Ostroh Bible❧Книга Суддів, розділ 13

1

И приложи́ша е҆щѐ сн҃ове і҆и҆л҃ви творити ѕл̂о пред̑ гм҃ъ, и҆ преда́ ѧ҆̀ в рꙋ́кꙋ филистим̑скꙋ, м҃, лт̑ѣ·

2

И҆ бѧ́ше мꙋж́ъ въ а҆ѱа́рѣ ѿ племе́ни да́нова и҆мѧ́ же е҆мꙋ мано́е. и҆ жена̀ е҆мꙋ бѧ́ше непло́ды и҆ не ражд̑аа́ше·

3

И҆ ꙗ҆ви́сѧ а҆гг҃лъ гн҃ь къ женѣ̀, и҆ рече к не́и. с̂е ѹ҆бо т̂ы непло́ды и҆ не ро́ди, с̂е б̂о зачне́ши и҆ роди́ши сн҃ъ·

4

И҆ нн҃ѣ снабдѝ ѹ҆бо. не пїи вина̀ н̂и сике́ра, и҆ не ꙗ҆́жъ нечи́ста ничто́же·

5

Ꙗ҆́ко с̂е ты̀ въ ѹ҆тро́бѣ прїи́меши и҆ породи́ши сн҃ъ, и҆ желѣ́зо на гла́вꙋ е҆го не възы́идетъ, ꙗ҆́ко назире́и бв҃и бꙋдет̑ с̂е, ѻ҆тро́ча ѿ чре́ва. и҆ се́и начне́тъ спс̑҇ти і҆и҆л҃ѧ и҆з рꙋкѝ и҆ноплеме́н꙽ник꙽·

6

И҆ вни́де жена̀ и҆ рече мꙋж́еви свое҆мꙋ гл҃юще, чл҃къ бж҃їи прїиде къ мнѣ̀ и ѻ́бразъ е҆го ꙗ҆́ко ѻ҆́бразъ а҆гг҃ла бж҃їа стра́шенъ ѕѣ́ло, и҆ въпраша́хъ е҆го ѿкꙋ́дꙋ е҆си, і҆ и́мени свое҆го не повѣ́да м̂и·

7

И҆ речѐ м̂и с̂е ты̀ въ ѹ҆тро́бѣ зачне́ши, и҆ роди́ши сн҃ъ. и҆ нн҃ѣ не пїи вина̀ ни ѻ҆лови́ны и҆ не ꙗ҆́жъ н̂ичто́же нечи́ста. ꙗ҆́ко назире́ѻ҆нъ б҃ꙋ бꙋ́детъ ѻ҆тро́чищъ, ѿ ѹ҆тро́бы до дн҃е смр҃ти е҆го·

8

И҆ помоли́сѧ мано́е къ гв҃и. и҆ рече ѽ г҃и. чл҃къ бж҃їи е҆го́же посла̀ мано́евы, и҆ прїиде па́ки а҆гг҃лъ бж҃їи к꙽ женѣ̀. сїа же сѣдѧ́ще на селѣ̀, мано́е же мꙋж́ъ е҆ѧ̀ не бѧ́ше с не́ю·

9

И҆ пот꙽ща́сѧ жена̀ и҆ те́кши ско́ро повѣда̀ мꙋж́ꙋ свое҆мꙋ, и҆ рече к немꙋ. с̂е ꙗ҆ви́сѧ м̂и мꙋжъ, и҆же приходѝ въ дн҃ь ѻ҆́нъ къ мнѣ̀·

10

И҆ въставъ и҆́де мано́е въ слд̑ѣ жены̀ свое҆ѧ и҆ прїиде к мꙋж́ꙋ, и҆ рече е҆мꙋ. ты л̂и е҆си мꙋж́ъ гл҃авыи къ женѣ̀ мое́и, и҆ рече а҆гг҃лъ а҆́зъ е҆смь·

11

И҆ рече мано́е нн҃ѣ ѹ҆бо да прїидетъ сло́во твое чт̂о е҆сть сꙋ́дъ ѻ҆троча́те, и҆ чт̂о е҆сть творе́нїе е҆го·

12

И҆ рече а҆гг҃лъ гн҃ь к꙽ мано́еви. ѿ сего̀ е҆же гл҃ах̑ женѣ̀ да съхрани́тсѧ ѿ всего̀·

13

И҆ ѿ всего̀ и҆же и҆схо́дитъ и҆з виногра́да да не ꙗ҆́сть и҆ вина̀ и҆ сике́ра да не пїе́тъ, и҆ всего̀ нечи́ста да не ꙗ҆́сть, и҆ вс̂е е҆ли́ко заповѣ́дахъ сїе да снабди́тъ·

14

И҆ рече мано́е къ а҆гг҃лꙋ бж҃їю, да т̂ѧ понꙋди́мъ, и҆ сътвори́мъ пред̑ тобо́ю ко́злище ѿ ко́зъ·

15

И҆ рече а҆гг҃лъ бж҃їи к꙽ мано́еви, а҆́ще м̂ѧ нꙋ́диши и҆ не ꙗ҆́м꙽ хлѣ́ба твое҆го, н̂о а҆́ще сътвори́ши вс̂есъж꙽же́нїе гв҃и, т̂о възнеси е҆̀. не вѣ́дѧше б̂о мано́е ꙗ҆́ко а҆гг҃лъ гн҃ь ес̑҇·

16

И҆ реч̑҇ мано́е къ а҆гг҃лꙋ гн҃ю чт̂о ти е҆сть имѧ твое да е҆гда̀ събꙋдет̑сѧ сло́во твоѐ просла́вим̑ тѧ·

17

И҆ реч̑҇ е҆мꙋ а҆гг҃лъ гн҃ь почто̀ с̂е въпраша́еши и҆́мени мое҆го с̂е же е҆сть чю́дно·

18

И҆ взѧ̀ мано́е ко́злищъ ѿ ко́зъ и҆ тре́бꙋ, и҆ възнесѐ на ка́мень гв҃и. и҆ сътвори чю́дно·

19

Мано́и же и҆ жена̀ е҆го гледѣ́ста·

20

И҆ быс̑҇ е҆гда̀ пла́мы взы́иде вы́ше ѻ҆лтарѧ̀ до нб҃се. и҆ взы́иде а҆гг҃лъ гн҃ь въ пла́мени ѻ҆лтарѧ̀ мано́е же и҆ жена̀ е҆го смотрѧ́ста, и҆ падо́ста ни́цъ на зем̑лѝ·

21

И҆ не приложѝ к꙽ семꙋ а҆гг҃лъ гн҃ь ꙗ҆ви́тис̑҇ мано́еви и҆ женѣ̀ е҆го, тогда̀ ѹ҆вѣ́дѣ мано́и ꙗ҆́ко а҆гг҃лъ гн҃ь е҆сть·

22

И҆ рече мано́и къ женѣ̀ свое́и, смр҃тїю ѹ҆мревѣ, ꙗ҆́ко б҃а видѣховѣ·

23

И҆ рече е҆мꙋ жена̀ е҆го, а҆́ще бы хотѣ́лъ б҃ъ ѹмр҃твити на́ю т̂о не бы̀ взѧ́лъ ѿ рꙋ́ки на́ю вс̂есъж꙽же́нїѧ и҆ тре́бы. и҆ не бы̀ показа́лъ на́ма сего̀ всего̀·

24

И҆ не бы̀ слы́шано с̂е сътвори́лъ на́мъ и зача жена̀ и҆ родѝ сн҃ъ и҆ нарече и҆́мѧ е҆мꙋ самѱо́нъ, и҆ възмо́же ѻ҆тро́ча и҆ блс̑҇ви е҆̀ б҃ъ·

25

И҆ нача́тъ дх҃ъ гн҃ь ходи́ти с ни́мъ, и҆ въ по́лцѣ да́новѣ средѣ сараа́ка, и҆ сре́дѣ е҆сѳеѻ҆́ла·