Ostroh Bible❧Книга Суддів, розділ 9

1

И і́де а҆вимеле́хъ сн҃ъ і҆е҆ровоа́мль въ сикемъ, къ бра́тїи мт҃ре свое́ѧ. и҆ рече к ни́мъ и҆ къ всемꙋ̀ племе́ни до́мꙋ ѿц҃а мтр҃и свое҆ѧ гл҃юще·

2

Гл҃ите с̂е въ ѹ҆́ши всѣм꙽ мꙋжем̑ сиким̑скимъ, чт̂о бл҃жїе вамъ с̂е лѝ и҆же владѣти ва́ми, ѻ҃, мꙋж́ь вс̂и сн҃ове і҆е҆роваа́мли, и҆л̂и владѣти вам̑ мꙋж́ꙋ е҆ді́номꙋ, и҆ помѧни́те ꙗ҆́ко ко́сть ва́ша и҆ пло́ть ва́ша е҆смь а҆́зъ·

3

И҆ гл҃аша бра́тїа мт҃ри е҆го ѻ҆ немъ, въ ѹ҆́ши всѣ́хъ мꙋжь сике́м꙽скъ, вс̂ѧ словеса̀ с̂и. и҆ ѹ҆клони́сѧ срд̑це и҆х꙽ въ слд̑ѣ а҆вимеле́ха, реко́ша б̂о ꙗ҆ко бра́тъ на́шъ е҆сть·

4

И҆ даша е҆мꙋ ѻ҃, сребре́никъ ѿ до́мꙋ ваа́ла, фериѳа. и҆ наѧ̀ и҆́ми а҆вимеле́хъ мꙋже́въ млады́хъ и҆ лѣ́пыхъ. и҆ хожда́хꙋ въ слд̑ѣ е҆го·

5

И҆ прїиде в дом̑ ѿц҃а свое҆го въ е҆ѳра́ѳꙋ, і҆ избѝ бра́тїю свою сн҃ы е҆ровоа́левы, ѻ҃, мꙋжъ на ка́мени е҆ді́номъ. толико ѻ҆ста̀ і҆ѻ҆а҆ѳа́мъ сн҃ъ і҆ѻ҆ровоа́ль мнїи съкры́ бо сѧ·

6

И҆ собра́шасѧ вс̂и мꙋж́и сике́м꙽стїи. и весь до́мъ маа́ловъ. и҆ шед̑ше и҆ поста́виша а҆вимеле́ха цр҃емъ, ѹ҆ вала́нѧ ста́нꙋ и҆же в сики́мехъ·

7

И҆ повѣ́даша с̂е и҆ѻ҆а́ѳамꙋ. и҆ шед̑ ст̂а на вр́ъхъ горы̀ газири́н꙽. и҆ въздви́же гла́съ свои и҆ възва̀ рече и҆мъ. послꙋша́ите менѐ мꙋж́и сики́м꙽стїи, да и҆ васъ ѹ҆сли́шитъ б҃ъ·

8

И҆дꙋщ́и и҆до́ша дре́ва і҆и҆збра́ти себѣ̀ цр҃ѧ. и҆ рѣша масли́чинѣ бꙋ́ди нам̑ цр҃ь·

9

И҆ рече и҆мъ масли́чина. и҆л̂и ѻ҆ста́вивши сы́тость свою̀, е҆же въ мнѣ̀ просла́ви б҃ъ и҆ чл҃цы. да и҆дꙋ̀ владѣти древа́ми·

10

И҆ реко́ша древа̀ смо́кви, прїиди и҆ црс̑҇твꙋи над̑ на́ми·

11

И҆ рече им̑ смо́кви, ѻ҆ста́вивши свою сладость и҆ плод̑ сво́и бл҃гыи, да и҆дꙋ̀ владѣти древа́ми·

12

И҆ реко́ша древа̀ к виногра́дꙋ. прїиди и҆ бꙋ́ди нам̑ цр҃ь·

13

И҆ рече им̑ виноград̑ ѻ҆ста́вивши л̂и вино̀ свое и҆ весе́лїе члчс̑҇ко. да и҆дꙋ̀ владѣти древа́ми·

14

И҆ посем̑ реко́ша вс̂и древа̀ те́рьнїю. прїиди и҆ бꙋ́ди намъ цр҃ь·

15

И҆ реч̑҇ те́рнїе къ древам̑. а҆ще по и҆́стиннѣ и҆збира́ете себѣ цр҃ѧ менѐ. т̂о прїидѣте и҆ внїи́дѣте под̑ сѣ́нь мою̀. а҆ще ли же н̂и т̂о и҆зы́де ѻ҆́гнь и҆зъ те́рнїа и҆ попалит̑ вс̂ѧ ке́дры лива́нъскыѧ·

16

И҆ нн҃ѣ а҆́ще по и҆́стин꙽нѣ и҆ по съвръше́нїю творитѐ, поставлѧ́юще а҆вимеле́ха цр҃емъ. и҆ а́ще е҆сте добро̀ сътвори́ли съ і҆ѻ҆ровоа́мом̑ и҆ з до́момъ е҆го. и҆ а́ще по ѿда́нїи рꙋкы̀ е҆го сътвори́сте е҆мꙋ·

17

Поне́же вое҆ва̀ ѿц҃ъ мо́и по вас̑҇ и҆ дава́ше дш҃ꙋ свою проти́вꙋ. і҆ и҆зба́ви вас̑҇ ѿ рꙋкы̀ мадїа́млѧ·

18

Вы же въста́сте на до́мъ ѿц҃а мое҆го дне́сь, и҆зби́сте сн҃ове е҆го. ѻ҃, мꙋжъ на е҆ді́номъ ка́мени, и҆ поста́висте цр҃ем꙽ а҆вимеле́ха, сн҃а рабы̀ е҆го над̑ мꙋжи сики́мски ꙗ҆́ко бра́тъ ва́шъ е҆сть·

19

І҆ а́ще по и҆́стин꙽нѣ с̂е и҆ по соверше́нїи сътвори́сте, съ и҆е҆ровоа́ломъ и҆ до́мом̑ е҆го дне́сь, блс̑҇вени в̂ы бꙋ́дете и҆ весе́ли, ѻ҆ а҆вимеле́сѣ и҆ тои ѻ҆ ва́съ·

20

А҆ще ли же н̂и да и҆зы́иде ѻ҆́гнь и҆з꙽ а҆вимеле́ха и҆ попали́тъ мꙋжа сиким̑ски, и҆ до́мъ маа҆ло́нь и҆ посе́м꙽ да и҆зы́иде ѻ҆́гнь ѿ мꙋжъ сики́мских̑, и҆ ѿ до́мꙋ моа҆ло́нѧ, и҆ попалѝ а҆вимеле́ха·

21

И҆ ѿи҆́де и҆ѻ҆а҆ѳа́мъ и҆ пробѣже, і҆ и́де въ ви́рꙋ, и҆ всели́сѧ т̂ꙋ, ѿ лица̀ а҆вимеле́ха бра́та свое҆го·

22

И҆ ѻ҆блада̀ а҆вимеле́хъ въ і҆и҆л҃и, г҃ лѣта·

23

И҆ посла̀ б҃ъ дх҃ъ ѕол̑҇ межд̑ꙋ а҆вимеле́хом̑, и҆ междꙋ̀ мꙋжи сики́м꙽скими. и҆ погордѣш́а мꙋжѝ сики́мъстїи а҆вемеле́хомъ·

24

Ꙗ҆́ко да възы́детъ ѿмще́нїе. о҃, сн҃овъ и҆е҆ровоа҆и́ль. и҆ кро́ви их̑ да възло́жатъ на а҆вимеле́ха бра́та и҆хъ, и҆же ѹ҆би́въ и҆хъ. и҆ на мꙋжа сики́м꙽ски и҆же ѹ҆крѣпи́ша рꙋцѣ е҆го. ѹ҆би́ти бра́тїю свою·

25

И҆ поста́виша на́нь мꙋжи сики́мстїи под̑са́ды. на връсѣ́хъ го́рских̑. и҆ разграблѧ́хꙋ вс̂ѧ и҆дꙋщаѧ к ни́мъ на пꙋтѝ. и҆ повѣ́дахꙋ с̂е а҆вимеле́хꙋ·

26

И҆ по се́мъ прїиде гаа́лъ сн҃ъ а҆ве́довъ и҆ бра́тїа е҆го. и҆ прїидо́ша в꙽ сики́мꙋ. и҆ ѹ҆пова́ша на́нь мꙋжѝ сики́мстїи·

27

І҆ и҆зыдо́ша на село̀. и҆ ѻ҆бъи҆ма́ша виногра́ды своѧ̀. і҆ и҆згнета́хꙋ и҆ сътвори́ша ли́ки. и҆ ходи́ша въ хра́мъ бого́въ свои҆хъ. и҆ ꙗ҆́ша и҆ пи́ша, кленꙋще а҆вимеле́ха·

28

И҆ рече гаа́дъ сн҃ъ а҆ве́довъ. чт̂о е҆сть а҆вимеле́хъ. и҆л̂и чт̂о е҆сть сн҃ъ сꙋхе́мовъ, ꙗ҆́ко да рабо́тае҆мъ е҆мꙋ. нѣ́сть л̂и се́и сн҃ъ и҆е҆рова́ль, и҆ зеѹ҆́ль. и҆же е҆сть страж̑ е҆го да слꙋжим̑ лꙋ́чше мꙋжем̑ е҆мо́ра ѿц҃а сꙋхе́млѧ. и҆ почто и҆ма́мы рабо́тати е҆мꙋ·

29

И҆ ктоже с̂е да́сть да бꙋ́дꙋтъ лю́дїе сїи въ рꙋ́кꙋ мое҆ю. и҆ преставлю̀ а҆вимеле́ха, и҆ речѐ, къ а҆вимеле́хꙋ ѹ҆мно́жи си́лꙋ твою̀, і҆ и҆зы́иди·

30

И҆ ѹ҆слы́ша с̂е зеѹ҆́ль кнѧ́ѕь гра́да, словеса̀ гаа҆ла сн҃а а҆ве́дова. и҆ разгнѣ́васѧ ꙗ҆́ростїю·

31

И҆ посла̀ послы̀ къ а҆вимеле́хꙋ съ ле́стїю гл҃ѧ. с̂е гаа҆дъ сн҃ъ а҆ве́довъ, и҆ бра́тїа е҆го прїидо́ша в꙽ сики́мꙋ. и҆ сїи въставлѧ́ютъ на́ тѧ град̑·

32

И҆ нн҃ѣ въста́ни но́щїю т̂ы, и҆ вс̂и лю́дїе тво́и с тобо́ю. и҆ под̑сѣдѝ до заѹ҆́трїѧ ѹ҆ селѐ·

33

И҆ е҆гда̀ бꙋ́дет꙽ да́но, ꙗ҆́ко възы́дет̑ слн҃це, ѻ҆бꙋтрѣ́ю и҆ протѧгни́сѧ къ гра́дꙋ. и҆ а҆ще то́й са́мъ и҆ лю́дїе и҆же с ним̑ и҆зы́дꙋтъ к тебѣ. т̂о сътвори́ши е҆мꙋ ꙗ҆коже а҆́ще возмо́же рꙋка̀ твоѧ·

34

И҆ въста̀ а҆вимелех̑ и҆ вс̂и лю́дїе и҆же с ни́мъ но́щїю. и҆ под̑сѣдоша в сики́мѣ, на д҃, ча́сти·

35

И҆ бы́сть заѹ҆́тра і҆ и҆зы́де гаа́лъ сн҃ъ а҆ве́довъ. и҆ ст̂а пред̑ вра́ты гра́дꙋ. и҆ въста̀ а҆вимеле́хъ и҆ лю́дїе и҆же с ним̑ ѿ под̑са́ды·

36

И҆ видѣ̀ гаа҆л꙽ сн҃ъ а҆ве́дов̑҇ лю́ди. и҆ рече к꙽ зеѹ҆́лю. с̂е народ̑ людїи и҆схо́дитъ съ ве́рхъ го́рских꙽. и҆ рече к немꙋ зеѹ҆́ль, стѣ́ню дꙋбра́вы ты̀ ви́диши ꙗ҆ко мꙋжа·

37

И҆ приложѝ е҆щѐ гаа́лъ гл҃ати. и҆ рече се лю́ди и҆схо́дѧтъ ѿ высоты̀ землѧ̀. и҆ пол̑҇къ е҆ді́нъ и҆де́тъ ѿ пꙋтѝ дꙋбра́в꙽ска ви́дѧщимъ·

38

И҆ рече к немꙋ зеѹ҆́ль гдѣ сꙋтъ нн҃ѣ ѹ҆ста̀ твоѧ̀ гл҃щаа чт̂о е҆сть а҆вимеле́хъ да рабо́тае҆мъ е҆мꙋ. не се л̂и сꙋть лю́дїе ꙗ҆́же ты̀ ѹ҆корѝ. и҆зы́ди ѹ҆бо нн҃ѣ и҆ въполчи́сѧ проти́вꙋ е҆мꙋ·

39

І҆ и҆зы́де гаа́дъ пред̑ мꙋжи сиким̑ски, и҆ ста̀ проти́вꙋ а҆вимеле́хꙋ·

40

И҆ прогна̀ и҆̀ а҆вимеле́х꙽, ѻ҆́н꙽же пробѣгнꙋ ѿ лица̀ е҆го. и҆ падо́ша ꙗ҆зве́нїи мно́ѕи до вра́тъ град̑ных̑·

41

И҆ ѻ҆бита̀ а҆вимеле́хъ въ а҆ри́мѣ. зеѹ҆́ль же и҆згна̀ гаа́ла и҆ бра́тїю е҆го да не живꙋтъ в꙽ сихе́мꙋ·

42

И҆ бы́сть наѹ҆́трїѧ и҆зыдо́ша лю́дїе на́ поле. и҆ повѣ́даша а҆вимеле́хꙋ·

43

И҆ поѧ̀ лю́дїе и҆ раздѣлѝ на тр̂и ча́сти и҆ заста́ви под̑садꙋ на селѣ̀ и҆ ви́дѣ. и҆ с̂е лю́дїе и҆схожда́хꙋ и҆з гра́да. и҆ въста̀ на́ нѧ і҆ и҆збѝ и҆хъ·

44

А҆вимелех̑ же и҆ старѣ́ишины ꙗ҆́же с ни́мъ протѧго́шасѧ, и҆ ста́ша ѹ҆ вра́тъ гра́да. а҆ дв̂ѣ ча́сти пролїа́шасѧ на вс̂ѧ ꙗ҆же на селѣ̀ і҆ и҆збѝ ѧ҆̀·

45

А҆вимеле́х же добыва́ше гра́да ве́сь дн҃ь то́и, и҆ взѧ̀ гра́дъ и҆ лю́ди и҆же в не́мъ. и҆збѝ и҆ разори́ша гра́дъ и҆ посѣ́ѧ в꙽ не́мъ со́ль·

46

И҆ ѹ҆слы́шаша с̂е вс̂и мꙋжи столпа̀ сихе́млѧ и҆ внидо́ша въ тве́рдь до́мꙋ бога веѳи́ль вери́ѳъ·

47

И҆ повѣда́ша а҆вимеле́хꙋ, ꙗ҆́ко събра́шасѧ та́мо вс̂и мꙋжи столпа̀ сики́мска·

48

И҆ взы́де а҆вимеле́хъ в горꙋ̀ е҆л꙽моновꙋ. са́мъ и҆ вси лю́дїе и҆же с ни́мъ. и҆ взѧ̀ а҆вимеле́хъ секи́рꙋ в рꙋкꙋ свою и҆ ѹ҆сѣче сно́пъ вѣтвїѧ ѿ дре́ва. и҆ воздви́же и҆̀ и҆ положѝ на ра́мꙋ свою. и҆ рече лю́дем̑ и҆же с ни́мъ. чт̂о ви́дѣсте м̂ѧ творѧ́ща. сътвори́те и҆ вы̀ ско́ро ꙗ҆́коже і҆ а́зъ·

49

И҆ ѹ҆сѣко́ша вс̂и лю́дїе вѣтвїѧ, и҆ взѧ́ша и҆ пои҆до́ша въ слѣ́дъ а҆вимеле́ха. и҆ възложи́ша на тверди́ль. и҆ запали́ша ѻ҆́нѣхъ тверди́ль ѻ҆гне́мъ. і҆ и҆змро́ша вс̂и лю́дїе столпа̀ сики́м꙽ска до, ҂а҃. мꙋже́и и҆ женъ·

50

И҆ посе́мъ и҆́де а҆вимеле́хъ въ ѳиви́с꙽, и҆ ѻ҆бсѧ́де е҆го и҆ взѧ̀ е҆го·

51

Сто́лпъ же б̂ѣ тве́рдъ средѣ града и҆ вбѣгнꙋша т̂ꙋ вс̂и мꙋжа и҆ же́ны, и҆ вс̂ѧ старѣ́ишины гра́да. и҆ заключи́шасѧ сами же и҆ в꙽зыидо́ша на възгражде́нїе столпа̀·

52

И҆ прїиде а҆вимелехъ до столпа̀. и҆ сꙋпротиви́стасѧ е҆мꙋ. и҆ пристꙋпѝ а҆вимеле́хъ до вра́тъ столпꙋ̀, запали́ти е҆го хотѧ̀ ѻ҆гнемъ·

53

И҆ све́рже жена̀ е҆ді́на и҆зло́мок̑҇ жерно́вныи, на главꙋ̀ а҆вимеле́хꙋ. и҆ съкрꙋшѝ е҆мꙋ тѣмѧ·

54

И҆ възопѝ ско́ро а҆вимеле́хъ къ ѻ҆́трокꙋ носѧ́щемꙋ сосꙋды е҆го. и҆ рече е҆мꙋ и҆звлецѝ ме́чъ твои и҆ ѹ҆бїи мѧ. да не рекꙋт꙽ ꙗ҆́ко жена̀ ѹ҆бѝ е҆го. и҆ прободѐ и҆̀ ѻ҆́трокъ е҆го, и҆ ѹ́мре т̂ꙋ·

55

И҆ ви́дѣша мꙋжи і҆и҆л҃ьсти ꙗ҆́ко ѹ҆же ѹ҆́мре а҆вимелех̑. и҆ ѿи́де ко́иждо на свое мѣ́сто·

56

И҆ ѿда̀ б҃ъ ѕл̂о а҆вимеле́хꙋ ꙗ҆́же сътворѝ ѿцꙋ свое҆мꙋ. и҆же ѹ҆би́въ, ѻ҃. бра́тїѧ свое҆ѧ·

57

Та́коже и҆ вс̂ѧ ѕло́бы мꙋжїи сихе́мль, и ѿда̀ б҃ъ на главꙋ̀ и҆хъ. и҆ взы́иде на́ нѧ клѧ́тва. и҆ѻ҆а҆ѳе́ма, сн҃а і҆е҆рова́лѧ·