Ostroh Bible❧Перша книга Мойсеєва: Буття, розділ 31

1

Слы́шав же і҆а́ковъ рѣ́чь сн҃въ лава́новъ гл҃ющихъ, вз̂ѧ і҆а́ковъ вс̂е ѿц҃а нашего, и҆ ѿц҃емъ на́шим̑, сътворѝ себѣ вс̂ю сла́вꙋ свою̀·

2

И҆ ѹ҆зрѣ і҆а́ковъ лицѐ ла́ване, и҆ с̂е не бѧ́ше къ немꙋ̀, ꙗ҆ко вчера̀ и҆ тре́тїемъ дн҃и·

3

Рече́ же г҃ь къ і҆а́ковꙋ, възврати́сѧ въ зе́млю ѿц҃а твое҆го в род̑ тво́и и҆ бꙋ́дꙋ с тобо́ю·

4

Посла́ же і҆а́ковъ и҆ възва̀ ли́ю и҆ рахи́ль на́ поле, и҆дѣже стада бѧ́хꙋ, и҆ рече и҆́ма ви́ждꙋ а҆́зъ лицѐ ѿц҃а ва́шего, ꙗ҆́ко нс̑҇ѣ къ мн̂ѣ, ꙗ҆́ко вчера̀ и҆ тре́тїемъ дн҃и·

5

Се́ же б҃ъ ѿц҃а мое҆го съ мно́ю е҆сть, и҆ в̂ы вѣсте ꙗ҆́ко все́ю си́лою рабо́тахъ ѿц҃ꙋ ва́шемꙋ. ѿц҃ъ же ва́шъ ѻ҆би́ди мѧ, и҆змѣни б̂о мъздꙋ̀ мою̀ де́сѧть а҆́гнец̑҇ н̂о не да́сть е҆мꙋ б҃ъ ѿц҃а мое҆го зл̂а сътвори́ти мнѣ̀·

6

А҆́ще ѹ҆бо тако речет̑ пе́стрыѧ̀ да бꙋдет̑ твоѧ̀ мзда̀ родѧт̑ всѧ ѻ҆вца̀ пе́стра·

7

А҆́ще ли речетъ та́ко бѣ́лыѧ да бꙋ́деть т̂и мзда̀. родѧт̑ вс̂ѧ ѻ҆вца̀ бѣ́ло ѿꙗ҆́ б҃ъ весь ско́т꙽ ѿц҃а ва́шего, и҆ да́стъ мн̂ѣ е҆го·

8

И҆ быс̑҇ е҆гда̀ ѻ҆́вца зачина́ющи въ́ чревѣ, ви́дѣхъ въ снѣ ѻ҆чи́ма свои́ма с̂е ко́зли гонѧ́хꙋ ѻ҆вца̀ и҆ ко́зы бѣ́лы и҆ пе́стры и҆ разли́чны во́лны·

9

И҆ рече ми а҆́гг҃лъ бж҃їи въ снѣ̀, і҆а́кове а҆́з же рѣхъ чт̂о е҆сть·

10

И҆ рече въ́зри ѻ҆чима твои́ма и҆ ви́ждь. ко́злы гонѧща ѻ҆вца̀ и҆ коз̑лы бѣ́лыѧ и҆ пе́стрыѧ̀, и҆ вс̂ѣ разно́лич꙽ны, ви́дѣхъ б̂о коли́ко ти лава́нъ сътворѝ·

11

А҆́зъ б̂о е҆смь б҃ъ тво́и ꙗ҆́ви́выисѧ тебѣ на мѣстѣ бж҃їи, е҆же пома́за ти м̂и тамо столпъ, и҆ моли́сѧ мн̂ѣ тамо мл҃твою̀·

12

И҆ нн҃ѣ ѹ҆бо въста́ни. і҆ и҆зы́ди ѿ землѧ̀ се́ѧ, і҆ и҆дѝ в зе́млю рожде́нїа твое҆го, и҆ бꙋдꙋ с то́бою·

13

И҆ ѿвѣща́вши рахи́ль и҆ ли́ѧ реко́ста е҆мꙋ. нс̑҇ѣ ли нама еще ча́сти ни прїа́тїѧ въ домꙋ̀ ѿц҃а нашего ꙗ҆́ко чꙋж́ди быхомъ е҆мꙋ·

14

Прода бо н̂ы и҆ ꙗ҆́де́нїемъ снѣ́сть цѣнꙋ нашꙋ. вс̂е богат̑ство и҆ сла́вꙋ ю҆же ѿꙗ҆́тъ б҃ъ ѿ ѻ҆ц҃а на́шего на́ма бꙋ́детъ и҆ чадом꙽ нашим̑, нн҃ѣ ѹ҆бо е҆ли́ко ти гл҃а б҃ъ твори́ ти·

15

Въста́в же і҆а́ковъ поѧ̀ жены свои и҆ дѣти своа всадѝ ѻ҆бѣ на вел̑҇блю́ды, и҆ забра̀ вс̂е и҆мѣ́нїе сво́е, и҆ вс̂ѧ и҆мѣ́нїа ꙗ҆же притѧжа̀ въ междорѣчїи, и҆ вс̂е своѐ ꙗ҆́коже ѿитѝ къ і҆саа́кꙋ ѿц҃ꙋ свое҆мꙋ, въ зе́млю ханаан̑҇скꙋю·

16

лава́нь же ѿи҆де стрещѝ ѻ҆ве́цъ своих̑, и҆ ѹ҆кра́де рахи́ль и҆долы ѿц҃а свое҆го, і҆а́ков꙽ же потаѝ лава́нꙋ сѷринꙋ, не повѣ́дати е҆мꙋ ꙗ҆́ко ѿхо́дитъ·

17

ѿи́де же і҆а́ковъ съ всѣмъ своим̑, и҆ пре́иде рѣкꙋ̀, и҆ възы́иде на горꙋ̀ галаа́дъ. и҆ повѣ́даша лава́нꙋ сѷринꙋ. тре́тїи дн҃ь ꙗ҆́ко побѣже і҆а́ковъ, и҆ поѧ вс̂ю бра́тїю свою̀ съ собо́ю. гна же въ слд̑ѣ пꙋтѝ е҆го се́дмь дн҃їи. и҆ ѻбы́иде е҆го на горѣ галаад̑·

18

Прїиде же а҆́гг҃лъ къ лава́нꙋ сѷринꙋ нощїю въ снѣ, и҆ рече е҆мꙋ сънабди́сѧ самъ, да не възгл҃еши е҆мꙋ зл̂ѣ·

19

И҆ пости́же лава́нъ і҆а́кова, і҆а́ковъ же потъкнꙋ̀ кꙋщꙋ свою въ горѣ̀. лава́н же раста́ви братїю свою̀ въ горѣ̀ галаа́дъ·

20

Рече же лава́нъ къ і҆а҆ковꙋ. чт̂о сѐ сътворѝ, въскꙋ́ю ѡти́де и҆ ѻ҆кра́де мѧ и҆ ѿведѐ дще́ри моѧ̀ ꙗ҆́ко плѣ́нъниць ѻ҆рꙋ́жїемъ. н̂о а҆́ще бы ми повѣдал̑҇ ѿпꙋсти́лъ т̂ѧ быхъ съ весе́лїе҆мъ, съ тимпаны и҆ гꙋ́сльми. не бы́хъ лї а подо́бенъ цѣлова́ти дѣти, н̂и дще́рїю моею̀·

21

Нн҃ѣ же несмы́сльнѣ сътворѝ, нн҃ѣ б̂о рꙋка моѧ̀ мо́жетъ вреди́ти т̂ѧ. н̂о б҃ъ ѿц҃а твое҆го вчера̀ рече къ мн̂ѣ гл҃ѧ съхрани́сѧ самъ, е҆гда́ възгл҃еши къ і҆а́ковꙋ зл̂ѣ·

22

Нн҃ѣ ѹ҆бо и҆дѝ, помышле́нїемъ б̂о помы́сли ѿи҆ти́ въ до́м꙽ ѿц҃а твое҆го, въскꙋ́ю же ѹ҆кра́де бо́гы моѧ̀. ѿвѣщав̑҇ же і҆а́ковъ рече къ лава́нꙋ, рх̑ѣ б̂о да не ѿи҆меши дще́ри своѧ̀ ѿ менѐ, и҆ вс̂ѧ моѧ̀·

23

И҆ рече і҆а́ковъ ѹ҆ негоже а҆́ще ѻ҆брѧ́щеши бо́ги твоѧ̀, да не бꙋ́детъ т̂и живъ пред̑ бра́тїею на́шею̀. сеже моѐ вс̂е и҆щѝ и҆ познава́и, и҆ чт̂о е҆сть твое҆го ѹ҆ менѐ възмѝ. и҆ не позна ѹ҆ него ничто́же, не вѣ́дѣ бо і҆а́ковъ ꙗ҆ко рахи́ль жена е҆го ѹ҆краде ѧ҆̀·

24

Вни́де же лава́нъ въ кꙋщ́ꙋ лі́инꙋ и҆зыска̀ и҆мѣнїе еѧ̀, и҆ не ѻ҆брѣте. и҆зъше́дъ же ѿ кꙋщи ли́ины, и҆зыска̀ кꙋщꙋ і҆а́ковлю. и҆ кꙋщ́ꙋ ѻ҆бою̀ рабы́ню и҆ не ѻ҆брѣте·

25

Прїиде же въ кꙋщ́ꙋ рахи́линꙋ, рахи́ль же възе́мши и҆́долы, и҆ под̑ложї ѐ под̑ сѣдло вельбꙋ́же, и҆ сѣ́де връхꙋ их̑·

26

Рече ѿц҃ꙋ свое҆мꙋ не и҆мѣ́и с̂и тѧ́жка гдс̑҇не не могꙋ̀ б̂о въста́ти пред̑ тобо́ю ꙗ҆́ко ве́щъ же́ньска ми е҆сть. и҆ска же лава́нъ въ все́и кꙋщи и҆ не ѻ҆брѣте и҆́долъ·

27

Разгнѣва же сѧ і҆а́ков̑҇. и҆ сварѝ лава́нꙋ·

28

И҆ ѿвѣща́в же і҆а́ковъ рече лава́нꙋ, чт̂о ли пра́вда моѧ, чт̂о ли грх̑ѣ моѝ, ꙗ҆ко жене́ши въ слд̑ѣ менѐ, и҆ ꙗ҆́ко и҆зыска̀ вс̂ѧ съсꙋ́ды моѧ̀. чт̂о ѻ҆брѣте ѿ всего̀ съсꙋда до́мꙋ твое҆го·

29

Положѝ здѣ пред̑ бра́тїею̀ твоею̀, и҆ бра́тїею моею̀, и҆ да разъсꙋ́дѧтъ междꙋ ѻ҆бѣма нама с̂е, к҃, лѣтъ а҆зъ е҆смь с тобо́ю ѻ҆вца твоѧ̀ и҆ ко́зы твоа̀ не бы́ша бес плода̀. ѻ҆ве́нъ твоих̑ ста́дъ нѣсмь и҆зъѧ́лъ, звѣроꙗ҆́дины не принесохъ к тебѣ·

30

А҆́зъ напол̑҇нихъ т̂и татьбины́ дн҃ьныѧ̀ и҆ нощъныѧ, быхъ дн҃ью̀ жего́мъ зно́емъ, а҆ стꙋденїю в нощѝ, и҆ ѿхожа́ше сон̑҇ ѿ ѻ҆чїю моею̀·

31

Си мн̂ѣ, к҃. лѣтъ, а҆́зъ бѣхъ въ домꙋ твое҆мъ рабо́тах̑ т̂и, д҃і, лѣтъ, двою̀ ради дще́рїю твоею. и҆ ѕ҃, лѣтъ за ѻ҆вца твоѝ, и҆ преѻ҆бѝдѣ мздꙋ̀ мою, і҃, а҆́гнецъ. а҆́ще не бы̀ б҃ъ ѿц҃а мое҆го а҆враа́ма и҆ страхъ і҆саа́ковъ не бысть мн̂ѣ, нн҃ѣ ѹ҆бо тща бы м̂ѧ ѿпꙋсти́лъ, на смире́нїе мое и҆ трꙋдъ рꙋ́кꙋ моею̀ ѹ҆ви́дѣвъ б҃ъ, и҆ наказа м̂ѧ вчера̀·

32

ѿвѣща́в же лава́нъ рече къ і҆а́ковꙋ, дщери дще́ри моѝ, и҆ сн҃ове. сн҃ове моѝ, скотъ, скотъ мои, и҆ вс̂е е҆ли́ко ви́диши моѐ е҆сть, и҆ дщерїю моих̑ чт̂о сътворю̀ и҆́ма днс̑҇ь и҆ чадомъ еа̀, ꙗ҆́же роди́ста·

33

Нн҃ѣ ѹ҆бо ходѝ, и҆ завѣща́и завѣтъ а҆зъ и҆ т̂ы. и҆ бꙋ́дет̑ в꙽ послꙋша́нїе междꙋ мно́ю и҆ тобо́ю·

34

И҆ рече е҆мꙋ с̂е нѣсть с нами никого́же, ви́дѣ б҃ъ и҆ по́слꙋхъ е҆сть междꙋ мно́ю и҆ тобо́ю·

35

И҆ възе́м же камень і҆а́ковъ поствї и҆̀ въ стол́пъ, рече же і҆а́ков꙽ бра́тїи свое́и, събери́те ка́менїе, и҆ събра́ша каменїе и҆ сътвори́ша моги́лꙋ, и҆ ꙗ҆до́ша же т̂ꙋ ѹ҆ моги́лы·

36

Реч̑҇ же е҆мꙋ лаван̑҇ моги́ла с̂и послх̑ꙋ междꙋ мно́ю и҆ тобо́ю днс̑҇ь, и҆ прозва̀ лаван̑҇ моги́ла послꙋш́наѧ̀, і҆а́ков̑҇ же прозва могила послх̑ꙋ·

37

Рече же лава́нъ къ і҆а́ковꙋ, моги́ла с̂и и҆ стол́пъ, и҆же поста́вилъ е҆си междѝ мною и҆ тобо́ю, по́слꙋхъ е҆сть моги́ла с̂и, и҆ по́слꙋх, и҆ сто́лпъ с̂и по́слꙋхъ·

38

Сего ради прозва̀ моги́ла послꙋшнаѧ, и҆ видѣ́нїе е҆же рече да ви́дѣ б҃ъ межди мно́ю и҆ тобо́ю·

39

А҆́ще ѿвр́ъжевѣсѧ дрꙋгъ ѿ д́рꙋга, и҆ а́ще съменшѝ дще́ри моѝ, и҆ пои́меши жоны̀ надъ дще́ри мои, ви́ждь нѣсть никогоже с нама, ви́ди б҃ъ и҆ по́слꙋхъ е҆сть междꙋ мно́ю и҆ тобо́ю·

40

И҆ рече лава́нъ і҆а́ковꙋ с̂е моги́ла по́слꙋхъ и҆ сто́лпъ с̂и, а҆́ще ѹ҆бо а҆́зъ не минꙋ к тебѣ, т̂о и҆ ты̀ не минѝ къ мн̂ѣ могилы сеѧ̀, и҆ стлъпа̀ съ зло́бою, б҃ъ а҆враа́мль б҃ъ нахо́ров꙽ сꙋдѝ междꙋ на́ма, и҆ клѧ́сѧ і҆аковъ по боѧ́зни ѿц҃а свое҆го і҆саа́ка·

41

И҆ сътворѝ требꙋ і҆а́ковъ на горѣ̀. и възва бра́тїю свою ꙗ҆до́ша же и҆ пиша. и҆ спа́ша на горѣ·

42

Въста́в же лаван̑҇ заѹ҆тра, цѣлова̀ сн҃ы своѧ̀ и҆ дще́ри своѧ̀ и҆ блс̑҇вї ѧ, и҆ възвратисѧ лава́н꙽ ѿи́де на мѣсто свое·