Ostroh BibleКнига Суддів, розділ 10
Шрифт:
Запис:
1
И въста̀ по а҆вимеле́сѣ спс̑҇ти сн҃ы і҆и҆л҃ѧ. ѳо́ла сн҃ъ ѳꙋ́а сн҃ъ бра́та ѿч҃а е҆мꙋ, мꙋж꙽ ѿ и҆саха́ра. се́и же живѧ́ше в семарѣ в горѣ̀ е҆фре́мовѣ·
2
И҆ сꙋдѝ і҆и҆л҃еви. лт̑ѣ, к҃г. и҆ ѹ҆мре, и҆ погребе́нъ бы́сть в сема́рѣ·
3
И҆ въста̀ по не́мъ и҆а҆и́ръ галаа҆ди́тинъ. и҆ сꙋди і҆и҆л҃еви. лт̑ѣ, к҃в·
4
И҆ бы́сть е҆мꙋ сн҃овъ, л҃, е҆здѧ́щихъ. на. л҃ ѻ҆слехъ. гра́ди же и҆мъ. л҃, и҆же прозыва́хꙋ ѧ҆̀ и҆а҆и́ровы да́же до дн҃е, и҆же сꙋть в꙽ землѝ галаа́довѣ·
5
И҆ ѹ́мре и҆а҆и́ръ. и҆ погребе́нъ бысть въ и҆камо́нѣ·
6
И҆ приложи́ша сн҃ве і҆и҆л҃ви твори́ти ѕло́е пред̑ гм҃ъ. и҆ послꙋжи́ша ваа́лимꙋ и҆ а҆старо́ѳꙋ и҆ бого́мъ сѷр꙽скимъ. и҆ бого́мъ сидо́ньскимъ. и҆ бого́мъ моа́вльскимъ. и҆ бого́мъ сн҃овъ а҆м꙽монь, и҆ богом̑ и҆ноплемен̑҇ник̑҇. и҆ ѻ҆ста́виша г҃а, и҆ не рабо́таша е҆мꙋ·
7
И҆ разгнѣвасѧ г҃ь ꙗ҆́ростїю на і҆и҆л҃ѧ. и҆ въда́сть ѧ҆̀ в꙽ рꙋкꙋ ѳилисти́мꙋ. и҆ в꙽ рꙋкꙋ сн҃овъ а҆м꙽мо́нь·
8
И҆ заѕлиша. и҆ ѻ҆печали́ша сн҃ы і҆и҆л҃евы в т̂о вре́мѧ. и҃і, лѣтъ. всѣхъ сн҃овъ і҆и҆л҃евыхъ и҆же ѻ҆бонꙋ странꙋ і҆ѻ҆рда́на в꙽ землѝ ам̑мор꙽ре́истеи, и҆же в галаа́дѣ·
9
И҆ посем̑ проидо́ша сн҃ове а҆мъмо́ни і҆е҆рда́нъ, вое҆ва́ти на і҆ю́дꙋ и҆ венїа҆ми́на. и҆ на до́мъ е҆фре́мов̑҇. и҆ въскорбѣша сн҃ове і҆и҆л҃еви ѕѣло·
10
И҆ възопи́ша сн҃ове і҆и҆л҃еви къ г҃ꙋ гл҃юще. съгрѣши́хомъ к тебѣ, ꙗ҆́ко ѻ҆ста́вихомъ б҃а нашего, и҆ рабо́тахомъ ваа҆ли́мꙋ·
11
И҆ рече г҃ь къ сн҃омъ і҆и҆л҃вым̑ не ѿ е҆гѷпта л̂и. и҆ ѿ ам̑мор꙽ре́ѧ и҆ ѿ сн҃ов꙽ а҆м꙽мо́нь. и҆ ѿ ѳилисти́ма·
12
И҆ ѿ сидо́нѧнъ. и҆ ѿ а҆мали́ка, и҆ ѿ мадїа҆ма и҆же стꙋжи́ша ва́мъ. и҆ ꙗ҆ко възопи́сте къ мн̂ѣ, и҆ сп҃сохъ вы̀ ѿ рꙋкѝ их̑.
13
Вы́ же ѻ҆ста́висте менѐ и҆ рабо́тасте бого́мъ и҆нѣм꙽. сего̀ ради не приложꙋ̀ спс̑҇ти ва́съ·
14
И҆дѣте и҆ възопїите къ бого́мъ ꙗ҆́же и҆збра́сте себѣ̀. и҆ т̂и да сп҃сꙋтъ в̂ы въ вре́мѧ ско́рби ва́шеѧ·
15
И҆ рѣша сн҃ове і҆и҆л҃еви къ г҃ꙋ. съгрѣши́хомъ сътворѝ т̂ы нам̑ по всемꙋ̀ е҆ли́ко го́дѣ бы́сть пред̑ ѻ҆чи́ма твои҆ма. то́чїю и҆зба́ви насъ в꙽ сїи дн҃ь·
16
І҆ и҆звергоша богѝ чю́ждаѧ ѿ средѣ себѐ и҆ послꙋжи́ша гв҃и е҆ді́номꙋ и҆ съжалѣ́сѧ дш҃а е҆го. трꙋжде́нїѧ і҆и҆л҃ева и҆ поми́лова их̑·
17
И҆ събра́шасѧ сн҃ове а҆м꙽мо́ни, и҆ ста́ша в꙽ галаа́дѣ събра́шасѧ та́кожде и҆ сн҃ове і҆и҆л҃еви и҆ въполчи́шасѧ въ стра́жбѣ·
18
И҆ рѣша кн҃ѕи людїи гала́дъскихъ, ко́ждо дрꙋгъ дрꙋгꙋ. кождо мꙋжъ и҆же начне́тъ би́тисѧ съ сн҃ъми а҆м꙽моновыми. то́и бꙋдетъ кн҃ѕь всѣмъ живꙋщимъ в꙽ галаа́дѣ·
Джерела
