Ostroh Bible❧Перша книга Мойсеєва: Буття, розділ 45

1

И не можа́шесѧ і҆ѻ҆сифъ ѹ҆дръжа́ти. зр̂ѧ всѣ́хъ пред̑стоѧ́щихъ е҆мꙋ. и҆ рече ѿстꙋпите ѿ менѐ вс̂и·

2

И҆ не стоѧ́ше никто́же пред̑ і҆ѻ́сифом̑, е҆гда̀ позна́вшесѧ братїи свое́и, и҆ въздви́же гласъ съ пла́чемъ·

3

Слы́шаша же вс̂и е҆гѷптѧне. и҆ ѹ҆слы́шано бысть въ домꙋ̀ фараѻ́ни·

4

И҆ рече і҆ѻ́сифъ братїи свое́и. а҆́зъ е҆смь і҆ѻ́сифъ. а҆́ще ли ѿц҃ъ мо́и живъ·

5

Не можа́хꙋ бра́тїѧ е҆го ѿвѣща́ти словесѝ е҆мꙋ ѹ҆страши́ша бо сѧ·

6

Рече же і҆ѻ́сифъ братїи свое́и. пристꙋпи́те къ мнѣ. и҆ пристꙋпи́ша·

7

И҆ рече а҆́зъ е҆смь і҆ѻ́сифъ бра́тъ вашъ. е҆гоже в̂ы прода́сте въ е҆гѷпет̑·

8

Нн҃ѣ ѹ҆бо не пецѣтесѧ. ни поро́ко в̂ы бꙋ́ди. и҆же прода́сте м̂ѧ сѣмо. на жи́знь б̂о пꙋсти м̂ѧ б҃ъ пред̑ ва́ми. с̂е б̂о дв̂ѣ лѣтѣ гла́дъ на землѝ. и҆ е҆щѐ пѧть лт̑ѣ ѻ҆ста̀ въ нихже не бꙋ́детъ ѻ҆ра́твы и҆ жа́твы·

9

Пꙋстѝ бо м̂ѧ б҃ъ пред̑ ва́ми ѻ҆ста́нокъ вамъ ѻ҆ста́вити на зем꙽лѝ. и҆ прекръми́ти васъ ѻ҆ста́вленїе вели́ко·

10

Нн҃ѣ ѹ҆б̂о не вы̀ посла́сте м̂ѧ сѣмо. н̂о б҃ъ, и҆ сътворѝ мѧ ꙗ҆́ко ѿц҃а фараѻ́нꙋ. и҆ властели́на всемꙋ̀ до́мꙋ е҆го, и҆ кнѧзѧ все́й землѝ е҆гѷпетъстѣи·

11

Потща́вшесѧ и҆дѣте къ ѿц҃ꙋ мое҆мꙋ, и҆ рцѣте е҆мꙋ·

12

Та́ко гл҃тъ сн҃ъ тво́и і҆ѻ́сифъ. сътворѝ м̂ѧ б҃ъ гдс̑҇на все́и землѝ е҆гѷпетъстѣи·

13

прїидѝ ѹ҆б̂о къ мнѣ̀, и҆ не преме́дли, и҆ ѹ҆сели́шисѧ въ землѝ гесе́мли въ а҆равїи. и҆ бꙋ́деши близъ мн̂ѣ, т̂ы и҆ сн҃ве твоѝ, и҆ сн҃ве сн҃овъ твоих̑·

14

и҆ ѻ҆вца̀ твоѧ̀. и҆ воло́ве твоѝ, и҆ вс̂е е҆ли́коже ти е҆сть. и҆ прекоръмлю т̂ѧ т̂ꙋ·

15

И҆ е҆щѐ б̂о пѧть лѣтъ гла́дъ бꙋдетъ на землѝ. и҆ да не поги́бнеши т̂ы и҆ сн҃ове твоѝ. и҆ вс̂е и҆мѣ́нїе твоѐ. и҆ с̂е ѻ҆́чима видита, і҆ ѻ҆чи венїами́на бра́та мое҆го. ꙗ҆́ко ѹ҆ста̀ моѧ̀ гл҃ют̑ к вам̑ повѣ́дите ѹ҆б̂о ѿц҃ꙋ мое҆мꙋ̀ вс̂ю сла́вꙋ мою̀. ꙗ҆́же въ е҆гѷптѣ. и҆ е҆ли́ко ви́дѣсте. и҆ потщав̑҇шесѧ, приведѣте ѿц҃а мое҆го сѣмо·

16

И҆ припад̑ на вы́ю венїѧми́на брата свое҆го пла́касѧ ѻ҆ нем̑·

17

и҆ венїѧми́нъ пла́касѧ ѻ҆быим̑ вы́ю е҆го. и҆ цѣлова̀ вс̂ю бра́тїю свою̀. и҆ пла́касѧ ѻ҆ ни́хъ. и҆ посе́мъ гл҃аша бра́тїѧ е҆го къ немꙋ̀·

18

И҆ пронесе́сѧ рѣчь до до́мꙋ фараѻ́нѧ гл҃юще. прїидо́ша бра́тїѧ і҆ѻ́сифова. и҆ възра́довасѧ фараѻ́нъ и҆ рабѝ е҆го·

19

Рече же фараѻ́нъ къ і҆ѻ́сифꙋ, рцы̀ бра́тїи свое́и с̂е сътвори́те. напо́лните съсꙋ́ды ваша, і҆ и҆дѣте в зе́млю ханаа́ню. пои́мше же ѿц҃а ва́шего і҆ имѣ́нїе ваше. и҆ прїидѣте къ мнѣ̀·

20

И҆ да́мъ вамъ ѿ всего̀ добра̀ е҆гѷпетъска. и҆ да ꙗ҆́сте бл҃готꙋ̀ земнꙋ́ю·

21

Ты̂ же заповѣж́дь им̑ да въ́змꙋтъ ко́ла ѿ землѧ̀ е҆гѷпетъски дѣтемъ и҆хъ и҆ женамъ и҆хъ. и҆ пои́мше ѿц҃а своего, да и҆̀ приведꙋт꙽. не пощади́те же ѻ҆чи́ма съсꙋ́дъ своих̑, всѐ б̂о до́бро е҆гѷпет꙽ско вамъ бꙋ́дет̑·

22

Сътвори́ша же сн҃ове і҆и҆л҃евы та́ко. да́сть же и҆мъ і҆ѻ́сифъ ко́ла. по повелѣ́нїю фараѻ́на цр҃ѧ е҆гѷпетъска и҆ да́стъ и҆мъ бра́шно на пꙋт́ь. и҆ всѣмъ дасть сꙋгꙋ́бы ризы·

23

Венїами́нꙋ же дасть. т҃, златник̑҇ и҆ пѧ́теры ри́зы и҆змѣне́ныѧ, ѿц҃ꙋ свое҆мꙋ послал̑҇ та́кожде, и і҃, ѻ҆се́лъ, носѧ́ще ѿ всего̀ добра̀ е҆гѷпетъска. и҆ де́сѧть мъскъ носѧ́ще хлѣ́бъ на пꙋт́ь ѿц҃ꙋ и҆хъ, и҆ ѿпꙋсти бра́тїю свою̀·

24

и҆ ѿидо́ша. рече же и҆мъ не гнѣ́ваитесѧ на пꙋтѝ·

25

И҆зыдо́ша же и҆зъ е҆гѷп꙽та, и҆ прїидо́ша в зе́млю ханаа̀ню, къ і҆а́ковꙋ ѿц҃ꙋ свое҆мꙋ, и҆ повѣ́даша е҆мꙋ гл҃ющи, ꙗ҆́ко сн҃ъ тво́и і҆ѻ́сифъ жи́въ е҆сть, и҆ владѣ́етъ въ все́и землѝ е҆гѷпетъстѣи·

26

И҆ въчюди́сѧ въ ѹ҆мѣ̀ с̂и і҆а́ковъ, не вѣ́роваше бо и҆мъ, гл҃аша же е҆мꙋ вс̂ѧ словеса̀ с̂и, ꙗ҆́же гл҃а и҆мъ і҆ѻ́сифъ, е҆ли́ко же рече и҆мъ·

27

Ѹ҆зрѣ́въ же ко́ла і҆а́ковъ ꙗ҆́же посла̀ і҆ѻсифъ, ꙗ҆ко въздви́гнꙋти и҆̀ и҆ ѻ҆жѝ дх҃ъ і҆а́ковль ѿц҃а и҆хъ·

28

И҆ рече і҆и҃ль велико ми е҆сть с̂е а҆ще е҆сть і҆ѻсифъ сн҃ъ мои живъ, шедъ да ви́ждꙋ е҆го до́ндеже не ѹ҆мрꙋ̀·