ е҆го пред̑ на́ми·

25

И҆ нас̑҇ и҆зведѐ г҃ь б҃ъ ѿтꙋ́дѣ, да въведе́тъ нас̑҇ да́ти намъ зе́млю сїю. е҆ю́же клѧ́тсѧ г҃ь б҃ъ нашъ ѿц҃емъ на́шимъ да́ти ю҆̀ намъ·

26

И҆ заповѣ́да намъ г҃ь твори́ти, вс̂ѧ ѻ҆правле́нїѧ сїѧ боѧ́тисѧ г҃а б҃а на́шего бл҃го да бꙋ́детъ намъ, вс̂ѧ дн҃и да живе́мъ, ꙗ҆́коже и҆ днес̑҇·

27

И҆ милосе́рдїе да бꙋ́детъ намъ, а҆́ще снабдим̑ сътвори́ти вс̂ѧ за́повѣди зако́на сего̀, пред̑ гм҃ъ б҃мъ на́шим̑, ꙗ҆́коже заповѣ́да намъ·