Ostroh BibleКнига Суддів, розділ 12
Шрифт:
Запис:
1
И събра́шасѧ мꙋж́и е҆фре́мли и҆ прїидо́ша въ сефи́нꙋ. и҆ рѣша къ е҆ѳа́е҆ви, почт̂о ходѝ въпол꙽чи́тисѧ на сн҃ы а҆м꙽монѧ. и҆ нас̑҇ не позва̀ и҆ти съ собо́ю. до́мъ твой с тобо́ю съж꙽жем꙽ ѻ҆гнемъ·
2
И҆ рече к ни́мъ е҆ѳа́и и҆мх̑ѣ прю̀ ве́лїю, и҆ лю́дїе моѝ съ сн҃ъми а҆м꙽мо́новыми и҆ ѻ҆скорби́ша менѐ и҆ лю́дїе моѝ ѕѣ́ло, а҆з же възва́хъ ва́съ и҆ не и҆зба́висте менѐ ѿ рꙋкꙋ и҆хъ·
3
И҆ ви́дѣхъ ꙗ҆ко не бѧ́ше сп҃саю҆щаго. и҆ положи́хъ дш҃ꙋ свою въ рꙋ́кꙋ мою̀. і҆ и҆до́хъ къ сн҃омъ а҆м꙽мо́нимъ. и҆ предастъ ѧ҆̀ г҃ь в рꙋ́кꙋ мою̀. въскꙋ́ю же прїидо́сте къ мнѣ днс̑҇е, въполчи́ти ли сѧ на́ мѧ·
4
І҆ и҆збра̀ и҆е҆ѳа́и вс̂и мꙋжа галаа́дъски, и҆ в꙽полчи́сѧ на е҆фре́ма. і҆ и҆зби́ша мꙋж́и галаа́дъстїи е҆фре́ма. поне́же гл҃ахꙋ ꙗ҆́ко бегꙋны̀ с̂е е҆фре́мови, в̂ы галаад̑ средѣ е҆фре́ма и҆ средѣ манасїѧ·
5
И҆ засѧ́де галаа́дъ прохо́ды с̂и ѹ҆ і҆е҆рда́на е҆фре́мови, и҆ бы́сть е҆гда̀ рѣша ѹ҆цѣлѣвшїи ѿ е҆фре́ма да мине́мъ. и҆ реко́ша и҆мъ мꙋж́и галаа́дъстїи. е҆да л̂и ѿ е҆фре́ма вы̀. и҆ рѣша нѣсмы·
6
И҆ рѣша им̑ рцѣте завт̑ѣ и҆ не ѹ҆пра́виша гл҃ати си́це, ѻ҆ни́же и҆ма́хꙋ и҆хъ и҆ закала́хꙋ ѹ҆ прехо́дъ і҆е҆рда́нихъ·
7
И҆ падо́ша в т̂о вре́мѧ ѿ е҆фре́ма. ҂м҃, и҆ двѣ ты́сѧщи·
8
И҆ сꙋдѝ і҆е҆ѳаи і҆ил҃еви, лт̑ѣ, ѕ҃. и҆ по се́мъ ѹ҆́мре и҆е҆ѳа́и галаа҆ди́тинъ. и҆ погребе́нъ быс̑҇ въ гра́дѣ свое҆мъ в꙽ галаа́дѣ·
9
И҆ сꙋдѝ по не́мъ і҆и҆л҃еви, е҆севон̑҇ ѿ виѳлеѻ́ма·
10
Се́и и҆мѧ́ше, л҃, сн҃овъ, и҆ л҃, дще́рїи ꙗ҆́же ѿда́лъ ѿ себѐ мꙋже́мъ, а҆ л҃, же́нъ. и҆ приведѐ сн҃омъ свои҆мъ и҆звнꙋ̀. и҆ сꙋдѝ і҆и҆л҃еви, з҃, лт̑ѣ·
11
Посе́мъ ѹ́мре е҆сево́нь, и҆ погребе́нъ бы́сть въ виѳлеѻ́мѣ·
12
И҆ сꙋдѝ по нем̑ і҆и҆л҃еви е҆лло́нъ заѹ҆ло́нъскїи. і҃, лт̑ѣ и҆ ѹ́мре е҆лло́нъ заѹ҆ло́нъскїи и҆ погребе́нъ въ е҆ли́ме въ землѝ заѹ҆ло́ни·
13
И҆ сꙋдѝ по не́мъ і҆и҆л҃еви, авдо́нъ сн҃ъ е҆лїе́ховъ фараѳони́тинъ·
14
Се́и и҆мѧше, м҃, сн҃овъ. а҆ л҃, внꙋковъ и҆же ꙗ҆здѧ́ше. на о҃, ѻ҆се́лъ. и҆ сꙋдѝ і҆и҆л҃еви. и҃, лѣтъ·
15
По сем̑ ѹ҆́мре а҆вдо́нъ сн҃ъ е҆лие́ховъ, фараѳони́тин̑҇ и҆ погребе́нъ бы́сть въ ѳараво́нѣ в꙽ землѝ е҆фре́мли, в꙽ горѣ а҆мали́ковѣ·
Джерела
