Ostroh Bible❧Книга пророка Єзекіїля, розділ 3

1

И рече къ мн̂ѣ, сн҃е чл҃чь, снѣжд̑ь сви́токъ сїи, и҆дѝ и҆ рцы сн҃омъ і҆и҆л҃евымъ. и҆ ѿврьзохъ ѹ҆ста̀ своѧ, и҆ напита мѧ сви́тка сего. и҆ рече къ мн̂ѣ, сн҃е чл҃чь, ѹ҆ста̀ твоѧ снѣдѧтъ, и҆ чрево твое насы́тит̑сѧ сви́тка сего дан꙽наго тебѣ. и҆ снѣдохъ е҆го, и҆ бы́сть въ ѹ҆стѣхъ моихъ ꙗ҆́ко медъ сла́докъ·

2

И҆ рече къ мнѣ сн҃е чл҃чь, и҆ди вни́ди въ дом꙽ і҆и҆л҃евъ. и҆ гл҃и словеса̀ моѧ к нимъ, ꙗ҆́ко не к лю́демъ глꙋбокорѣчным̑ і҆ и́ноꙗ҆зы́чномъ. посыла́емъ е҆си к꙽ домꙋ і҆и҆л҃евꙋ. ниже к꙽ людемъ мно́гимъ глꙋбокорѣчнымъ і҆ и҆ноꙗзы́чномъ, ни тѧ́жкомъ ꙗ҆зы́комъ сꙋщемъ, и҆хже да не разꙋмѣ́еши словесъ. а҆ще къ та́цѣмъ посла́лъ т̂ѧ бы́хъ, т̂о и҆ тїи послꙋшали бы́ша тебе, а҆ дом̑ і҆и҆л҃евъ не въсхощетъ послꙋшати тебе. ꙗ҆́ко весь домъ і҆и҆л҃евъ непокори́въ е҆сть, и҆ жестоцы срд̑цы. и҆ с̂е да́хъ лице твое си́лно пред̑ лицемъ их̑, и҆ чело̀ твое крѣплѣи пред̑ чело́мъ их̑. и҆ бꙋдетъ всегда̀ твер꙽же камени, и҆ ꙗ҆́ко креме́нь дахъ чело̀ твоѐ. не ѹ҆бо́исѧ и҆хъ ни ѹ҆жаса́исѧ лица̀ и҆хъ, за неже домъ разгнѣва́ѧи е҆сть·

3

И҆ реч̑҇ къ мнѣ, сн҃е чл҃чь, всѧ словеса̀ ꙗ҆́же гл҃ахъ с тобо́ю, възмѝ въ срд̑це свое, и ѹшима свои́ма послꙋшаи. и҆ шед̑ вни́ди съ плѣн꙽ники къ сн҃омъ людїи сихъ, и҆ речеши к нимъ. та́ко гл҃етъ а҆дона́и г҃ь. а҆ще ѹ҆бо послꙋшаютъ, и҆ а́ще ѹ҆бо попꙋстѧтъ. в꙽зѧ́ мѧ дх҃ъ, и слы́шахъ гла́съ за собо́ю трꙋса вели́ка. и҆ блс̑҇вена слава гн҃ѧ ѿ мѣста е҆го, и҆ гласъ кры́лъ живо́тныхъ съкрылѧ́ющесѧ дрꙋгъ къ дрꙋгꙋ. и гласъ колес̑҇ дрьжа́щих̑сѧ живо́тныхъ, и҆ глас̑҇ трꙋса вели́ка. и҆ дх҃ъ въздви́же м̂ѧ и҆ взѧ́ мѧ. и пои҆дохъ възнесенъ въ ѹ҆стремле́нїи дх҃а свое҆го. и рꙋка̀ гн҃ѧ бысть на мнѣ ѹкрѣплѧ́ющи м̂ѧ. и внидо́хъ въ плѣн꙽ники възнесе́ны, и҆ ѻ҆быидохъ живꙋщаѧ на рѣцѣ̀ хова́рь. и҆ сѣдох̑ т̂ꙋ седмь дн҃їи, ходѧ посреди их̑·

4

И҆ бысть по седми дн҃їи слово гн҃е къ мнѣ гл҃ѧ. сн҃е чл҃чь стра́жа дах̑ тѧ домꙋ і҆и҆л҃евꙋ. да слы́шиши сло́во ѿ ѹ҆стенъ мои҆хъ, и҆ въспрети́ши им̑ ѿ мене. внегда гл҃ю безакон꙽никꙋ, смр҃тїю ѹ́мреши. и҆ не възвѣсти́ши е҆мꙋ ни съгл҃еши. ꙗ҆́ко ѻ҆ста́тис̑҇ безакон꙽никꙋ, и҆ ѻ҆брати́тисѧ ѿ пꙋти е҆го, ꙗ҆́коже живꙋ бы́ти е҆мꙋ. безакон꙽ник꙽ же то́и въ безако́нїи своем̑ ѹ́мретъ. кро́ви же е҆го ѿ рꙋки твое́а взыщꙋ·

5

И ты же а҆ще възвѣсти́ши безакон̑҇никꙋ, и҆ не ѻ҆братит̑сѧ ѿ безако́нїѧ свое҆го, и҆ ѿ пꙋти свое҆го безако́нна. то́и безакон꙽никъ въ безако́нїи свое҆мъ ѹ́мретъ, а҆ т̂ы дш҃ꙋ свою и҆зба́виши·

6

И҆ егда̀ съврати́тсѧ правдивыи ѿ правдъ свои҆хъ, и҆ сътворитъ съгрѣше́нїе. и҆ дамъ мꙋкꙋ пред̑ ним꙽, тои ѹ҆мрет̑, ꙗ҆́ко т̂ы ѻ҆ста́ви е҆го въ грѣсехъ свои ѹ҆мрѣти, занѐ не помѧнꙋтсѧ пра́вды е҆го ꙗ҆́же сътвори. кро́ви же е҆го ѿ рꙋки твое́ѧ взыщꙋ·

7

Ты́ же а҆ще възвѣсти́ши правди́вомꙋ, ꙗ҆́коже не съгрѣшити, и҆ то́и не съгрѣшитъ. правди́выи же жи́знїю ѻ҆живетъ, и҆ ты свою дш҃ꙋ и҆зба́виши·

8

И҆ бысть на мн̂ѣ рꙋка гн҃ѧ. и҆ рече къ мнѣ, въста́ни і҆ и҆зыиди на́ поле, и҆ т̂ꙋ съгл҃етсѧ к тебѣ. и҆ въста́хъ и҆зыидо́хъ на́ поле, и҆ с̂е т̂ꙋ сла́ва гн҃ѧ стоѧ́ше. ꙗ҆́коже виденїе, и҆ ꙗ҆коже слава е҆же ви́дѣхъ на рецѣ̀ хова́рѣ. и҆ падо́хъ на лицы свое҆мъ, и҆ прїиде на мѧ дх҃ъ, и҆ поста́ви мѧ на ногꙋ моею. и҆ гл҃а къ мн̂ѣ, и҆ рече м̂и. вни́ди и҆ затворисѧ средѣ домꙋ свое҆го·

9

Ты́ же сн҃е чл҃чь сѐ дадѧ́тсѧ на́ тѧ ѹ́зы и҆ свѧ́жꙋт꙽ т̂ѧ и́ми, и҆ не и҆зы́идеши ѿ среды их̑. и҆ ꙗ҆зы́къ твои привѧжꙋ̀ къ горта́ни твое҆мꙋ, и҆ ѻ҆нѣмѣ́еши. и҆ не бꙋдеши мꙋжъ ѻ҆бличе́нїѧ, поне̑ домъ разгнѣ́ваѧи е҆сть. и҆ внегда̀ гл҃ю тебѣ, ѿврьзꙋ ѹ҆ста̀ твоѧ. и҆ речеши к нимъ, с̂е гл҃етъ а҆дона́и г҃ь·

10

Слы́шаи да слы́шитъ, и҆ не покарѧ́ѧисѧ дасѧ поко́ритъ. занеж̑ домъ разгнѣваѧи е҆сть·