Ostroh Bible❧Перша книга Мойсеєва: Буття, розділ 32

1

Иа́ковъ и҆де на сво́и пꙋть, възрѣвъ и҆ ви́дѣ полкы бж҃їѧ вополъчи́шасѧ, и҆ срѣто́ша а҆гг҃ли бж҃їи·

2

Рече же і҆а́ков꙽ е҆гда и҆̀ видѣ плък꙽ бж҃їи с̂и, и҆ прозва̀ и҆мѧ мѣстꙋ томꙋ по́лкы·

3

Посла́ же і҆а́ковъ послы̀ пред̑ собо́ю, къ і҆са́вꙋ бра́тꙋ свое҆мꙋ въ зе́млю си́ръ, въ село̀ е҆до́мъ, и҆ заповѣ́да им̑ гл҃ѧ·

4

Тако рецѣте гдс̑҇нꙋ мое҆мꙋ і҆са́вꙋ, тако гл҃етъ ра́бъ твои і҆а́ковъ, ѹ҆ лава́на ѻ҆битахъ и҆ ѹ҆мед̑лѣхъ досе́лѣ. быша м̂и воло́ве и҆ ѻ҆слы̀. і҆ ѻ҆вца рабы̀ и҆ рабы́нѧ, и҆ послах̑ повѣ́дати гдс̑҇нꙋ мое҆мꙋ і҆савꙋ, даб̂ы ѻ҆брѣ́лъ рабъ твои блгд̑ть предъ тобо́ю·

5

И҆ въз꙽врати́шасѧ послы̀ къ і҆а́ковꙋ гл҃ще, ходихомъ къ братꙋ твое҆мꙋ і҆савꙋ. и҆ самъ и҆детъ противꙋ тебѣ, и҆ у҃ мꙋжъ с нимъ·

6

Ѹ҆боѧ́ же сѧ і҆а́ковъ ѕѣло, и҆ въ недоѹ҆мїи бысть, и҆ разлꙋчѝ че́лѧдь свою говѧ́да ѻ҆вцы, и҆ вельблю́ды на дв̂а плъка·

7

И҆ рече і҆а́ковъ а҆ще прїидетъ і҆са́въ на е҆ді́н꙽ по́лкъ, і҆ и҆съсѣчетъ и҆̀. бꙋ́детъ вторыи по́лкъ въ спс̑҇нїи҆̀·

8

Рече же і҆а́ковъ б҃ъ ѿц҃а мое҆го а҆враа́ма, и҆ б҃ъ ѿц҃а мое҆го і҆саа́ка и҆ г҃и бж҃е е҆же гл҃авыи мн̂ѣ, и҆дѝ въ зе́млю рожде́нїѧ твое҆го и҆ бл҃га т̂ѧ сътворю, довлѣе҆тъ ми ѿ всеѧ́ правды̀, и҆ ѿ всеѧ̀ и҆стины, ю҆́же сътворѝ рабꙋ свое҆мꙋ.

9

Съ жезлом̑ бо симъ преи҆дохъ і҆ѻ҆рданъ сїй, нн҃ѣ же бѣхъ въ дв̂а по́лка, и҆зба́ви мѧ ѿ рꙋкꙋ брата мое҆го і҆са́ва ꙗ҆́ко бою́сѧ е҆го, е҆гда пришедъ ѹ҆бие҆тъ м̂ѧ, и҆ мт҃ри с чады·

10

А҆ т̂ы рече до́брѣ бл҃га тѧ сътворю̀, и҆ поставлю сѣмѧ твоѐ ꙗ҆ко пѣсо́къ морскїи и҆же сѧ не и҆зо́чтетъ ѿ мно́жества.

11

И҆ спа т̂ꙋ тоѝ нощи, и҆ вз̂ѧ даръ ѿ него́же и҆мый в рꙋцѣ сво́и, и҆ посла і҆савꙋ братꙋ свое҆мꙋ, ко́зъ, с҃, и҆ ко́зловъ, к҃, ѻ҆ве́цъ, с҃, и҆ ѻ҆венъ, к҃, вельблю́довъ дойныхъ со жребѧты и҆хъ, л҃, воло́въ, м҃. бы́къ, і҃ и҆ ѻ҆слицъ, к҃, жребе́цъ и҆хъ, і҃, и҆ и҆ дасть и҆̀ в рꙋцѣ рабо́мъ свои҆мъ кое҆ждо стадо кромѣ·

12

И҆ рече рабо́мъ свои҆мъ и҆дѣте предо мно́ю и҆ межда сътвори́те междꙋ̀ ста́домъ, и҆ стадомъ·

13

И҆ запо́вѣда старѣ́ишемꙋ гл҃ѧ, а҆ще ли т̂ѧ братъ мо́и срѧ́щетъ, и҆ а҆ще въпрошает̑ т̂ѧ гл҃ѧ. чи́и е҆си, и҆л̂и камо и́деши, и҆ чїѐ с̂е и҆же предъ тобо́ю и҆детъ, рцы е҆мꙋ раба̀ твое҆го і҆а́кова да́ръ, посла̀ гдс̑҇нꙋ свое҆мꙋ і҆са́вꙋ, и҆ с̂е самъ за нами и҆детъ·

14

И҆ заповѣ́да пр́ъвомꙋ второ́мꙋ и҆ тре́тїемꙋ и҆ всѣмъ пред꙽и҆дꙋщимъ и҆ заднимъ.

15

И҆ рече по семꙋ̀ словесѝ гл҃ете і҆савꙋ, е҆гда дости́жет̑ в̂ы гл҃ите, се̂ рабъ твои і҆а́ковъ и҆детъ за на́ми, вѣща ѹ҆бо ѹ҆крощꙋ̀ лице е҆го, да́ромъ мои҆мъ, пред̑и҆дꙋщим̑ е҆го и҆ по сем̑ ѹ҆зрю лице е҆го и҆ да прїиметъ лице моѐ лице е҆го·

16

И҆ пред̑и҆дѧ́ше даръ пред̑ ни́мъ са́м же лежа тоѝ нощи въ полцѣ·

17

Въста́в же то́ѝ нощи поѧ̀ ѻ҆б̂ѣ женѣ своѝ. и҆ ѻ҆б̂ѣ рабы́ни. и҆ ѻ҆ а҃і, сн҃въ свои҆хъ, и҆ преи́де бро́дъ ѧ҆во́ѳъ, и҆ пои́мъ ѧ҆̀ минꙋ̀ водоте́чь, и҆ преведѐ вс̂е своѐ·

18

ѻ҆ста же і҆а́ковъ е҆ді́нъ, и҆ борѧ́шесѧ с ним̑ мꙋжъ до ѹ҆трїѧ·

19

Ви́дѣв же ꙗ҆́ко не мо́жетъ противꙋ е҆мꙋ, и҆ принѧ́сѧ въ стъгна е҆го. и҆ ѹ҆те́рпе пресѣча стъгна і҆а́ковлѧ̀, е҆гда̀ борѧ́шесѧ с нимъ·

20

Рече же е҆мꙋ пꙋстѝ м̂ѧ възы́де б̂о свѣтъ, се́й же рече не пꙋщꙋ̀ тебе, а҆́ще не блс̑҇ви́ши мене. и҆ рече е҆мꙋ ка́ко ти и҆́мѧ е҆сть, се́й же рече і҆а́ковъ·

21

Рече же е҆мꙋ николи́же не прозове́тсѧ и҆́мѧ твоѐ і҆а́ковъ, н̂о і҆ил҃ь бꙋ́детъ и҆́мѧ твоѐ, понеже ѹ҆крѣпи́сѧ съ бг҃омъ, и҆ съ чл҃кы же си́ленъ бꙋ́деши·

22

Въпроша́ше же і҆а́ковъ и҆ рече, повѣ́ждь ми и҆́мѧ твоѐ, и҆ реч̑҇ въскꙋ́ю въпраша́еши и҆́мени мое҆го. чю́дно б̂о е҆сть·

23

И҆ блс̑҇ви е҆го т̂ꙋ, и҆ прозва і҆а́ковъ и҆́мѧ мѣстꙋ томꙋ̀ ѻ҆бразъ бж҃їи·

24

Ви́дѣхъ б̂о б҃а лицем̑ къ лицꙋ̀, и҆ сп҃се́ ми сѧ дш҃а моа̀. и҆ възы́иде сл҃нце е҆гда̀ ѿи́де ѻ҆́браз̑ бж҃їи·

25

Се́й же похрама стъгномъ свои҆мъ сего̀ ради не и҆́мꙋть ꙗ҆сти сн҃ве і҆и҃левы жилы, ꙗ҆́коже ѹ҆тръпѣ̀ въ пресѣченїи҆̀ стъгна е҆го и҆ до дн҃ешнего дн҃и, того̀ ради и҆же пресѣче́ны жилы стегна е҆го, и҆ ѹ҆терпѣ·