Ostroh BibleКнига Ездри, розділ 5
Шрифт:
Запис:
1
Прро̑҇кова́ша же, а҆г꙽ге́и про̑҇ркъ и҆ заха́рїѧ сн҃ъ ад̑дов꙽·
2
Прорица́ющи къ і҆ѹ҆де́ѻмъ иже бѧхꙋ въ і҆ѹ҆де́и і҆ и҆ерс̑҇лимѣ въ и҆мѧ б҃а і҆и҆л҃ева·
3
Тогд̑а воста́ша зороваве́ль сн҃ъ салафїилев̑҇, и҆ ѻ҆сꙋе сн҃ъ і҆ѻ҆седе́ковъ·
4
И҆ нача́ша зда́ти цр҃квь гн҃ю и҆же въ і҆ерс̑҇лі́мѣ и҆ с ни́ми про̑҇рцы бж҃їи помага́ющи им̑·
5
В то́ же вре́мѧ прїиде к ним̑ ѳаѳана́и иже бы́сть кнѧѕь за рѣко́ю, и҆ саѳа́рьвꙋзана́и и҆ совѣтницы и҆хъ·
6
Такоже гл҃а и҆мъ, кт̂о да́лъ вамъ совѣтъ. да до́мъ той съзи́ждете и҆ стѣ́ны е҆го въста́вите·
7
Тогда̀ сїѧ реко́ша и҆мъ, ꙗ҆́кова̀ и҆мена̀ мꙋжїи тѣхъ и҆же съзида́ютъ гра́дъ се́и·
8
И҆ ѻ́чи бж҃їи на плѣне́нїѧ і҆ѹ́дина, и҆ не възбрани́ша им̑ до повеле́нїѧ да́рїева, дондеже ѿне́сено бꙋдетъ посланїе·
9
И҆ тогда̀ посла̀ да́нино́сца, сего ра́ди и҆ възвѣще́нїѧ съ псанїемъ ꙗ҆́же посла̀ кн҃ѕь ѿ ѻ҆бо́нꙋ страны̀ рѣкѝ·
10
Сказа́нїеж̑ посла́нїѧ си́це·
11
Саѳарвꙋза́нъ и҆ совѣтницы е҆го а҆ѳарсаѳе́и, и҆же бѧ́хꙋ за рѣко́ю, да́рїю цр҃ю ми́ръ всѧ́къ·
12
Вѣдомо да бꙋдетъ цр҃ю ꙗ҆́ко ходи́хом̑ въ і҆ѹ҆де́искꙋю странꙋ̀ къ до́мꙋ бж҃їю вели́комꙋ и҆же съзида́етсѧ ка́менїем̑ ѹ҆краше́н꙽нымъ и҆ дре́во ста́витсѧ въ стѣна́хъ. дѣло же т̂о съ т꙽ща́нїемъ строитсѧ. и҆ поспѣша́етсѧ въ рꙋка́хъ и҆хъ. въспроси́хомъ б̂о ста́рецъ тѣхъ, и҆ та́ко рекохомъ и҆мъ·
13
Кт̂о да́лъ ва́мъ ѻ҆́бласть да до́мъ тои съзи́ждете, и҆ стѣны тїи въста́вите. н̂о і҆ и҆мена и҆хъ и҆ска́хомъ ѿ нихъ да възвѣсти́мъ тебѣ. ꙗ҆́ко да пи́шемъ и҆мена их̑ мꙋжемъ и҆же сꙋть нача́лницы в них̑.
14
И҆ си́цевы словеса̀ ѿвѣща́ша намъ гл҃ющи·
15
Мы̀ е҆сми рабѝ б҃а нб҃си и҆ землѝ. и҆ съзида́емъ цр҃ковь и҆же бы́сть ѹ҆стро́ена пре́жде тѣхъ лт̑ѣ мно́гихъ. и҆ цр҃ь і҆и҆л҃евъ вели́кїи създа́лъ ю҆̀ и҆ сътвори́лъ, и҆ разорѝ ю҆̀ и҆хъ ра́ди·
16
Поне́же въ ꙗ҆́рости прогнѣвахꙋ ѿц҃ы на́ши б҃а нбс̑҇наго и҆ преда́лъ ихъ в рꙋки нав꙽ходоносо́рꙋ цр҃ю вавѷло́ньскомꙋ и҆ халде́искомꙋ, и҆ дом̑ тои разори́лъ, и҆ лю́ди преве́лъ въ вавѷлонъ·
17
Но лѣта, а҃ го кѷра цр҃ѧ. кѷръ цр҃ь вавѷло́ньскїи поста́вилъ повеле́нїе, да до́мъ бж҃їи съзи́ждетсѧ. и҆ сосꙋды цр҃кви бж҃їѧ зла́тыѧ и҆ сре́бреныѧ и҆хже навходоносо́ръ взѧ́лъ ѿ цр҃кви и҆же бы́сть въ і҆ерс̑҇лимѣ. и҆ ѿнеслъ ѧ҆̀ въ цр҃ковь вавѷло́ньскꙋю. в꙽зѧ́лъ кѷръ цр҃ь ѿ цр҃кви вавѷло́ньскїѧ и҆ да̀ и҆хъ санаваса́рꙋ храни́телю, и҆же над̑ сокро́вищем̑ рече же е҆мꙋ сїи сосꙋди вс̂и възмѝ и҆ поидѝ. и҆ поста́ви и҆хъ въ цр҃кви и҆же е҆сть въ і҆ерс̑҇лимѣ въ мѣсте и҆хъ·
18
Тогда саванаса́ръ тои прїиде, и҆ поста́вилъ ѻ҆снованїе цр҃кви бж҃їи въ і҆ерс̑҇лимѣ. и҆ ѿ того вре́мени даже и҆ до нн҃ѣ съзидает̑сѧ, и҆ нѝ е҆щѐ съвръше́на е҆сть. и҆ нн҃ѣ зи́ждетсѧ и҆ не совръши́сѧ·
19
И҆ нн҃ѣ ѹ҆бо а҆ще ви́дит̑сѧ цр҃ю бл҃го. раз꙽смотрѝ въ книгохрани́телницы цр҃евѣ, и҆же е҆сть въ вавѷло́нѣ ꙗ҆́ко да ѹ҆вѣси ꙗ҆́ко ѿ кѷра цр҃ѧ сѝ повелѣно бы́сть да съзида́е҆тсѧ до́мъ бж҃їи въ і҆ерс̑҇лимѣ. и҆ ѹ҆вѣдѣвъ цр҃ю ѻ҆ семъ послѝ к намъ·
Джерела
