Ostroh BibleПерша книга Мойсеєва: Буття, розділ 6
Шрифт:
Запис:
1
И бѣ̀ но́е лѣтъ, е҃, сот̑ и҆ родѝ сн҃ы три, си́ма, ха́ма и҆а҆фе́та.
2
И҆ бы́сть е҆гда̀ нача́ша чл҃вцы мно́зи бывати на землѝ, и҆ дще́рѧ роди́шасѧ и҆мъ·
3
Ви́дѣвше же сн҃ве бж҃їи дще́рѧ чл҃чѧ ꙗ҆́ко добры сꙋть, и҆ поѧ҆́ша себѣ же́ны ѿ всѣхъ ꙗ҆́же и҆збра́ша·
4
И҆ рече г҃ь б҃ъ, не и҆́мать дх҃ъ мо́и пребыва́ти въ чл҃вцѣхъ си́хъ, занѐ сꙋть плъть·
5
Бꙋдꙋтъ же дн҃їе и҆хъ, лѣтъ, рк҃·
6
и҆споли́ни же бѧхꙋ на землѝ въ дн҃и ѻ҆́ни·
7
И҆ потм̑о ꙗ҆́коже въхожд̑ахꙋ сн҃ве бж҃їи къ дще́рем̑ члчс̑҇ким꙽, и рожд̑ахꙋ себѣ сїи, и҆ тїи бѧ́хꙋ и҆споли́ни, и҆же ѿ вѣка чл҃вцы и҆мени́ти·
8
Ви́дѣвъ же г҃ь б҃ъ, ꙗ҆́ко ѹ҆мно́жишасѧ зло́бы чл҃вкомъ на землѝ, и всѧ́къ кто̀ помышлѧ́етъ въ срд̑цы своем̑ прилѣжно всѧ́къ кто̀ помышлѧ́етъ въ срд̑цы своем̑ прилѣжно на зла́ѧ всѧ̀ дн҃и·
9
І҆ помысли б҃ъ ꙗ҆́ко сътворѝ чл҃вка на зем̑ли, и҆ размы́сли·
10
И҆ рече да потреблю̀ члв҃ка е҆гоже сътворих꙽ ѿ землѧ̀, ѿ члв҃ка да́же и҆ до ско́та, и҆ ѿ га́дъ да̀же и҆ до пти́цъ нбс̑҇ныхъ, ꙗ҆́ко размы́слихъ и҆же сотвори́хъ.
11
Но́е же ѻ҆брѣте блгд̑ть прд̑е гм҃ъ бг҃м꙽.
12
Сїѧ҆ же бытїѧ̀ но́ева. но́е б̂ѣ чл҃къ пра́веденъ, и҆ съвръшенъ въ всем̑ ро́дѣ свое҆м꙽, и҆ ѹ҆годѝ но́е бг҃ꙋ·
13
Роди́ же но́е три сн҃ы, си́ма, ха́ма, и҆а҆фе́та ѻ҆скверни́ же сѧ землѧ предъ бм҃ъ, и҆ напо́лнисѧ непра́вды·
14
І҆ видѣ г҃ь б҃ъ зе́млю и҆́же бѣ ѻ҆скверне́на, ꙗ҆ко ѻ҆сквернѝ всѧ́ка плъть пꙋть сво́и на зе́мли·
15
І҆ ре́че г҃ь б҃ъ но́ю, вре́мѧ всѧ́кого чл҃вка прїиде прд̑е мѧ, ꙗ҆́ко напо́лънисѧ землѧ̀ непра́вды ѿ них̑, и҆ се а҆́зъ рас꙽сы́плю.
16
Ты́ же ѹ҆бо сътворѝ себѣ ковче́гъ ѿ дре́въ негнїю҆́щих̑ на четы́ри ѹ҆глы̀, предѣлы сътвори́ши въ ковче́зѣ, и҆ посмо́лиши вънꙋтръѹ҆́дꙋ и҆ внѣѹ҆́дꙋ смоло́ю, и҆ та́ко съвершѝ ковче́гъ, т҃, лако́тъ въ долготꙋ̀ ковче́гꙋ, н҃, въ широтꙋ̀, л҃, въ высотꙋ̀ е҆мꙋ. и҆ ѹ҆зѧ̀, сътвори́ши ковчег̑ въ е҆ді́нъ ла́коть сконча́еши съве́рхꙋ. две́риж̑ ковче́гꙋ сътвори́ши въ странꙋ̀, пола́ти и҆ предѣлы съ стропы̀ сꙋгꙋ́бы и҆ трегꙋ́бы сътвори́ши въ нем̑·
17
І҆ се а҆́зъ пото́пъ наведꙋ̀ на́ землю погꙋби́ти всѧ́кꙋ плъть въ не́иже е҆сть дꙋ́хъ живо́тенъ под̑ нб҃се́мъ, и҆ е҆ли́ко е҆́сть на землѝ и҆зъмрет̑·
18
І҆ поста́влю завѣт̑ мо́и к тебѣ̀·
19
Въни́дешиж̑ въ ковче́гъ ты̀, и҆ сн҃ве твоѝ, жена̀ твоѧ̀, и҆ жены̀ сн҃въ твои́хъ с тобо́ю. и҆ ѿ всѧ́кого ско́та, и҆ ѿ всѣхъ гад̑, и҆ ѿ всѧкого звѣ́ри, и҆ ѿ всѧ́кїѧ плъти дво́е дво́е, ѿ всѣ́хъ въведе́ши въ ковче́гъ, и҆ да пита́еши съ собо́ю, мꙋ́жескїи по́лъ и҆ же́ньскїи, да бꙋ́дет̑ ѿ всѣхъ пти́цъ по́ родꙋ. и҆ ѿ всего̀ скота по́ родꙋ·
20
І҆ ѿ всѣ́хъ га́дъ по́л꙽заю҆щих̑ по землѝ по́ родꙋ, дво́е дво́е ѿ всѣхъ сих̑, въни́дꙋтъ к тебѣ̀ пита́тисѧ с тобо́ю мꙋж́ескїи по́лъ и҆ ж́еньскїи·
21
Ты́ же възмѝ себѣ̀ ѿ всѣх꙽ бра́шенъ ꙗ҆же и҆́мате ꙗ҆сти, и҆ събереши къ себѣ̀ и бꙋ́дет̑ тебѣ̀ и҆ ѻ҆́нѣмъ бра́шно.
22
І҆ сътворѝ но́е всѐ е҆ли́ко заповѣда̀ е҆мꙋ г҃ь б҃ъ, та́ко сътворѝ·
Джерела
