Ostroh Bible❧Перша книга Мойсеєва: Буття, розділ 44

1

И заповѣда і҆ѻ́сифъ домострои́телю свое҆мꙋ гл҃ѧ, напо́л꙽ните вре́тища мꙋжъ пи́ща е҆лико мо́гꙋтъ въздви́гнꙋти, вложи́те же къмꙋждо и҆ сребро̀ върхꙋ ѹ҆стїѧ вре́тищꙋ, и҆ чашꙋ сребрѧнꙋю вложи́те въ мен̑҇шего вре́тище, и҆ цѣ́нꙋ пшени́чнꙋю·

2

Бы́сть же по словесѣхъ і҆ѻ́сифовыхѣ ꙗ҆́коже гл҃а, заѹ҆́тра же на свита́нїи мꙋжи ѿпꙋсти́шасѧ и҆ ѻ҆слѧ́та и҆хъ і҆ и҆зшед̑шим и́мъ и҆́з града, не ѿи҆до́ша далече·

3

И҆ реч̑҇ і҆ѻ́сифъ домострои́телю свое҆мꙋ гл҃ѧ, въста́въ и҆дѝ въ слѣдъ мꙋжїи, и҆ пости́гни ѧ҆̀ и҆ съ гнѣвомъ рцы и҆мъ·

4

Почт̂о та́ко ми възда́сте зл̂о за добро̀, въскꙋ́ю ѹ҆крадо́сте ча́шꙋ м̂и сре́брѧнꙋ, т̂а ес̑҇ е҆́же пїе́тъ гдс̑҇нъ мои самъ и҆ влъхвова́нїемъ волхвꙋ́етъ въ не́и. зл̂ѣ сконча́етесѧ е҆же сътвори́сте·

5

Пости́гше же ѧ҆̀ мꙋжъ рече и҆мъ по словесе́мъ симъ·

6

Сїи же рѣша въскꙋ́ю гл҃етъ гдс̑҇нъ словеса с̂и. не бꙋ́ди рабо́мъ твои҆мъ сътвори́ти сего̀ по словесем̑ сим꙽. поне́же сребро̀ е҆же ѻ҆брѣто́хомъ въ вре́тищихъ свои҆хъ. възврати́хомъ къ тебѣ̀ ѿ землѧ̀ ханаа́нѧ. како ѹ҆б̂о да ѹ҆кра́демъ сребро̀ и҆ зла́тꙋ ча́шꙋ ѿ до́мꙋ гдс̑҇на твое҆го̀·

7

Ѹ҆ него́же ѻ҆брѧ́щет̑сѧ чаша ѿ раб̑҇ твоих̑ да ѹ҆мрет̑, а҆ мы бꙋдем̑ рабѝ гдс̑҇на твое҆го·

8

Се же рече е́й, нн҃ѣ ꙗ҆́коже гл҃ете та́ко бꙋдетъ, ѹ҆ него́же сѧ ѻ҆брѧ́щетъ чаша. да бꙋ́детъ гдс̑҇нꙋ мое҆мꙋ ра́бъ, а҆ вы̀ бꙋ́дете чи́сти·

9

И҆ потща́вшесѧ съвръже ко́ждо вре́тище своѐ, и҆ ѻ҆́твори́ста ко́ждо своѐ вре́тище. и҆зыска́ же, ѿ старѣ́ишаго. заче́нъ до́ндеже прїиде до ме́ншаго, и҆ скончив̑҇ше ѻ҆брѣте ча́шꙋ въ вре́тищи венїами́ни·

10

И҆ растръза́ша ри́зы своѧ̀, и҆ възложиша кожд̑о вре́тище своѐ на ѻ҆слы̀ своѧ̀, и҆ ѻ҆брати́шасѧ въ́ градъ·

11

Въни́де же і҆ѹ́да и҆ бра́тїѧ е҆го къ і҆ѻ҆сифꙋ. е҆щѐ е҆мꙋ сꙋщ́ꙋ т̂ꙋ, и҆ припадо́ша прѣд ни́мъ до землѧ̀·

12

Рече же и҆мъ і҆ѻ҆сифъ чт̂о дѣтель сїю̀ сътвори́сте. не вѣ́сте ли ꙗ҆́ко нѣ́сть враж꙽би́тъ чл҃къ ꙗ҆́коже а҆́зъ·

13

Рече же і҆ѹ҆да чт̂о ѿвѣща́емъ гдс̑҇нꙋ, и҆лѝ чт̂о ѿгл҃емъ, и҆лѝ чи́мъ ѻ҆правди́м꙽сѧ. б҃ъ б̂о ѻ҆брѣте зл̂о рабовъ твоих̑. и҆ с̂е мы̀ рабѝ гдс̑҇на на́шего, и҆ м̂ы и҆ ѹ҆ него́же ѻ҆брѣте ча́ша·

14

Рече же і҆ѻ́сифъ не бꙋ́ди ми сътвори́ти словесѝ сего, мꙋж́ъ ѹ҆ него́же ѻ҆брѣтесѧ ча́ша сїѧ̀, то́и да бꙋ́детъ м̂и ра́бъ, а҆ в̂ы да и́дете в цѣ́лости къ ѿц҃ꙋ свое҆мꙋ·

15

Пристꙋпи́въ же і҆ѹ́да, и҆ реч̑҇ молю́сѧ гдс̑҇не да рече́тъ рабъ тво́и пред̑ тобо́ю, и҆ не прогнѣ́ваисѧ на раба̀ твое҆го. ꙗ҆ко ты е҆си по фараѻ́нѣ властели́нъ гдс̑҇не, т̂ы въпроша̀ ра́бъ твоих̑ гл҃ѧ, не и́мате ли ѿц҃а и҆ брата, и҆ рѣхомъ гдс̑҇не, е҆́сть н̂ы ѿц҃ъ ста́ръ. и҆ ѻтро́чищъ на ста́рость мнїи е҆мꙋ. бра́тъ же е҆мꙋ ѹ҆мрѐ, се́и же е҆ди́нъ ѻ҆ста̀ ѹ҆ мт҃ре свое҆ѧ, ѿц҃ъ же възлюбѝ и҆̀·

16

Ты же рече рабо́мъ свои҆мъ приведѣте е҆го къ мн̂ѣ да и҆̀ ви́ждꙋ. и҆ рѣ́хомъ гдс̑҇не не мо́жетъ ѻ҆ста́вити ѻ҆тро́чищъ ѿц҃а. а҆ще ли ѻ҆ста́вит꙽ ѿц҃а, т̂о ѹ҆́мретъ·

17

Ты же ѿвѣща̀ рабо́мъ свои҆мъ, а҆́ще не приведе́те брата ва́шего ме́ншего сѣмо, т̂о не приложи́те ктомꙋ̀ ви́дѣти лица̀ мое҆го̀·

18

Бысть же е҆гда̀ прїидо́хомъ къ рабꙋ̀ твое҆мꙋ ѿц҃ꙋ на́шемꙋ, и҆ повѣ́дахомъ е҆мꙋ рѣ́чь гдс̑҇на·

19

Рече же нам̑ ѿц҃ъ нашъ. и҆дѣте па́ки кꙋпи́те намъ мало пи́ща, мы же реко́хомъ не мо́жемъ и҆ти. а҆́ще ли братъ на́ш꙽ мнїи и́детъ с нами. т̂о и́демъ, не мо́жемъ бо ви́дѣти лица̀ мꙋж́ꙋ. братꙋ ме́ншемꙋ не сꙋщ́ꙋ с нами·

20

Реч̑҇ же ра́бъ тво́и ѿц҃ъ нашъ къ на́мъ, в̂ы вѣ́сте ꙗ҆ко двꙋ̀ м̂и е҆сть породѝ жона̀ і и҆зы́иде е҆̀ди́нъ ѿ менѐ и҆ реко́сте звѣ́рь и҆зъе҆лъ и҆̀ е҆сть, и҆ не ви́дѣхъ е҆го досе́лѣ·

21

А҆́ще бо по́имете и҆ сего̀ ѿ лица̀ мое҆го. и҆ слꙋчи́тсѧ е҆мꙋ зл̂о на пꙋтѝ спрово́дите ста́рость мою с печа́лїю въ а́дъ·

22

Нн҃ѣ а҆́ще и́демъ ѹ҆бо къ рабꙋ̀ твое҆мꙋ̀ ѿц҃ꙋ на́шемꙋ. и҆ ѻ҆тро́чища не бꙋ́детъ с на́ми, дш҃а бо е҆го свѧ́зана е҆сть съ дш҃ею сего̀·

23

И҆ бꙋ́детъ ꙗ҆́ко ѹ҆́зритъ самъ. не сꙋща̀ ѻ҆тро́чища съ на́ми. ѹ҆́мретъ, и҆ с̂е прово́дѧтъ рабѝ твоѝ ста́рость раба̀ твое҆го ѿц҃а на́шего съ болѣ́знїю въ а́дъ·

24

Ра́бъ бо тво́и ѿц҃ъ нашъ вда̀ ѻ҆тро́ка в рꙋцѣ̀ моѝ. и҆ а҆́зъ реко́хъ аще не приведꙋ е҆го к тебѣ. и҆ не поста́влю е҆го пред̑ тобо́ю грѣшенъ бꙋ́дꙋ къ ѿц҃ꙋ вс̂ѧ дн҃и·

25

И҆ нн҃ѣ ѹ҆бо бꙋ́дꙋ а҆́зъ рабъ твои въ ѻ҆тро́чища мѣ́сто ра́бъ гдс̑҇нꙋ мое҆мꙋ·

26

А҆ ѻ҆тро́чищь да и́детъ съ бра́тѣею. ка́ко бо и́демъ къ ѿц҃ꙋ ѿтро́чищꙋ не сꙋщ́ꙋ с нами. да не ви́жд̑ꙋ зл̂а е́же и́мать быти на ѿц҃а мое҆го·