Ostroh Bible❧Книга Суддів, розділ 14

1

По се́мъ и҆́де сам꙽ѱо́нъ въ ѳам̑наѳа, и҆ ви́дѣ женꙋ̀ въ ѳамнаѳѣ ѿ дще́рїи филистим̑ских̑, и҆ годѣ бы́сть пред̑ ним̑·

2

И҆ взы́иде повѣ́да ѿц҃ꙋ свое҆мꙋ и мтри свое́и, и҆ рече, женꙋ ви́дѣхъ въ ѳамна́ѳѣ ѿ дще́рїи филисти́мль, и҆ нн҃ѣ пои҆мѣте ю҆̀ мн̂ѣ въ женꙋ̀·

3

И҆ рече е҆мꙋ ѿц҃ъ е҆го и҆ мт҃и е҆го е҆да нѣсть дще́ри ѿ бра́тїѧ твое́а и҆ ѿ всѣхъ людїи мои҆хъ жены̀, ꙗ҆ко т̂ы хощеши поѧ́ти женꙋ̀ ѿ дще́рїи и҆ноплеме́н꙽никъ неѻ҆брѣзаныхъ. и҆ рече сам̑ѱо́нъ къ ѿц҃ꙋ свое҆мꙋ, т̂ꙋ м̂и пои҆мѝ. ꙗ҆́ко та̀ м̂и ѹ҆го́дна е҆сть пред̑ ѻ҆чи́ма мои҆ма·

4

ѿц҃ъ же е҆го и҆ ма́ти е҆го не разꙋмѣша ꙗ҆ко с̂е ѿ г҃а е҆сть, ꙗ҆́ко вины̀ взы́щетъ ѿ ѳилисти́млѧнъ. в т̂о бо вре́мѧ владѧ́хꙋ ѳилисти́ни сн҃ы і҆и҆л҃евыми·

5

И҆ сни́де самѱо́н꙽ и҆ ѿц҃ъ е҆го и҆ ма́ти е҆го въ ѳамна́ѳа. и҆ прїидо́ша до виногра́да ѳамна́ѳы, и҆ с̂е льви́чищъ ревы́и проти́вꙋ е҆мꙋ·

6

И҆ сни́де нань дх҃ъ гн҃ь и҆ въсхитѝ льва̀ и҆ растерза̀ и҆̀, ꙗ҆́ко ко́злищъ. и҆ ничто́же не и҆мѣа́ше в рꙋкꙋ свое́ю. и҆ не повѣда̀ ѿц҃ꙋ с̂и и҆ мт҃ри е҆же сътворѝ·

7

И҆ посе́м꙽ и҆́де и҆ гл҃а съ жено́ю. и҆ ѹ҆го́дно пред̑ ѻ҆чи́ма самѱо́нꙋ·

8

И҆ възврати́сѧ по дн҃ехъ поꙗ҆́ти ю҆̀. и҆ съврати́сѧ ви́дѣти трꙋпъ льво́въ. и҆ с̂е ро́и пче́лъ въ ѹ҆стѣхъ льво́выхъ и҆ ме́дъ·

9

І҆ и҆зѧ̀ и҆̀ ѿ ѹ҆стъ льво́въ на́ рꙋкꙋ свою, і҆ и҆ды́и и҆дѧ́ше и҆ ꙗ҆́ды́и. і҆ и́де къ ѿц҃ꙋ свое҆мꙋ и҆ мт҃ри свое́и. и҆ да́сть и҆́ма и҆ ꙗ҆́ста. н̂о не повѣда и҆́ма ꙗ҆́ко ѿ трꙋ́па льво́ва в꙽зѧ̀ сїи ме́дъ·

10

И҆ сни́де ѿц҃ъ е҆го к невѣ́сте, и҆ сътворѝ самѱо́нъ та́мо пи́ръ. з҃. дн҃їи. ꙗ҆ко та́ко тво́рѧтъ ю҆́ноты·

11

И҆ быс̑҇ е҆гда нача́ша боꙗ҆́тисѧ е҆го, приста́виша к немꙋ̀. л҃, дрꙋговъ. и҆ бѧ́хꙋ с ни́мъ·

12

И҆ рече им̑ самѱо́нъ, да вы̀ пред̑ложꙋ нн҃ѣ гада́нїе. и҆ а҆ще ѿгада́ю҆ще сповѣ́дите мн̂ѣ. въ з҃. дн҃їи пирꙋ сего. т̂о да́мъ вы̀, л҃. по́нѧв꙽ и҆, л҃, ри́зъ и҆змѣн꙽ны·

13

И҆ а҆ще л̂и не мо́жете и҆сповѣ́дати мн̂ѣ. т̂о дасте вы̀ мн̂ѣ, л҃, по́нѧвъ. и҆ л҃, ри́зъ и҆змѣн꙽ны·

14

И҆ реко́ша е҆мꙋ пред̑ложѝ гада́нїе твое да слы́шимъ и҆̀. и҆ гл҃а и҆мъ ѿ ꙗ҆дꙋщаго ꙗ҆до́мое и҆зы́иде. и҆ ѿ крѣпкаго и҆зы́иде слад̑кость, и҆ не мого́ша и҆сповѣдати гада́нїѧ, до трехъ дн҃їи·

15

И҆ бы́сть въ дн҃ь четве́ртыи и҆ бы́сть е҆гда приближа́шесѧ дн҃ь се́дмыи, реко́ша женѣ̀ сам̑ѱо́новѣ. прельстѝ ѹ҆бо мꙋжа свое҆го да ти повѣсть гада́нїе с̂е хо́щеши л̂и да не съж꙽жемъ т̂ѧ и҆ до́мъ ѿц҃а твое҆го. ѻ҆ѹ҆бо́жати л̂и съзва́сте ны̀ здѐ·

16

И҆ пла́касѧ жена̀ сам꙽ѱо́нова к сам꙽ѱо́нꙋ мꙋжꙋ свое҆мꙋ. и҆ рече почто ненави́диши менѐ. и҆ не възлюби́лъ е҆си мене ꙗ҆́ко гада́нїе е҆же е҆си пред̑ложил̑҇ сн҃омъ людїи мои҆хъ. и҆ не повѣда е҆го мн̂ѣ. и҆ рече е́й сам꙽ѱо́нъ с̂е ѿц҃ꙋ свое҆мꙋ и҆ мт҃ри свое́и не повѣ́дахъ сего. а҆ тебѣ л̂и и҆́мамъ повѣдити·

17

И҆ пла́касѧ к немꙋ̀, з҃, дн҃їи в нѧ́же б̂ѣ и҆мъ пи́ръ. и҆ бы́сть въ дн҃ь з҃, и҆ повѣда е́и ꙗ҆́ко стꙋжѝ е҆мꙋ вельмѝ. си́ же скоро повѣда сн҃омъ людїи своих̑.

18

И҆ реко́ша е҆мꙋ мꙋжи град̑стїи въ дн҃ь се́дмыи. прежде зашествїѧ сл҃нцꙋ чт̂о слад̑ше ме́дꙋ, чт̂о л̂и крѣплѣи льва̀. и҆ рече и҆мъ самѱо́нъ. а҆ще не бысте принꙋ́дили ю҆́ница мое́ѧ. т̂о не бы́сте ѹ҆вѣ́дали гада́нїѧ мое҆го·

19

И҆ падѐ нань дх҃ъ гн҃ь. и҆ сни́де въ а҆сколо́нꙋ. і҆ и҆збѝ тамо. л҃, мꙋжъ и҆ взѧ̀ ри́зы и҆хъ. и҆ дасть и҆̀ повѣдавшимъ гада́нїе. и҆ разгнѣвасѧ ꙗ҆́ростїю сам꙽ѱо́нъ, и҆ взы́де в дом̑ ѿц҃а свое҆го·

20

Жена́ же самѱо́нова и҆́де за и҆ныи мꙋжъ и҆же бы́сть е҆ді́нъ ѿ дрг̑҇ꙋ е҆го пи́рныхъ·