Ostroh Bible❧Перша книга Мойсеєва: Буття, розділ 33

1

И възрѣвъ і҆а́ковъ, ви́дѣ и҆ с̂е і҆са́въ братъ е҆го и҆ды́и и҆ у҃, мꙋжъ съ нимъ·

2

И҆ разлꙋчѝ і҆а́ковъ дѣти, ли́и и҆ рахи́ль и҆ дв̂ꙋ рабы́нь, и҆ поста́ви ѻ҆б̂ѣ рабы́ни и҆ сн҃ы ею̀ въ пр́ъвыѧ̀·

3

Лию́ же и҆ дѣти еѧ̀ пони́же, рахи́ль же і҆ и҆ѻ́сифа съзадѝ. сам же и҆зыде пр́ъвѣе пред̑ ни́ми и҆ поклони́сѧ до землѧ̀ седмижды, до́ндеже приближи́сѧ къ бра́тꙋ свое҆мꙋ·

4

И҆ прїиде і҆са́въ въскорѣ проти́вꙋ е҆мꙋ, и҆ ѻ҆бъи҆мъ цѣлова́ и, и҆ припадѐ къ вы́и е҆го. и҆ пла́кастасѧ ѻ҆́ба·

5

Възрѣв꙽ же ви́дѣ жены̀ и҆ дѣти, и҆ рече чт̂о с̂и сꙋть. се́й же рече дѣти и҆́миже поми́лова б҃ъ раба̀ твое҆го·

6

И҆ пристꙋпи́ста же рабы́ни и҆ дѣти еѧ̀, и҆ поколони́шасѧ. пристꙋпи ж̑ лїѧ̀ и҆ дѣти еѧ̀, и҆ поклони́шасѧ. посе́м же пристꙋпѝ рахи́ль і҆ и҆ѻ́сифъ, и҆ поклони́стасѧ·

7

И рече чт̂о с̂е сꙋт́ь по́лцы с̂и вс̂и ꙗ҆́же срѣтох̑, се́й же реч̑҇ да ѻ҆брѧ́щет̑ рабъ твои блгд̑ть пред̑ тобо́ю гдс̑҇не·

8

Рече же е҆мꙋ і҆са́въ довлѣ́ет꙽ ми брате. ты же твоѐ собѣ съдержѝ·

9

И҆ рече і҆а́ковъ, а҆ще ѻ҆брѣто́хъ бл҃годать пред̑ тобо́ю, прїими́ даръ ѿ рꙋкꙋ мое́ю, сего̀ ради ви́дх̑ѣ лице твое, ꙗ҆́коже ви́дитъ кт̂о лицѐ бж҃їе, покажи м̂и любо́въ. и҆ прїи́ми блс̑҇ве́нїе моѐ е҆же принесо́хъ т̂и, ꙗ҆коже поми́лова мѧ б҃ъ, и҆́мамъ вс̂е. и҆ принꙋдѝ е҆го и҆ взѧ̀·

10

И҆ рече въста́вше по́идемъ попростꙋ. и҆ рече і҆а́ковъ господи́не вѣ́си, ꙗ҆́ко дѣти моѝ ю҆́ны, ѻ҆вца же и҆ говѧ́да и҆стомлены̀, а҆́ще ѹ҆бо поженꙋ ѧ́ е҆ді́нъ дн҃ь, и҆ли дв̂а и҆змреть весь ско́тъ·

11

Преди т̂ы пои҆ди гдс̑҇не мой пред̑ рабомъ свои҆мъ, а҆зъ ѹ҆бо крѣпѣю на пꙋтѝ, по поможе́нїю го́да мое҆го и҆же прѣдо мно́ю. и҆ ꙗ҆́ко да возмо́гꙋт꙽ и҆ти дѣти моѝ, до́ндеже прїидꙋ къ гдс̑҇нꙋ мое҆мꙋ въ сїи́ръ·

12

И҆ рече і҆са́въ ѻ҆ста̀влю л̂и ѿ мж̑ꙋ с тобо́ю и҆же съ мно́ю сꙋть. се́й же реч̑҇ въскꙋю с̂е довлѣѐтъ ми ꙗ҆ко ѻ҆брѣтох̑ блгд̑ть предъ тобо́ю гдс̑҇не·

13

Възврати́ же сѧ і҆са́въ в то́мъ дн҃и свои҆мъ пꙋтемъ в сїи́ръ, і҆а́ковъ же прїи́де въ сохо́тъ, и҆ поста́ви себѣ хра́минꙋ и҆ разбѝ кꙋщꙋ скотꙋ̀, и҆ нарече и҆́мѧ мѣстꙋ томꙋ сохо́тъ, с̂ирѣчъ станы̀·

14

Прїиде же і҆а́ковъ въ сали́мъ град̑ сикемъскъ и҆же е҆сть въ землѝ ханаа́ньстѣи, е҆гда̀ прїиде ѿ междорѣ́чїѧ сѷрьска, и҆ ста пред̑ лицемъ, града и҆ кꙋпѝ часть села̀, въ не́мже постави храм̑ сво́и т̂ꙋ ѿ е҆м꙽мо́ра ѿц҃а сѷхемлѧ стомъ ѻ҆венъ. и҆ поста́ви т̂ꙋ ѻ҆лта́рь, и҆ помоли б҃а і҆ил҃ева·