Ostroh Bible❧П'ята книга Мойсеєва: Повторення Закону, розділ 8

1

Вс̂ѧ за́повѣди ꙗ҆́же заповѣда вам̑ днс̑҇ь, да снабдѝ твори́ти и҆̀ да живе́те, и҆ ѹ҆мно́житесѧ, и҆ внїи́дѣте и҆ прїимѣте зе́млю бл҃гꙋю. е҆ю́же клѧ́тсѧ г҃ь б҃ъ ѿц҃емъ ва́шимъ·

2

И҆ да помѧне́ши весь пꙋть, и҆́мже прове́лъ тебѐ г҃ь б҃ъ твои, в꙽ пꙋсты́ни. да и҆скꙋсѝ т̂ѧ и҆ зазлит̑ т̂ѧ, и҆ ѹ҆разꙋмѣе҆тсѧ е҆же въ срд̑цы твое҆мъ, а҆́ще снабди́ши за́повѣди е҆го и҆л̂и нѝ·

3

И҆ заѕлѝ тебѣ̀, и҆ гла́домъ заморѝ т̂ѧ, и҆ посем̑ пита т̂ѧ ма́нною, е҆же т̂ы не ѹ҆вѣдѣ н̂и ѿц҃ы твоѝ, и҆ да ꙗ҆ви́тъ тебѣ̀. ꙗ҆́ко не ѻ҆ хлѣбѣ е҆ді́нем̑ жи́въ бꙋдетъ чл҃къ н̂о ѻ҆ всѧ́комъ словесѝ и҆з꙽ходѧщим̑ и҆зъ ѹ́стъ бж҃иих̑ жи́въ бꙋдетъ чл҃къ·

4

И ри́зы твоа̀ не раздра́шасѧ на тебѣ̀. но́ѕи твои не ꙗ҆звитесѧ, с̂е м҃ лѣтъ·

5

И҆ сего̀ ради разꙋмѣ́еши срд̑цемъ твои҆мъ ꙗ҆́ко кт̂о чл҃къ нака́жетъ сн҃ъ свои.

6

Тако г҃ь б҃ъ твои наказꙋетъ т̂ѧ. и҆ да снабди́ши за́повѣди г҃а б҃а твое҆го, ходи́ти во пꙋтѝ е҆го и҆ боа́тисѧ е҆го·

7

Гь҃ б̂о б҃ъ твой въведѐ т̂ѧ въ зе́млю бл҃гꙋю и҆ мно́гꙋ, и҆дѣже водоте́чи вод̑ны́ѧ і҆ и҆сто́чники глꙋбо́ки. и҆сходѧщеи по по́лемъ и҆ горам̑·

8

Въ зем̑лю пшени́цы и҆ ꙗ҆́чме́ни, виноград̑ и҆ смо́кви и҆ ши́пцы, въ зе́млю ма́сличїю и҆ е҆ле́ю и҆ ме́дꙋ. въ зе́млю на не́иже не с нището́ю и҆зъꙗ҆́си хлѣ́ба твое҆го. и҆ не про́сиши ничто́же на не́и. в꙽ землю в꙽ не́иже ка́менїе желѣз́но, и҆ ѿ горъ и҆хъ и҆сто́чит̑сѧ мѣдь·

9

И҆ ꙗ҆́си и҆ насыти́шисѧ и҆ блс̑҇ви́ши г҃а б҃а твое҆го, на землѝ бла́ѕѣи ю҆же е҆сть да́лъ тебѣ̀·

10

Во́ньми себѣ̀ не забꙋдѝ г҃а б҃а свое҆го, снабдѣти за́повѣди е҆го, и҆ сꙋдо́въ и҆ ѻ҆правле́нїи е҆го. е҆ли́ко а҆́зъ заповѣдаю тебѣ днс̑҇ь, да не когда̀ ꙗ҆дыи насыти́в꙽сѧ и҆ хра́мы добры съгради́въ, и҆ всели́всѧ в н̂ѧ, и҆ волы твоѝ и҆ ѻв̑҇цы твоѝ ѹ҆мно́жатсѧ тебѣ̀, и҆ сребро̀ и҆ зла́то ѹ҆мно́жит̑сѧ тебѣ̀. и҆ вс̂е е҆ли́ко т̂и е҆сть ѹ҆мно́жит꙽сѧ тебѣ·

11

И҆ посем̑ възнесе́шисѧ срд̑цем꙽ твоим̑ и҆ забꙋдеши г҃а б҃а твое҆го. и҆звед̑шаго т̂ѧ и҆з꙽ землѧ̀ е҆гѷпет̑ски ѿ до́мꙋ рабо́ты.

12

И҆ прове́дшаго т̂ѧ сквоѕѣ пꙋсты́ню вели́кꙋю, и҆ стра́шнꙋю ѻ҆́нꙋ. въ не́иж̑ ѕмїѧ̀ хапа́ющїѧ и҆ скорпїи, и҆ жажд̑а в не́иже не бѣѧ́ше воды̀, и҆же из̑ведѐ тебѣ̀ и҆с камы́ка несѣко́ма и҆сто́чник̑҇ водны́и·

13

И҆ пита́ѧи т̂ѧ ма́нною въ пꙋсты́ни. е҆гоже не вѣ́де т̂ы ниже вѣ́дѧхꙋ ѿц҃ы твои, да заѕли́тъ т̂и да и҆скꙋ́ситъ т̂ѧ и҆ бл҃го т̂и сътвори́тъ напослѣдокъ твои·

14

да не рече́ши въ срд̑цы твое҆мъ крѣ́пость моѧ и҆ си́ла рꙋки мое҆ѧ сътворѝ мн̂ѣ си́лꙋ вели́кꙋю сїю·

15

да помѧне́ши г҃а б҃а твое҆го. ꙗ҆́ко то́и дасть тебѣ крѣпость и҆ си́лꙋ твори́ти, и҆ да ѹ҆ста́витъ завт̑ѣ свои. и҆мже клѧ́сѧ ѿц҃емъ твои҆мъ до днесь·

16

И҆ бꙋдет̑ а҆ще ли забве́нїемъ забꙋдеши г҃а б҃а твое҆го, и҆ по́идеши въ слѣдъ бого́въ и҆ныхъ, и҆ послꙋж́иши и҆мъ и҆ поклони́шисѧ и҆мъ, засвѣдѣтельствꙋю вамъ днесь нб҃семъ и҆ земле́ю ꙗ҆́ко па́гꙋбою поги́бнете·

17

Ꙗ҆́коже и҆ про́чїи ꙗ҆́зы́цы, ꙗ҆́же г҃ь б҃ъ погꙋблѧ́етъ ѿ лица̀ ва́шего·

18

Та́коже поги́бнете и҆хже ради не послꙋшасте гла́са г҃а б҃а ва́шего·