Ostroh Bible❧Перша книга Мойсеєва: Буття, розділ 35

1

Рече і҆а́ковꙋ б҃ъ, въста́въ и҆зыиди в мѣсто веѳїи́лево живи т̂ꙋ, сътвори же ѻ҆лъта́рь бг҃ꙋ. ꙗ҆влъшемꙋсѧ тебѣ, е҆гда̀ бѣжа̀ ѿ лица бра́та свое҆го і҆са́ва·

2

Рече же і҆а́ков̑҇ до́мꙋ свое҆мꙋ, и҆ всѣмъ и҆же с ни́мъ, повр́ъзѣте в̂ы богы чюжда́ѧ, и҆же с ва́ми, и҆ ѿ срѣды̀ их̑ ѻ҆чисти́тесѧ, І҆ и҆змѣни́те ризы своѧ̀. и҆ въста́въше и҆дѣте въ веѳе́иль, да сотворим̑ т̂ꙋ ѻ҆лта́рь бг҃ꙋ, и҆же послꙋш́а менѐ въ дн҃ь скръбѣ́нїа мое҆го, и҆же б̂ѣ со мно́ю, и҆ снабдѣ м̂ѧ на пꙋтѝ воньже ходих꙽·

3

И҆ въда́ша і҆а́ковꙋ богы чюждаѧ, и҆же бѧ́хꙋ въ рꙋкꙋ и҆хъ, и҆ ѹ҆серѧ́зи ѹ҆ше́съ и҆хъ·

4

и҆ съкры ѧ҆̀, і҆а́ковъ под̑ дꙋбомъ, и҆же въ сике́мъ, и҆ погꙋбї ѧ҆̀ до дн҃ешнѧго дн҃е·

5

И҆ въздви́жесѧ і҆и҃ль ѿ сике́ма, и҆ бысть страхъ бж҃їи на гра́дѣхъ, и҆же ѻ҆кресть ихъ, и҆ не гна́шасѧ въ слд̑ѣ сн҃овъ і҆и҃левъ·

6

Прїиде же і҆а́ковъ в лю́зꙋ ꙗ҆́же е҆сть в землѝ ханаа́ньстѣѝ, ꙗ҆́же е҆сть самъ веѳе́иль, и҆ вс̂ѧ че́лѧдь ꙗ҆́же бѧхꙋ с нимъ·

7

И҆ създа̀ т̂ꙋ ѻ҆лта́рь, и҆ прозва̀ и҆́мѧ мѣстꙋ томꙋ виѳе́ль, тꙋ б̂о сѧ е҆мꙋ ꙗ҆́вѝ б҃ъ, е҆гда̀ бѣжа̀ ѿ лица бра́та свое҆го і҆са́ва·

8

Ѹ҆мре же дево́ра дои́лица реве́чина, и҆ погребо́ша ю҆̀, ниже веѳеилѧ, под̑ дꙋбомъ и҆ прозва̀ и҆́мѧ е҆мꙋ дꙋбъ пла́ченъ·

9

Ꙗ҆́ви́ же сѧ г҃ь і҆а́ковꙋ, и҆ е҆ще сꙋщꙋ в лю́зѣ, е҆гда̀ прїиде ѿ междорѣчїа сѷрска, и҆ блс̑҇ви е҆мꙋ б҃ъ·

10

Рече же е҆мꙋ б҃ъ и҆́мѧ тебѣ не прозоветсѧ і҆а́ковъ, н̂о і҆и҃ль бꙋдет꙽ и҆́мѧ тебѣ, и҆ възва̀ и҆́мѧ е҆мꙋ і҆ил҃ь.

11

И҆ рече е҆мꙋ б҃ъ, а҆зъ е҆смь б҃ъ твой растѝ и҆ мно́жисѧ, ꙗ҆́зы́цы б̂о мно́ѕи бꙋдꙋтъ ѿ тебѐ, и҆ цр҃и ѿ чре́слъ твои҆хъ и҆зы́дꙋтъ. и҆ землю̀ ю҆же дахъ а҆враа́мꙋ, і҆ и҆саа́кꙋ, тебѣ даю́, и҆ сѣмени твое҆мꙋ, по тебѣ̀ дамъ землю сїю̀ въ род̑и̑ ихъ·

12

Възы́де же б҃ъ ѿ мѣ́ста и҆дѣже гл҃а съ нимъ, и҆ поста́ви і҆а́ковъ стол́пъ на мѣстѣ и҆дѣже с ним̑ гл҃а стол́пъ ка́менный, и҆ жрѧ́хꙋ на немъ же́ртвы, ѻ҆блїѧ вино́мъ и҆ е҆леѻ́мъ, и҆ прозва̀ і҆а́ков꙽ и҆́мѧ мѣ́стꙋ то́мꙋ, и҆дѣже гл҃а б҃ъ с нимъ виѳе́ль·

13

Въста́в же і҆а́ковъ ѿ виѳе́илѧ, и҆ постави кꙋщꙋ свою̀ недале́че сто́лпа гаде́ръ·

14

И҆ бысть е҆гда приближи́сѧ хара́ѳѣи преитѝ до землѝ е҆фра́ѳа. роди́ же рахи́ль, и҆ възбѣднова̀ род̑ствомъ·

15

И҆ бысть е҆гда болѣзнено е́й роди́ти, рече е́й ба́ба не боисѧ се б̂о тебѣ е҆сть сн҃ъ·

16

Быстьж̑ е҆гда̀ ѻ҆ставлѧше свою̀ дш҃ꙋ, ѹ҆мираше б̂о, и҆ прозва и҆́мѧ е҆мꙋ сн҃ъ болѣзни моеѧ. ѿц҃ъ же прозва и҆̀ веньѧ҆ми́нъ·

17

Ѹ҆мре́ же рахи́ль. и҆ погребо́ша ю̀ на пꙋтѝ е҆фраты. сїи ес̑҇ вифлеѻ́мъ, и҆ постави і҆а́ков̑҇ стол̑҇пъ на́ гробѣ е́й си́и е҆сть столпъ гро́ба рахи́лина и҆ до сего̀ дн҃е. и҆зы́де же ѿтꙋдꙋ і҆ил҃ь. постави кꙋщ́и за столпо́мъ гаде́ръ·

18

И҆ бысть е҆гда ѹ҆сели́сѧ і҆ил҃ь в землѝ то́и, шед̑ рꙋвимъ и҆ спа̀ съ ва́ллою̀, зало́жницею ѿц҃а свое҆го, слы́ша же і҆ил҃ь зл̂ѣ ꙗ҆ви́сѧ пред̑ ним̑·

19

Бѣша же сн҃ове і҆а́ковли, в҃і, сн҃ове ли́и рꙋви́мъ пръвене́цъ і҆а́ковль, симеѻ́нъ, левїи. і҆ѹ҆да, и҆сиха́ръ заѹ҆лонъ.

20

Сн҃ове же рахи́ли, и҆ѻ́сифъ, и҆ венїами́нъ. сн҃ове вал꙽лии҆ны рабы̀ рахи́лѧ да́нъ и҆ неѳали́м. сн҃ове же зе́лѳы рабы̀ ли́ины га́дъ, и҆ а҆си́ръ·

21

Си̂ сꙋть сн҃ове і҆а́ковли е҆же быша е҆мꙋ в междорѣ́чїи сѷрьстѣи·

22

Прїиде же і҆а́ковъ къ і҆саа́кꙋ ѿц҃ꙋ свое҆мꙋ, и҆ е҆ще жи́вꙋ сꙋщꙋ е҆мꙋ въ мамврїи, въ градѣ по́льном̑, и҆ с̂и е҆сть хе́вро́нъ, въ землѝ, ханаа́нъстѣи. и҆дѣже ѻ҆бита а҆враамъ і҆ и҆саа́къ·

23

Быша же дн҃їе і҆сааковы, ꙗ҆́же житъ, р҃п, лѣтъ, и҆ сконча́въ ѹ҆мрѐ. и҆ приложи́сѧ къ рожде́нїю свое҆мꙋ, старецъ испол̑҇нъ дн҃їи. и҆ погребо́ста и҆̀ ісавъ і҆ и҆а́ковъ дв̂а сн҃ове е҆го·