Ostroh Bible❧Книга Суддів, розділ 11

1

И бы́сть е҆́ѳа галаа́д꙽скїи мж̑ꙋ во́ин꙽. и҆ си́лныи крѣп́остїю, се́и же быс̑҇ сн҃ъ жены̀ блꙋ́дница, и҆же родѝ галаа́дꙋ, і҆е҆ѳа́ѧ. и҆ роди́ же и҆ жена галаа́дова сн҃овъ е҆мꙋ. и҆ е҆гда̀ възмꙋжа́ша сн҃ове жены̀. и҆згна́ша е҆ѳа́ѧ. и҆ реко́ша е҆мꙋ не причасти́шисѧ в꙽ домꙋ̀ ѿц҃а на́шего. ꙗко жены̀ блꙋ́дныѧ е҆си т̂ы·

2

И҆ ѿи́де і҆е҆ѳа́и ѿ лица̀ братїѧ свое҆ѧ. и҆ всели́сѧ въ землѝ то́вовѣ. и҆ събира́хꙋсѧ къ е҆ѳа́ю мꙋжи про́сти, и҆ хожда́хꙋ с ни́мъ·

3

И҆ быс̑҇ по днехъ сихъ вое҆ва́ша сн҃ове а҆ммо́ни на і҆и҆л҃ѧ·

4

И҆ внегда̀ вое҆ва́ша сн҃ве а҆м꙽мо́ни на і҆и҆л҃ѧ. и҆до́ша ста́рцы галаа́дови поѧ́ти е҆ѳа́ѧ ѿ землѧ̀ то́вовы·

5

И҆ реко́ша къ е҆ѳа́еви. прїидѝ да н̂ы бꙋдеши старѣ́ишина. да сѧ вополчи́мъ на сн҃ы а҆м꙽мо́нѧ·

6

И҆ рече е҆ѳа́и ста́рцемъ галаа́дъским꙽. не вы́ л̂и ѹ҆бо възненави́дѣсте м̂ѧ. і҆ и҆згна́сте мѧ и҆з до́мꙋ ѿц҃а мое҆го, и҆ ѿпꙋсти́сте мѧ ѿ себѐ. т̂о почто̀ прїидо́сте къ мн̂ѣ нн҃ѣ, в꙽негда̀ печа́лни е҆сте·

7

И҆ реко́ша ста́рцы галаа́д꙽стїи къ е҆ѳа́еви. сего̀ ради н҃нѣ прїидо́хомъ к тебѣ̀. да и҆́деши с на́ми и҆ да въполчи́мсѧ на сн҃ы а҆м꙽мо́ни и҆ бꙋ́деши на́мъ кн҃ѕь всѣмъ живꙋщимъ в галаа́дѣ·

8

И҆ рече е҆ѳа́и къ ста́рцем̑ галаа́довымъ а҆ще ѻ҆браща́е҆те мѧ въпол꙽чи́тисѧ на сн҃ы ам̑мо́нѧ и҆ преда́сть ѧ҆̀ г҃ь предо мно́ю, бꙋдꙋ л̂и а҆зъ вамъ кн҃ѕь·

9

И҆ реко́ша ста́рцы галаа́дъски къ е҆ѳа́еви. г҃ь да бꙋдет̑ по́слꙋхъ междꙋ тобо́ю и҆ на́ми. а҆ще по сло́вꙋ твое҆мꙋ та́ко не сътворим̑·

10

І҆ и́де е҆ѳа́и съ ста́рцы галаа́дъскими и҆ поста́виша и҆̀ лю́дїе старѣ́ишинꙋ над̑ собо́ю во́жда и҆ кн҃ѕѧ. и҆ гл҃а е҆ѳа́и всѧ словеса̀ своѧ̀ пред̑ бм҃ъ в꙽ маси́ѳѣ·

11

По сем̑ посла̀ е҆ѳа́и послы̀ къ цр҃ю сн҃овъ а҆м꙽мо́нь, гл҃ѧ чт̂о мн̂ѣ и҆ тебѣ̀, ꙗ҆́ко прїиде къ мн̂ѣ въполчи́тисѧ на землѝ мое́й·

12

И҆ реч̑҇ цр҃ь сн҃ов꙽ а҆м꙽монь къ посло́мъ е҆ѳа́емъ. чт̂о ради взѧ̀ і҆и҆л҃ь зе́млю мою, внегда̀ и҆зы́де из̑ е҆ги́пта ѿ а҆рно́нѧ, даже до иаа҆во́ка и҆ до е҆рда́на, и҆ н҃нѣ възвратѝ ю҆̀ с ми́ромъ и҆ ѿи́дꙋ, и҆ възврати́шасѧ послы̀ къ е҆ѳа́ю·

13

И҆ приложѝ е҆ще е҆ѳа́и и҆ посла̀ послы̀ къ цр҃ю сн҃овъ а҆м꙽мо́нь·

14

И҆ рекоша е҆мꙋ та́ко гл҃етъ е҆ѳа́и. не взѧ́лъ і҆и҆л҃ь зе́млю моа́влю, ниже зе́млю сн҃овъ а҆м꙽мо́нь.

15

Но е҆гда̀ и҆схожа́хꙋ и҆зъ землѧ̀ е҆гѷпетъскїѧ і҆ и́де і҆ил҃ь по пꙋсты́ни до мо́рѧ чрьмнаг̑҇ и҆ прїиде до кади́съ·

16

И҆ посла̀ і҆и҆л҃ь послы̀ къ цр҃ю е҆до́мъскꙋ гл҃ѧ да́и м̂и и҆тѝ сквоѕѣ зе́млю твою̀, и҆ не послꙋша цр҃ь е҆до́м꙽скъ. такоже посыла́лъ и҆ къ цр҃ю моа́вскꙋ и҆ не въсхотѣ̀. и҆ сѣде і҆и҆л҃ь в кади́сѣ·

17

По семъ и҆́де пꙋсты́нею. и҆ ѻ҆бы́иде зе́млю е҆до́млю и҆ зе́млю моа́влю. и҆ прїиде на восто́к꙽ сл҃нцꙋ, до землѝ моа́вли. и҆ въполъчи́сѧ ѻ҆бо́нꙋ странꙋ̀ а҆рно́нь. н̂о не вни́де в꙽ предѣлы моав̑҇лѧ. ꙗ҆́ко а҆рно́нь бѧ́ше предѣ́лъ моа́вль·

18

И҆ посла̀ і҆и҆л҃ь послы̀ къ сиѻ҆́нꙋ цр҃ю ам̑мор꙽рѣ́искꙋ и҆ цр҃ю е҆сево́ньскꙋ и҆ рече к немꙋ і҆и҆л҃ь, да мине́мъ по землѝ твое́и до мѣ́ста мое҆го·

19

И҆ не въсхотѣ сїѻ́нъ і҆и҆л҃ѧ пропꙋсти́ти по предѣ́лꙋ свое҆мꙋ. н̂о собра̀ сїѻн̑҇ вс̂ѧ лю́ди своѧ, и҆ въпол̑҇чи́сѧ къ і҆и҆л҃ю до и҆а́сы и҆ вое҆ва̀ на і҆и҆л҃ѧ·

20

И҆ преда́сть г҃ь б҃ъ в рꙋцѣ і҆и҆л҃ю сїѻ́на, и҆ вс̂ѧ лю́ди е҆го, і҆ и҆збѝ ѧ҆̀. и҆ прїѧ̀ і҆и҆л҃ь вс̂ю зе́млю, ам̑морре́ѧ живꙋщаго на землѝ то́и и҆ взѧ́ша весъ предѣлъ а҆м꙽море́искъ·

21

ѿ а҆рно́на, да́же до а҆во́ка. и҆ ѿ пꙋсты́нѧ до і҆ѻ҆рда́на·

22

И҆ н҃нѣ г҃ь б҃ъ і҆и҆л҃евъ и҆згна̀ ам̑морре́ѧ ѿ лица людїи своих̑ і҆и҆л҃ѧ.

23

Ты же хо́щеши причасти́ти ю҆̀ себѣ̀·

24

Ни̂, н̂о е҆ли́ко причастѝ тебѣ̀ хамо́съ бо́гъ твой. сїѧ да причасти́ши, и҆ вс̂ѧ ꙗ҆же и҆згна̀ г҃ь б҃ъ на́шъ ѿ лица̀ нашего, т̂о мы̀ причасти́мъ·

25

Но н҃нѣ лꙋ́чшїи лѝ е҆си т̂ы валаа́ка сн҃а сепѳо́рова цр҃ѧ моа́влѧ. не препира́ ли сѧ съ і҆и҆л҃емъ. и҆л̂и не вою́ѧ вое҆ва̀ на́ нѧ·

26

Внегда̀ всели́сѧ і҆и҆л҃ь въ е҆сево́нѣ, и҆ въ предѣ́лехъ е҆го и҆ въ а҆рои́ре и҆ въ предѣ́лехъ е҆го и҆ въ всѣхъ гра́дех̑ и҆же въ предѣ́лехъ а҆рно́ни. т҃. лт̑ѣ, почто̀ не и҆зба́висте и҆хъ въ вре́мѧ т̂о·

27

А҆з же не съгрѣши́хъ тебѣ̀. а҆ ты̀ твори́ши со мно́ю ѕл̂о вою́юще на́ мѧ. да сꙋ́дитъ г҃ь и҆же сꙋдѝ днесь ме́ждꙋ сн҃ы і҆и҆л҃евыми, и҆ междꙋ сн҃ы а҆м꙽мо́ни·

28

И҆ не послꙋша цр҃ь сн҃овъ а҆м꙽мо́нь слове́съ е҆ѳа́евыхъ и҆хже посыла̀ к немꙋ̀·

29

И҆ бы́сть на е҆ѳаѝ дх҃ъ гн҃ь. и҆ минꙋ̀ галаа́да и҆ манасїю, и҆ стражбꙋ̀ галаа́довꙋ. и҆ ѿ стражбы̀ галаа́довы и҆́де на ѻ҆́нꙋ странꙋ̀ сн҃овъ а҆м꙽мо́нь·

30

И҆ молисѧ и҆е҆ѳа́и мл҃твою къ гв҃и и҆ рече. г҃и а҆ще преда́нїемъ предасѝ сн҃ы а҆м꙽мо́нѧ в рꙋ́кꙋ мою.

31

То чт̂о и҆зы́идетъ и҆з вра́тъ до́мꙋ мое҆го, проти́вꙋ мн̂ѣ, е҆гда̀ ѻ҆бращꙋсѧ с ми́ромъ ѿ сн҃овъ а҆м꙽мо́нь. да бꙋ́детъ с̂е гв҃и. и҆ли възнесꙋ и҆̀ въ вс̂есъж꙽же́нїе·

32

И҆ прїиде е҆ѳа́и къ сн҃омъ а҆м꙽мо́немъ въполчи́тисѧ на́ нѧ. и҆ преда́сть ѧ҆̀ г҃ь в рꙋцѣ е҆го·

33

І҆ и҆збѝ ѧ҆̀ ѿ а҆рои́ра, до́ндеже прїитѝ въ семинꙋѳъ. к҃, гра́дъ да́же и҆ до а҆ве́ѧ. и҆ виногра́домъ вре́домъ вели́кимъ ѕѣ́ло. и҆ покоре́ни сꙋть сн҃ове а҆м꙽мо́ни пред̑ лицемъ сн҃овъ і҆и҆л҃евъ·

34

И҆ прїиде и҆е҆ѳа́и въ маси́ѳꙋ в до́мъ сво́и. и҆ с̂е дщѝ е҆го и҆схожда́ше проти́вꙋ е҆го съ тим꙽па́ны и҆ ли́ки. си же е҆ді́ночад̑на сꙋщи е҆мꙋ и҆ възлю́блена. и҆ не бѣ е҆мꙋ сн҃а н̂и дрꙋгїѧ дще́ре, ра́звѣ еѧ̀·

35

И҆ бы́сть е҆гда̀ ви́дѣ и҆̀ са́мъ, растерза̀ ри́зы своѧ̀ на себѣ̀. и҆ рече ѽ дщѝ моѧ̀ смꙋща́юще смꙋтѝ м̂ѧ. и҆ ты̀ нн҃ѣ въ жесто́тѣ бы́сть пред̑ ѻ҆чи́ма мои҆ма. а҆зъ б̂о ѿврьзо́х꙽ ѹ҆ста̀ моѧ къ г҃ꙋ, и҆ не възмогꙋ̀ въспѧ́ть ѻ҆брати́ти·

36

И҆ рече к немꙋ дщѝ ѿч҃е а҆ще ѿврьзлъ е҆си ѹ҆ста̀ своѧ̀ къ г҃ꙋ. сътворѝ мн̂ѣ ꙗ҆́коже и҆зы́иде, и҆зъ ѹ́стъ твоих̑. зане же сътворѝ г҃ь месть враго́мъ твоим̑, ѿ сн҃овъ а҆м꙽монь·

37

И҆ рече къ ѿц҃ꙋ с̂и сътворѝ ѿч҃е мой с̂е сло́во. ѻ҆ста́ви м̂ѧ дв̂а мцс̑҇а, да и҆́дꙋ и҆ взы́идꙋ на го́ры. и҆ да пла́чꙋсѧ дв҃ъства мое҆го а҆зъ и҆ дрꙋги́нѧ моѧ̀·

38

И҆ рече е́й и҆дѝ и҆ ѿпꙋстѝ ю҆̀ на, в҃ мцс̑҇а, і҆ и́де сама̀ и҆ дрꙋги́нѧ е҆ѧ̀. и҆ пла́касѧ дв҃ъства свое҆го на горах̑·

39

И҆ бы́сть на коне́цъ дво́ю мцс̑҇ꙋ, възврати́сѧ къ ѿц҃ꙋ свое҆мꙋ. и҆ сътворѝ е́й е҆ѳа́и по ѻ҆беща́нїю свое҆мꙋ, е҆ю́же сѧ ѻ҆беща̀. си́ же та́ко бы́сть не зна́ющи мꙋж́а.

40

И҆ бы́сть с̂е в зако́нъ въ і҆и҆л҃и ѿ го́да до го́да. и҆ съхожда́хꙋ дще́ри і҆и҆л҃евы да пла́чꙋтъ дще́ри ради е҆ѳа́евы галаа҆ди́тина. д҃, дн҃и въ лѣте·