Ostroh Bible❧П'ята книга Мойсеєва: Повторення Закону, розділ 7

1

И бꙋ́детъ е҆гда̀ въведе́тъ т̂ѧ г҃ь б҃ъ твои въ зе́млю в ню́же вхо́диши та́мо прїѧ́тї ю҆̀. і и҆згна́ти страны̀ вели́кїа и҆ мно́гїа с꙽ лица̀ твое҆го. хет̑ѳе́ѧ, и҆ герьгесе́ѧ, и҆ а҆м꙽морре́ѧ, и҆ ханане́ѧ, и҆ ферезе́ѧ, и҆ е҆вꙋе҆ѧ, и҆ е҆ѹ҆се́ѧ. з҃, стра́нъ вели́ких̑ и҆ мно́гих̑, и҆ крѣпча́е вас̑҇·

2

И҆ преда́стъ и҆хъ г҃ь б҃ъ твои въ рꙋцѣ твоѝ, і҆ и҆збїе́ши ѧ҆̀. па́гꙋбою погꙋби́ши ѧ҆̀, да не завѣща́еши к ни́мъ завѣта, н̂и поми́лꙋеши и҆хъ·

3

Ниже сва́тьства сътвори́ши с ни́ми, дще́ри свое҆а не да́си сн҃ꙋ е҆го. н̂иже дще́ри е҆го да не пое́млеши, сн҃ꙋ свое҆мꙋ·

4

ѿврати́тъ б̂о сн҃а твое҆го ѿ менѐ. и҆ послꙋ́житъ бого́мъ и҆́нѣмъ, и҆ разгнѣ́ваетсѧ г҃ь гнѣ́вомъ на́ вы, и҆ потреби́тъ т̂ѧ въско́рѣ·

5

Но̂ си́це да сътвори́те им̑. тре́бища их̑ рассы́плете, и҆ столпы̀ и҆хъ да съкрꙋши́те. и҆ дꙋбра́вы и҆хъ да посѣче́те и҆ ваꙗ҆́нїа бо́гъ и҆хъ да и҆зож꙽же́те на ѻ҆гнѝ·

6

Ꙗ҆́ко лю́ди ст҃и в̂ы е҆сте гв҃и б҃ꙋ твое҆мꙋ, и҆ тебѐ и҆збра́л꙽ е҆сть г҃ь б҃ъ тво́и. и҆ да бꙋ́дете е҆мꙋ лю́ди и҆збра́нни, па́че всѣхъ стра́нъ е҆ли́ко е҆сть на все́и землѝ·

7

Не и́мже мно́ѕи е҆сте па́че всѣхъ странъ и҆зѧт̑ вас̑҇ г҃ь, і҆ и҆збра̀ вас̑҇ г҃ь·

8

Вы̂ б̂о е҆сте ме́ншѣи ѿ всѣхъ стра́нъ·

9

Но им̑же възлюбѝ г҃ь вас̑҇, и҆ снабдѧ̀ клѧ́твꙋ е҆же клѧ́тсѧ ѿц҃емъ ва́шимъ. і҆ и҆зведе г҃ь вас̑҇ рꙋко́ю крѣ́пкою и҆ мы́шцею высо́кою, і҆ и҆зба́вилъ т̂ѧ ѿ до́мꙋ рабо́ты, и҆ ѿ рꙋкѝ фараѻ́на цр҃ѧ е҆гѷпет̑ска·

10

И҆ да ѹ҆вѣ́си ꙗ҆́ко г҃ь б҃ъ тво́и, се́и б҃ъ. б҃ъ вѣ́рныи, снабдѧ́и завѣтъ сво́и, и҆ млс̑҇ть любѧ́щим̑ е҆го. и҆ снабдѧ́щимъ завѣтъ е҆го въ ты́сѧщъ рожде́нїи·

11

И҆ ѿда́ѧ ненави́дѧщимъ е҆го в лицѐ потреби́ти ѧ҆̀. и҆ не ѹ҆ме́длитъ ненави́дѧщимъ в лицѐ ѿда́ти и҆мъ·

12

да снабди́ши за́повѣди, и҆ ѻ҆правле́нїѧ и҆ сꙋды̀ сїѧ. е҆ли́ко а҆зъ заповѣ́даю тебѣ сътвори́ти дне́сь·

13

И҆ бꙋ́детъ е҆гда̀ послꙋшаете вс̂ѧ ѻ҆правле́нїа с̂и и҆ снабди́те сътвори́ти ѧ҆̀·

14

И҆ снабди́тъ г҃ь б҃ъ твои и҆ тебѣ, завт̑ѣ и҆ млс̑҇ть ꙗ҆́коже клѧ́сѧ ѿц҃емъ ва́шимъ·

15

И҆ възлю́битъ т̂ѧ и҆ блс̑҇витъ т̂ѧ, и҆ ѹ҆мно́житъ т̂ѧ. и҆ блс̑҇ви́тъ пло́дъ чре́ва твое҆го, и҆ пло́дъ землѧ̀ твое҆ѧ. и҆ пшени́цꙋ твою̀, и҆ вино̀ твоѐ и҆ е҆ле́и тво́и, и҆ ста́до воло́въ твои҆хъ·

16

и҆ па́ствꙋ ѻ҆ве́цъ твои҆хъ на землѝ е҆ю҆же клѧт̑сѧ ѿц҃емъ их̑ дати тебѣ̀·

17

И҆ блс̑҇венъ бꙋ́деши па́че всѣхъ ꙗ҆́зык̑҇, и не бꙋ́детъ въ ва́съ бес племе́нни, ниже непло́ды въ ско́тѣхъ твои҆х꙽·

18

И҆ ѿи҆́метъ г҃ь б҃ъ твои ѿ тебе вс̂е раслабле́нїе. и҆ вс̂ю ꙗ҆́зю е҆гѷпетъскꙋю ѕлꙋю̀, ю҆же ви́дѣсте.

19

И҆ е҆лико съвѣси не възложит̑ на тѧ, н̂о въложит̑ ѧ҆̀ на вс̂ѧ ненави́дѧщаѧ тебѐ·

20

И҆ ꙗ҆́сти бꙋ́дешъ весь плѣнъ стра́нъ, и҆же г҃ь б҃ъ дае́тъ тебѣ̀ да не пощадѧт̑ ѻ҆́чи твоѝ ѿ нихъ, и҆ да не послꙋж́иши бо́гомъ и҆х꙽, ꙗ҆́ко вредъ тебѣ̀ е҆сть с̂е·

21

А҆́ще л̂и гл҃еши въ ѹ҆́мѣ̀ с̂и ꙗ҆́ко страна̀ с̂и множа́иши паче мене. ꙗ҆ко възмогꙋ̀ а҆́зъ потребити ѧ҆̀, не възбо́исѧ и҆х꙽·

22

Па́мѧтїю да помѧне́ши е҆лико сътворѝ г҃ь б҃ъ твоѝ фараѻ́нꙋ и҆ всм̑ѣ е҆гѷптѧномъ·

23

Бѣды̀ вели́кїа ꙗ҆́же ви́дѣста ѻ҆́чи твоѝ. зна́менїа ѻ҆́на и҆ чюдеса̀ вели́каѧ. и҆ рꙋко́ю крѣ́пкою, и҆ мы́шцею высо́кою, ꙗ҆́ко и҆зведѐ т̂ѧ г҃ь б҃ъ твои. та́ко сътворит̑ г҃ь б҃ъ вашъ, всѣмъ страна́мъ и҆хже т̂ы бои́шисѧ ѿ лица̀ и҆хъ·

24

И҆ ше́ршни по́слетъ г҃ь б҃ъ твои на ни́хъ до́ндеж̑ потребѧ́тсѧ ѻ҆ста́вленїи и҆ съкрове́нїи ѿ тебѐ·

25

Не вреди́шисѧ ѿ лица̀ и҆хъ. ꙗ҆́ко г҃ь б҃ъ твои в꙽ тебѣ, б҃ъ вели́кїи и҆ крѣ́пкїи·

26

И҆ погꙋбит̑ г҃ь б҃ъ твои ꙗ҆зы́ки сїѧ, с лица̀ твое҆го по ма́лꙋ до ма́ла, не возмо́жеши погꙋби́ти и҆хъ въско́рѣ да не бꙋдет꙽ землѧ̀ пꙋста̀, да совокꙋпѧ́тсѧ и҆ роз̑множат̑сѧ ѕвѣрїе дивїи на́ тѧ·

27

И҆ предастъ е҆̀ г҃ь б҃ъ твои в рꙋцѣ твоѝ и҆ погꙋбѝ и҆хъ, погꙋбле́нїемъ вели́ким̑, до́ндеже и҆скорени́ши их̑·

28

И҆ преда́стъ цр҃и и҆хъ в рꙋцѣ твоѝ. и҆ погꙋби́те и҆́мѧ и҆хъ ѿ мѣста сего̀. и҆ не постоит̑ ни́же е҆ді́нъ пред̑ лицем̑ твоим̑, до́ндеже погꙋби́ши и҆хъ·

29

И҆ ваѧ́нїа боговъ их̑ и҆ж꙽же́ши на ѻ҆гнѝ, да не похо́щеши зла́та и҆ сребра̀ взѧ́ти себѣ̀ ѿ него, да не когда̀ съгрѣшиши того̀ ради. ꙗ҆ко хꙋ́лно е҆сть гв҃и б҃ꙋ твое҆мꙋ·

30

Не вносѝ похꙋ́лы въ сво́и до́мъ, и҆ проклѧт̑ бꙋ́деши ꙗ҆́ко и҆ т̂о, н̂о проклѧ́тїем꙽ прокленеши лиши е҆̀ ꙗ҆́ко проклѧта̀·