Ostroh Bible❧Перша книга Мойсеєва: Буття, розділ 25

1

И приложи́вше а҆враа́м꙽. поѧ̀ женꙋ е́йже и́мѧ хет꙽тꙋра, и҆ роди́ же е҆мꙋ земъврама, е҆ктана, и҆ мадана, и҆ мадїама, и҆ е҆во́ка, и҆ сое́на·

2

Некта́нъ же родѝ сава́на, и҆ ѳема́на, и҆ деда́на·

3

Сн҃ове же деда́ни быша, рагꙋилъ, и҆ навде́илъ, и҆ а҆сꙋри́м꙽, и҆ латꙋрїимъ, и҆ лоѻ҆ми́мъ, сн҃ве же ма́дїамли, е҆фа́ръ, и҆ а҆фи́ръ, и҆ е҆но́хъ, и҆ а҆ви́да, и҆ е҆льдага, сі́й же бѣша сн҃ве хеттꙋ́рины·

4

Дасть же а҆враа́мъ вс̂е своѐ и҆мѣ́нїе і҆саа́кꙋ сн҃ꙋ свое҆мꙋ, сн҃омъ же зало́жниць своих̑ дасть а҆враа́мъ да́ры, и҆ ѿпꙋсти ѧ҆̀ ѿ і҆саа́ка сн҃а свое҆го, е҆щѐ жи́въ сы́й, до землѝ въсто́чныѧ, си̂ же дн҃и и҆ лѣта а҆враа́млѧ, е҆ли́ко жи́тъ, лт̑ѣ, р҃, о҃, е҃, и҆ скончавъ ѹ҆́мре а҆враа́мъ въ ста́рости до́брѣи, ста́рець и҆спо́лненъ дн҃и, и҆ приложи́сѧ къ лю́демъ своимъ·

5

И҆ погребо́ша е҆го і҆саа́къ і҆ и҆змаилъ два сн҃ве е҆го, в пеще́рѣ, сꙋгꙋбѣи, на селѣ̀ е҆фро́новѣ сн҃а саа́рова хетѳе́анина, е҆же е҆сть прѧ́мо мам꙽врїи·

6

Село, и҆ пещерꙋ, ю҆́же притѧжа̀, а҆враам̑ ѿ сн҃овъ хетѳе́ѻ҆въ, т̂ꙋ погребо́ша а҆враа́ма и҆ женꙋ̀ е҆го са́ррꙋ·

7

Бысть же по ѹ҆мр҃твїи а҆враа́мли, блгс̑҇ви б҃ъ і҆саа́ка сн҃а е҆го, и҆ ѹ҆сели́сѧ і҆саа́къ ѹ҆ кладѧзѧ видѣ́ннаго·

8

Си̂ же бытїа и҆змаила сн҃а а҆враа́млѧ, е҆гож̑ родѝ а҆гарь раба са́ррина а҆враа́мꙋ·

9

Си̂ и҆мена сн҃овъ и҆зма́илевъ по и҆менѝ и҆хъ, и҆ в ро́дѣхъ и҆хъ первене́ць и҆змаилевъ, наваѻ҆́фъ, кыда́ръ, и҆ навдеи́лъ, маса́нъ, масма́и, и҆дꙋма, и҆ масѝ, и҆ ходан̑҇, ѳема́нъ, и҆ е҆тꙋръ, и҆ нафесъ, и҆ ке́дма·

10

Си сꙋт́ь сн҃ове и҆зма́или, и҆ с̂и и҆мена и҆хъ в домѣ́хъ и҆хъ. и҆ въ се́лѣхъ их̑, в҃і, кн҃зѧ, въ ꙗ҆́зы́цѣхъ и҆хъ·

11

Лѣт́а же с̂и житїѧ и҆змаилѧ, лѣтъ, р҃, л҃з, кончавъ ѹ҆мре, и҆ приложи́сѧ къ рожденїю свое҆мꙋ·

12

Въсели́ же сѧ ѿ е҆ѹ҆лата, до сѷра, и҆́же е҆сть ли́цъ е҆гѷптꙋ, даже доходѧ́ще сѷрїи, пред̑ лицем̑ братїѧ своеѧ ѹ҆сели́сѧ·

13

Сі́и же бытїѧ̀ і҆саа́кова сн҃а а҆враа́млѧ, а҆враа́мъ роди и҆саа́ка, бѧ́ше і҆саа́къ, м҃, лт̑ѣ е҆гда̀ поѧ̀ реве́кꙋ, дще́рь ваѳꙋи́левꙋ, сѷрина въ женꙋ̀ себѣ·

14

Молѧ́ше же сѧ і҆саа́къ реве́кы ради жены̀ свое҆ѧ, ꙗ҆́ко непло́ды бѧше·

15

Послꙋш́а же е҆го б҃ъ, зачатъ въ ѹ҆тро́бѣ реве́ка жена е҆го·

16

И҆гра́ста же младе́нца въ не́й, и҆ рече а҆ще хо́щетъ си́це быти, т̂о что̀ се ми е҆сть·

17

І҆ и҆де въпрашати г҃а, и҆ рече е́й г҃ь, дв̂а ꙗ҆зы́ка въ ѹ҆тро́бѣ твое́й е҆ста, и҆ дво́и лю́дїе, ѿ ѹ҆тро́бы твое́ѧ, разлꙋ́чатсѧ, и҆ лю́дїе лю́дїи прд̑ѣспѣ́ютъ, и҆ старѣ́ишїи да порабо́таетъ ме́ньшемꙋ·

18

И҆ кончашасѧ дн҃їе родити е́й, сі́и бѣста близнѧ́та, въ ѹ҆тро́бѣ е́й·

19

И҆зы́де же сн҃ъ первене́цъ чръменъ ве́сь, и҆ ꙗ҆́ко ко́жа косматъ, и҆ нарече и҆мѧ е҆мꙋ и҆савъ·

20

И҆ по се́мъ и҆зы́де братъ е҆го рꙋка же е҆го придержасѧ пѧтѣ и҆савовѣ, и҆ нарече и҆мѧ е҆мꙋ і҆а́ковъ·

21

И҆саа́къ же и҆мѧ́ше, ѯ҃, лѣтъ, е҆гда роди е҆мꙋ реве́ка, и҆ възрасто́ста ю҆́нотѣ·

22

И҆ бысть і҆савъ мꙋ́жь лове́ць и҆ ѻ҆рачь, і҆а́ко́въ же бысть мꙋж́ь нелꙋкавъ живы́и въ домꙋ̀·

23

И҆ възлюбѝ і҆саа́къ и҆са́ва, ꙗ҆ко лови́тва е҆го бѧше бра́шно е҆го, реве́ка же люблѧ́ше і҆а́кова·

24

звари́ же себѣ і҆а́ковъ варе́нїе. и҆ прїиде же і҆савъ с по́лѧ, ѹ҆трꙋди́в꙽сѧ, и҆ рече къ і҆а́ковꙋ напита́и мѧ, варе́нїа сего̀, ꙗ҆́ко да ꙋкрѣплю́сѧ, сего ра́ди прозва̀ и҆мѧ е҆мꙋ е҆до́м꙽. и҆ рече і҆а҆ковъ і҆саавꙋ. ѿда́и же днс̑҇е пръвенъство свое мн̂ѣ·

25

Рече же і҆са́в꙽ с̂е а҆́зъ и҆дꙋ̀ ѹ҆мрѣти, въскꙋю́ ми первенъство с̂е, и҆ рече і҆а́ковъ е҆мꙋ клени́ ми сѧ днс̑҇ь, и҆ клѧ́сѧ е҆мꙋ·

26

И҆ ѿда́сть і҆савъ, і҆а́ковꙋ первенъство свое·

27

І҆а́ков же да́сть і҆са́вꙋ хлѣбъ, и҆ варенїе соче́вно, ꙗ҆́сть же и҆ пи́тъ, и҆ въставъ ѻ҆ты́де, и҆ нивъчтоже вомени себ́ѣ, і҆савъ перве́ньство·